Skip to main content

பாலியல் தொல்லை என கதறி வீடியோ வெளியிட்ட விடுதி வார்டன்... நடந்தது என்ன?

Published on 14/02/2020 | Edited on 14/02/2020

அரசு பெண் விடுதி வார்டன் வரலட்சுமி என்பவர் கதறி அழுதபடி வெளியிட்ட சில தினங்களுக்கு முன்பு வைரல் ஆனது. அதில் "தொடர் தொல்லைகள், மொட்டை புகார்கள் மீது அதிகாரிகள் விசாரணை என்று டார்ச்சர் என்னால் தாங்க முடியவில்லை. இதனால் என் பணியையும் செய்ய முடியவில்லை. குடும்பத்தையும் பார்க்க முடியவில்லை. தற்கொலை செய்து கொள்ளலாமா என்று தோன்றுகிறது" என்று குறிப்பிட்டிருந்தார். 

 

Ulundurpettai hostel Watan issue

 



இந்த வீடியோ விவகாரம் கூறித்து லட்சுமியிடமே நாம் கேட்டோம். அதற்கு "கள்ளக்குறிச்சி மாவட்டம் தியாகதுருகம் மாவட்ட பிற்பட்டோர் நல அரசு பெண்கள் பள்ளி விடுதி வார்டனாக பணி செய்து வருகிறேன். கடந்த 2018 முதல் என் மீது மொட்டை புகார்கள் அனுப்பி வருகின்றனர். அந்த புகார்கள் மீது அதிகாரிகள் விசாரணை என்ற பெயரில் வந்து மாணவிகள் முன்பு என்னை மரியாதைக்குறைவாக பேசுகிறார்கள். இதனால் விடுதி பிள்ளைகள் கூட ஏளனமாகப் பார்க்கும் நிலை உள்ளது. 

இதற்கெல்லாம் காரணம் உளுந்தூர்பேட்டையில் விடுதி வார்டனாக உள்ள முருகேசன் என்பவர் தான் நான் கடந்த எட்டு ஆண்டுகளாக போதக விடுதி காப்பாளர் சங்கத்தில் அங்கத்தினராக இருந்தேன். அதே சங்கத்தின் மாநில துணைத் தலைவராக இருந்து வரும் முருகேசன் அடிக்கடி எனக்கு பாலியல் தொந்தரவு கொடுத்து வந்தார். அவர் தொல்லை தாங்க முடியாமல் அந்த சங்கத்தை விட்டு வெளியேறி விட்டேன்.

 



ஆனாலும் முருகேசனின் தொல்லைகள் இன்றுவரை தொடர்ந்து கொண்டே உள்ளது. அவருக்கு வேண்டியவர்கள் மூலம் பொய்யான பெயர்களில் என் மீது மொட்டை புகார்களை அதிகாரிகளுக்கு எழுதியபடியே உள்ளனர். அந்த புகார் பொய்யானது போலியானது என்று தெரிந்தும் கூட அதிகாரிகள் விசாரணை என்ற பெயரில் என்னை பணி செய்ய விடாமல் தொந்தரவு அளித்து வருகிறார்கள். இது சம்பந்தமாக முருகேசன் மீது நான் எழுதிய புகார்கள் என் புகார்கள் மீதான விளக்கங்கள் என அதிகாரிகளுக்கு கட்டுக்கட்டாக எழுதினேன். யாரோ எழுதும் புகார்களை விசாரிக்கும் அதிகாரிகள் நான் எழுதும் புகார்கள் பற்றி கண்டு கொள்வதில்லை.

காரணம் முருகேசன் சங்கத்தின் மாநில பொறுப்பில் இருந்து கொண்டு எனது புகார் விளக்கங்களை அதிகாரிகள் மூலம் தடுத்து எனக்கு எதிராக திசை திருப்பி விடுகிறார். இதனால் விடுதி பணியையும் செய்ய முடியவில்லை. என் பிள்ளைகளையும் குடும்பத்தையும் கவனிக்க முடியவில்லை. விசாரணை என்ற பெயரில் டார்ச்சரை தாங்கமுடியாமல் தற்கொலை கூட செய்து கொள்ளலாம் என தோன்றுகிறது. ஏனென்றால் பெண்களை கேவலமான பிறவியாக தவறானவர்களாக சித்தரிக்கப் பார்க்கிறார்கள். இதை தாங்க முடியாமல்தான் வீடியோவில் பேசி என் ஆதங்கத்தை தெரியப்படுத்தினேன்" என தெரிவித்தார். 

