Skip to main content

அனுமதி இல்லாத பார்.. வழிப்பறியில் இறங்கும் இளைஞர்கள்.. நடவடிக்கை எடுக்குமா போலீஸ்?

Published on 10/06/2023 | Edited on 10/06/2023

 

Unlicensed bars.. Youths who go on the streets.. Will the police take action?

 

புதுக்கோட்டை மாவட்டத்தில் 140க்கு 80 டாஸ்மாக் கடைகளில் பார் அனுமதி இல்லை. ஆனால், தடையின்றி பார் நடப்பதுடன் இரவு பகலாக மது விற்பனையும் நடக்கிறது. இந்த அனுமதிக்கப்படாத பார்களிலும் அரசுக்கு வரவேண்டிய தொகையை விட 2 மடங்கு கூடுதல் கட்டணத்தை யாரோ வசூல் செய்து செல்கிறார்கள். அதனால் எந்த அதிகாரியும் கண்டுகொள்வதில்லை. இதனால் சட்ட ஒழுங்கு பிரச்சனைகளும் அதிகரித்து வருகிறது.

 

சில நாட்களுக்கு முன்பு ஆலங்குடி சப்-டிவிசன் வடகாடு காவல் எல்லையில் உள்ள வானக்கண்காடு டாஸ்மாக் கடையில் அனுமதி இல்லாத பாரில் காலை நேர மது விற்பனையில் ஈடுபட்ட பரிமளம் என்பவரை போலீசார் கைது செய்தனர். அப்போது அந்த பாரின் உரிமையாளர் மதியழகன் காவலரை தனது காலணியால் தாக்க முயன்றார். இந்தச் சம்பவம் தொடர்பான வீடியோ சமூக வலைதளங்களில் வேகமாகப் பரவியது. அதன் பிறகு அவர் மீது 5 பிரிவுகளில் வழக்குப்பதிவு செய்த வடகாடு காவல் நிலையம், மதியழகனை இன்னும் கைது செய்யவில்லை. 

 

இதே போல அறந்தாங்கி அருகே துரையரசபுரத்தில் உள்ள டாஸ்மாக் கடையில் அனுமதி இல்லாத பாரில் மது அருந்தும் சிலர், அந்த சாலையின் வழியாக செல்வோரிடம் வம்பிழுத்து அவர்களை தாக்கும் சம்பவங்களும் நடந்துள்ளன. நேற்று இரவு பஞ்சாத்தி ஆனந்த் என்பவர் தன்னிடம் வேலை செய்தவர்களுக்கு சம்பளம் கொடுக்க அந்தச் சாலை வழியாக சென்றுள்ளார். அப்போது அந்த அனுமதி பெறாத பாரில் மது அருந்திவிட்டு வெளியே வந்த சிலர், ஆனந்தை தாக்கி அவரிடம் இருந்த பணத்தை வழிப்பறி செய்துள்ளனர். இதனால், அந்தக் கிராம மக்கள் திரண்டு சாலை மறியல் செய்துள்ளனர்.

 

சாலை மறியலில் இருந்த கிராம மக்கள் கூறும் போது, “அனுமதி பெறாத பாரில் எந்த நேரமும் மது விற்பனை நடக்கிறது. இதனால் அடிக்கடி சட்ட ஒழுங்கு பிரச்சனை நடந்தாலும் போலீசார் கண்டுகொள்வதில்லை. அதன் விளைவு தான் இன்று ஆனந்த் தாக்கப்பட்டது. சாலை மறியலுக்கு பிறகு வந்த போலீசார் தாக்கியவர்களை கைது செய்யாமல் எங்களிடம் வந்து சமாதானம் பேசுகிறார்கள். இந்தப் பகுதியில் உள்ள அரசு நிறுவனங்களில் படிக்கும் மாணவர்களை குறிவைத்து கஞ்சா விற்பனையும் அதிகரித்துள்ளது. இதனை போலீசார் தெரிந்தும் தெரியாதது போல உள்ளனர். இதனால் பெரிய விபரீதங்கள் ஏற்படும் முன்பே நடவடிக்கை எடுத்தால் நல்லது” என்றனர். ஆனந்தை தாக்கியவர்களை கைது செய்வதாக போலீசார் உறுதி அளித்த பிறகு சாலை மறியல் கைவிடப்பட்டது.

 

 

சார்ந்த செய்திகள்

 

Next Story

காலி மது பாட்டில்களைத் திரும்பப்பெறும் திட்டம்; டாஸ்மாக் நிர்வாகம் புதிய தகவல்!

Published on 05/07/2024 | Edited on 05/07/2024
Tasmac New Information about Empty Bottle Take Back Scheme

டாஸ்மாக் மதுபானக் கடைகள் மூலம் வனப்பகுதிகள் மற்றும் மலைப்பிரதேசங்களில் அமைந்துள்ள சுற்றுலா தளங்கள் உள்ளிட்ட பல்வேறு மாவட்டங்களில் காலி மதுபானப் பாட்டில்களைத் திரும்பப் பெறும் திட்டம் செயல்படுத்தப்பட்டு வருகிறது. இந்த திட்டத்தின் படி மதுபானத்தின் விலையை விடக் கூடுதலாக பத்து ரூபாய் செலுத்தி மதுபானப் பாட்டில்களை வாங்கிவிட்டு அதன் பின்னர் காலி மதுபானப் பாட்டில்களை டாஸ்மாக் கடைகளில் திரும்ப ஒப்படைக்கும்போது  கூடுதலாக வசூலிக்கப்பட்ட 10 ரூபாயைத் திரும்பப் பெற்றுக்கொள்ளலாம் என்பதாகும்.

