Skip to main content

ஏற்காடு கோடை விழா தொடங்கியது! வழக்கமான உற்சாகம் காணோம்!!

Published on 01/06/2019 | Edited on 01/06/2019

சேலம் மாவட்டத்தின் பிரசித்தி பெற்ற சுற்றுலாத் தலங்களுள் ஒன்றான ஏற்காட்டில் 44வது கோடை விழா மற்றும் மலர்க்கண்காட்சி வெள்ளிக்கிழமை (மே 31, 2019) தொடங்கியது.



மூன்று நாள்கள் நடைபெறும் இவ்விழாவை, மாவட்ட ஆட்சியர் ரோகிணி தொடங்கி வைத்தார். தோட்டக்கலைத்துறை இயக்குநர் சுப்பையன், மலர்க்கண்காட்சியை துவக்கி வைத்தார்.

 

YERCAUD



கடந்த ஆண்டு ஐந்து நாள்கள் இவ்விழா நடத்தப்பட்டது. மக்களவை தேர்தல் காரணமாக, வி-ழா தொடங்க தாமதம் ஆனதோடு, விழா நடைபெறும் நாள்களும் குறைக்கப்பட்டது. எனினும், சிறப்பான மலர் அலங்காரங்கள் குறைவின்றி செய்யப்பட்டு இருந்தன.

 




அண்மையில், பாகிஸ்தான் போர் விமானங்கள் மீது தாக்குதல் நடத்திய இந்திய விமானப்படை வீரர் அபிநந்தனுக்கு சிறப்பு செய்யும் வகையில், மலர்க்கண்காட்சியில் அவருடைய கட்அவுட் வைக்கப்பட்டு இருந்தது. அதன் அருகே, சிவப்பு மற்றும் வெள்ளை ரோஜா பூக்களால் ஆன மிக்-21 ரக போர் விமானத்தின் சிற்பமும் செய்யப்பட்டு இருந்தது. அது, ஒட்டுமொத்த பார்வையாளர்களின் கவனத்தையும் வெகுவாக ஈர்த்தது.

 

YERCAUD



தற்போது உலகக்கோப்பை கிரிக்கெட் போட்டி தொடங்கியுள்ள நிலையில், அதை நினைவூட்டும் வகையில் உலகக்கோப்பையையும் மலர் சிற்பமாக வடித்திருந்ததும் பலரையும் கவனிக்க வைத்தது.

 




மக்களவை தேர்தலுக்கு முன்னதாக, சென்னையில் உள்ள மத்திய ரயில் நிலையத்திற்கு புரட்சித்தலைவர் எம்ஜிஆர் ரயில் நிலையம் என்று பெயர் சூட்டப்பட்டது. அதற்கு பெருமை சேர்க்கும் விதமாக, பல்வேறு வகையான மலர்களால் சிற்பமாக ரயில் நிலையம் வடிவமைக்கப்பட்டு இருந்தது. சுற்றுலா பயணிகள் ஏராளமானோர் அந்த ரயில் முன்பு நின்று தற்படம் எடுத்து மகிழ்ந்தனர்.


அண்ணா பூங்காவிற்கு வரும் சுற்றுலா பயணிகளை வரவேற்கும் வகையில் மா, பால, வாழை என முக்கனிகள் மட்டுமின்றி, அன்னாசி, பப்பாளி, எலுமிச்சை உள்ளிட்ட பல்வேறு கனிகளைக்கொண்டு அலங்கார வளைவு அமைக்கப்பட்டு இருந்தது.

 

YERCAUD



தோட்டக்கலைத்துறை சார்பில் தமிழ்நாட்டில் விளையும் பழங்கள், காய்கறிகள், மலர்கள், தோட்டப்பயிர்கள், மருத்துவ பயிர்கள் காட்சிக்கு வைக்கப்பட்டு இருந்தன. மேலும், பல்வேறு கனிகளால் ஆன விலங்குகள், பறவைகளும் வடிவமைக்கப்பட்டு இருந்தன. 



