Skip to main content

“புகை மாசு இல்லாத மாநிலமாக தமிழ்நாட்டை மாற்ற முடியும்” - அமைச்சர் மெய்யநாதன் 

Published on 01/12/2023 | Edited on 01/12/2023

 

Tamil Nadu can be made a smoke free state says Minister Meiyanathan

 

புதுக்கோட்டை மாவட்டம் கீரமங்கலம் அரசு மகளிர் மேல்நிலைப் பள்ளி தொடர்ந்து கல்வியில் மட்டுமின்றி விளையாட்டு, பரதம், நடனம், கலை, இலக்கியம், பாட்டு, சுற்றுச்சூழல் பாதுகாப்பு, பிளாஸ்டிக் இல்லாத தண்ணீர் பாட்டில்கள் எனப் பல துறைகளிலும் தமிழ்நாட்டின் சிறந்த பள்ளிகளில் ஒன்றாகத் திகழ்கிறது. தற்போது, இந்தப் பள்ளியின் மாணவிகள் மாவட்ட அளவிலான விளையாட்டுப் போட்டிகளில் வெற்றி பெற்று அடுத்து நடக்க உள்ள மாநில அளவிலான 14 வயதிற்குட்பட்டோர் மற்றும் 17 வயதிற்குட்பட்டோர்களுக்கான கையுந்து பந்து, பீச் வாலிபால் போட்டிகளில் பங்கேற்கச் செல்கின்றனர்.

 

இந்த வீராங்கனைகளுக்குத் தேவையான விளையாட்டு உபகரணங்கள் தேவை உள்ளதையறிந்த சுற்றுச்சூழல் துறை அமைச்சர் மெய்யநாதன் பள்ளிக்கு நேரில் சென்று மாநிலப் போட்டிகளில் பங்கேற்க உள்ள 27 மாணவிகளுக்கு விளையாட்டு உடை மற்றும் உபகரணங்களை வழங்கினார். தொடர்ந்து அமைச்சர் மெய்யநாதன் மாணவிகள் மத்தியில் பேசும்போது, “நமக்கு ஏட்டுக் கல்வி மட்டுமே போதும் என்பதை கடந்து இந்தப் பள்ளி மாணவிகள் தொடர்ந்து விளையாட்டு, கலை போட்டிகளிலும் தனித்திறன்களை வெளிப்படுத்தி சாதித்து வருவது எனக்கு மகிழ்ச்சியளிக்கிறது. அதே போல சுற்றுச்சூழலை பாதுகாக்கும் விதமாக எந்த ஒரு இடத்திலும் இங்கே பிளாஸ்டிக்கை காண முடியவில்லை. தண்ணீர் பாட்டில்கள் கூட பிளாஸ்டிக்கில் இல்லை என்பது சிறப்பாக உள்ளது. மேலும், இந்த ஆண்டு தீபாவளிக்கு கடந்த காலங்களைவிட பல மடங்கு புகை மாசு இல்லாத தீபாவளியாக கொண்டாடப்பட்டுள்ளது. இதேபோல தொடரும் பட்சத்தில் புகைமாசு இல்லாத மாநிலமாக தமிழ்நாட்டை மாற்ற முடியும். அதுவும் மாணவர்களான உங்களால்தான் சாத்தியமாகும். 

 

நீங்கள் பிளாஸ்டிக்கை தவிர்க்கும்போது நீங்கள் உங்கள் வீட்டிலும் பிளாஸ்டிக்கை தவிர்க்க செய்வீர்கள். உங்கள் வீடுகளில் பிளாஸ்டிக் தவிர்க்கப்படும்போது உங்கள் அருகாமையில் உள்ள வீடுகளிலும் தவிர்க்க விழிப்புணர்வு ஏற்படுத்துவீர்கள். அதனால்தான் மாணவர்களில் இருந்து பிளாஸ்டிக் தவிர்ப்பு, புகைமாசு ஒழிப்பு, சுற்றுச்சூழல் பாதுகாப்பு விழிப்புணர்வை தொடங்குகிறோம். அதன் ஒரு பகுதிதான் தீபாவளியில் புகை மாசு குறைந்தது என்ற பலன். வரும் காலங்களில் சுற்றுச்சுழலை பாதுகாக்க மாணவர்களாகிய நீங்கள் சபதம் ஏற்று விழிப்புணர்வு ஏற்படுத்தினால் மட்டுமே எதிர்கால சந்ததி நலமுடன் வாழ முடியும். விளையாட்டோடு சேர்ந்த படிப்பு தான் உயர் கல்வியையும் உடல் ஆரோக்கியத்துடன் வேலைவாய்ப்புகளையும் பெற்றுத் தரும். படிப்பு மட்டுமே வாழ்க்கை இல்லை. படிப்போடு விளையாட்டும் சேரும்போது அதற்கான சிறிய மதிப்பெண்கள் கூட இட ஒதுக்கீட்டில் கல்வியையும் வேலையையும் பெற்றுத் தருகிறது. 

