காங்கிரஸ் முன்னாள் எம்.எல்.ஏ. ஓ.எஸ்.வேலுச்சாமி காலமானார்!

தூத்துக்குடி மாவட்டம், ஒட்டப்பிடாரம் சட்டமன்ற தொகுதி முன்னாள் எம்.எல்.ஏ. (காங்கிரஸ்) ஓ.எஸ்.வேலுச்சாமி உடல் நலக்குறைவால் காலமானார்.

88 வயதான ஓ.எஸ்.வேலுச்சாமி ஒட்டப்பிடாரம் சட்டமன்ற தொகுதியில் 1977- ஆம் ஆண்டு இந்திய தேசிய காங்கிரஸ் கட்சி சார்பில் போட்டியிட்டு வெற்றிபெற்று, 1980- ஆம் ஆண்டு வரை சட்டப்பேரவை உறுப்பினராக பணியாற்றினார்.

காங்கிரஸ் கட்சியிலிருந்து விலகி ஜி.கே.வாசன் தமிழ் மாநில காங்கிரஸ் தொடங்கியபோது, அதில் ஓ.எஸ்.வேலுச்சாமி தன்னை இணைத்துக்கொண்டு பணியாற்றினார். மேலும், கோவில்பட்டி காந்தி மண்டபம் அறக்கட்டளையின் தலைவராக இருந்து வந்தார் என்பது குறிப்பிடத்தக்கது.