Skip to main content

பணி விடுவிப்பு உத்தரவு; தற்கொலைக்கு முயன்ற வி.ஏ.ஓ

Published on 30/05/2024 | Edited on 30/05/2024
VAO who was on leave attempted lost their life

கடலூர் மாவட்டம் காட்டுமன்னார்கோவில் அருகே தொண்டமாநத்தம்  கிராம நிர்வாக அலுவலராக பணியாற்றி வந்தவர் வீரராஜ். இவர் தொண்டமாநத்தம் கிராமத்தில் உள்ள சிலரின் நிலங்களுக்குப் பக்கத்து கிராமத்தில் பயிர் செய்யாத விவசாயிகளுக்கு அடங்கல் வழங்கி காப்பீடு செய்ய உதவி செய்துள்ளார். இது குறித்து பாதிக்கப்பட்ட விவசாயிகள், விவசாய சங்கங்கள், மாவட்ட ஆட்சியர் மற்றும் காட்டுமன்னார்கோவில் காவல் நிலையத்தில் புகார் கொடுத்தனர்.

இந்த நிலையில் புகாரின் அடிப்படையில் மண்டல துணை வட்டாட்சியர், இரண்டு வருவாய் ஆய்வாளர்கள், நான்கு கிராம நிர்வாக அலுவலர்கள், கொண்ட குழுவை அமைத்து பாதிக்கப்பட்ட கிராமத்திற்கு நேரில் சென்று விசாரணை மேற்கொள்ள காட்டுமன்னார்கோவில் வட்டாட்சியரால் அறிவுறுத்தப்பட்டது. இந்தக் குழுவினர் சம்பந்தப்பட்ட கிராமத்திற்கு சென்று விசாரணை மேற்கொண்டதில் போலி அடங்கல் கொடுத்து காப்பீடு செய்யப்பட்டு இருப்பது தெரியவந்தது. மேலும் விசாரணையின் போது கிராம நிர்வாக அலுவலர்  வீரராஜ் பாதிக்கப்பட்ட பொதுமக்களைக் கடுமையாக திட்டித் தகராறு செய்துள்ளார் என்றும் தெரியவந்துள்ளது.

விசாரணைக் குழுவின் பரிந்துரையின் அடிப்படையில் காட்டுமன்னார்கோவில் வட்டாட்சியர் சிவக்குமார், கிராம நிர்வாக அலுவலர் மீது நடவடிக்கை  எடுக்க சிதம்பரம் சார்- ஆட்சியருக்கு பரிந்துரை செய்தார். இந்த நிலையில்  சிதம்பரம் சார்-ஆட்சியர் ராஷ்மிராணி பாதிக்கப்பட்ட பொதுமக்கள், குற்றம் சாட்டப்பட்ட கிராம நிர்வாக அலுவலர் ஆகியோரை அழைத்து  விசாரணை மேற்கொண்டார். இதில் கிராம நிர்வாக அலுவலர் போலி அடங்கல் கொடுத்தது கண்டறியப்பட்டது.

இதனையடுத்து சார்-ஆட்சியர் ராஷ்மிராணி, கிராம நிர்வாக அலுவலர் வீரராஜை  அந்தக் கிராமததில் இருந்து பணி விடுவிப்பு செய்து உத்திரவிட்டார்.  கிராம நிர்வாக அலுவலர் வீரராஜ், தொண்டமாநத்தம் கிராமத்தில் இருந்து பணி விடுவிப்பு செய்யப்பட்டார். இதனை அறிந்த அவர் பூச்சிக்கொல்லி மருந்தைக் குடித்து தற்கொலைக்கு முயன்றுள்ளார். அதன் பின்னர் அவரை மீட்டு காட்டுமன்னார்கோவில் அரசு மருத்துவமனையில்  சேர்த்தனர்.

