Skip to main content

செஞ்சியில் கரடி நடமாட்டம்; பொதுமக்கள் பீதி 

Published on 17/03/2023 | Edited on 17/03/2023

 

villupuram genji bear movement public feared
மாதிரி படம்

 

விழுப்புரம் மாவட்டம் செஞ்சி வனச்சரகத்திற்கு உட்பட்ட முட்டுக்காடு, சோமசமுத்திரம், வடகால், கோணை புதூர், ஜே ஜே நகர் ஆகிய மலையோர கிராமப் பகுதிகளில் கடந்த வாரம் கரடி நடமாட்டம் இருப்பதை விவசாயிகள் நேரில் பார்த்துள்ளனர். கடந்த சில நாட்களாக கோணை புதூர் பகுதியில் உலா வரும் கரடியானது மேய்ச்சலுக்கு செல்லும் ஆடு, கன்றுக் குட்டி ஆகியவற்றைத் தாக்கி காயப்படுத்தி வந்துள்ளது.

 

இதுகுறித்து அப்பகுதி கிராம மக்கள் வனத்துறையினருக்கு தகவல் தெரிவித்தனர். வனத்துறையினர் சம்பந்தப்பட்ட பகுதிக்குச் சென்று ஆய்வு செய்தபோது கரடி நடமாட்டம் இருப்பதை உறுதி செய்தனர். இதையடுத்து வனச்சரகர் வெங்கடேசன் மேற்பார்வையில் கோணை புதூர் பகுதி மலையடிவாரத்தில் கரடியைp பிடிப்பதற்காக கூண்டு வைத்தனர். அந்தக் கூண்டில் வாழைப்பழம் வைக்கப்பட்டது. வாழைப்பழம் சாப்பிட வரும்போது கூண்டில் கரடி சிக்கிக் கொள்ளும் என்று எதிர்பார்த்தனர். ஆனால் கரடி கூண்டுக்குள் வருவதற்குள் அப்பகுதியில் சுற்றித் திரிந்த குரங்குகள் கரடிக்காக வைக்கப்பட்டிருந்த கூண்டிலிருந்த வாழைப்பழங்களை எடுத்துச் சென்றுவிட்டன. இதையடுத்து கூண்டுக்குள் பலாப்பழத்தை வைத்து கரடியைப் பிடிக்க முடிவு செய்துள்ளனர் வனத்துறையினர்.

 

இந்த நிலையில் நேற்று முழுவதும் அப்பகுதியில் கரடி நடமாட்டம் இல்லை என்றும் வேறு பகுதிக்கு உணவு தேடி கரடி சென்றிருக்கலாம் என்று எண்ணிய வனத்துறையினர். மலைப்பகுதியின் பல்வேறு இடங்களில் கரடி நடமாட்டத்தை கண்காணித்து வருகிறார்கள். கரடியைப் பிடிக்க கூண்டு வைத்து 4 நாட்கள் ஆகியும் அது பிடிபடாதது பொதுமக்கள் மத்தியில் மேலும் பயத்தை அதிகரிக்கச் செய்துள்ளது.

 

கடந்த பல ஆண்டுகளாக செஞ்சி மலைப் பகுதி கிராமங்களில் கரடி நடமாட்டம் இல்லை என்றும் திடீரென தற்போது கரடி அப்பகுதிக்கு எப்படி வந்தது என மக்கள் மத்தியில் குழப்பத்தையும் பயத்தையும் ஏற்படுத்தியுள்ளது. கரடி பிடிபடாமல் இருப்பதால் வரும் நாட்களில் மேய்ச்சலுக்கு செல்லும் கால்நடைகளை மீண்டும் தாக்கினால் என்ன செய்வது என்ற பயத்திலும் உள்ளனர் அப்பகுதி மக்கள். கரடி கூண்டுக்குள் அகப்படவில்லை என்றால் வலை விரித்தாவது பிடிக்க வேண்டும் என்ற முயற்சியில் வனத்துறையினர் ஈடுபட்டுள்ளனர்.

 

 

சார்ந்த செய்திகள்

 

Next Story

‘ஆமைகளின் எண்ணிக்கை உயர்வு’ - வனத்துறை சாதனை!

