ஈரோடு அடுத்த மொடக்குறிச்சி  கஸ்பாபேட்டை பூளபாளையம் பகுதியைச் சேர்ந்தவர் முத்துசாமி (60). இவரது மனைவி தயாளு அம்மாள். முத்துசாமி இளநீர் வியாபாரம் செய்து வருகிறார். இதற்காக அவர் தென்னந்தோப்புகளை குத்தகைக்கு எடுத்து மரத்தில் உள்ள இளநீரை அவரே வெட்டி கீழே இறக்கி நஞ்சை ஊத்துக்குளியில் இளநீர் வியாபாரம் செய்து வந்தார்.

இந்நிலையில் நேற்று காலை வழக்கம்போல் முத்துசாமி அதே ஊரில் உள்ள ஒரு தோட்டத்தில் இளநீர் பறிப்பதற்காக சென்றார். அதன் பின்பு அவர் வீட்டுக்கு வரவில்லை. அவரது மனைவி தொலைபேசியில் அழைத்தும் அவர் போனை எடுக்கவில்லை. பின்னர் அவரது மனைவியும் இளநீர் வியாபாரம் முடித்துவிட்டு வீட்டுக்கு வந்து விடுவார் என இருந்து விட்டார். இரவு ஆகியும் அவர் வீட்டுக்கு வராததால் தயாளு அம்மாள் உறவினர்களுடன் கணவரை தேடி தென்னந்தோப்புக்கு வந்தார்.  

தோப்பில் அவரது செருப்பும், அவரது மோட்டார் சைக்கிள் மட்டும் இருந்தது. அப்போது அங்குள்ள ஒரு தென்னை மரத்தின் உச்சியில் முத்துசாமி அமர்ந்தவாறு இருந்துள்ளார். இது குறித்து மொடக்குறிச்சி தீயணைப்பு நிலையத்திற்கும், போலீசாருக்கும் தகவல் தெரிவிக்கப்பட்டது. தீயணைப்பு வீரர்கள் சம்பவத்திற்கு விரைந்து வந்து மரத்தில் ஏறி முத்துசாமியை மீட்டு கீழே கொண்டு வந்தனர். ஈரோடு அரசு மருத்துவமனைக்கு சிகிச்சைக்காக கொண்டு வந்தனர். அவரை பரிசோதித்த மருத்துவர் வரும் வழியிலேயே முத்துசாமி இறந்துவிட்டதாக தெரிவித்தனர். இது குறித்து மொடக்குறிச்சி போலீசார் வழக்குப்பதிவு செய்து முத்துசாமி எவ்வாறு இறந்தார் என விசாரணை நடத்தி வருகின்றனர்.

நீலகிரி மாவட்டம் பந்தலூரில் தினமும் மது அருந்திவிட்டு கணவன் தகராறு செய்ததால், மனைவி கணவனின் காலை வெட்டிய சம்பவம் பரபரப்பை ஏற்படுத்தி இருக்கிறது. இது தொடர்பாக தாக்குதலில் ஈடுபட்ட மனைவியை போலீசார் கைது செய்துள்ளனர்.

நீலகிரி மாவட்டம் பந்தலூர் வட்டத்திற்கு உட்பட்டது எருமாடு கிராமம். இந்த கிராமத்தின் பள்ளியரா எனும் பகுதியைச் சேர்ந்தவர்கள் குமரன் - சாரதா தம்பதியினர். இவர்களுக்கு சுஜாதா, சுனிதா, பிரியா, சிவானந்தம் என்ற நான்கு குழந்தைகள் உள்ளனர். இந்நிலையில் கணவர் குமரன் தினந்தோறும் மது குடித்துவிட்டு மனைவி சாரதாவிடம் தகராற்றில் ஈடுபடுவதை வாடிக்கையாக கொண்டிருந்தார்.

நேற்று முன்தினம் இரவு வழக்கம் போல் மது குடித்துவிட்டு மனைவியிடம் குமரன் வாக்குவாதத்தில் ஈடுபட்டுள்ளார். இதனால் ஆத்திரமடைந்த சாரதா, வீட்டிலிருந்த கத்தியை எடுத்து வந்து கணவனின் காலை வெட்டியுள்ளார். அடுத்த நாள் அதிகாலை பார்த்த பொழுது கணவர் ரத்த வெள்ளத்தில் சடலமாகக் கிடந்துள்ளார். கால் பகுதியில் நரம்பு துண்டிக்கப்பட்டதால் உடலில் இருந்த ரத்தம் அனைத்தும் வெளியேறி அவர் உயிரிழந்தது தெரியவந்தது. அக்கம் பக்கத்தில் இருந்தவர்கள் உடனடியாக காவல்துறையினருக்குத் தகவல் கொடுத்த நிலையில். சம்பவ இடத்திற்கு வந்த தேவாலா காவல்துறையினர் உயிரிழந்த குமரனின் உடலை மீட்டு பிரேதப் பரிசோதனைக்கு அனுப்பி வைத்ததோடு, உயிரிழப்புக்கு காரணமான மனைவி சாரதாவை கைது செய்தனர்.