இதனையடுத்து வருவாய் துறையினரின் தொடர் விசாரணையில் இருந்து மீள்வதற்கும், அதிகாரிகளை மிரட்டுவதற்காக இவர் பூச்சிக் கொல்லி மருந்து குடித்து தற்கொலை செய்து கொள்ள முயன்றதாகக் கூறப்படுகிறது. மேலும் இவர் வேப்பூர் வட்டத்தில் பணிபுரியும் போது இதே போன்று அதிகாரிகளை மிரட்டுவதற்கு பூச்சிக் கொல்லி மருந்து குடித்து தற்கொலை செய்ய முயன்று நாடகமாடிய சம்பவம் நடந்ததாகவும் கூறப்படுகிறது.  இந்தப் பிரச்சனையில்  மாவட்ட ஆட்சியர் உரிய நடவடிக்கை எடுக்க வேண்டும் என்பதே தொண்டமாநத்தம் கிராம மக்களின் எதிர்பார்ப்பாக உள்ளது.

 

சார்ந்த செய்திகள்

 

Next Story

காப்பகத்தில் புதைக்கப்பட்ட உடல்கள்; நீலகிரியில் அதிர்ச்சி சம்பவம்!

Published on 09/07/2024 | Edited on 09/07/2024
The Kundaladi shelter near Kudalur in the Nilgiris district

நீலகிரி மாவட்டம் கூடலூர் அருகே உள்ள குந்தலாடி என்ற இடத்திற்கு அருகில் உள்ள வெக்கி என்ற கிராமத்தில் அகத்தியன் என்பவர் மனநலம் பாதிக்கப்பட்டவர்களைப் பாதுகாக்கக் கூடிய காப்பகம் ஒன்றை நடத்தி வந்துள்ளார். 25 ஆண்டுகளுக்கு மேலாக இந்த காப்பகம் செயல்பட்டு வருவதாகக் கூறப்படுகிறது. இருப்பினும் இந்த காப்பகம் செயல்பட்டு வருவதற்கு எந்த உரிமமும் பெறாமல் நடத்தி வந்துள்ளது என்ற அதிர்ச்சி தகவல் வெளியாகி உள்ளது.

கடந்த வாரம் நீலகிரி மாவட்ட ஆட்சித் தலைவர் தலைமையில் நடைபெற்ற கூட்டம் ஒன்றில் இது தொடர்பாகப் புகார் ஒன்று அளிக்கப்பட்டுள்ளது. இதனையடுத்து இந்த காப்பகத்தில் ஆய்வு நடத்தக் கூடலூர் வருவாய்க் கோட்டாட்சியருக்கும், தேவாலா காவல் துணை கண்காணிப்பாளருக்கும் உத்தரவிடப்பட்டது. இதன் அடிப்படையில் நேற்று (08.07.2024) சம்பந்தப்பட்ட இடத்திற்குச் சென்று அதிகாரிகள் ஆய்வு செய்தனர். அப்போது உரிமம் ஏதும் இல்லாமல் காப்பகம் செயல்பட்டு வந்து தெரிய வந்துள்ளது.

அதே சமயம் காப்பகத்தில் பராமரிக்கப்பட்டு வந்த மனநலம் பாதிக்கப்பட்ட குழந்தைகளுக்கு அடிப்படை வசதி எதுவும் இல்லை என்பதும் தெரிய வந்தது. மேலும் காப்பகத்தில் உடல்நிலை பாதிக்கப்பட்டு இறந்த 20க்கும் மேற்பட்டவர்களின் உடலை அரசு அதிகாரிகளுக்குத் தெரியாமல் காப்பகத்திற்குச் சொந்தமான இடத்தில் புதைத்தது தெரிய வந்துள்ளது இதனையடுத்து இன்று (09.07.2024) ஆய்வு மேற்கொள்ளப்பட்டு அங்கு இருந்த 13 சிறுவர்கள் மீட்கப்பட்டுப் பாதுகாப்பான இடத்தில் தங்க வைக்கப்பட்டுள்ளனர்.