வழக்கம்போல் ஏற்காடு ஏரியில் சுற்றுலா பயணிகள் படு உற்சாகமாக படகு சவாரி செய்து மகிழ்ந்தனர். கிராமிய கலைநிகழ்ச்சிகள், நாடகங்கள், செல்லப்பிராணிகள் போட்டி, புகைப்பட போட்டிகளுக்கும் ஏற்பாடுகள் செய்யப்பட்டு உள்ளன.




கோடை விடுமுறை முடிந்து பள்ளி திறப்பதற்கு சில நாள்களே உள்ளதால், உள்ளூர் மற்றும் வெளியூர் சுற்றுலா பயணிகள் கூட்டம் இந்தாண்டு குறைவாக இருந்தது. முதல்வர் எடப்பாடி பழனிசாமி, பிரதமர் பதவியேற்பு விழாவில் கலந்து கொள்ள டெல்லி சென்றதால், ஏற்காடு கோடை விழா நிகழ்ச்சியில் கலந்து கொள்ளவில்லை. அவர் வராததால் மற்ற அமைச்சர்கள், எம்எல்ஏக்களும் பங்கேற்கவில்லை. இதனாலும் கோடை விழா வழக்கமான உற்சாகமின்றி, களையிழந்து காணப்பட்டது.

 

 

 


.

சார்ந்த செய்திகள்

 

Next Story

“ரூ.10 லட்சம் நிவாரணம் வழங்க வேண்டும்” - எடப்பாடி பழனிசாமி வலியுறுத்தல்!

Published on 04/05/2024 | Edited on 04/05/2024
“Rs. 10 lakh relief should be provided” - Edappadi Palaniswami insists

சேலம் மாவட்டம் ஏற்காட்டுக்கு புதிய பேருந்து நிலையத்திலிருந்து தனியார் பேருந்து ஒன்று கடந்த 30 ஆம் தேதி (30.04.2024) சென்றது. அதன் பின்னர் ஏற்காடு பேருந்து நிலையத்திலிருந்து மாலை 6:00 மணியளவில் சேலத்தை நோக்கி மீண்டும் வந்து கொண்டிருந்தது. மாலை நேரம் என்பதால் பேருந்தில் அதிகப்படியான பயணிகள் இருந்ததாகக் கூறப்படுகிறது. இத்தகைய சூழலில் ஏற்காடு மலையின் 11 வது கொண்டை ஊசி வளைவு பகுதியில் வந்து கொண்டிருந்த போது திடீரென கட்டுப்பாட்டை இழந்து பேருந்து கவிழ்ந்தது. மேல்பகுதியில் இருந்து அடுத்த கொண்டை ஊசி வளைவு உள்ள பகுதி சாலை வரை உருண்டோடியது. இதில் சுமார் 60க்கும் மேற்பட்டோர் படுகாயம் அடைந்தனர்.

இந்த விபத்து குறித்து தகவல் அறிந்த ஏற்காடு காவல் நிலைய போலீசார் மற்றும் தீயணைப்புத் துறையினர் விபத்தில் சிக்கியவர்களை மீட்டனர். அவ்வாறு மீட்கப்பட்ட அனைவரும் கார் மற்றும் ஆம்புலன்ஸ்கள் மூலம் சேலம் அரசு மருத்துவமனைக்கு அனுப்பி வைக்கப்பட்டனர். மேலும் இந்த விபத்து தொடர்பான காட்சிகள் சமூக வலைத்தளங்களில் வெளியாகி வைரலாகியது. இதற்கிடையில், இந்தக் கோர விபத்தில் 4 பேர் உயிரிழந்ததாக முதற்கட்ட தகவல் வெளியான நிலையில் மேலும் இருவர் உயிரிழந்தனர். இதன் காரணமாக உயிரிழப்பு எண்ணிக்கை ஆறாக அதிகரித்தது.

