Skip to main content

தன் அவதியை உணர்த்த விஷப்பாம்புடன் ஆட்சியர் அலுவலகம் வந்த பெண்!

Published on 25/04/2023 | Edited on 25/04/2023

 

tirunelveli woman came district collector office with snake

 

மாவட்ட ஆட்சியர் அலுவலகங்களில் திங்கட்கிழமை தோறும் மக்கள் குறைதீர்க்கும் கூட்டம் நடைபெறுவது வழக்கம். இந்த கூட்டங்களில் கலந்து கொள்ளும் பொதுமக்கள் தங்களது குறைகளை தீர்த்து வைக்கக் கோரி மாவட்ட ஆட்சியர் மற்றும் அரசு உயர் அதிகாரிகளிடம் அவ்வப்போது நூதன முறையில் மனுவை வழங்கி வருகின்றனர்.

 

அந்த வகையில் நேற்று (25.04.2023) திருநெல்வேலி மாவட்ட ஆட்சியர் அலுவலகத்தில் நடைபெற்ற மக்கள் குறைதீர்க்கும் கூட்டம்  நடைபெற்றது. இதில் மானூர் வட்டம் வன்னிக்கோனேந்தல் தெற்கு தெருவைச் சேர்ந்த முருகன் மனைவி சமரச செல்வி என்பவர்  தனது மகளுடன் மனு அளிக்க மாவட்ட ஆட்சியர் அலுவலகத்திற்கு  வந்தார்.

 

அப்போது அவர், நேற்று முன்தினம் தனது வீட்டிற்கு வந்திருந்த கொடிய விஷத்தன்மை கொண்ட கண்ணாடி விரியன் பாம்பு ஒன்றை கொன்று  தனது பையில் வைத்திருந்ததை எடுத்து காண்பித்தார். அப்போது அங்கு பாதுகாப்பு பணியில் இருந்த போலீசார் இதனைக் கவனித்த பின் அவரிடம்  இருந்த கண்ணாடி விரியன் பாம்பை போலீசார் கைப்பற்றினர். மேலும் பாம்பை அங்கிருந்து அப்புறப்படுத்தினர். அதனை தொடர்ந்து சமரச செல்வியை மாவட்ட ஆட்சியர் கார்த்திகேயனிடம் மனுவை வழங்க போலீசார் அழைத்து சென்றனர்.

 

சமரச செல்வி மாவட்ட ஆட்சியரிடம் அளித்த தனது மனுவில், "முதலமைச்சரின் சூரிய ஒளியுடன் கூடிய பசுமை வீடு கட்டும் திட்டத்தின் கீழ் கடந்த 2019-20-ம் ஆண்டில் எனக்கு வீடு கட்ட அனுமதி வழங்கப்பட்டது. அதன்படி பசுமை வீட்டை கட்டி முடித்து விட்டோம். வீட்டுக்கு மின் இணைப்பு, வீட்டு வரி, குடிநீர் இணைப்பு பெறுவதற்கான முயற்சிகள் செய்தோம். அப்போது 3 பேர் சேர்ந்து ஊராட்சி செயலாளரிடம் வீட்டு வரி ரசீது, குடிநீர் இணைப்பு வழங்க கூடாது என கூறி இடையூறு செய்கிறார்கள். மேலும் மின் இணைப்பும் கிடைக்க விடாமல் இடையூறு செய்து வருகிறார்கள். இதுகுறித்து கேட்டதற்கு என்னை அடித்து,  கொலை செய்து விடுவதாக மிரட்டல் விடுத்தனர். இதுகுறித்து தேவர்குளம் காவல் நிலையத்தில் வழக்கு பதிவு செய்யப்பட்டது. ஆனால் 4 ஆண்டுகள் கடந்தும் இதுவரை எனது வீட்டுக்கு மின் இணைப்பு கிடைக்கவில்லை.

 

மின்சார வசதி இல்லாததால் எனது இரு குழந்தைகள் படிக்க முடியாமல் மிகவும் சிரமப்படுகின்றனர். இரவு நேரங்களில் மின்விளக்கு வெளிச்சம் இல்லாததால்  வீடுகளிலும், வீட்டை சுற்றிலும் பாம்புகள் தொல்லை அதிகமாக உள்ளது. இதன் மூலம் வீட்டில் வளர்த்து வரும்  ஆடு, கோழிகள் பாம்பு கடித்து பலியாகி உள்ளன. இது தொடர்பாக ஏற்கனவே மாவட்ட ஆட்சியர், காவல் உயர் அதிகாரிகளிடம் புகார் அளித்தும் இது குறித்து இதுவரை எவ்வித நடவடிக்கையும் எடுக்கவில்லை. எனவே எனது ஆதார் அட்டை, ரேஷன் அட்டை மற்றும் வாக்காளர் அடையாள அட்டையை ஒப்படைக்கிறேன். மேலும் மாவட்ட ஆட்சியர் எனது மனு மீது கவனம் செலுத்தி உடனே மின் இணைப்பு கிடைக்க உரிய நடவடிக்கை எடுக்க வேண்டும்" என தெரிவித்துள்ளார். ஆட்சியர் அலுவலகத்திற்கு மனு  அளிக்க வந்த ஒருவர் பாம்பையும் தன்னுடன் எடுத்து வந்த செயல் மாவட்ட ஆட்சியர் அலுவலகத்தில் பெரும் பரபரப்பை ஏற்படுத்தி உள்ளது. 

