Skip to main content

மனைவி குழந்தைகளை பிரிந்த சோகம்; பிணையில் வந்த கணவர் கோயிலில் தூக்கிட்டு தற்கொலை! 

Published on 07/10/2022 | Edited on 07/10/2022

 

youngster passed away in temple

 

சேலம் அருகே, திருமண உறவுக்கு வெளியே ஏற்பட்ட தவறான தொடர்பால் இரண்டு குழந்தைகள் உள்பட ஒரு குடும்பமே பலியான சம்பவம் கிராம மக்களை பெரும் சோகத்தில் ஆழ்த்தியுள்ளது. 

 

சேலம் மாவட்டம், காடையாம்பட்டி அருகே உள்ள கணவாய்புதூர் ஊராட்சி, கே.மோரூர் காட்டுவலவு பகுதியைச் சேர்ந்தவர் பிரபாகரன் (35). இவருடைய மனைவி மரகதம் (30). இவர்களுக்கு செல்வகணபதி (7), கோகுலகண்ணன் (5) ஆகிய இரண்டு ஆண் குழந்தைகள் இருந்தனர். பிரபாகரன், தன்னுடைய சொந்த நிலத்தில் விவசாயம் செய்து வந்தார். அதே தோட்டத்தின் ஒரு பகுதியில், சிறிய அளவில் பிளாஸ்டிக் பைகளை மறுசுழற்சி செய்யும் தொழிற்சாலையும் நடத்தி வந்தார். 

 

இந்நிலையில் அவருக்கு, வேறு ஒரு பெண்ணுடன் நெருக்கமான தொடர்பு ஏற்பட்டுள்ளது. இது தொடர்பாக அவர்களுக்குள் அடிக்கடி தகராறு ஏற்பட்டு வந்துள்ளது. கடந்த பிப். 14ம் தேதி அவர்களுக்குள் மீண்டும் தகராறு ஏற்பட்டுள்ளது. விரக்தி அடைந்த மரகதம், தற்கொலை செய்து கொள்ள தீர்மானித்துள்ளார். தான் இறந்து விட்டால் தனது குழந்தைகள் அனாதைகள் ஆகிவிடுவார்களே எனக்கருதிய மரகதம், பிப். 14ம் தேதியன்று, தங்களது தோட்டத்தில் உள்ள கிணற்றில் இரு குழந்தைகளையும் தூக்கி வீசி எறிந்து கொலை செய்துள்ளார். அதன்பிறகு, அவரும் அதே கிணற்றில் குதித்து தற்கொலை செய்து கொண்டார். 

 

இந்த சம்பவம் குறித்து தீவட்டிப்பட்டி காவல்நிலைய காவல்துறையினர் வழக்குப்பதிவு செய்து, விசாரணை நடத்தினர். பிரபாகரன் நடத்தி வந்த பிளாஸ்டிக் தொழிற்சாலைக்கு உள்ளூரைச் சேர்ந்த பெண் ஒருவர் வேலைக்கு வந்துள்ளார். அப்போது இருவரும் நெருங்கிப் பழகி வந்துள்ளனர். இதையறிந்த மரகதத்தின் பெற்றோர், பிரபாகரன் மீது காவல்நிலையத்தில் புகார் அளித்தனர். 

 

இந்த சம்பவத்திற்குப் பிறகு பிரபாகரன், தனது மனைவியை அடிக்கடி அடித்து கொடுமைப்படுத்தியதோடு, அவரை தற்கொலைக்கு தூண்டியிருப்பது விசாரணையில் தெரிய வந்தது. அதன்பிறகுதான் மரகதம் குழந்தைகளுடன் கிணற்றில் குதித்து தற்கொலை செய்து கொண்டுள்ளார். இந்த வழக்கில் பிரபாகரனை காவல்துறையினர் கைது செய்தனர். 

