Skip to main content

பாதுகாப்பின்றி சாக்கடையில் இறங்கிக் கழிவுகளை அள்ளும் தொழிலாளர்கள்!

Published on 08/06/2024 | Edited on 08/06/2024
Workers who go down the drain without protection and scoop waste

வேலூர் மாநகராட்சிக்குட்பட்ட சைதாப்பேட்டை 35 வது வார்டு பகுதியில் செல்லும் பாதாள சாக்கடையில் அடைப்பு ஏற்பட்டுள்ளதால் இன்று அதனை அகற்றும் பணியில் மாநகராட்சி ஊழியர்கள் ஈடுபட்டுள்ளனர். அப்போது பாதாள சாக்கடை கழிவு நீர் கால்வாய் அடைப்பை அகற்ற வேலூர் மாநகராட்சியில் உள்ள பிரத்யேகமான வாகனத்தை அருகிலேயே நிறுத்திவைத்துக்கொண்டு வயதான தூய்மை பணியாளர்கள் இருவர் பாதுகாப்பு உபகாரணங்கள் இன்றி அடைப்பை சரிசெய்யும் பணியில் ஈடுபட்டுள்ளனர்.

குறிப்பாக அதில் ஓர் முதியவர் பாதாள சாக்கடைக்குள்ளேயே இறங்கி எந்த வித பாதுகாப்பும் இன்றி வெறும் கைகளால் கழிவுகளை எடுத்து போடும் அவலக்காட்சி அரங்கேறி உள்ளது. நவீன இயந்திரம் இருந்தும் இதுபோன்ற செயல் வேதனையை ஏற்படுத்தியுள்ளது. இதனை மாநகராட்சி நிர்வாகம் கண்காணித்து முறைபடுத்தப்பட வேண்டியது அவசியம் என்கின்றனர் சம்பவத்தை நேரில் பார்த்தவர்கள்.

Workers who go down the drain without protection and scoop waste

மனிதர்கள் பாதாள சாக்கடைக்குள் இறங்கி கழிவுகளை அகற்றக்கூடாது என்கிற சட்டம் உள்ளது. ஆனால் அந்தச் சட்டம் குறித்து அதிகாரிகள் நன்றாக தெரிந்தும் இப்படி பாதாள சாக்கடைக்குள் ஆபத்தான முறையில் உள்ளே இறங்கி வேலை செய்ய வைப்பது தொடர்கதையாகவே உள்ளது. சட்டத்தை மதிக்காமல் இப்படி செய்யும் அதிகாரிகள் குறைந்தபட்சம் அந்தத் தொழிலாளர்களுக்கு பாதுகாப்பு உபகரணங்கள் வழங்கலாம், அதையும் செய்வதில்லை எனக் கூறுகின்றனர் தொழிலாளர் தரப்பினர்.

இதனைப் பார்த்த சமூக ஆர்வலர்கள், அதிகாரிகள்தான் இதனைக் கண்காணிக்க வேண்டும் ஆனால் அவர்களே தவறு செய்ய வைக்கிறார்கள். இதைக் கண்டிக்க வேண்டிய மேயர் கண்டுக்கொள்ளாமலேயே இருப்பது வேதனைப்படுத்துகிறது என்கின்றனர்.

சார்ந்த செய்திகள்

 

Next Story

“இப்படி இருந்தா எப்படி ஓட்டுக்கேட்க முடியும்?” - கவுன்சிலரை லெஃப்ட் ரைட் வாங்கிய எம்.எல்.ஏ

Published on 18/07/2024 | Edited on 18/07/2024
MLA advised the councillors to do the panchayat work properly

வேலூர் மாவட்டம் அணைக்கட்டு சட்டமன்றத் தொகுதிக்கு உட்பட்ட பள்ளிகொண்ட அடுத்த வெட்டுவானம் பகுதியில் எம்.எல்.ஏ நந்தகுமார் இன்று (18.7.2024) திடீரென ஆய்வு மேற்கொண்டார். அப்போது அனைவருக்கும் குடிநீர் வழங்கும் அம்ரித் திட்டப் பணிகளில் தோண்டப்பட்ட குழிகளில் சரியான முறையில் ஒப்பந்ததாரர் சிமெண்ட் பேட்ச் ஒர்க் சரிவரச் செய்யாததால் பள்ளமாக இருந்தது.