 



கள்ளக்குறிச்சி விழுப்புரம் ஆகிய ஒருங்கிணைந்த மாவட்டத்தில் பல விடுதிகள் உள்ளன. இதுபோன்ற விசாரணை நடவடிக்கை என எங்கும் நடப்பது இல்லை. ஆனால் லட்சுமி மீது மட்டும் கடந்த இரண்டு ஆண்டுகளாக பொய் புகார்கள். அதன் மீது அதிகாரிகளின் தொடர் விசாரணை என துரத்த காரணம் என்ன? அந்த முருகேசன்  தான் என்கிறார்கள் இத்துறையில் பணி செய்யும் சில ஊழியர்கள். மேலும் மாவட்ட அதிகாரிகளாக யார் வந்தாலும் அவர்கள்  சங்கத்தின் பொறுப்பாளர்கள் பேச்சை மட்டுமே கேட்கிறார்கள். அவர்கள் சொல்வதை மட்டுமே  நம்புகிறார்கள் என்றும் தெரிவித்தனர்.  

இந்நிலையில் முருகேசனிடமே இந்த குற்றச்சாட்டு குறித்து கேட்டோம். அவர், "லட்சுமி மீது பொய்யான பலரை ஏவிவிட்டு நான் புகார் அனுப்பி வருவதாக அவர் கூறுகிறார். அவர் என் மீது அபாண்டமான பொய்யான குற்றச்சாட்டை கூறுகிறார். இதேபோன்று கடந்த ஆண்டு தியாகதுருகம் போலீசில் நான் பாலியல் தொந்தரவு அளிப்பதாக பொய்யான புகார் அளித்தார். போலீசார் எங்கள் இருவரையும் அழைத்து விசாரணை செய்தனர். அப்போது லட்சுமி சமாதானமாக போவதாக எழுதிக் கொடுத்துவிட்டு சென்று விட்டார். மேலும் என் மீது தேசிய பெண்கள் உரிமை ஆணையத்தில் லட்சுமி புகார் கொடுத்துள்ளார்.அங்கும் விசாரணை நடைபெற்று வருகிறது.

யார் யாரோ அவர் மீது எழுதும் புகார்களுக்கு எல்லாம் நான்தான் காரணம் என்று அவர் கூறுகிறார். மிகவும் தவறான குற்றச்சாட்டு நிச்சயமாக நான் அப்படிப்பட்ட செயல்கள் செய்பவன் இல்லை. இதுபற்றி  லட்சுமி அவர்களிடம் நேரடியாகவே கூறியுள்ளேன். எனக்கும் உன் மீது அனுப்பும் புகார்களுக்கு நான் காரணமில்லை என்று விளக்கம் சொல்லியும் அவர் வேண்டுமென்றே என் மீது பழி போடுகிறார். எனக்கு மனைவி இரு பெண், ஒரு ஆண் என பிள்ளைகள் குடும்பம் உள்ளது. அப்படி உள்ள நான் இப்படிப்பட்ட இழிவான செயலை செய்வேனா? இந்த பிரச்சினையால் என் குடும்பத்தில் குழப்பம் எனக்கு மன உளைச்சல் ஏற்பட்டுள்ளது" என்கிறார்.

 

 

சார்ந்த செய்திகள்

Next Story

மனைவிக்கு ஆபாச வீடியோ அனுப்பிய கணவருக்கு சிறை; நீதிமன்றம் அதிரடி தீர்ப்பு!

Published on 20/03/2024 | Edited on 20/03/2024
 The court action decision for Husband jailed for sending video to wife

கர்நாடகா மாநிலம், பெங்களூர் ராஜாஜி நகரில் உள்ள தனியார் நிறுவனத்தில் 36 வயது மிக்க இளைஞர் ஒருவர் வேலை பார்த்து வருகிறார். அவருக்கும், தனியார் நிறுவனத்தில் வேலை பார்த்து வந்த ஒரு பெண்ணுக்கும் கடந்த 2016 ஆம் ஆண்டு திருமணம் நடைபெற்றது. திருமணமான சிறிது நாளிலேயே, கணவன் மனைவி இருவருக்கும் இடையே அடிக்கடி வாக்குவாதம் ஏற்பட்டு வந்துள்ளது. அதனால் அந்த பெண், கணவரிடம் இருந்து விவாகரத்து கேட்டுள்ளார். ஆனால், கணவர் விவாகரத்து தரவில்லை என்று கூறப்படுகிறது. 