Published on 16/06/2024 | Edited on 16/06/2024
The number of turtles has increased a forest dept achievement

தமிழ்நாட்டின் 1076 கிலோமீட்டர் நீளமுள்ள கடற்கரையில் வரலாற்று ரீதியாக ஆமைகள் கூடு கட்டுவதற்காக வருகை தருகின்றன. ஆலிவ் ரிட்லி, பச்சை ஆமை, ஹாக்ஸ்பில் ஆமை, லாக்கர்ஹெட் ஆமை மற்றும் லெதர்பேக் ஆமை ஆகிய ஐந்து வகையான கடல் ஆமைகள் தமிழக கடற்கரைக்கு வருகை தருகின்றன. இவற்றில், முக்கியமாக ஆலிவ் - ரிட்லி ஆமைகள் அதிக எண்ணிக்கையில் வருகின்றன. அவை கூடு கட்டுவதற்கும் மற்றும் அவற்றின் தீவனமாகவும் தமிழ்நாட்டின் தென்பகுதியான கோரமண்டல் கடற்கரை அறியப்படுகின்றன, அதேசமயம் மற்ற வகை ஆமைகள் தற்போது கூடு கட்டுவது அரிதாக உள்ளன.

கடல் ஆமைகளுக்கான பருவம் ஒவ்வொரு ஆண்டும் நவம்பர் மாதத்தில் தொடங்கும். இந்நிகழ்வின் போது வனத் துறையானது தற்காலிக குஞ்சு பொரிப்பகங்களை உருவாக்குதல், ஊழியர்களுக்கான வழிகாட்டுதல் திட்டம் மற்றும் துறைகளுக்கிடையேயான ஒருங்கிணைப்பு கூட்டங்களைத் தொடர்ந்து நடத்துதல், தினசரி இரவு ரோந்துப் பணிகளைத் தொடர்தல். மாணவர்கள் கடல் ஆமைகள் பாதுகாப்பு கூடு கட்டுதல் (SSCN) மற்றும் பிற தன்னார்வலர்களுடன் இணைந்து ஆயத்தப் பணிகள் மேற்கொள்ளப்படுகிறது. வனத் துறைப் பணியாளர்கள் மற்றும் கண்காணிப்பாளர்கள், இந்த நோக்கத்திற்காக நியமிக்கப்பட்டவர்கள் மூலம் கூடுகள் அடையாளம் காணப்பட்டு. வனத் துறையின் குஞ்சு பொரிப்பகங்களில் வைத்துப் பாதுகாக்கப்படுகின்றன. 

The number of turtles has increased a forest dept achievement

இந்த ஆண்டு ஆமைகள் கூடு கட்டும் பருவத்தில் 13 கடலோர மாவட்டங்களில் உள்ள 8 பிரிவுகளில் 53 குஞ்சு பொரிப்பகங்களை வனத்துறை அமைத்தது. 2363 கூடுகள் மூலம் மொத்தம் 2 லட்சத்து 58 ஆயிரத்து 775 முட்டைகள் சேகரிக்கப்பட்டு, அவை துறைசார் குஞ்சு பொரிப்பகங்களுக்கு மிக நுட்பமாக இடமாற்றம் செய்யப்பட்டன. இந்த அனைத்து குஞ்சு பொரிப்பகங்களிலும் ஒவ்வொரு குஞ்சும் வெளிவரும் வரை இடமாற்றம் செய்யப்பட்டதிலிருந்து 24 மணி நேரமும் கண்காணிப்பு மேற்கொள்ளப்பட்டது. அவ்வாறு செய்யும் போது அனைத்து கூடுகளின் அளவீடுகள் மற்றும் வெப்பநிலை உட்பட அனைத்தும் பதிவு செய்யப்பட்டன. அதனையொட்டி இந்த ஆண்டு வனத்துறை, 2 லட்சத்து 15 ஆயிரத்து 778 ஆமைக் குஞ்சுகளைக் கடலுக்கு அனுப்பியுள்ளது. இதுவே. இதுவரை பதிவுசெய்யப்பட்ட எண்ணிக்கையில் அதிகபட்சமாகும்.

