Skip to main content

நள்ளிரவில்… துடிக்க துடிக்க… சாதி ஆணவத்தின் கோரத் தாண்டவம்! 

Published on 16/07/2019 | Edited on 16/07/2019

 

ஜூலை 4-ம் தேதி அதிகாலை மூன்று மணிக்கெல்லாம் நடந்து முடிந்திருந்தது அந்த இரட்டைப் படுகொலை. பல கனவுகளுடன் திருமணம் செய்துகொண்ட இரண்டே மாதத்தில் உயிரைப் பறிகொடுத்திருந்தது அந்தப் புதுமணத் தம்பதி. 
 

முகம், கழுத்து, முதுகு, தோள்பட்டை, மணிக்கட்டு என மிகக்கொடூரமாக வெட்டப்பட்டதில், படுத்த படுக்கையிலேயே ரத்தவெள்ளத்தில் பிணமாகி இருந்தனர் இருவரும். அதிகாலை உறக்கம் கழிந்து வந்து பார்த்த முத்துமாரிக்கு பேரதிர்ச்சி காத்திருந்தது. மகனும், மருமகளும் சதைப் பிண்டமாகக் கிடப்பதைக் கண்டு ஓலமெடுத்து அவர் அலறியதில்தான், ஊர்முழுக்க இந்தக் கொடூரச் செய்தி பரவியது. 

 

jothi-solairaj


 

"உடலில் விழுந்த ஒவ்வொன்றும் மிக ஆழமான வெட்டுகள். கத்தாமல் இருப்பதற்காகவே கழுத்திலும், குரல்வளையிலும் குறிவைத்து வெட்டியதில், சத்தமில்லாமல் அடங்கி இருக்கிறது மூச்சு'’என்று சடலத்தைப் பார்வையிட்ட காவல்துறையினர் பேசிக் கொண்டார்கள். இந்தக் கொடூர சம்பவத்திற்குப் பின்னாலும் சாதி, வர்க்க ஆணவமே கோரத்தாண்டவம் ஆடியிருப்பதாக நமக்குத் தகவல் கிடைக்க, அந்தப் பகுதியில் விசாரித்தோம். 
 

தூத்துக்குடி மாவட்டம் குளத்தூர் பகுதியிலுள்ள பெரியார் நகர் காலனியில்தான் இந்த பயங்கரம் நடந்தேறியது. அங்கு வசிப்பவர் முத்துமாரி, கொல்லப்பட்ட சோலைராஜின் தாயார். சிறுவயதிலேயே தந்தையை இழந்த சோலைராஜ், குடும்பச்சூழலால் அருகிலுள்ள கல்லூரியிலிருக்கும் உப்பளத்தில் கூலி வேலைக்குப் போனார். அங்கு வேலைக்கு வந்த குளத்தூர் பக்கமுள்ள பல்லாகுளத்தைச் சேர்ந்த அழகரின் மகள் ஜோதியோடு, சோலைராஜுக்கு காதல் மலர்ந்தது. இவர்கள் இருவருமே தாழ்த்தப்பட்ட சமுதாயங்களைச் சேர்ந்தவர்கள்தான் என்றாலும், உட்பிரிவுகள் வெவ்வேறானவை. இருந்தும் நம்பிக்கையோடு காதலை வளர்த்தவர்களுக்கு திருமணம் செய்துகொண்டு குடும்பமாக வாழவேண்டுமென்பது கனவாக இருந்தது. 


 

 

சோலைராஜ் கூலித்தொழிலாளி. வசதி படைத்த குடும்பத்தில் பிறந்தவர் ஜோதி. அவரது தந்தை அழகருக்கு சுயமாக வாழ்கிற லெவலுக்கு விவசாய நிலமும், வெளிநாட்டு வேலையும் இருந்தது. மூன்று மகள்கள், ஒரு மகன். ஜோதிதான் மூத்த மகள். மூன்று மாதங்களுக்கு முன்புதான் சோலைராஜ் உடனான ஜோதியின் காதலை அறிந்து அதிர்ச்சியடைந்த அழகர், கடுமையாக எதிர்த்திருக்கிறார். இதில் அவரது உறவுகளும் ஒட்டிக்கொள்ள, எதிர்ப்புகளை மீறி மாலை மாற்றிக் கொண்டனர். 
 

