Skip to main content

மது போதையில் அடித்துக் கொல்லப்பட்ட இளைஞர்; போலீசார் விசாரணையில் அதிர்ச்சி

Published on 17/08/2023 | Edited on 17/08/2023

 

Youth beaten to under the influence of alcohol; Shocked by the police investigation

 

மது போதையில் ஏற்பட்ட வாய் தகராறில் இளைஞர் ஒருவர் அடித்துக் கொலை செய்யப்பட்டு புதைக்கப்பட்ட சம்பவம் பொள்ளாச்சியில் பரபரப்பை ஏற்படுத்தி இருக்கிறது.

 

கோவை மாவட்டம் பொள்ளாச்சி நேதாஜி சாலையில் வசித்து வந்தவர் அருண்கார்த்திக். கடந்த பத்தாம் தேதி வெளியே சென்ற அருண்கார்த்திக் மீண்டும் வீடு திரும்பாததால் பெற்றோர்கள், உறவினர்கள் பல இடங்களில் தேடினர். எங்கு தேடியும் அவர் கிடைக்காததால் காவல் நிலையத்தில் புகார் கொடுக்கப்பட்டது. போலீசார் இது தொடர்பாக விசாரணை மேற்கொண்ட நிலையில் அருண் கார்த்திக் சக நண்பர்களான சூரிய பிரகாஷ், அரவிந்த் ஆகிய இரண்டு பேரைப் பிடித்து போலீஸார் விசாரணை நடத்தினர். ஆனால், விசாரணையில் அவர்கள் தங்களுக்கு எதுவும் தெரியாது என சொல்லிவிட்டனர். அதனால் போலீசாரும் அவர்களை விட்டுவிட்டனர். தொடர்ந்து அருண்கார்த்திக்கின் செல்போன் சிக்னலை வைத்து போலீசார் விசாரணை நடத்தினர். அதன்பிறகு மீண்டும் அதே நண்பர்கள் இருவரையும் பிடித்து கிடுக்குப்பிடியாக விசாரித்ததில் பணம் கொடுக்கல் வாங்கல் பிரச்சனையில் அருண்கார்த்திகை கொலை செய்தது தெரிய வந்தது.

 

மது அருந்துவதற்காக அருண்கார்த்திக்கை அழைத்துச் சென்ற இருவரும், அவரை தாக்கியுள்ளனர். இந்த சம்பவத்தில் உயிரிழந்த அருண் கார்த்திக்கின் உடலை உடனே அருகில் உள்ள கல்குவாரி பகுதியில் சூரிய பிரகாஷ், அரவிந்த் ஆகிய இருவரும் புதைத்துள்ளனர். மோப்பநாய் உதவியுடன் அருண்கார்த்திக்கின் உடலை போலீசார் கண்டுபிடித்துள்ளனர். பணம் கொடுக்கல் வாங்கல் பிரச்சனையில், சக நண்பர்களாலேயே இளைஞர் அடித்துக்கொலை செய்யப்பட்ட சம்பவம் அங்கு பரபரப்பை ஏற்படுத்தியுள்ளது. 

 

சார்ந்த செய்திகள்

 

Next Story

நண்பனின் மனைவியுடன் திருமணத்தை மீறிய உறவு; கொடூரமாகக் கொல்லப்பட்ட கணவர்

Published on 24/06/2024 | Edited on 24/06/2024
 youth incident his friend near Ponneri

திருவள்ளூர் மாவட்டம் பொன்னேரி வட்டத்திற்கு உட்பட்ட சின்னக்காவனம் கிராமத்தைச் சேர்ந்தவர் சரித்திர பதிவேடு குற்றவாளியான லக்ஷ்மணன். பல்வேறு குற்ற வழக்குகளில் தொடர்புடைய இவருக்கும், மீஞ்சூரை அடுத்த தோட்டக்காடு கிராமத்தைச் சேர்ந்த பிரபல ரவுடியான விஷ்ணு என்பவருக்கும் சென்னை புழல் நடுவன் சிறையில் இருந்தபோது, இருவருக்கும் இடையே ஏற்பட்ட நட்பு இருவரும் சிறையில் இருந்து வெளியில் வந்த பின்னரும் தொடர்ந்துள்ளது.