இந்நிலையில் ஏற்காட்டில் ஏற்பட்ட பேருந்து விபத்தில் காயமடைந்து சேலம் அரசு மருத்துவமனையில் சிகிச்சை பெற்று வருபவர்களை அதிமுக பொதுச்செயலாளர் எடப்பாடி பழனிசாமி சந்தித்து நலம் விசாரித்தார். அதன் பின்னர் செய்தியாளர்களை சந்தித்து பேசுகையில், “பேருந்து விபத்தில் உயிரிழந்தோர் குடும்பங்களுக்கு தலா ரூ.10 லட்சமும், படுகாயமடைந்தவர்களுக்கு ரூ.2 லட்சமும் தமிழ்நாடு அரசு வழங்க வேண்டும். சுற்றுலா தலங்களுக்கு வரும் வாகனங்களை அதிகாரிகள் முறையாகக் கண்காணிக்க வேண்டும்” எனத் தெரிவித்தார்.

“Rs. 10 lakh relief should be provided” - Edappadi Palaniswami insists

அதனைத் தொடர்ந்து பேசுகையில், “ரகசிய பயணம் எதுவும் நான் மேற்கொள்ளவில்லை. ஆயுர்வேத சிகிச்சைக்காக கேரளா சென்றிருந்தேன். அதிக நேரம் நிற்பதால் குதிகாலில் வலி ஏற்பட்டது. வறட்சியான நேரத்தில் ஓய்வு எடுப்பதற்கு முதலமைச்சர் செல்வதா?” எனவும் கேள்வி எழுப்பினார். 

Next Story

'அந்த 7 பேர் உயிருக்கு முதல்வர் பொறுப்பேற்பாரா?'-பிரேமலதா விஜயகாந்த் கேள்வி

Published on 01/05/2024 | Edited on 01/05/2024
 'Will the Chief Minister take responsibility for the lives of those 7 people?'-Premalatha Vijayakanth's question

ஏற்காட்டில் நிகழ்ந்த பேருந்து விபத்தில் 7 பேர் உயிரிழந்ததற்கு முதல்வர் பொறுப்பேற்பாரா என தேமுதிகவின் பொதுச்செயலாளர் பிரேமலதா விஜயகாந்த் கேள்வி எழுப்பியுள்ளார்.

சென்னையில் செய்தியாளர்களை சந்தித்த தேமுதிக கட்சியின் பொதுச்செயலாளர் பிரேமலதா விஜயகாந்த் பேசுகையில், ''நாம் எத்தனையோ தேர்தலை பார்த்திருக்கிறோம் ஆனால் இந்த தேர்தலில் வாக்கு சதவீதங்களை மாறி மாறிச் சொல்கிறார்கள். முதலில் ஒன்று சொன்னார்கள். இப்படி மாற்றி மாற்றிச் சொல்லி கடைசியில் 69 சதவிகிதம் என சொல்கிறார்கள். ஏன் இந்த அளவிற்கு குளறுபடி என்பது ஒரு பெரிய கேள்விக்குறியாக இருக்கிறது. ஆறு மணிக்கு வாக்குப்பதிவு முடிந்த உடனே 7:00 மணிக்கு சரியான புள்ளி விவரத்தை சொல்லி விடுவார்கள். இதுதான் வழக்கம். இந்த முறை தான் மூன்று முறை, நான்கு முறை மாற்றி மாற்றி அறிவித்ததை பார்க்கிறோம். தேர்தல் ஆணையம் தமிழ்நாடு முழுக்க ஸ்ட்ராங் ரூம் என ஒன்று வைத்துள்ளார்கள். பெயரளவில் அது ஸ்ட்ராங் ரூமா என்பதை தேர்தல் ஆணையம் தான் உறுதி செய்ய வேண்டும். நீலகிரி, ஈரோடு ஆகிய மாவட்டங்களில் ஸ்ட்ராங் ரூமில் கரண்ட் கட் ஆகி 20 நிமிடம் சிசிடிவி கேமரா செயலிழந்துள்ளது. இது உண்மையிலேயே வன்மையாக கண்டிக்கத்தக்கது.