இருவரும் சோலைராஜின் வீட்டிலேயே குடும்பம் நடத்தி வந்தனர். இதற்கிடையே தன் இரண்டு மகள்களின் சடங்கு நிகழ்ச்சிக்காக பத்திரிகை அடித்து ஊர்முழுக்க அழைப்பு விடுத்துக் கொண்டிருந்தார் அழகர். இந்நிலையில்தான், "சாதி மாறி அதுவும் கூலிக்காரனோடு ஓடிப்போனவளின் வீட்டில் யார் பெண் எடுப்பார்கள்' என்ற பேச்சு அழகரின் மனதைப் பிசைந்தது. இனி விழாவிற்கு வந்தாலும் சொந்த பந்தங்களின் வாயிலிருந்து இதே பேச்சு வருமே என்று எண்ணியவர், பத்திரிகை கொடுத்து முடித்த கையோடு, சடங்கு நிகழ்ச்சியை நிறுத்தினார். விடாமல் தூபம் போட்டார்கள் உற்றார் உறவினர். கூலிக்காரனோடு ஓடிப்போன ஓடுகாலியை விட்டுவைக்கணுமா? என்ற தொடர் கேள்விகள் அழகரின் மூளைக்குள் ஆணவ வெறியைத் தூண்டின. இந்தச் சூழலில்தான் காலனியில் இருக்கும் சோலைராஜையும், ஜோதியையும் வேவு பார்த்து, வெயிலின் தாக்கத்தால் வீட்டுவாசலில் உறங்குவதை அறிந்துகொண்டு இரவோடு இரவாக காரியத்தை முடித்திருக்கிறார்கள்.  
 

குற்றவாளிகளைக் கைதுசெய்யாத வரை உடல்களை வாங்கமாட்டோம் என்று போராட்டம் நடந்து கொண்டிருக்க, “""அந்தப் பொண்ணு வீட்ல எதிர்ப்பு. எது வேணாலும் நடக்கலாம்ன்னு சொல்லித்தான், உசுருக்குப் பாதுகாப்பு இல்லைன்னு போலீஸ் ஸ்டேஷனுக்குப் போனோம். அவுகளைக் கூப்பிட்டு, "ரெண்டுபேரும் மேஜர். மனசு ஒத்தவகளைத் தொந்தரவு பண்ணக்கூடாது'ன்னு எச்சரிச்சு அனுப்பினாங்க. இருந்தும் இப்புடி துடிதுடிக்க சீரழிச்சுட்டாவளே'' என்று துணையாக இருந்த மகனையும், மருமகளையும் பறிகொடுத்த முத்துமாரி கதறினார். 


 

 

விசாரணை அதிகாரிகளுடன் பேசியதில், “""வேறு சாதிக்காரரோடு மகள் போனதை, அவரது தந்தையால் ஜீரணிக்க முடியவில்லை. தவிர, இந்தப் படுகொலையில் இருவரின் உடல்களில் விழுந்த வெட்டுகளின் ஆழத்தைப் பார்க்கும்போது, புதிதாக கொலைசெய்ய அரிவாள் பிடித்தவர்களைப் போலத் தெரியவில்லை. முதலில் ஒரேநேரத்தில் இருவரின் குரல்வளையைக் குறிவைத்து ஆழமாக வெட்டிப் பிளந்து, அவர்களை ஓலமிட விடாமல் செய்துவிட்டு, பின் மணிக்கட்டுகளைத் துண்டாக்கி இருக்கிறார்கள். கூலிப்படையினர் மற்றும் தேர்ந்த குற்றவாளிகளின் ஸ்டைல் இது''’என்கிறார்கள். 
 

இதுகுறித்து மாவட்ட எஸ்.பி. அருண் பாலகோபாலன் கூறியது, ""பெண்ணின் தந்தை அழகர் மற்றும் சிலரையும் பிடித்து விசாரித்து வருகிறோம். அழகர் தான்தான் கொலை செய்ததாகச் சொல்கிறார். மேலும் விசாரணை நடத்த வேண்டியுள்ளது''’என்றவரிடம், "இதுபோன்ற வெட்டும் திறன் சாதாரணமானவர்களுக்கு சாத்தியமா?' என்று கேட்டபோது, “""அந்தக் கோணத்திலும் பார்க்கிறோம்''’என்றார். 
 

சாதிமறுப்புத் திருமணங்களை காலமே அங்கீகரித்து விட்டது. சாதி ஆணவ வெறியோ முறுக்கிக்கொண்டு அரிவாளை உயர்த்துகிறது. 
 

சார்ந்த செய்திகள்

Next Story

பறக்கும் முத்தத்தால் பந்தாடிய மனைவி!

Published on 22/03/2024 | Edited on 22/03/2024
The husband who flew because of the flying kiss

நாகையில், மனைவிக்கு பறக்கும் முத்தம் (flying kiss) கொடுத்த கணவரை மனைவியே அடியாட்களை வைத்து அடித்த சம்பவம் பரபரப்பை ஏற்படுத்தி இருக்கிறது.

