மத்திய உள்துறை அமைச்சர் அமித்ஷா சென்னை வந்தடைந்தார்!

தமிழகத்தில் சட்டப்பேரவை தேர்தல் நெருங்கும் சூழலில் மத்திய உள்துறை அமைச்சர் அமித்ஷா சென்னை வந்தடைந்தார்.

இரண்டு நாள் அரசு முறை பயணமாக டெல்லியில் இருந்து தனி விமானம் மூலம் சென்னை விமான நிலையம் வந்தடைந்த மத்திய உள்துறை அமைச்சர் அமித்ஷாவை தமிழக முதல்வர் எடப்பாடி பழனிசாமி, துணை முதல்வர் ஓ.பன்னீர் செல்வம், அமைச்சர்கள் தங்கமணி, வேலுமணி, செங்கோட்டையன் ஜெயக்குமார், கே.பி.அன்பழகன், பென்ஜமின், பாண்டியராஜன், தலைமைச் செயலாளர் சண்முகம் மற்றும் பா.ஜ.க. மாநில தலைவர் எல்.முருகன், ஹெச்.ராஜா, சி.டி.ரவி, பொன்.ராதாகிருஷ்ணன் உள்ளிட்டோர் வரவேற்றனர்.

விமான நிலையத்தில் இருந்து அமித்ஷா ஓட்டலுக்கு செல்லும் வழியில் பா.ஜ.க., அ.தி.மு.க.வினர் உற்சாக வரவேற்பு அளித்தனர். அ.தி.மு.க.வினர் கட்சி கொடியுடனும், ஆடல், பாடல் நிகழ்ச்சியுடனும் உற்சாகத்துடன் வரவேற்றனர்.

சென்னை கலைவாணர் அரங்கில் மாலை 04.00 மணிக்கு நடக்கும் அரசு விழாவில் மத்திய உள்துறை அமைச்சர் அமித்ஷா பங்கேற்கிறார். விழாவில் ரூபாய் 67,378 கோடி மதிப்பிலான திட்டங்களுக்கு காணொளி மூலம் அடிக்கல் நாட்டுகிறார்.

மத்திய உள்துறை அமைச்சர் அமித்ஷாவின் சென்னை வருகையையொட்டி பாதுகாப்பு பலப்படுத்தப்பட்டுள்ளது.