 

சிறையில் அடைக்கப்பட்டு இருந்த பிரபாகரன், பிணையில் விடுதலை ஆனார். மனைவி, குழந்தைகள் இல்லாமல் வீட்டில் தனிமையில் இருந்ததால் கடும் மன உளைச்சலில் இருந்துள்ளார். இந்நிலையில், அக். 5ம் தேதி இரவு கே.மோரூரில் இருந்து தலையாரியூர் பகுதிக்கு வந்த பிரபாகரன், தனது குலதெய்வ கோயிலான அண்ணமார் கோயிலுக்குச் சென்றுள்ளார். திடீரென்று அந்தக் கோயிலுக்குள் சென்று அவர் தூக்கிட்டு தற்கொலை செய்து கொண்டார். 


இந்நிலையில் வியாழக்கிழமை (அக். 6) கோயிலுக்கு வந்த பக்தர்கள், பிரபாகரன் சடலமாகத் தொங்குவதைப் பார்த்து அதிர்ச்சி அடைந்தனர். இதுகுறித்து ஓமலூர் காவல்நிலையத்திற்கு தகவல் அளித்தனர். காவல்துறையினர் சடலத்தைக் கைப்பற்றி, உடற்கூராய்வுக்காக சேலம் அரசு மருத்துவமனைக்கு அனுப்பி வைத்தனர். தொடர்ந்து விசாரணை நடந்து வருகிறது. 


திருமண உறவுக்கு வெளியே ஏற்பட்ட தவறான உறவால், அப்பாவி குழந்தைகள் உள்பட ஒரு குடும்பமே பலியான சம்பவம் கே.மோரூர் கிராமத்தில் பெரும் சோகத்தை ஏற்படுத்தி உள்ளது. 

 

 

சார்ந்த செய்திகள்

Next Story

எல்.முருகன் மீது வழக்குப் பதிவு

Published on 29/03/2024 | Edited on 29/03/2024
Case registered against L. Murugan

நாட்டின் 18 ஆவது நாடாளுமன்ற மக்களவைத் தேர்தலுக்கான தேதிகள் அறிவிக்கப்பட்டு, மொத்தமாக ஏழு கட்டங்களாகத் தேர்தல் நடத்தப்படவுள்ள நிலையில், முதற்கட்டமாகத் தமிழ்நாட்டில் ஏப்ரல் 19 ஆம் தேதி வாக்குப்பதிவு நடைபெற இருக்கிறது. இதற்கான வாக்கு எண்ணிக்கை ஜூன் 4 ஆம் தேதி நடைபெறவுள்ளது. ஏற்கெனவே தமிழகத்தில் உள்ள அரசியல் கட்சிகள் தேர்தல் பணியில் தீவிரம் காட்டி வரும் நிலையில், தேர்தல் தேதி அறிவிக்கப்பட்டதால் தேர்தல் களம் அனல் பறக்க ஆரம்பித்து விட்டது.

அரசியல் கட்சிகள் தீவிரமான தேர்தல் பரப்புரையில் இறங்கிய நிலையில், மறுபுறம் தேர்தல் பறக்கும் படையினர் பல்வேறு இடங்களில் அதிரடி சோதனைகளில் இறங்கியுள்ளனர். இந்நிலையில், தேர்தல் நடத்தை வழிமுறைகளை மீறியதாக நீலகிரி பாஜக வேட்பாளர் எல்.முருகன் மீது வழக்குப் பதிவு செய்யப்பட்டுள்ளது.

