Skip to main content

பள்ளியில் அட்டூழியம் செய்யும் தலைமையாசிரியரின் கணவர்; கொதித்தெழுந்த பெற்றோர்கள்

Published on 22/03/2023 | Edited on 22/03/2023

 

students parents have accused the headmaster husband of interfering in school affairs

 

ஈரோடு பழையபாளையத்தில் மாநகராட்சி தொடக்கப்பள்ளி செயல்பட்டு வருகிறது. இந்த பள்ளியில் 1-ம் வகுப்பு முதல் 5-ம் வகுப்பு வரை 106 மாணவ மாணவிகள் படித்து வருகின்றனர். இந்த பள்ளியின் தலைமை ஆசிரியராக அமுதா என்பவர் இருந்து வருகிறார். மேலும் ஒரு உதவி தலைமை ஆசிரியர் மற்றும் கூடுதலாக ஒரு ஆசிரியர் என மூன்று பேர் பணியாற்றி வருகின்றனர்.

 

இந்நிலையில் தலைமை ஆசிரியை அமுதா பள்ளிக்கு தாமதமாக வருவதாக குற்றச்சாட்டு எழுந்தது. மேலும் மாணவ மாணவிகளுக்கு முறையாக கல்வியை கற்பிக்கவில்லை எனவும் குற்றச்சாட்டு எழுந்தது. தலைமையாசிரியை அமுதாவின் கணவர் பாபு என்பவர் பள்ளிக்கு அடிக்கடி வருவதும், பள்ளி விவகாரத்தில் தலையிடுவதாகவும் பெற்றோர்கள் புகார் தெரிவித்திருந்தனர். இந்நிலையில் இன்று பள்ளியில் பெற்றோர்களுக்கான கூட்டத்துக்கு ஏற்பாடு செய்யப்பட்டிருந்தது. அப்போது பெற்றோர்கள் அமர்வதற்காக வகுப்பு அறையில் இருந்து பெஞ்சுகள் எடுக்கப்பட்டது. இதை தலைமை ஆசிரியையின் கணவர் கண்டித்து பெற்றோர்களை மிரட்டியதாக கூறப்படுகிறது.

 

இதனால் ஆத்திரமடைந்த பெற்றோர்கள் திடீரென பள்ளி வளாகத்தில் அமர்ந்து தர்ணா போராட்டத்தில் ஈடுபட்டனர். இதனால் அந்த பகுதியில் பரபரப்பான சூழ்நிலை நிலவியது. இதுகுறித்து சூரம்பட்டி போலீசருக்கு தகவல் தெரிவிக்கப்பட்டது. மேலும் வட்டாரக் கல்வி அலுவலர் ஜோதி சந்திரா, வார்டு கவுன்சிலர் ஜெகதீசன் ஆகியோர் பள்ளிக்கு விரைந்து வந்து போராட்டத்தில் ஈடுபட்ட பெற்றோர்களிடம் பேச்சுவார்த்தையில் ஈடுபட்டனர். அப்போது பெற்றோர்கள் கூறும்போது, தலைமை ஆசிரியை அடிக்கடி பள்ளிக்கு தாமதமாக வருகிறார். மாணவர்களுக்கு முறையாக கல்வி கற்பிக்கவில்லை. தலைமையாசிரியரின் கணவர் பள்ளி உள்விவகாரத்தில் தலையிடுகிறார். எங்களையும் மிரட்டுகிறார். எனவே உடனடியாக இந்த பள்ளியில் இருந்து தலைமையாசிரியையை மாற்ற வேண்டும். இல்லையென்றால் எங்களது குழந்தைகளுக்கு மாற்றுச் சான்றிதழ் (டிசி) கொடுத்துவிடுங்கள். நாங்கள் வேறு பள்ளியில் சேர்த்துக் கொள்கிறோம் என்றனர். தொடர்ந்து பெற்றோரிடம் பேச்சுவார்த்தை நடத்திக் கொண்டிருக்கின்றனர். இதனால் அந்த பகுதியில் பரபரப்பான சூழ்நிலை நிலவி வருகிறது.

 

 

சார்ந்த செய்திகள்

 

Next Story

ஆசிரியர் மீது அளவில்லா அன்பு... ஆச்சரியத்தில் ஆழ்த்திய மாணவர்கள்!

Published on 17/07/2024 | Edited on 17/07/2024
133 students are joined in same school as teacher has transferred In Telangana

தெலங்கானா மாநிலத்தில் பொனகல் என்ற கிராமத்தில் ஒன்றாம் வகுப்பு முதல் ஐந்தாம் வகுப்பு வரை செயல்படும் தொடக்கப்பள்ளி ஒன்று உள்ளது. இங்கு 250 மாணவ மாணவிகள் பயின்று வருகின்றனர். இந்த பள்ளியில் ஸ்ரீனிவாசன் என்பவர் ஆசிரியராக பணியாற்றி வருகிறார். இவர் 12 ஆண்டுகளாக இந்த பள்ளியில் ஆசிரியராக பணியாற்றி வரும் நிலையில், மாணவர்கள் அனைவரும் இவரின் மீது பெரும் மதிப்பும் மரியாதையும் வைத்துள்ளனர். ஸ்ரீனிவாசனும் மாணவர்களின் நலன் சார்ந்த விஷங்களில் அதீத கவனம் எடுத்து அவர்களுக்குத் தேவையான அனைத்து உதவிகளையும் செய்து வந்திருக்கிறார். மேலும் அவர் படிப்பைத் தாண்டி மற்ற விஷங்களிலும் மாணவர்களுக்கு உதவியிருக்கிறார். 