 

விளையாட்டில் சாதிக்கும் வீராங்கனையாக வருகிறீர்கள். அதேபோல உங்கள் கவனம் விளையாட்டின் பக்கம் திசைமாறும்போது தீய எண்ணங்களின் பக்கம் உங்கள் சிந்தனை போகாது. அதனால் தீய பழக்கவழக்கங்கள் மறைந்து போகும். இதனால் சுற்றுச்சூழல் பாதுகாப்பதுடன் குற்றச் செயல்களும் குறைந்துவிடும். ஆகவேதான் விளையாட்டுடனான படிப்பு தேவை என்கிறோம். உங்களுக்கான தேவைகளை அறிந்து இந்த அரசு உங்களை ஊக்கப்படுத்தவும் உதவிகள் செய்யவும் தயாராக உள்ளது” என்றார்.

 

நிகழ்வில் பள்ளி தலைமை ஆசிரியை வள்ளிநாயகி, பேரூராட்சித் தலைவர் சிவக்குமார் உள்பட உள்ளாட்சி பிரதிநிதிகள், ஆசிரியர்கள், பெற்றோர் ஆசிரியர் கழக நிர்வாகிகள் எனப் பலர் கலந்து கொண்டனர். முடிவில் ஆசிரியர் கொடியரசன் நன்றி கூறினார். 

 

 

சார்ந்த செய்திகள்

 

Next Story

பற்றி எரியும் வங்கதேசம்; இந்தியர்களுக்கு முக்கிய அறிவிப்பு!

Published on 18/07/2024 | Edited on 18/07/2024
Students struggle against quota in Bangladesh

வங்கதேசம் - பாகிஸ்தான் போரில் உயிர்த் தியாகம் செய்த ராணுவ வீரர்களின் குடும்பத்தினருக்கு அரசுப் பணியில் 30 சதவீதம் இட ஒதுக்கீடு வழங்கப்பட்டு வந்தது. இதற்கு  வங்கதேசம் முழுவதும் எதிர்ப்புகள் கிளம்பிய நிலையில் கடந்த 2018 ஆம் ஆண்டு மாணவர்களின் போராட்டத்திற்குப் பிறகு அந்த இட ஒதுக்கீடு நிறுத்தி வைக்கப்பட்டது.

இந்த நிலையில், வங்கதேசத்தில் மீண்டும் போரில் உயிரிழந்தவர்களில் குடும்பத்தினருக்கு அரசுப் பணிகளில் 30 சதவீத இட ஒதுக்கீடு வழங்குவது நடைமுறைப்படுத்தப்படும் என அந்நாட்டின் அரசு அறிவிப்பினை வெளியிட்டுள்ளது.  இது தொடர்பான வழக்கு அந்நாட்டின் உச்சநீதிமன்றத்தில் நிலுவையில் உள்ளது. 

இந்த நிலையில், இந்த இட ஒதுக்கீட்டை எதிர்த்து மாணவர்கள் அரசுக்கு எதிராகப் போராட்டங்களை நடத்தி வருகின்றனர். அதே சமயம் ஆளும் அவாமி லீக் கட்சியின் மாணவர்கள் அமைப்பினர் இட ஒதுக்கீட்டிற்கு எதிராகப் போராடும் மாணவர்கள் மீது தாக்குதல் நடத்தினர். இதனைத் தொடர்ந்து கடந்த செவ்வாய்க்கிழமை நடந்த போராட்டத்தில் மாணவர்களுக்கும், காவலர்களுக்கும் வன்முறை வெடித்துள்ளது. இதில் மாணவர்கள் உள்பட 6 பேர் உயிரிழந்துள்ளதாகவும், 100க்கும் மேற்பட்டவர்கள் காயமடைந்துள்ளதாகவும் கூறப்படுகிறது. 