கடந்த ஆண்டு 1 லட்சத்து 82 ஆயிரத்து 917 குஞ்சுகள் அனுப்பப்பட்டன. கடலூர், நாகப்பட்டினம் மற்றும் சென்னை மாவட்டங்களில் முறையே கடலூர் 89 ஆயிரத்து648, நாகப்பட்டினம் 60 ஆயிரத்து 438 மற்றும் சென்னை 38 ஆயிரத்து 230 என அதிக அளவில் ஆமை குஞ்சுகளை அனுப்பியுள்ளன. இந்த ஆண்டு, வனத்துறையிலிருந்து 185 கள ஊழியர்களும் மற்றும் 264 தன்னார்வலர்களும் இந்த பாதுகாப்பு நடவடிக்கையில் தீவிரமாகப் பங்கேற்றனர். இத்துறையின் முயற்சிகளுக்கு வலு சேர்க்கும் வகையில், சென்னை மற்றும் நாகப்பட்டினத்தில் கடல் ஆமைகள் பாதுகாப்பு மையங்களை அமைப்பதாகத் தமிழ்நாடு அரசு ஏற்கனவே அறிவித்துள்ளது குறிப்பிடத்தக்கது. இது இந்த உயிரினங்களுக்கான பாதுகாப்பு முயற்சிகளுக்கு மேலும் உத்வேகம் அளிக்கும் எனத் தமிழக அரசு சார்பில் வெளியிடப்பட்டுள்ள செய்திக் குறிப்பில் தெரிவிக்கப்பட்டுள்ளது. 

Next Story

சிறுத்தை அச்சுறுத்தல்; கார் ஷெட்டுக்குள் தவித்த 5 பேர் மீட்பு 

Published on 14/06/2024 | Edited on 14/06/2024
Leopard threat; Rescue of 5 people trapped inside the car shed

திருப்பத்தூரில் தனியார் பள்ளி ஒன்றில் சிறுத்தை புகுந்த சம்பவம் பரபரப்பை ஏற்படுத்திய நிலையில் சிறுத்தை புகுந்த கார் ஷெட்டுக்குள் இருந்த 5 பேர் பத்திரமாக மீட்கப்பட்டுள்ளனர்.

திருப்பத்தூர் மாவட்ட ஆட்சியர் அலுவலகத்திற்கு அருகிலேயே உள்ள தனியார் பள்ளியில் இன்று மாலை சிறுத்தை ஒன்று புகுந்த சம்பவம் பரபரப்பை ஏற்படுத்தியது. கூண்டு வைத்து சிறுத்தையைப் பிடிக்கும் பணி நடைபெற்று வருகிறது. தொடர்ந்து சிறுத்தை கார் ஷெட் ஒன்றில் தஞ்சம் அடைந்தது. வனப்பகுதிகளே சுற்றிலும் இல்லாத நகர் பகுதியில் சிறுத்தை எவ்வாறு வந்தது என்பது பொதுமக்கள் மற்றும் வனத்துறையினர் இடையே பெரும் குழப்பத்தை ஏற்படுத்தி. இருக்கிறது. இதனால் அந்தப் பகுதியில் உள்ள மக்கள் வெளியே நடமாட வேண்டாம் என அவசர எச்சரிக்கை விடுக்கப்பட்டுள்ளது.

சிறுத்தை புகுந்த அந்த கார் ஷெட்டில் இரண்டு கார்களில் மொத்தமாக ஐந்து பேர் சிக்கி இருந்தனர். சிறுத்தை அச்சுறுத்தலால் 5 மணி நேரத்திற்கு மேலாக காருக்குள்ளேயே இருந்த அவர்கள் வெளியே வர முடியாமல் தவித்து வந்தனர். இந்நிலையில் பலமணிநேர போராட்டத்திற்குப் பின் வனத்துறை உதவியுடன் தற்போது ஐந்து பேரும் மீட்கப்பட்டுள்ளனர். தொடர்ந்து சிறுத்தையை மயக்க ஊசி செலுத்திப் பிடிக்க வனத்துறை தீவிரம் காட்டி வருகிறது. இதனால் அங்கு அதிகப்படியான வனத்துறை அதிகாரிகள் கூடியுள்ளதால் பரபரப்பு ஏற்பட்டுள்ளது.