உடனடியாக இதை அனைத்தையும் கொத்தி எடுத்து விட்டு மீண்டும் சிமெண்ட் சாலை தரமான முறையில் அமைக்க வேண்டும் எனவும் டிசம்பரில் உள்ளாட்சித் தேர்தல் நடைபெறவுள்ளது. அதற்குள் பணிகளை ஒழுங்காகச் செய்யவில்லை என்றால் மக்களிடம் ஓட்டு கேட்க முடியாது எனக் கவுன்சிலர்களைக் கடிந்து கொண்டார்.

தொடர்ந்து வெட்டுவானம் சென்னை பெங்களூர் தேசிய நெடுஞ்சாலையில் பொது மக்களின் நீண்ட நாள் கோரிக்கையான சுமார் 43 கோடி மதிப்பீட்டில் நடைபெற உள்ள மேம்பாலம் அமைக்கும் பணியினை நேரில் ஆய்வு செய்தார். பின்னர் பணிகளை விரைந்து முடித்து பொதுமக்கள் பயன்பாட்டிற்குத் தரவேண்டும் என அதிகாரிகள் இடத்தில் அறிவுரை வழங்கினார்.

Next Story

காவல் ஆய்வாளர் மீது தொடர் புகார்; பாய்ந்த அதிரடி நடவடிக்கை!

Published on 16/07/2024 | Edited on 16/07/2024
Transferred to  armed forces after   complaints against the police inspector

சென்னையைச் சேர்ந்த ராஜா என்பவர் வேலூர் மாவட்ட காவல்துறையில் சத்துவாச்சாரி காவல் நிலைய ஆய்வாளராக பணியாற்றி வந்தார். இந்த நிலையில் ஆய்வாளர் ராஜா சத்துவாச்சாரி காவல் நிலையத்திற்கு புகார் கொடுக்கவரும் பொதுமக்களின் புகார்கள் மீது எந்த நடவடிக்கையும் எடுக்காமல், புகார் கொடுக்க வருபவர்களையே தகாத வார்த்தைகளில் திட்டுவதாகவும் கூறப்படுகிறது.

மேலும் சத்துவாச்சாரி காவல் நிலையத்திற்கு உட்பட்டப் பகுதியில் அதிக குற்றச்செயல்கள் நடப்பதாகவும், அதே பகுதியில் பாலியல் தொழில் நடப்பது தெரிந்தும் ராஜா எந்த நடவடிக்கையும் எடுக்கவில்லை என்று அடுக்கடுக்கான குற்றச்சாட்டுகள் எழுந்துள்ளது.

இது குறித்து உயர் அதிகாரிகள் விசாரணை நடத்தியதில் குற்றச்சாட்டுகள் உண்மை என்று தெரியவந்தது. அதனைத் தொடர்ந்து காவல் ஆய்வாளர் ராஜாவை உயர் அதிகாரிகள் இரண்டு மூன்று முறை அழைத்து எச்சரிக்கை செய்துள்ளனர். ஆனாலும் காவல் ஆய்வாளர் ராஜா தனது போக்கை மாற்றிக் கொள்ளவில்லை எனக் கூறப்படுகிறது. 

இந்த நிலையில் காவல் ஆய்வாளர் ராஜாவை வேலூர் ஆயுதப்படைக்கு பணியிடை மாற்றம் செய்து உயர் அதிகாரிகள் நடவடிக்கை எடுத்துள்ளனர். இது வேலூர் மாவட்ட காவல்துறை வட்டாரத்தில் பெரும் பரபரப்பை ஏற்படுத்தியுள்ளது.