இது தொடர்பான வழக்கு சென்னை உயர் நீதிமன்ற நீதிபதிகள் பரத சக்ரவர்த்தி, சதிஷ்குமார் ஆகியோர் அடங்கிய அமர்வில் இன்று (05.07.2024) விசாரணைக்கு வந்தது. அப்போது மனுதாரர் தரப்பில், “இந்த திட்டத்தின் மூலம் அரசுக்கு 250 கோடி ரூபாய் வருவாய் கிடைக்க வாய்ப்பு உள்ளது” எனத் தெரிவிக்கப்பட்டது. இதனைக் கேட்டறிந்த நீதிபதிகள் தமிழகத்தில் ஒரு நாளைக்கு எத்தனை மதுபானப்பாட்டில்கள் விற்பனை செய்யப்படுகிறது எனக் கேள்வி எழுப்பினர். 

Tasmac New Information about Empty Bottle Take Back Scheme

அதற்கு டாஸ்மாக் நிர்வாகம் சார்பில், “ஒரு நாளைக்குச் சராசரியாக 70 லட்சம் பாட்டில்கள் விற்பனை செய்யப்படுகிறது” எனத் தெரிவிக்கப்பட்டது. இதனையடுத்து தமிழகம் முழுவதும் இந்த திட்டத்தை அமல்படுத்த நீதிபதிகள் உத்தரவிட்டனர். அதோடு இத்திட்டம் மூலம் கணிசமான வருவாயும் ஈட்டமுடியும் என நீதிபதிகள் தெரிவித்தனர். அப்போது டாஸ்மாக் நிறுவனம் சார்பில், “தமிழகம் முழுவதும் செப்டம்பர் மாதம் முதல் இத்திட்டம் நடைமுறைப்படுத்தப்படும்” எனத் தெரிவிக்கப்பட்டது. இதனைப் பதிவு செய்துகொண்ட நீதிபதிகள் வழக்கு விசாரணையை ஆகஸ்ட் 7 ஆம் தேதிக்கு ஒத்திவைத்தனர். 

Next Story

விக்கிரவாண்டி இடைத்தேர்தல்; மாவட்ட ஆட்சியர் அதிரடி உத்தரவு!

Published on 04/07/2024 | Edited on 04/07/2024
Vikravandi by-election District Collector action order

விழுப்புரம் மாவட்டத்தில் உள்ள விக்கிரவாண்டி சட்டமன்றத் தொகுதியில் திமுக சார்பில் போட்டியிட்டு வெற்றி பெற்றவர் புகழேந்தி. இவர் கடந்த ஏப்ரல் 6 ஆம் தேதி (06.04.2024) உடல்நலக் குறைவால் காலமானார். இவர் மறைந்ததைத் தொடர்ந்து விக்கிரவாண்டி சட்டமன்றத் தொகுதிக்கு ஜூலை 10 ஆம் தேதி இடைத்தேர்தல் நடைபெறும் எனத் தேர்தல் ஆணையம் அறிவித்திருந்தது. இந்த இடைத்தேர்தலில் திமுக சார்பில் அன்னியூர் சிவா, நாம் தமிழர் கட்சி சார்பில் அபிநயா பாஜக கூட்டணியில் உள்ள பாமக சார்பில் அக்கட்சியின் மாநிலத் துணைத் தலைவர் சி.அன்புமணி ஆகியோர் போட்டியில் உள்ளனர். இதனையொட்டி அரசியல் கட்சியினர் தீவிர பிரசாரம் மேற்கொண்டு வருகின்றனர்.

அதே சமயம் அதிமுக, தேமுதிக ஆகிய இருகட்சிகளும் இந்த இடைத்தேர்தலைப் புறக்கணிக்கிறது எனத் தெரிவிக்கப்பட்டிருந்தது. மேலும் தவெக தலைவரும், நடிகருமான விஜய் விக்கிரவாண்டி இடைத்தேர்தலில் தமிழக வெற்றிக் கழகம் போட்டியிடாது என்றும், எந்தக் கட்சிக்கும் ஆதரவு இல்லை என்றும் தெரிவித்திருந்தார். இத்தகைய சூழலில்தான் இடைத்தேர்தல் முன்னிட்டு, விக்கிரவாண்டி வட்டாட்சியர் அலுவலகத்தில், தேர்தல் பணிகளில் ஈடுபடும் காவலர்களுக்கான அஞ்சல் வாக்குப்பதிவு பணிகள் நடைபெற்று வருகிறது. இதனை மாவட்ட தேர்தல் அலுவலரும் மாவட்ட ஆட்சித்தலைவருமான சி. பழனி இன்று (04.07.2024) நேரில் பார்வையிட்டு ஆய்வு செய்தார்.

இந்நிலையில் விக்கிரவாண்டி தொகுதி இடைத்தேர்தல் காரணமாக 4 நாட்கள் விழுப்புரம் மாவட்டத்தில் டாஸ்மாக் கடைகள் மூடப்படும் என மாவட்ட ஆட்சியர் அறிவித்துள்ளார். வரும் 10 ஆம் தேதி வாக்குப்பதிவு நடக்க உள்ள நிலையில் 8 ஆம் தேதி முதல் 13ஆம் தேதி வரை என 4 நாட்கள் டாஸ்மாக் கடைகள், தனியார் மதுபானக் கூடங்கள் மூடப்பட உள்ளன என ஆட்சியர் பழனி தெரிவித்துள்ளார்.