“எந்த கருத்து வேறுபாடுகளும் இல்லை” - டி.கே. சிவக்குமாருடனான சந்திப்புக்குப் பிறகு சித்தராமையா பேட்டி!

கர்நாடக மாநிலத்தில் முதல்வர் பதவிக்கு அம்மாநில முதல்வர் சித்தராமையா, துணை முதல்வர் டி.கே. சிவகுமார் ஆகிய இருவருக்கும் இடையே போட்டி தீவிரமடைந்துள்ளதாக கூறப்படுகிறது. இது தொடர்பாக இருவரிடமும், சமரசம் பேச காங்கிரஸ் கட்சியின் தலைமை டெல்லிக்கு அழைத்துள்ளது. இந்நிலையில் முதல்வர் சித்தராமையாவுடன், துணை முதல்வர் டி.கே. சிவகுமார் காலை உணவுடன் கூடிய சந்திப்பு பெங்களூருவில் இன்று (29.11.2025) நடைபெற்றது. 

இந்த சந்திப்புக்குப் பிறகு, துணை முதல்வர் டி.கே. சிவகுமார் செய்திகாளர்களைச் சந்தித்து பேசுகையில், “ஆட்சியில் யார் தலைமை வகிப்பது தொடர்பான பிரச்சினையைப் பொறுத்தவரை, நாங்கள் எங்கள் (காங்கிரஸ்) கட்சியின் உயர்நிலை குழுவினரின் முடிவுகளைப் பின்பற்றுகிறோம். அவர்கள் என்ன சொன்னாலும், அது தான் எங்கள் முடிவு. நாங்கள் கட்சியின் விசுவாசமான வீரர்களாக இருந்துள்ளோம். நாட்டில் காங்கிரஸ் கட்சி கடினமான சூழலைச் சந்தித்து வருகிறது என்பதை நாங்கள் அறிவோம். ஆனால் அதனைச் சமாளிக்க கர்நாடகா ஒரு முக்கிய பங்கை வகிக்கும். 

2028இல் மீண்டும் ஆட்சி அமைப்போம். 2029இல் மல்லிகார்ஜுன் கார்கே மற்றும் ராகுல் தலைமையில் முன்னேறுவோம் என்று நாங்கள் நம்பிக்கையுடன் இருக்கிறோம். நாங்கள் (முதல்வர் சித்தராமையா) ஒன்றாக இணைந்து பணியாற்றியுள்ளோம். கர்நாடக மக்கள் எங்களுக்கு மிகப்பெரிய உத்தரவை வழங்கியுள்ளனர். கர்நாடக மக்களுக்கு நாங்கள் அளித்த அனைத்து வாக்குறுதிகளையும் நிறைவேற்றுவது எங்கள் பொறுப்பு. 2028ஆம் ஆண்டு நடைபெற உள்ள சட்டமன்றத் தேர்தலுக்கான எங்கள் உத்தி மற்றும் எதிர்க்கட்சிகளை எவ்வாறு கையாள்வது என்பது குறித்து இன்று விவாதித்தோம். 

எதிர்க்கட்சியினர் பல பிரச்சினைகளை எழுப்ப முயற்சிக்கலாம். நாங்கள் பதிலளிக்கத் தயாராக இருக்கிறோம். உங்களுடைய அனைவரின் ஆதரவுடன், நாங்கள் காங்கிரஸ் அரசாங்கத்தைக் கொண்டு வந்துள்ளோம். எங்கள் வாக்குறுதியின்படி செயல்பட்டு வருகிறோம். அதற்கு மாநில மக்கள் தங்கள் முழு ஆதரவை வழங்கி வருகின்றனர். அவர்களின் விருப்பங்களை நாங்கள் நிறைவேற்ற வேண்டும். அந்த பாதையில் நாங்கள் செயல்பட்டு வருகிறோம். கட்சியின் உயர்நிலை குழு என்ன சொல்கிறதோ, அதை நாங்கள் பின்பற்றுவோம். எங்களுக்குள் எந்தப் பிரிவும் இல்லை. இப்போதும் நாங்கள் ஒன்றிணைந்து செயல்படுகிறோம். முதல்வர் என்ன சொன்னாரோ அதன்படி செயல்படுகிறேன். 

நான் முதல்வருடன் இருக்கிறேன். நாங்கள் ஒன்றிணைந்து செயல்படுகிறோம். நம்பிக்கையில்லா தீர்மானத்தைப் பொறுத்தவரையில், அவர்கள் கொண்டு வரட்டும். நாங்கள் சட்டமன்றத்தையும் அரசாங்கத்தையும் நடத்தும் திறன் கொண்டவர்கள். நாங்கள் அதனை செய்வோம்” எனப் பேசினார். மேலும் சித்தராமையா கூறுகையில், “எங்கள் ஒற்றுமை தொடரும். நாங்கள் ஒன்றாக இருக்கிறோம்; ஒன்றுபட்டுள்ளோம். எங்களுக்குள் எந்த கருத்து வேறுபாடுகளும் இல்லை. கட்சியின் உயர்நிலை குழுவினர் என்ன முடிவு எடுத்தாலும், அதற்கு நாங்கள் இருவரும் கீழ்ப்படிவோம். டி.கே. சிவகுமாருக்கும், எனக்கும் எந்த வேறுபாடும் இல்லை. அவர்கள் (பா.ஜ.க. மற்றும் ஜே.டி.எஸ்.) நம்பிக்கையில்லா தீர்மானம் கொண்டு வரப்படாது என்று கூறுகிறார்கள். ஒருவேளை கொண்டுவந்தால் நாங்கள் அதை எதிர்கொள்வோம்” எனத் தெரிவித்தார்.