Skip to main content

அதிமுக எம்.எல்.ஏ மிரட்டல்; கண்ணீர் விட்டு அழுத பெண் கமிஷனர்

Published on 24/01/2024 | Edited on 24/01/2024
The woman commissioner burst into tears for AIADMK MLA threatened

கோவை மாவட்டம் மேட்டுப்பாளையம் நகராட்சியில் 33 வார்டுகள் உள்ளன. நகராட்சி தலைவராக மெஹரீபா பர்வீன் அஷ்ரப் அலி என்பவரும், துணைத் தலைவராக அருள் வடிவு என்பவரும் பொறுப்பு வகித்து வருகின்றனர். 

இந்த நிலையில், மேட்டுப்பாளையம் நகராட்சி அலுவலகத்திற்கு அதிமுக எம்.எல்.ஏ ஏ.கே. செல்வராஜ் நேற்று (23-01-24) வந்தார். இதனையடுத்து, அவர் தனது ஆதரவாளர்களுடன் நகராட்சி ஆணையாளர் (கமிஷனர்) அமுதாவின் அறைக்குச் சென்று, அவரிடம் நகராட்சி வளர்ச்சி பணிகள் குறித்து கேள்வி கேட்டுள்ளார். அப்போது அவர், கமிஷனரை ஒருமையில் பேசி மிரட்டியதாகக் கூறப்படுகிறது. இதனிடையே கமிஷனர் அமுதா, எம்.எல்.ஏ மிரட்டியதால் பயந்து அழுது கொண்டு இருந்துள்ளார்.

இந்நிலையில், வரும் குடியரசு தினத்தை முன்னிட்டு விழாவினைக் கொண்டாடுவது குறித்து பேசுவதற்காக நகராட்சி தலைவர், துணைத் தலைவர் உள்ளிட்டோர் கமிஷனர் அறைக்குச் சென்றுள்ளனர். அங்கு கமிஷனர் அமுதா அழுது கொண்டிருந்ததைப் பார்த்த நகராட்சி தலைவரும், துணைத் தலைவரும் கமிஷனரை சமாதானப்படுத்தி இருக்கையில் அமர வைத்துள்ளனர். அப்போது அதிமுக எம்.எல்.ஏ ஏ.கே. செல்வராஜ், ‘நான் பேசிக்கொண்டிருக்கும் போது நீ எதற்கு உள்ளே வந்தாய்?’ என நகராட்சி தலைவரையும், துணைத் தலைவரையும் ஒருமையில் பேசியுள்ளார். இதனைக் கண்ட அங்கிருந்த திமுக கவுன்சிலர்கள், அங்கு சென்று அதிமுக எம்.எல்.ஏ மற்றும் அவரது ஆதரவாளர்களுடன் வாக்குவாதத்தில் ஈடுபட்டனர். இதனால் நகராட்சி அலுவலகத்தில் பதற்றமான சூழல் ஏற்பட்டது. 

இந்த சம்பவம் குறித்து தகவல் அறிந்து விரைந்து வந்த டிஜிபி பாலாஜி, வாக்குவாதத்தில் ஈடுபட்ட அதிமுக மற்றும் திமுகவினரை சமாதானப்படுத்தினார். பின்னர், அவர்கள் அங்கிருந்து கலைந்து சென்றனர். இதனிடையே, மேட்டுப்பாளையம் காவல் நிலையத்தில் கமிஷனரை ஒருமையில் பேசி மிரட்டியதாக நகராட்சி ஊழியர்கள் புகார் அளித்தனர். ஒரு பெண் என்றும் பாராமல் ஒருமையில் பேசி மிரட்டிய அதிமுக எம்.எல்.ஏ.வால் நகராட்சி கமிஷனர் அழுத சம்பவம் பெரும் அதிர்ச்சியை ஏற்படுத்தியுள்ளது.  

சார்ந்த செய்திகள்

 

Next Story

'செல்லூர் ராஜு சொன்னது உண்மை; எடப்பாடிக்கு தான் புத்தி வரவேண்டும்'-புகழேந்தி பேட்டி

Published on 15/07/2024 | Edited on 15/07/2024
'What Sellur Raju said is true; "Edappadi should come to his senses" - Pugahendi interview