இந்த நிலையில் ஜூலை 1 ஆம் தேதி ஆசிரியர் ஸ்ரீனிவாசன் அக்காபெல்லிகுடா என்ற கிராமத்தில் இருக்கும் பள்ளிக்கு பணியிட மாற்றம் செய்யப்பட்டார். இதனை அறிந்த மாணவர்கள் கதறி அழுது, ‘வேறு பள்ளிக்கு எல்லாம் செல்ல வேண்டாம் சார்..’ என்று வலியுறுத்தியுள்ளனர். இருப்பினும் ஆசிரியர் ஸ்ரீனிவாசன் அக்காபெல்லிகுடா பள்ளிக்குச் சென்றுவிட்டார். இந்த நிலையில் தங்களுக்கு விருப்பமான ஆசிரியர் வேலை பார்க்கும் பள்ளியில் தான் படிப்போன் என்று பொனகல் கிராமத்தில் உள்ள தொடக்கப்பள்ளியில் இருந்து அக்காபெல்லிகுடாவில் உள்ள பள்ளியில் 133 மாணவர்கள் சேர்ந்துள்ளனர். 

பொனகல் கிராமத்தில் உள்ள தொடக்க பள்ளியில் 250 மாணவர்களில் பாதி மாணவர்கள் ஸ்ரீனிவாசன் பணியிட மாற்றம் பெற்ற பள்ளியில் சேர்ந்திருப்பது பலரையும் நெகிழ்ச்சியடைய செய்துள்ளது. “இது பெற்றோர்கள் என் மீது வைத்திருக்கும் நம்பிக்கையைத்தான் காட்டுகிறது. ஒவ்வொரு மாணவர்களின் மனநிலையை புரிந்துகொண்டு அவர்களுக்கு ஏற்றார்போல் பாடத்தை நடத்துகிறேனே தவிர வேறெதையும் நான் செய்யவில்லை” என்று கூறிய ஆசிரியர் ஸ்ரீனிவாசன், அனைத்து அரசு பள்ளிகளும் தற்போது தரம் உயர்த்தப்பட்டுள்ளது; அதனைப் பெற்றோர்கள் பயன்படுத்திக் கொள்ள வேண்டும் என்று கோரிக்கைவைத்துள்ளார். 

Next Story

தெங்குமரஹாடாவில் வெள்ளப்பெருக்கு; நனவாகுமா தொங்கு பாலம் கனவு?

Published on 16/07/2024 | Edited on 16/07/2024
Flooding in Tengumarahada; Will the suspension bridge dream come true?

ஈரோடு மாவட்டம் சத்தியமங்கலத்தை அடுத்துள்ள பவானிசாகர் வனச்சரகத்திற்கு உட்பட்ட பகுதியில் தெங்குமரஹாடா மலை கிராமம் உள்ளது. இந்த மலை கிராமத்தை சென்றடைய மாயாற்றை கடக்க வேண்டும். மலை கிராமத்தில் வசிக்கும் வியாபாரிகள், பள்ளி மாணவ -மாணவிகள், கல்லூரிக்கு செல்லும் மாணவர்கள் மாயாற்றை பரிசல் மூலம் கடந்து சத்தியமங்கலம் வந்து செல்வது வழக்கம்.

மழைக்காலங்களில் மாயாற்றில் திடீரென வெள்ளப்பெருக்கு ஏற்பட்டுவிடும். அந்த சமயம் ஆபத்தை உணராமல் பரிசலில் மக்கள் சென்று வருகின்றனர். இந்நிலையில் தற்போது தமிழகத்தில் பல்வேறு இடங்களில் பரவலாக மழை பெய்து வருகிறது. குறிப்பாக நீலகிரி மற்றும் அதன் சுற்றுவட்டார பகுதியில் கனமழை பெய்து வருகிறது. இதன் காரணமாக மாயாற்றில் கடந்த இரண்டு நாட்களாக நீர்வரத்து அதிகரித்து வருகிறது. இன்று காலை மாயாற்றில் 10 ஆயிரம் கன அடி நீர்வரத்தானதால் கடும் வெள்ளப்பெருக்கு ஏற்பட்டு இரு கரைகளையும் தொட்டபடி நீர் ஆர்ப்பரித்து செல்கிறது. இதனால் இன்று மாயாற்றில் பரிசல் இயக்க முடியாத சூழ்நிலை ஏற்பட்டுள்ளது.

மேலும் தொடர்ந்து மழை பெய்து வருகிறது. இதனால் பரிசலை முற்றிலும் இயக்க முடியாத சூழ்நிலை ஏற்பட்டுள்ளது. இதனால் இன்று காலை பள்ளி கல்லூரிக்கும் மாணவர்கள் மற்றும் வியாபாரத்துக்கு செல்லும் மக்கள் கடும் அவதி அடைந்துள்ளனர். இதனால் தெங்குமரஹாடா, அல்லி மாயார் பொதுமக்கள் தங்கள் அன்றாட தேவைகளுக்கு வெளியே வர முடியாது நிலை ஏற்பட்டுள்ளது. மாயாற்றில் நீண்ட வருடமாக தொங்கு பாலம் அமைக்க வேண்டும் என அப்பகுதி மக்கள் கோரிக்கை விடுத்து வருகின்றனர். தற்போதும் தொங்கு பாலம் அமைக்க வேண்டும் என மீண்டும் கோரிக்கை விடுத்துள்ளனர்.