இதில் மனமுடைந்த அந்த பெண் பிரிந்து வாழ்ந்து வந்தார். இதற்கிடையே, அந்த பெண் வெளிநாட்டில் உள்ள தனியார் நிறுவனத்தில் வேலை பார்த்து வந்துள்ளார். இந்த நிலையில், அந்த பெண்ணுக்கு அவரது கணவர் மின்னஞ்சல் மூலம் ஆபாச வீடியோக்களை அனுப்பி, ஆபாசமான குறுந்தகவல்களையும் அனுப்பி வந்துள்ளார். இதில் கோபமடைந்த அந்த பெண், இந்த விவகாரம் குறித்து பெங்களூரில் வசித்து வரும் தனது சகோதரரிடம் கூறியுள்ளார். அதன் பேரில், அந்த பெண்ணின் சகோதரர் பெங்களூர் போலீசில் புகார் அளித்துள்ளார். 

இதனையடுத்து, வெளிநாட்டில் இருந்து பெங்களூர் வந்த பெண், கணவர் அனுப்பிய ஆபாச வீடியோக்கள் தொடர்பானது குறித்து தனது கணவர் மீது போலீசில் புகார் அளித்துள்ளார். அவர் அளித்த அந்த புகாரின் பேரில், போலீசார் வழக்குப்பதிவு செய்து விசாரணை நடத்தி வந்தனர். அவர்கள் நடத்திய விசாரணையின் அடிப்படையில், தனியார் நிறுவன ஊழியரை போலீசார் கைது செய்தனர்.

மேலும், இது தொடர்பான வழக்கு பெங்களூர் நீதிமன்றத்தில் விசாரணை நடைபெற்று வந்தது. அந்த வழக்கு விசாரணை முடிவடைந்த நிலையில், நேற்று (19-03-24) நீதிமன்றம் பரபரப்பு தீர்ப்பை அளித்தது. அதில், விவாகரத்து கேட்டு பிரிந்து வாழும் மனைவிக்கு ஆபாச வீடியோக்களை அனுப்பி மன உளைச்சல் ஏற்படுத்தியது உறுதியானதால், தனியார் நிறுவன ஊழியருக்கு ஒரு மாதம் சிறைத் தண்டனையும், ரூ.45,000 அபராதமும் விதித்து தீர்ப்பளித்து உத்தரவிட்டது.

Next Story

“எங்களை காப்பாற்றுங்கள்” - ரஷ்ய ராணுவத்தால் கதறும் இந்தியர்கள்

Published on 07/03/2024 | Edited on 07/03/2024
 Indian tourists shouts Save us from Russia

உக்ரைன் - ரஷ்யா இடையே, கடந்த 2 ஆண்டுகளுக்கும் மேலாக போர் சூழ்நிலை உருவாகி நீடித்து வரும் நிலையில் மீண்டும் ரஷ்யா தீவிர தாக்குதலை உக்ரைன் மீது தொடுத்து வருகிறது. இந்த நிலையில், ரஷ்யாவுக்கு சுற்றுலா சென்ற இந்தியர்கள் உக்ரைன் எல்லையில் சிக்கியிருப்பதாக அவர்கள் வெளியிட்ட வீடியோ தற்போது சமூக வலைத்தளங்களில் வைரலாகி வருகிறது.

அந்த வீடியோவில், 7 இந்தியர்கள் ரஷ்ய ராணுவ உடைகள் அணிந்து பேசியதாவது, “கடந்த ஆண்டு டிசம்பர் 27ஆம் தேதி புத்தாண்டை கொண்டாடுவதற்காக ரஷ்யாவிற்கு சுற்றுலா பயணிகளாக வந்தோம். வெவ்வேறு இடங்களுக்குச் செல்ல எங்களுக்கு உதவிய ஒரு ஏஜெண்டை நாங்கள் சந்தித்தோம். அதன் பின்னர், அந்த ஏஜெண்ட் எங்களை பெலாரஸுக்கு அழைத்துச் செல்ல முன்வந்தார். ஆனால், அங்கு விசாவுடன் தான் செல்ல வேண்டுமென்று எங்களுக்கு தெரியாது. 