Students struggle against quota in Bangladesh

வன்முறையைக் கட்டுப்படுத்தும் வகையில், வங்கதேசம் முழுவதும் பல்கலைக்கழங்கள், கல்லூரிகள் என அனைத்து கல்வி நிறுவனங்களுக்கும் விடுமுறை அளிக்கப்பட்டுள்ளது. மேலும், அனைத்து விடுதிகளையும் மாணவர்கள் காலி செய்யவும் உத்தரவிடப்பட்டுள்ளது. இதனைத் தொடர்ந்து டாக்கா உள்ளிட்ட வங்கதேசத்தின் முக்கிய நகரங்களில் மாணவர்கள் தொடர்ந்து போராட்டம் நடத்தி வருகின்றனர். இதனால் பெரும் பதற்றமான சூழல் நாடு முழுவதும் நிலவி வருவதால், இந்தியர்கள் அத்தியாவசிய தேவைகளைத் தவிர, மற்றவற்றிற்கு  யாரும் வெளியே வரவேண்டாம் என்று இந்திய வெளியுறவுத்துறை அமைச்சகம் அறிவுறுத்தியுள்ளது. மேலும் அவசர உதவி எண்களையும் வெளியிட்டுள்ளது. 

Next Story

ஆசிரியர் மீது அளவில்லா அன்பு... ஆச்சரியத்தில் ஆழ்த்திய மாணவர்கள்!

Published on 17/07/2024 | Edited on 17/07/2024
133 students are joined in same school as teacher has transferred In Telangana

தெலங்கானா மாநிலத்தில் பொனகல் என்ற கிராமத்தில் ஒன்றாம் வகுப்பு முதல் ஐந்தாம் வகுப்பு வரை செயல்படும் தொடக்கப்பள்ளி ஒன்று உள்ளது. இங்கு 250 மாணவ மாணவிகள் பயின்று வருகின்றனர். இந்த பள்ளியில் ஸ்ரீனிவாசன் என்பவர் ஆசிரியராக பணியாற்றி வருகிறார். இவர் 12 ஆண்டுகளாக இந்த பள்ளியில் ஆசிரியராக பணியாற்றி வரும் நிலையில், மாணவர்கள் அனைவரும் இவரின் மீது பெரும் மதிப்பும் மரியாதையும் வைத்துள்ளனர். ஸ்ரீனிவாசனும் மாணவர்களின் நலன் சார்ந்த விஷங்களில் அதீத கவனம் எடுத்து அவர்களுக்குத் தேவையான அனைத்து உதவிகளையும் செய்து வந்திருக்கிறார். மேலும் அவர் படிப்பைத் தாண்டி மற்ற விஷங்களிலும் மாணவர்களுக்கு உதவியிருக்கிறார். 

இந்த நிலையில் ஜூலை 1 ஆம் தேதி ஆசிரியர் ஸ்ரீனிவாசன் அக்காபெல்லிகுடா என்ற கிராமத்தில் இருக்கும் பள்ளிக்கு பணியிட மாற்றம் செய்யப்பட்டார். இதனை அறிந்த மாணவர்கள் கதறி அழுது, ‘வேறு பள்ளிக்கு எல்லாம் செல்ல வேண்டாம் சார்..’ என்று வலியுறுத்தியுள்ளனர். இருப்பினும் ஆசிரியர் ஸ்ரீனிவாசன் அக்காபெல்லிகுடா பள்ளிக்குச் சென்றுவிட்டார். இந்த நிலையில் தங்களுக்கு விருப்பமான ஆசிரியர் வேலை பார்க்கும் பள்ளியில் தான் படிப்போன் என்று பொனகல் கிராமத்தில் உள்ள தொடக்கப்பள்ளியில் இருந்து அக்காபெல்லிகுடாவில் உள்ள பள்ளியில் 133 மாணவர்கள் சேர்ந்துள்ளனர். 

பொனகல் கிராமத்தில் உள்ள தொடக்க பள்ளியில் 250 மாணவர்களில் பாதி மாணவர்கள் ஸ்ரீனிவாசன் பணியிட மாற்றம் பெற்ற பள்ளியில் சேர்ந்திருப்பது பலரையும் நெகிழ்ச்சியடைய செய்துள்ளது. “இது பெற்றோர்கள் என் மீது வைத்திருக்கும் நம்பிக்கையைத்தான் காட்டுகிறது. ஒவ்வொரு மாணவர்களின் மனநிலையை புரிந்துகொண்டு அவர்களுக்கு ஏற்றார்போல் பாடத்தை நடத்துகிறேனே தவிர வேறெதையும் நான் செய்யவில்லை” என்று கூறிய ஆசிரியர் ஸ்ரீனிவாசன், அனைத்து அரசு பள்ளிகளும் தற்போது தரம் உயர்த்தப்பட்டுள்ளது; அதனைப் பெற்றோர்கள் பயன்படுத்திக் கொள்ள வேண்டும் என்று கோரிக்கைவைத்துள்ளார்.