அரசு அதிகாரிகளுக்குத் தெரியப்படுத்தாமல் 20 பேரின் உடல்கள் புதைக்கப்பட்டது தொடர்பாகக் கிராம நிர்வாக அலுவலர் சண்முகம் நெலாக்கோட்டை காவல் நிலையத்தில் புகார் ஒன்றை அளித்துள்ளார் அந்த புகாரின் அடிப்படையில் காவல் நிலையத்தில் வழக்குப் பதிவு செய்யப்பட்டிருக்கிறது. இறந்தவர்கள் 20 பேர் யார் என்று குறித்து விரைவில் போலீசார் விசாரணை நடத்துவார்கள் எனக் கூறப்படுகிறது. மேலும் இறந்தவர்களின் உடல் உறுப்புகள் விற்பனை செய்யும் முயற்சி ஏதும் நடைபெற்றதா என்று கோணத்திலும் போலீசார் விசாரணை தொடங்க உள்ளதாகக் கூறப்படுகிறது. 

Next Story

மருத்துவமனையில் இருந்து வீடு திரும்பினார் அத்வானி!

Published on 04/07/2024 | Edited on 04/07/2024
Advani returned home from the hospital

பாஜகவின் மூத்த தலைவர் எல்.கே. அத்வானிக்கு (வயது 96) வயது முதிர்வு காரணமாக ஏற்பட்ட உடல்நலக் குறைவு மற்றும் சிறுநீரக பாதிப்புகளால் அவருக்கு வீட்டிலேயே தொடர்ந்து மருத்துவ சிகிச்சைகள் அளிக்கப்பட்டு ஓய்வு எடுத்து வருகிறார். இத்தகைய சூழலில் தான் கடந்த ஜூன் 26 ஆம் தேதி இரவு அவரது உடல்நிலை கடுமையாகப் பாதிக்கப்பட்டது. இதனால் அவர் டெல்லி எய்ம்ஸ் மருத்துவமனையில் உடனடியாக சிகிச்சைக்காக அனுமதிக்கப்பட்டார். அங்கு அவருக்கு மருத்துவர்கள் தீவிர சிகிச்சை அளித்து வந்தனர்.

இதனையடுத்து எய்ம்ஸ் மருத்துவர்கள் அளித்த சிகிச்சையால் எல்.கே. அத்வானியின் உடல் நிலையில் முன்னேற்றம் ஏற்பட்டது. அதனைத்தொடர்ந்து அவர் வீட்டிற்கு அழைத்துச் செல்லப்பட்டார். இந்நிலையில் அத்வானி டெல்லியில் உள்ள அப்பல்லோ மருத்துவமனையில் நேற்று இரவு (03.07.2024) இரவு சிகிச்சைக்காக அனுமதிக்கப்பட்டார். அவரது உடல் நிலை சீராக இருப்பதாகவும், தொடர்ந்து அவருக்குச் சிகிச்சை அளிக்கப்பட்டு வருவதாகவும் மருத்துவமனை நிர்வாகம் தெரிவித்திருந்தது.

இது குறித்து அப்பல்லோ மருத்துவமனை சார்பில் தெரிவிக்கையில், “பாஜக மூத்த பாஜக தலைவர் லால் கிருஷ்ண அத்வானி இரவு 9 மணியளவில் டாக்டர் வினித் சூரியின் கண்காணிப்பில் அப்பல்லோ மருத்துவமனையில் அனுமதிக்கப்பட்டார். அவர் தொடர்ந்து மருத்துவ கண்காணிப்பில் உள்ளார். அவர் உடல் நிலை சீராக உள்ளது” எனத் தெரிவிக்கப்பட்டது. மேலும் அத்வானியின் உடல்நிலை குறித்து பாஜக தலைவர்கள் மருத்துவமனை நிர்வாகத்திடம் தொலைப்பேசி வாயிலாகக் கேட்டறிந்தனர். இந்நிலையில் அத்வானி டெல்லி அப்பல்லோ மருத்துவமனையில் இருந்து இன்று (04.07.2024) மாலை டிஸ்சார்ஜ் செய்யப்பட்டார்.