கடந்த 25 ஆம் தேதி வேட்புமனு தாக்கல் செய்ய வந்த மத்திய இணை அமைச்சரும் நீலகிரி நாடாளுமன்றத் தொகுதி பாஜக வேட்பாளருமான எல்.முருகன் பல்வேறு கோவிலுக்கு சென்று வழிபாடு நடத்தியதுடன் உதகை அருகே உள்ள கிராமம் ஒன்றுக்குச் சென்று எந்த அனுமதியும் பெறாமல் 100க்கும் மேற்பட்டோர் ஆலோசனையில் ஈடுபட்டதாக கூறப்பட்டது. இதுகுறித்து தேர்தல் பறக்கும் படையின் தலைவராக உள்ள துணை வட்டாட்சியர் தனலட்சுமி தேனாடுகம்பை காவல் நிலையத்தில் புகார் அளித்திருந்தார். இந்த புகாரின் அடிப்படையில் தேர்தல் நடத்தைகளை மீறியதாக எல்.முருகன் மீது போலீசார் வழக்குப் பதிவு செய்யப்பட்டுள்ளது.

Next Story

பட்டப்பகலில் வீடு புகுந்து படுகொலை; 6 மணி நேரத்தில் பிடிபட்ட குற்றவாளி

Published on 29/03/2024 | Edited on 29/03/2024
Cruelty to a woman in broad daylight; Criminal caught in 6 hours

திருவள்ளூர் மாவட்டம் பொன்னேரியில் வீட்டில் தனியாக இருந்த பெண் ஒருவர் சரமாரியாக வெட்டிக் கொலை செய்யப்பட்ட சம்பவம் பரபரப்பை ஏற்படுத்திய நிலையில், இந்த வழக்கில் 6 மணி நேரத்தில் குற்றவாளியை போலீசார் கைது செய்துள்ளனர்.

திருவள்ளூர் மாவட்டம் பொன்னேரி பகுதியைச் சேர்ந்தவர் குமார். ஓய்வு பெற்ற மின்வாரிய ஊழியரான இவர் நேற்று வெளியே சென்றுவிட்டு வீடு திரும்பியுள்ளார். அப்போது வீட்டின் ஹாலில் அவருடைய மனைவி சரஸ்வதி வெட்டுக் காயங்களுடன் ரத்த வெள்ளத்தில் கிடந்தார். இதனைக் கண்டு அதிர்ச்சியடைந்த குமார் கூச்சலிட்டுள்ளார். அக்கம் பக்கத்தில் இருந்தவர்கள் ஓடி வந்து பார்த்து போலீசாருக்கு தகவல் கொடுத்தனர்.

தகவலறிந்து உடனடியாக சம்பவம் நடந்த இடத்திற்கு வந்த போலீசார், ரத்த வெள்ளத்தில் உயிரிழந்து கிடந்த சரஸ்வதியின் உடலைப் பிரேதப் பரிசோதனைக்காக அனுப்பி வைத்தனர். மர்ம நபர்கள் சரஸ்வதியை வெட்டிப் படுகொலை செய்துவிட்டு அவர் கழுத்தில் இருந்த தங்க நகையைப் பறித்துச் சென்றது விசாரணையில் தெரியவந்தது. இருப்பினும் இந்த கொலை, நகைக்காக நடந்ததா அல்லது வேறு ஏதேனும் முன் விரோதப் பிரச்சனை காரணமாக நிகழ்ந்ததா என்பது தொடர்பாக விசாரணை நடத்தி வருகின்றனர். பட்டப்பகலில் பெண் படுகொலை செய்யப்பட்ட சம்பவம் அந்த பகுதியில் பெரும் பரபரப்பை ஏற்படுத்தியது.

Cruelty to a woman in broad daylight; Criminal caught in 6 hours

இந்த சம்பவத்தில் போலீசார் விசாரணை மேற்கொண்டு வந்த நிலையில், உயிரிழந்த பெண்ணின் சகோதரி மகனே கொலையில் ஈடுபட்டது தெரியவந்தது. பணம் கேட்டுத் தராததால் ஆத்திரத்தில் இருந்த சரஸ்வதியின் சகோதரி மகன் அசோக் குமார், வீட்டில் சரஸ்வதி தனியாக இருந்த பொழுது கத்தியால் குத்திக் கொலை செய்தது தெரியவந்தது.