காவிரியில் நாம் தண்ணீர் கேட்பதும், கோடை காலம் வந்தவுடன் தண்ணீர் இல்லை என்று சொல்வதும், பெண்கள் எல்லோரும் குடத்துடன் ரோட்டில் உட்கார்ந்து மறியல் செய்வதும் இன்று புதிது கிடையாது. இது ஒவ்வொரு வருடமும் நடந்து கொண்டுதான் இருக்கிறது. டிசம்பர் மாதத்தை நாம் கொஞ்சம் யோசித்துப் பார்க்க வேண்டும். திருநெல்வேலி, தூத்துக்குடி என எல்லா இடத்திலும் வெள்ளம். தமிழ்நாட்டில் என்ன நிர்வாகம் இருக்கிறது என்பது தொடர்பாக நான் கேள்வியை வைக்க விரும்புகிறேன். ஒரு பக்கம் அதிகமாக மழை வெள்ளத்தை கடவுள் கொடுக்கிறார். அதனை சேமிக்கும் திறன்; ஒரு நல்ல கட்டமைப்பு; தொலைநோக்கு பார்வை இந்த அரசுக்கு இல்லை. தண்ணீர் வரும் பொழுது அதை கடலில் வீணாக கலந்து விடுகிறார்கள். அதனையடுத்து மூன்று நான்கு மாத காலங்களில் கோடை காலம் வந்து விடுகிறது. அப்பொழுது தண்ணீர் இல்லை என்ற நிலை உருவாகிறது.

கர்நாடகா தண்ணீர் கொடுக்க வேண்டியது அவர்களுடைய கடமை. கொடுக்கவில்லை என்றால் நாம் கேட்டு பெறத்தான் போகிறோம். ஆனால் ஏன் ஒவ்வொரு வருடமும் அவர்களிடம் போய் கெஞ்சி தண்ணீர் கொடுங்கள், தண்ணீர் கொடுங்கள் என கேட்க வேண்டுமா? என்ன நம்மிடம் ஆட்சி இல்லையா? நிர்வாகத் திறன் உள்ள அதிகாரிகள் இல்லையா? ஆட்சியாளர்கள் இல்லையா? பண பலம் இல்லையா? என்ன இல்லை. ஏன் ஒவ்வொரு முறையும் மழைக்காலம் வரும்பொழுது கடலில் தண்ணீரை கலப்பது, கோடை காலம் வந்தவுடன் தண்ணீர் இல்லை என்பது, கர்நாடகாவிடம் காவிரியில் தண்ணீர் கொடுங்கள் எனக் கேட்பது என இன்னும் எத்தனை நாளைக்கு தான் இதே பாணியைத் தான் இவர்கள் ஓட்டப் போகிறார்கள்.

ஏற்காட்டில் நேற்று சுற்றுலா போன பஸ் பாதாளத்தில் விழுந்து ஏழு பேர் உயிரிழந்துள்ளார்கள். தேமுதிக சார்பில் அறிக்கை கொடுத்திருக்கிறோம். ஏன் இந்த குளறுபடிகள். சம்மர் வந்தால் மலைப் பிரதேசங்களுக்கு செல்வது எல்லாருக்கும் வழக்கம். அப்போது உரிய பாதுகாப்பு தர வேண்டியது அரசாங்கத்தின் கடமை. மலைப்பகுதிகளில் திறமையான பேருந்து ஓட்டுநர்களை அமைக்க வேண்டும். மதில் சுமர்கள் இரண்டு பக்கமும் ஏற்ற வேண்டும். பயணிகளுக்கு பாதுகாப்பான பயணத்தை ஏற்படுத்தி தர வேண்டியது அரசினுடைய கடமை. காவல்துறையின் கடமை.  ஏழு உயிர் போய் இருக்கிறது. இதற்கு யார் பொறுப்பேற்றுக் கொள்ளப் போகிறார்கள்? முதல்வர் பொறுப்பேற்றுக் கொள்வாரா? அவர்களுக்கு உரிய சன்மானத்தையும் அவர்கள் குடும்பத்தில் ஒருவருக்கு வேலையும் தர வேண்டும். இந்த நிகழ்வு இனி எங்கும் நடக்காமல் இருக்க வேண்டும். ஊட்டி, கொடைக்கானல், ஏலகிரி, ஏற்காடு என எல்லா இடத்திற்கும் தான் மக்கள் போவார்கள். அந்த பாதை சரியாக இருக்கிறதா.. பேருந்து சரியாக இருக்கிறதா... ஓட்டுநர்கள் சரியாக இருக்கிறார்களா? என சோதனை செய்து அனுப்ப வேண்டியது அரசின் கடமை''என்றார்.