போதையால் ஏற்பட்ட விபத்து; பணம், நகை, ஆயுதங்களுடன் மக்களிடம் சிக்கிய பலே திருடன்!

புதுக்கோட்டை மாவட்டம் கீரமங்கலம் அருகில் உள்ள கொத்தமங்கலத்தைச் சேர்ந்த 4 பேர், ஆலங்குடியில் இருந்து ஒரு காரில் கொத்தமங்கலம் வந்து கொண்டிருந்த போது எதிரே பைக்கில் வந்த இளைஞர்கள் கார் மீது மோதிவிட்டு காரில் உள்ளவர்களை பாரைக் கம்பியால் குத்த முயன்றுள்ளனர். அப்போது, காரில் இருந்தவர் சுதாரித்து கீழே இறங்கி ஒருவனை மடக்கி பிடிக்க மற்ற இருவர் பேக்குகளுடன் ஓடிவிட்டனர்.

பிடிபட்ட இளைஞஞனை அப்பகுதி மக்கள் கவனித்து விசாரிக்க, தான் சூரன்விடுதி கிருஷ்ணமூர்த்தி மகன் பாவா என்கிற லெனின் என்று கூறி, ‘போதையில தெரியாம செஞ்சுட்டோம், விட்ருங்க போயிடுறேன்’ என்று கெஞ்சியுள்ளார். அந்த நேரத்தில் அவரிடம் இருந்த பேக்கை திறந்து பார்த்த போது மக்கள் அதிர்ச்சியடைந்துள்ளனர். பேக் நிறைய பணம், தங்க நகைகள், வெள்ளி கொலுசுகள், வெள்ளி அரணாக்கள், வெளிநாட்டு காயின்கள், செல்போன்கள், விலை உயர்ந்த கை கடிகாரங்கள், எஸ்.எல்.ஆர் கேமராக்கள், பூஜை தட்டுகள், பூட்டு உடைக்க திருப்புழி, கடப்பாறை கம்பிகள் என ஏரானமான பொருட்கள் கிடந்துள்ளது. இதனை பார்த்ததும் பிடிபட்டிருப்பது திருடன் என்று தெரியவந்தது.

இதையடுத்து, இந்த சம்பவம் தொடர்பாக கீரமங்கலம் காவல் நிலையத்திற்கு தகவல் கொடுத்துள்ளனர். அதன்படி கீரமங்கலம் போலீசார், சம்பவ இடத்திற்குச் சென்று பாவா லெனினை பொதுமக்களிடம் இருந்து மீட்டு விசாரனை நடத்தினர். அதில், பாவா லெனின் மீது ஆலங்குடி காவல் நிலையத்தில் மட்டும் கொலை முயற்சி 3 வழக்குகள், ஏடிஎம் உடைப்பு உள்பட 2 வழக்குகள் என 5 வழக்குகள் உள்ளது. சரித்திரபதிவேடு குற்றவாளியான பாவா லெனின், கடந்த ஆண்டு குண்டர் தடுப்புச் சட்டத்தில் சிறையில் அடைக்கப்பட்டு சில மாதங்களுக்கு முன்பு வெளியே வந்துள்ளார். மேலும், சரித்திரப் பதிவேட்டு ரவுடிகளான ஆலங்குடி கம்பர் தெருவைச் சேர்ந்த ராசு மகன் விஜயமார்த்தாண்டன், மற்றும் மாத்தூரில் தன் நண்பனையே திருமணத்திற்கு முதல் நாள் கொன்ற ராப்பூசல் கிராமத்தைச் சேர்ந்த மாத்தூர் அண்ணாநகரில் வசிக்கும் பழனியாண்டி மகன் பாலு (எ) பாலமுத்து ஆகியோர் பெயர்களை தன் நெஞ்சில் பச்சை குத்தி அவர்கள் தனது ஆசான்கள் என்று பாவா லெலினி கூறி கொண்டு வந்ததாகக் கூறப்படுகிறது.

பாவா லெனின் கூட மேலும் சில இளைஞர்கள் கூட்டாக சேர்ந்து வெளியூர்களில் திருடி பங்கு வைத்துக் கொள்வது வழக்கம். அப்படி இவருக்கு கிடைத்த பங்கு தான் இவர் பேக்கில் உள்ள பணம், நகை உள்ளிட்ட பொருட்கள் என்று தெரியவந்துள்ளது. திருடிய இடத்தில் எல்லாம் சிக்காமல் போதையில் காரில் மோதி சிக்கிக் கொண்ட திருடனை தனிப்படைப் போலிசார் விசாரனை செய்து வருகின்றனர். மேலும் தப்பி ஓடியவர்களையும் பிடித்து விசாரித்தால் நேற்று இரவு நடந்த கலீப் நகர் சம்பவத்திலும் இவர்களுக்கு தொடர்பு உண்டா என்பது தெரிய வரும் என்று கூறப்படுகிறது.