நாகை தேவூர் பகுதியைச் சேர்ந்த ஆயுர்வேத மருத்துவர் செந்தமிழ் செல்வன். அவருடைய மனைவி சுதா. அவரும் சித்த மருத்துவராக உள்ளார். செந்தமிழ் செல்வன் - சுதா இடையே ஏற்பட்ட கருத்து வேறுபாடு காரணமாக 10 ஆண்டுகளாகப் பிரிந்து வாழ்வதாகக் கூறப்படுகிறது. இருவரும் முறையாக விவாகரத்து பெற்றுள்ள நிலையில், நீதிமன்ற உத்தரவுப்படி தன்னுடைய 13 வயது மகனைப் பார்ப்பதற்காக செந்தமிழ் செல்வன் சென்றுள்ளார். ஆனால் அவரது மனைவியான சுதா மகனை சந்திப்பதற்குத் தொடர்ந்து மறுப்பு தெரிவித்து வந்துள்ளார்.

இந்தநிலையில், அடிக்கடி சுதா பணியாற்றும் மருத்துவமனைக்கு வரும் செந்தமிழ் செல்வன், பறக்கும் முத்தம் (flying kiss) கொடுப்பதைப் போல் செய்வதால், தொல்லை தாங்க முடியாத சுதா அடியாட்களை வைத்து செந்தமிழ் செல்வனை தாக்கியுள்ளார். இதில் காயமடைந்த செந்தமிழ் செல்வன் மருத்துவமனையில் தலையில் கட்டுடன் சிகிச்சை பெற்று வருகிறார்.

Next Story

பாஜகவில் சேர்ந்த தமிழிசை; தேர்தலில் மீண்டும் வாய்ப்பா?

Published on 20/03/2024 | Edited on 20/03/2024
Tamilisai joined BJP; A SEAT again?

நாட்டின் 18ஆவது நாடாளுமன்ற மக்களவைத் தேர்தலுக்கான தேதிகள் அறிவிக்கப்பட்டுள்ள நிலையில், முதற்கட்டமாகத் தமிழ்நாட்டில் ஏப்ரல் 19 ஆம் தேதி நாடாளுமன்றத் தேர்தல் நடைபெற இருக்கிறது. இந்த நாடாளுமன்றத் தேர்தலின் வாக்குப்பதிவு எண்ணிக்கை, ஜூன் 4 ஆம் தேதி நடைபெறவுள்ளது. ஏற்கெனவே தமிழகத்தில் உள்ள அரசியல் கட்சிகள் கூட்டணி, தொகுதிப் பங்கீடு எனத் தீவிரம் காட்டி வரும் நிலையில், தேர்தல் தேதி அறிவிக்கப்பட்டதால் தேர்தல் களம் அனல் பறக்க ஆரம்பித்துவிட்டது.

நாடு முழுவதும் மக்களவை தேர்தலுக்கான வேட்புமனு தாக்கல் தொடங்கி இருக்கும் நிலையில் இன்று திமுகவும் அதிமுகவும் வேட்பாளர்கள் பட்டியலை வெளியிட்டுள்ளது. பாஜக தொகுதிப் பங்கீடு குறித்த பேச்சுவார்த்தையை நடத்தி வருகிறது. இந்நிலையில், ஆளுநர் பதவியை ராஜினாமா செய்த தமிழிசை மீண்டும் பாஜகவில் சேர்ந்துள்ளார்.

தமிழக பா.ஜ.க. தலைவராக இருந்த தமிழிசை செளந்தரராஜன் கடந்த 2019 ஆம் ஆண்டு நடைபெற்ற மக்களவைத் தேர்தலில் தூத்துக்குடி தொகுதியில் போட்டியிட்டு தி.மு.க. துணைப் பொதுச்செயலாளர் கனிமொழியிடம் தோல்வி அடைந்தார். அதனைத் தொடர்ந்து 2019 ஆம் ஆண்டு செப்டம்பர் மாதம் தெலங்கானா மாநிலத்தின் ஆளுநராகப் பொறுப்பேற்றார். மேலும் கடந்த 2022 ஆம் ஆண்டு முதல் புதுச்சேரி யூனியன் பிரதேச துணைநிலை ஆளுநராகவும் பதவி வகித்தார். இந்த நிலையில் நேற்று முன்தினம் ஆளுநர் பதவியை ராஜினாமா செய்தார்.

இந்நிலையில் மீண்டும் அவர் பாஜக அடிப்படை உறுப்பினர் பதவியை பெற்று பாஜகவில் இணைந்துள்ளார். இதனால் தமிழிசைக்கு பாஜகவில் மீண்டும் நாடாளுமன்ற தேர்தலில் போட்டியிட வாய்ப்பளிக்க சாத்தியக்கூறுகள் அதிகம் இருப்பதாக அரசியல் வட்டாரங்களில் பேசப்படுகிறது. அப்படி வாய்ப்பளித்தால் மீண்டும் தூத்துக்குடியில் தமிழிசை நிற்பாரா என்ற கேள்வியும் எழுந்துள்ளது. ஏற்கெனவே திமுகவில் கனிமொழி தூத்துக்குடி நாடாளுமன்ற வேட்பாளராக மீண்டும் அறிவிக்கப்பட்டுள்ளார் என்பது குறிப்பிடத்தக்கது.