 

 

சார்ந்த செய்திகள்

 

Next Story

‘மின் கட்டண உயர்வை உடனடியாக திரும்பப் பெற வேண்டும்’ - இ.பி.எஸ். வலியுறுத்தல்!

Published on 16/07/2024 | Edited on 16/07/2024
Electricity hike should be rolled back immediately EPS Emphasis

தமிழகத்தில் மின் கட்டணத்தை உயர்த்தி தமிழ்நாடு மின்சார ஒழுங்குமுறை ஆணையம் அறிவிப்பு வெளியிட்டுள்ளது. வெளியான இந்த அறிவிப்பின்படி ஜூலை ஒன்றாம் தேதி முதல் மின் கட்டணம் உயர்த்தப்பட்டுள்ளது.  இது குறித்து அதிமுக பொதுச் செயலாளர் எடப்பாடி பழனிசாமி எக்ஸ் சமூக வலைத்தளத்தில் வெளியிட்டுள்ள பதிவில், “தமிழ்நாட்டில் மின் கட்டணத்தை மீண்டும் உயர்த்தியுள்ள  திமுக அரசுக்கு என் கடும் கண்டனம்.

பாராளுமன்றத் தேர்தலும், விக்கிரவாண்டி இடைத்தேர்தலும் ஓயட்டும் என்று காத்திருந்து தமிழ்நாட்டு மக்களுக்கு பேரதிர்ச்சியை பரிசளித்திருக்கிறார் திமுக முதல்வர். மக்களின் வயிற்றில் அடிப்பதில் என்ன இன்பமோ இந்த அரசுக்கு? ‘சொன்னதையும் செய்வேன்- சொல்லாததையும் செய்வேன்’ என்று மேடைதோறும் பேசிய முதல்வர் ஸ்டாலின் அவர்களே- மாதம் ஒருமுறை மின் கட்டணம் உள்ளிட்ட சொன்ன வாக்குறுதி எதையும் செய்த பாடில்லை; சொல்லாத மின் கட்டண உயர்வை மட்டும் செய்துகொண்டே இருக்கிறீர்கள்!.

உங்கள் நிர்வாகத் திறமையின்மையின் சுமையை மக்கள் தலைகளில் திணிப்பது அநியாயம்!. மக்களை வாட்டி வதைப்பதே திமுக அரசின் வாடிக்கை ஆகிவிட்டது. மின்சாரத்தை தடையின்றி வழங்கும் அடிப்படை திறனின்றி, மின் கட்டணத்தை மட்டும் மீண்டும் மீண்டும் உயர்த்தும்  திமுக அரசுக்கு எனது கடும் கண்டனம். மக்களை பெரும் சுமைக்கு ஆளாக்கும் மின் கட்டண உயர்வை உடனடியாக திரும்பப் பெற திமுக முதல்வரை வலியுறுத்துகிறேன்” எனக் குறிப்பிட்டுள்ளார். 

Next Story

தன்னைக் கடித்த பாம்பை திருப்பிக் கடித்த நபர்; மூடநம்பிக்கையால் நடந்த சம்பவம்!

Published on 06/07/2024 | Edited on 06/07/2024
A person who bites back a snake that has bitten him in bihar

தன்னைக் கடித்த பாம்பை மூடநம்பிக்கையால் மீண்டும் திருப்பிக் கடித்த சம்பவம் பெரும் பரபரப்பை ஏற்படுத்தியுள்ளது. 

பீகார் மாநிலம் ரஜெலி பகுதியைச் சேர்ந்தவர் சந்தோஷ் லோஹர் (35). இவர் ரயில்வே ஊழியராக பணியாற்றி வருகிறார். இந்த நிலையில், கடந்த 2ஆம் தேதி இவர், தனது வேலையை முடித்துவிட்டு ரயில் தண்டவாளம் அருகே உள்ள வனப்பகுதியில் தூங்கிக் கொண்டிருந்தார். அப்போது அவரைப் பாம்பு ஒன்று கடித்துள்ளது. 

தன்னைக் கடித்த பாம்பை திருப்பி கடித்தால், பாம்பின் உடலில் இருக்கும் விஷம் தன்னை ஒன்றும் செய்யாது என்ற மூட நம்பிக்கை சந்தோஷ் லோஹருக்கு இருந்ததாகக் கூறப்படுகிறது. அந்த மூடநம்பிக்கையின் காரணமாக, சந்தோஷ் அந்தப் பாம்பை பிடித்து 3 முறை கடித்து உள்ளார். இதில் அந்தப் பாம்பு சம்பவ இடத்திலேயே உயிரிழந்தது. 

இதனையடுத்து, உடனடியாக அங்கிருந்த மற்ற ஊழியர்கள் சந்தோஷை மீட்டு அருகே உள்ள மருத்துவமனைக்கு அனுமதித்துள்ளனர். அங்கு அவரைப் பரிசோதித்து, அவருக்கு உரிய சிகிச்சை அளிக்கப்பட்டது. அதன் பிறகு, அவர் உடல்நலம் தேறியதையடுத்து அடுத்த நாள் மருத்துவமனையில் இருந்து விடுவிக்கப்பட்டார்.