காமராஜர் பிறந்தநாள் ஜூலை 15 தேதியான இன்று கொண்டாடப்பட்டு வரும் நிலையில் ஓசூரில் அதிமுக தொண்டர்கள் ஒருங்கிணைப்பு குழு சார்பில் புகழேந்தி காமராஜர் சிலைக்கு மரியாதை செய்தார். அதன் பிறகு செய்தியாளர்களை சந்தித்த அவர் பேசுகையில், ''குழந்தைகளுக்கான இலவச உணவு திட்டத்தை அமுல்படுத்தி, இலவச கல்வியை தோற்றுவித்த ஏழை பங்காளனாக, கறை படியாத கரங்களுக்கு சொந்தக்காரராக விளங்கியவர் காமராஜர். அவருடைய பிறந்தநாளை இன்றைய தினம் நான் இங்கே உள்ள நிர்வாகிகளோடு கொண்டாடி உள்ளேன். அதிமுகவில் ஒற்றுமை வரவேண்டும் என்பது மனதார வரவேண்டும் வாயிலேயே பேசிக்கொண்டு இருந்தால் ஆகாது. கூப்பிட்டு சேர்த்து வைத்து விடுவேன் என்று ஒருவரும்; எந்த தியாகமும் செய்ய தயார் என்று இன்னொருவரும்; முடியவே முடியாது என்று இன்னொருவரும்; கட்சி நாசமாக போகட்டும் என நினைக்கும் பழனிசாமியும் என இப்படிப்பட்ட நிலைப்பாடுகள் மாற வேண்டும்.

எல்லோரும் ஒருங்கிணைந்தால் தான் அதிமுக காப்பாற்றப்படும் என்பது என்னுடைய கருத்து அல்ல தொண்டர்கள், பொதுமக்கள் கருத்து. அதற்கு வழி வகுக்க வேண்டும். அதற்கு தான் பாடுபடுகிறோம். இதில் சரியாக வரவில்லை என்றால் மக்கள் மத்தியில் அவர்கள் யார் என்பதை தோலுரித்துக் காட்டுவதற்கு இந்த ஒருங்கிணைப்பு குழு தயங்காது. மனதார காமராஜர் பிறந்தநாளில் முன்னாள் அமைச்சர் செல்வராஜ் மதுரையில் இருந்து ஒரு பேட்டி கொடுத்துள்ளார். என்ன தெரியுமா சொல்லி இருக்கிறார் 'நாங்கள் என்ன காமராஜரா? நாங்கள் என்ன எம்.ஜி.ஆரா? நாங்கள் என்ன ஜெயலலிதாவா? கூவி கூவி ஓட்டு கேட்டாலும் போட மாட்டேன் என்கிறார்கள். அதனால் தான் மூன்றாவது இடத்துக்கு போய்விட்டோம். மதுரை அதிமுகவின் கோட்டையாக இருந்தது. கூவி கூவி ஓட்டு கேட்டும் ஓட்டு போடவில்லையே' என்று செல்லூர் ராஜூ சொல்கிறார்.

அப்பொழுது அவருடைய தலைமை யார்? அவர் தலைமையாக ஏற்றுக் கொண்டிருப்பவர் பழனிசாமி. இப்பொழுதாவது பழனிசாமிக்கு புரியுமா? செல்லூர் ராஜு சொன்னது உண்மை. சென்ற மாதம் ராகுல் காந்தியை பாராட்டினார் மனதார வரவேற்றோம். இப்பொழுது இன்னொரு உண்மையை சொல்லி விட்டார். எடப்பாடி பழனிசாமி தலைமையில் கூவி கூவி ஓட்டு கேட்டாலும் 'தூ..' என துப்பி விட்டு போகிறார்களே தவிர ஓட்டு போட மாட்டார்கள் என்பதை மிகத் தெளிவாக செல்லூர் ராஜு சொல்லி இருக்கிறார். இனி பழனிசாமிக்கு தான் புத்தி வரவேண்டும். தோற்றுப் போனதற்கு அவர் காரணம் சொல்ல வேண்டும். ஜெயலலிதா சொல்லுவார் இந்த தோல்வியை நானே ஒப்புக்கொள்கிறேன். இந்த தோல்வியை நானே ஏற்றுக்கொள்கிறேன் என்று சொல்வார். கலைஞர் கடிதம் எழுதுவார் தோல்வியை ஒப்புக்கொள்கிறேன் என்று. ஆனால் எடப்பாடி பழனிசாமி உட்கார்ந்து ஆய்வு செய்து கொண்டிருக்கிறாராம். உன்னால் தான் அதிமுக தோற்றே போய்விட்டது. இதில் என்ன ஆய்வு செய்ய வேண்டி இருக்கிறது. எடப்பாடி பழனிசாமி செய்த தப்புக்கு யார் ஆய்வு செய்வது. செல்லூர் ராஜு உண்மையை சொல்லி உள்ளார் பாராட்டுகிறோம். ஏன் சி.வி.சண்முகம் இன்னும் அமைதியாக இருக்கிறார். நான் எதிர்பார்த்தது நியாயம், தைரியம் எல்லாம் சி.வி.சண்முகம் இடத்தில் எதிர்பார்த்தோம். ஆனால் இந்த தைரியம் எங்கோ ஒரு மதுரை மண்ணிலிருந்து வருகிறது. ஏன் விழுப்புரம் மண்ணில் இருந்தது வரவில்லை என்பது தான் எனக்கு புரியவில்லை'' என்றார்.

