Skip to main content

சொக்கட்டான்காயாக இருக்கக்கூடாது என தமிழக அரசு - வேல்முருகன்

Published on 24/01/2019 | Edited on 24/01/2019
velmurugan tvk



மேகேதாட் அணை விவகாரத்தில் மூலவேரான மத்திய அரசின் சொக்காயைப் பிடிப்பதற்குப் பதில், அது உருட்டி ஆடும் சொக்கட்டான்காயாக இருக்கக்கூடாது என தமிழக அரசு என தமிழக வாழ்வுரிமைக் கட்சியின் தலைவர் வேல்முருகன் கூறியுள்ளார்.
 

இதுதொடர்பாக அவர் வெளியிட்டுள்ள அறிக்கையில், 
 

கர்நாடக அரசு காவிரியின் குறுக்கே மேகேதாட்டில் அணை கட்டிக்கொள்ள மத்திய அரசு ஒப்புதல் தந்த வழக்கு நேற்று உச்ச நீதிமன்றத்தில் நீதிபதி ஏ.எம்.கன்வில்கர் தலைமையிலான அமர்வு முன்பு விசாரணைக்கு வந்தது. அப்போது கர்நாடக அரசின் வழக்குரைஞர், “கர்நாடக அரசு மேகேதாட் அணை வரைவு செயல்திட்டத்தை அனைத்து விவரங்களுடன் மத்திய அரசிடம் தாக்கல் செய்துள்ளது; அது தொடர்பான பிரமாணப் பத்திரத்தை இங்கு உச்ச நீதிமன்றத்திலும் தாக்கல் செய்திருக்கிறது. எனவே இது தொடர்பான தமிழக அரசின் மனுவை தள்ளுபடி செய்ய வேண்டும்” என்றார். 


“இதற்கு பதில் மனு தாக்கல் செய்ய 4 வார கால அவகாசம் தேவை” என்றார் தமிழக அரசின் வழக்குரைஞர். இதே போல மத்திய அரசின் வழக்குரைஞரும் அவகாசம் கேட்டார். 


இதனை ஏற்றுக்கொண்ட நீதிபதிகள் இருவருக்கும் 4 வார கால அவகாசம் வழங்கி வழக்கை ஒத்திவைத்து உத்தரவு பிறப்பித்தனர்.


இதற்குப் பின் பிற்பகலில், கர்நாடக அரசின் பதில் மனு மீது தமிழக அரசு எதிர் பதில் மனு தாக்கல் செய்தது. அதில், “காவிரி மேலாண்மை ஆணையத்தின் அனுமதி பெறாமல் மேகேதாட்டில் அணை கட்டுவது தொடர்பாக மத்திய அரசுக்கு வரைவு செயல்திட்டத்தை கர்நாடக அரசு தாக்கல் செய்திருப்பது காவிரி நதிநீர் பங்கீடு தொடர்பாக காவிரி நடுவர் மன்றம் மற்றும் உச்ச நீதிமன்றம் பிறப்பித்த உத்தரவுக்கு எதிரானது, அவமதிக்கும் செயலுமாகும். எனவே கர்நாடக அரசு மீது நீதிமன்ற அவமதிப்பு நடவடிக்கை எடுக்க வேண்டும்” என்று கூறியது.


இதேபோன்ற எதிர் பதில் மனுவை மத்திய அரசின் பதில் மனு மீதும் தாக்கல் செய்தது தமிழக அரசு.


இனி பிரச்சனைக்கு வருவோம்; கடந்த 18ந் தேதி மேகேதாட் அணைக்கான விரிவான திட்ட அறிக்கையை கர்நாடக அரசு மத்திய அரசிடம் தாக்கல் செய்துள்ளது. அதில், 9 ஆயிரம் கோடி ரூபாய் மதிப்பில் திட்டத்தை நிறைவேற்ற இருப்பதாக தெரிவிக்கப்பட்டுள்ளது. மேலும், இத்திட்டம் தொடர்பாக தமிழக அரசுக்கு கடிதம் எழுதியும், இதுவரை எந்த பதிலும் வரவில்லை எனவும் கூறப்பட்டுள்ளது. இது குறித்து தமிழக அரசு, தமிழக மக்களுக்குச் சொல்ல வேண்டிய பதில் என்ன?
அதே சமயம், தமிழக அரசைக் கேளாமலேயே மேகேதாட் அணைக்கு ஒப்புதலளித்து, அதன்படி திட்ட அறிக்கையையும் பெற்றுக்கொண்டுள்ளது மத்திய பாஜக அரசு. இது அரசமைப்புச் சட்டம், பொது அறம் எதையுமே கருத்திற் கொள்ளாமல், வஞ்சகம் மற்றும் சூழ்ச்சியுடன் மேற்கொண்ட படுகேவலமான இழிந்த செயல் அல்லவா? இது குறித்து தமிழக அரசு வாய் திறந்ததுண்டா? இதில் தமிழக அரசின் நிலைதான் என்ன?


எனவே மேகேதாட் அணை விவகாரத்தில் மூலவேரான மத்திய அரசின் சொக்காயைப் பிடிப்பதற்குப் பதில், அது உருட்டி ஆடும் சொக்கட்டான்காயாக இருக்கக்கூடாது என தமிழக அரசை எச்சரிக்கிறது தமிழக வாழ்வுரிமைக் கட்சி! இவ்வாறு கூறியுள்ளார். 