இந்த நிலையில் லட்சுமணனின் மனைவியுடன் விஷ்ணுவிற்கு திருமணத்தை மீறிய உறவு இருந்ததாகக் கூறப்படுகிறது. இதனை அறிந்து பலமுறை இருவரையும் ஏற்கெனவே லட்சுமணன் கண்டித்த நிலையில் நேற்று இரவு லாவகமாக விஷ்ணு லட்சுமணனை தனது சொந்த ஊரான தோட்டக்காடு அழைத்துச் சென்று மது வாங்கி கொடுத்துள்ளார். திருமணத்தை மீறிய உறவுக்கு இடையூறாக இருந்த லட்சுமணனை நண்பர்களுடன் சேர்ந்து விஷ்ணு சரமாரியாக வெட்டி கொலை செய்துவிட்டு அங்கிருந்து தப்பி சென்றுள்ளார்.

இது குறித்து தகவல் அறிந்து சம்பவ இடத்திற்கு சென்ற மீஞ்சூர் காவல்துறையினர் உடலைக் கைப்பற்றி உடற்கூறு ஆய்வுக்காக சென்னை ஸ்டான்லி மருத்துவமனைக்கு அனுப்பி வைத்தனர். இது குறித்து வழக்கு பதிவு செய்த போலீசார் கொலை செய்துவிட்டு தலைமறைவாக இருக்கும் விஷ்ணு உள்ளிட்ட ஐந்து பேரை தேடி வருகின்றனர். மனைவி உடனான திருமணத்தை மீறிய உறவை தட்டிக் கேட்ட சரித்திர பதிவேடு குற்றவாளியை நண்பனே வெட்டி கொலை செய்த சம்பவம் அப்பகுதியில் பரபரப்பை ஏற்படுத்தி உள்ளது

Next Story

நிலத்தைச் சமன் செய்துகொண்டிருந்த ஜே.சி.பி கொழுந்து விட்டு எரிந்த சம்பவம்!

Published on 24/06/2024 | Edited on 24/06/2024
incident of JCB burning while leveling the land

கிருஷ்ணகிரி மாவட்டம் கதவணி பகுதியைச் சேர்ந்தவர் சோனாச்சலம். இவரின் மகன் சிவராமன்(38). இவருக்கு சொந்தமாக ரூ.20 லட்சம் மதிப்பிலான ஜேசிபி உள்ளது. இவர் திருப்பத்தூர் மாவட்டம் குரிசிலாப்பட்டு அடுத்த ஜொள்ளகவுண்டனூர் பகுதியைச் சேர்ந்த சேகர் என்பவருக்கு சொந்தமான ஒரு ஏக்கர் அளவிலான நிலத்தை சமன் செய்ய வந்துள்ளார். நிலத்தை சமன் செய்து கொண்டிருந்தபோது ஜேசிபியில்  இருந்த பேட்டரியின் மூலம் மின்கசிவு  ஏற்பட்டு டீசல் டேங்க் மற்றும் சக்கரத்தில் தீ பற்றி தகதகவென கொழுந்து விட்டு எரியத்தொடங்கியது.

இது குறித்து சிவராமன் திருப்பத்தூர் தீயணைப்பு துறையினருக்கு தகவல் தெரிவித்தார் பின்னர் விரைந்து வந்த தீயணைப்பு துறையினர் தீயை அணைத்தனர். அதற்குள் ஜேசிபி முழுவதும் தீப்பற்றி எரிந்ததால் எலும்பு கூடாக காட்சியளித்தது. இந்தச் சம்பவம் குறித்து குரிசிலாப்பட்டு போலீசார் வழக்கு பதிவு செய்து விசாரணை மேற்கொண்டு வருகின்றனர்.

நிலத்தை சமன் செய்ய சென்ற இடத்தில் ஜேசிபியில் இருந்த பேட்டரியில் மின் கசிவு காரணமாக ஜேசிபி எரிந்து நாசமான சம்பவம் ஆழ்ந்த சோகத்தை ஏற்படுத்தியுள்ளது.