Next Story

ஜெயலலிதாவுக்கான சிகிச்சை; உயர்நீதிமன்றம் அதிரடி உத்தரவு!

Published on 15/07/2024 | Edited on 15/07/2024
Treatment for Jayalalithaa High Court action order

கடந்த 2016ஆம் ஆண்டு தமிழக முதல்வராக ஜெயலலிதா பதவியில் இருந்தபோது அவருக்கு திடீர் உடல்நலக் குறைவு ஏற்பட்டது. இதனால் அப்பல்லோ மருத்துவமனையில் அனுமதிக்கப்பட்ட அவருக்கு அங்கு தீவிர சிகிச்சை அளிக்கப்பட்டது. இருப்பினும் சிகிச்சை பலனளிக்காத காரணத்தால் அவர் மறைந்துவிட்டதாக சொல்லப்பட்டது. ஆனாலும் அவரது மரணம் தொடர்பான பல்வேறு சந்தேகங்கள் எழுப்பப்பட்டது. இதன் தொடர்ச்சியாக கடந்த 2017 ஆம் ஆண்டு செப்டம்பர் 25ஆம் தேதி ஓய்வுபெற்ற நீதிபதி ஆறுமுகசாமி தலைமையில் ஜெயலலிதா மரணம் தொடர்பான விசாரணைக்கு ஆணையம் அமைக்கப்பட்டது.

இதனையடுத்து அதிமுக ஆட்சி நிறைவடைந்து திமுக ஆட்சிக்கு வந்தது. இத்தகைய சூழலில் தான் சுமார் 5 ஆண்டுகளுக்குப் பிறகு 600 பக்கங்கள் கொண்ட இறுதி அறிக்கையை தமிழக முதல்வர் மு.க.ஸ்டாலினிடம் நீதிபதி ஆறுமுகசாமி சமர்பித்தார். அதனைத் தொடர்ந்து ஜெயலலிதா மரணம் தொடர்பான விசாரணை அறிக்கை சட்டசபையில் சமர்ப்பிக்கப்பட்டது. இதற்கிடையே முன்னாள் முதலமைச்சர் ஜெயலலிதா மருத்துவமனையில் அனுமதிக்கப்பட்டிருந்த காலத்தில் நடந்த சம்பவங்கள் குறித்து சிபிஐ விசாரணை கோரி அதிமுக தொண்டர் ராம் குமார் என்பவர் சென்ன உயர் நீதிமன்றத்தில் மனு ஒன்றைத் தாக்கல் செய்திருந்தார். 

Treatment for Jayalalithaa High Court action order

இந்நிலையில் இந்த மனுக்கள் இன்று விசாரணைக்கு வந்தது. அப்போது மனுதாரர் தரப்பில், “மறைந்த முதல்வர் ஜெயலலிதா 75 நாட்கள் மருத்துவமனையில் அனுமதிக்கப்பட்டிருந்தார். அப்போது மருத்துவமனையில் இருந்த கண்காணிப்பு கேமராக்கள் (CCTV) வேலை செய்யவில்லை. மருத்துவமனை தரப்பில் இரண்டு பேட்டிகள் அளிக்கப்பட்டன. இந்த இரு பேட்டிகளுக்கு இடையே முரண்பாடு உள்ளது. அது மட்டுமல்லாமல் இந்த காலகட்டத்தில் அதிமுக நிர்வாகிகள் அளித்த பேட்டிகளுக்கும், ஆறுமுகசாமி ஆணையம் சார்பில் அளிக்கப்பட்ட அறிக்கைக்கும் முரண்பாடுகள் உள்ளன. தமிழக அரசுக்கு ஆறுமுகசாமி ஆணையம் பரிந்துரை செய்தவற்றை தமிழக அரசு நடைமுறைப்படுத்தவில்லை” என வாதிடப்பட்டது.

இந்த மனுவை விசாரித்த பொறுப்பு தலைமை நீதிபதி மகாதேவன் மற்றும் நீதிபதி முகமது சபீக் அடங்கிய அமர்வு இந்த விவகாரம் தொடர்பாக தமிழக அரசு 2 வாரங்களில் பதில் அளிக்க வேண்டும் என்று தெரிவித்தனர். இதனால் இரண்டு வாரங்களுக்கு வழக்கு விசாரணையை ஒத்தி வைத்துள்ளனர். 

The website encountered an unexpected error. Please try again later.