 

 

 

சார்ந்த செய்திகள்

Next Story

தொடங்கியது வேட்புமனு பரிசீலனை

Published on 28/03/2024 | Edited on 28/03/2024
Scrutiny of nominations has begun

நாட்டின் 18 ஆவது நாடாளுமன்ற மக்களவைத் தேர்தலுக்கான தேதிகள் அறிவிக்கப்பட்டு, மொத்தமாக ஏழு கட்டங்களாகத் தேர்தல் நடத்தப்படவுள்ள நிலையில், முதற்கட்டமாகத் தமிழ்நாட்டில் ஏப்ரல் 19 ஆம் தேதி வாக்குப்பதிவு நடைபெற இருக்கிறது. இதற்கான வாக்கு எண்ணிக்கை ஜூன் 4 ஆம் தேதி நடைபெறவுள்ளது. ஏற்கெனவே தமிழகத்தில் உள்ள அரசியல் கட்சிகள் தேர்தல் பணியில் தீவிரம் காட்டி வரும் நிலையில், தேர்தல் தேதி அறிவிக்கப்பட்டதால் தேர்தல் களம் அனல் பறக்க ஆரம்பித்துவிட்டது.

நேற்று வேட்புமனு தாக்கல் முடிந்த நிலையில், இன்று வேட்புமனு பரிசீலனை நடைபெற்று வருகிறது. சேலத்தில் திமுக வேட்பாளராக அறிவிக்கப்பட்ட செல்வ கணபதியின் வேட்புமனு நிறுத்தி வைக்கப்பட்டுள்ளது. இரட்டை வாக்குரிமை சர்ச்சை காரணமாக அவருடைய வேட்புமனு நிறுத்தி வைக்கப்பட்டுள்ளது. திருச்சியில் மதிமுக சார்பில் போட்டியிடும் துரை வைகோவின் மனு ஏற்கப்பட்டுள்ளது. திருச்சியில் அமமுக சார்பில் போட்டியிடும் செந்தில்நாதன் வேட்புமனு ஏற்கப்பட்டுள்ளது.

மதுரை தொகுதியில் அதிமுக, பாஜக, நாம் தமிழர் வேட்பாளர்களின் மனுக்கள் ஏற்கப்பட்டுள்ளன. நாமக்கல் தொகுதியில் திமுக, அதிமுக, பாஜக, நாம் தமிழர் கட்சிகளின் வேட்பு மனுக்கள் ஏற்கப்பட்டுள்ளது. மத்திய சென்னையில் போட்டியிடும் திமுக வேட்பாளர் தயாநிதி மாறன் மனு ஏற்கப்பட்டுள்ளது. தென் சென்னையில் போட்டியிடும் திமுக வேட்பாளர் தமிழச்சி தங்கபாண்டியன் மனு ஏற்கப்பட்டுள்ளது. பாஜக வேட்பாளர் வினோத் பி. செல்வம் மனுவை ஏற்றுக்கொள்ளக்கூடாது என திமுக தரப்பு எதிர்ப்பு தெரிவித்துள்ளது. மனுவை முழுமையாகப் பூர்த்தி செய்து தராததால் திமுக எதிர்ப்பு தெரிவித்துள்ளது. வினோத் பி. செல்வத்தின் மனுவை மறு ஆய்வு செய்ய வேண்டும் என திமுக தரப்பு கோரிக்கை வைத்துள்ளதால் பரபரப்பு ஏற்பட்டுள்ளது.

Next Story

'100 நாள் வேலை ஊதியம்' - மத்திய அரசு வெளியிட்ட திடீர் அரசாணை

Published on 28/03/2024 | Edited on 28/03/2024
'100 days of work wages'- Sudden decree issued by the central government

100 நாள் வேலை ஊதியத்தை உயர்த்தி மத்திய அரசு அரசாணை வெளியிட்டுள்ளது.

தமிழகம் மற்றும் புதுச்சேரியில் 100 நாள் வேலைவாய்ப்பு திட்டத்தின் ஊதியத்தை 319 ரூபாயாக உயர்த்தி ஒன்றிய அரசு அரசாணை பிறப்பித்துள்ளது.

தற்பொழுது தேர்தல் நடத்தை விதிகள் அமலில் இருப்பதால் தேர்தல் ஆணையத்தின் அனுமதியைப் பெற்று இந்த அரசாணை வெளியிடப்பட்டுள்ளதாக ஒன்றிய அரசு சார்பில் தெரிவிக்கப்பட்டுள்ளது. மாநிலம் வாரியாக 100 நாள் வேலைத் திட்டத்திற்கான ஊதியத்தை ஏற்கனவே அதிகரித்து மத்திய அரசு அறிவித்து வெளியிட்டிருந்த நிலையில் இதற்கான அரசாணை தற்போது வெளியிட்டுள்ளது.

அண்மையில் மகளிர் தினத்தின் போது சமையல் சிலிண்டர் விலை குறைப்பு நடவடிக்கையில் ஒன்றிய அரசு  ஈடுபட்ட நிலையில், தேர்தல் நேரத்தில் பாஜக அரசு வாக்குகளைப் பெற இதுபோன்ற சலுகைகளை அறிவிப்பதாக எதிர்க்கட்சிகள் குற்றம்சாட்டி வந்தன. இந்நிலையில் தற்போது தேர்தல் தேதி அறிவிக்கப்பட்ட பின்னர் 100 நாள் வேலையின் ஊதியத்தை உயர்த்தி மத்திய அரசு வழங்கியுள்ளதையும் எதிர்க்கட்சிகள் விமர்சித்து வருகின்றன.