அதன் பின், நாங்கள் பெலாரஸுக்குச் சென்றோம். அங்கு நாங்கள் அவருக்கு பணம் கொடுத்தோம். ஆனால், அவர் அதிக பணம் கேட்டார். எங்களிடம், அவர் கேட்ட பணம் இல்லாததால் எங்களை நெடுஞ்சாலையில் விட்டுவிட்டு சென்றுவிட்டார். அதன் பின்னர், அங்கு வந்த போலீசார், எங்களை பிடித்து ரஷ்ய ராணுவத்திடம் ஒப்படைத்துவிட்டனர். ரஷ்ய இராணுவம் எங்களை தெரியாத இடத்தில் மூன்று, நான்கு நாட்கள் அடைத்து வைத்தது. பின்னர் உதவியாளர்கள், ஓட்டுநர்கள் மற்றும் சமையல்காரர்களாக பணிபுரிய எங்களை ஒப்பந்தத்தில் கையெழுத்திட வற்புறுத்தினார்கள். ஒருவேளை கையெழுத்து போடவில்லையென்றால், எங்களை 10 ஆண்டுகள் சிறையில் அடைத்து விடுவோம் என அவர்கள் மிரட்டினார்கள். 

அந்த ஒப்பந்தம், அவர்களின் மொழியில் இருந்ததால், அது எங்களுக்கு புரியவில்லை. ஆனால், நாங்கள் அதில் கையெழுத்திட்டோம். அதன் பிறகு, அவர்கள் எங்களை ராணுவப் பயிற்சி மையத்தில் சேர்த்தனர். பின்னர் தான், நாங்கள் ஏமாற்றப்பட்டது தெரியவந்தது. அவர்கள் எங்களை ராணுவத்தில் சேர்த்து பயிற்சி கொடுத்தனர். 

ஒரு வருடத்திற்குப் பிறகுதான் நாங்கள் வெளியேற முடியும் என்று ரஷ்ய இராணுவம் எங்களிடம் கூறுகிறது. உக்ரைன் எல்லையில் எங்களை இறக்கிவிட்டு துப்பாக்கியுடன் முன்னேறிச் செல்லுங்கள் என்று உத்தரவிட்டனர். அவர்கள், இந்த போரில், வெற்றிபெற உதவுமாறு எங்களைக் கேட்கிறார்கள். நாங்கள் போருக்கு தயாராகவில்லை. அவர்களுக்கு எப்படி உதவுவது என்று எங்களுக்குத் தெரியவில்லை. இதில், நாங்கள் பிழைக்காமல் கூட போகலாம். இது எங்கள் கடைசி வீடியோவாக இருக்கலாம். அதனால், எங்களை காப்பாற்றுங்கள்” என்று தெரிவித்தனர். 

இதனிடையே, ரஷ்யா சார்பில் உக்ரைனுக்கு எதிரான போரில் ஈடுபடுத்தப்பட்ட இந்தியர் ஒருவர் பரிதாபமாக உயிரிழந்துள்ளார். அவர் தெலங்கானா மாநிலம், ஹைதராபாத்தைச் சேர்ந்த முகமது அஸ்பன் என தெரியவந்துள்ளது. மேலும், அந்த 7 பேர் யார் என்பது குறித்த விசாரணையில், ககான்தீப் சிங் (24), லவ்பீரித் சிங் (24), நரேன் சிங் (22), குர்பீரித் சிங் (21), குர்பீர்த் சிங் (23), ஹர்ஸ் குமார் (20), அபிஷேக் குமார் (21) எனத் தெரியவந்தது. இதனையடுத்து, அந்த 7 இந்தியர்களை மீட்க அனைத்து முயற்சிகளையும் இந்திய அரசு செய்யும் என இந்திய வெளியுறவுத் துறை அமைச்சகம் தெரிவித்துள்ளது.