Skip to main content

மகளின் ஆசையை நிறைவேற்றிய நெகிழ்ச்சி சம்பவம்; அமைச்சர் அன்பில் மகேஷ் பாராட்டு

Published on 13/01/2024 | Edited on 13/01/2024
The story of Eleshchi fulfilling the daughter's wish; Appreciation of Minister Anbil Mahesh

மதுரை மாவட்டம், மேலூர் அருகே உள்ள கொடிக்குளம் கிராமத்தைச் சேர்ந்தவர் ஆயி என்ற பூரணம். இவரது கணவர், தனியார் வங்கியில் அலுவலக பணியாளராக பணியாற்றி வந்த நிலையில், கடந்த 1991ஆம் ஆண்டு காலமானார். அதன் பிறகு, பூரணம் தனது மகளை திருமணம் செய்து கொடுத்த நிலையில், கடந்த 2 ஆண்டுகளுக்கு முன் அவரது மகள் துரதிர்ஷ்டவசமாக உயிரிழந்தார். 

இதையடுத்து, தனது மகளின் நினைவாக, கொடிக்குளம் கிராமத்தில் இருந்த ரூ.4 கோடி மதிப்பிலான தனது ஒன்றரை ஏக்கர் நிலத்தை அங்குள்ள நடுநிலைப்பள்ளியை தரம் உயர்த்துவதற்காக தானமாக வழங்கியுள்ளார். இது குறித்து அவர் கூறியதாவது, ‘நல்ல காரியங்களுக்கு நிலத்தை பயன்படுத்த வேண்டும் என்பது எனது மகள் ஜனனியின் ஆசை. அதன்படியே, எனது நிலத்தை பள்ளிக்கு தானமாக கொடுத்துள்ளேன்’ என்று கூறினார். இவரது செயலை பலரும் பாராட்டி வருகின்றனர். அந்த வகையில், பள்ளிக்கல்வித்துறை அமைச்சர் அன்பில் மகேஷ் பொய்யாமொழி, அரசுக்கு தனது நிலத்தை தானமாக வழங்கிய பூரணம் அம்மாளை பாராட்டியுள்ளார்.

இது குறித்து அவர் தனது எக்ஸ் (ட்விட்டர்) பக்கத்தில் கூறியதாவது, “1.5 ஏக்கர் நிலத்தை அரசுப் பள்ளிக்கு வழங்கிய "ஆயி என்ற பூரணம் அம்மாள்" அவர்களை வணங்குகிறேன். போற்றுகிறேன். மதுரை ஒத்தக்கடை கொடிக்குளம் நடுநிலைப் பள்ளியின் ஆசிரியர்கள் சார்பாகவும், அப்பள்ளியில் பயிலும் வருங்கால அறிஞர்கள் சார்பாகவும் பூரணம் அம்மாளுக்கு நன்றிகளைத் தெரிவித்து, அவரின் செல்வ மகள் மறைந்த ஜனனியின் சேவை மனப்பான்மையைப் போற்றுகிறேன்.

"அன்ன சத்திரம் ஆயிரம் வைத்தல்
ஆலயம் பதினாயிரம் நாட்டல்
அன்னயாவினும் புண்ணியம் கோடி
ஆங்கோர் ஏழைக்கு எழுத்தறிவித்தல்" எனும் பாரதியின் வரிகளுக்கு ஏற்ப வாழும் பூரணம் அம்மாளின் தொண்டு மகத்தானது!

தமிழ்நாடு முதலமைச்சர் மு.க.ஸ்டாலின் அறிவுறுத்தலின்படி, ஜனவரி 29-ஆம் தேதி மதுரையில் நடைபெறவிருக்கும் பெற்றோர் ஆசிரியர் கழக மண்டல மாநாட்டில் பூரணம் அம்மாள் கௌரவிக்கப்பட உள்ளார்கள்” என்று பதிவிட்டுள்ளார். 

சார்ந்த செய்திகள்

Next Story

“ஏப்ரல் ஃபூல் யார ஆக்குவீங்க?” - அதிமுக வேட்பாளர் சரவணனுக்கு மக்கள் அளித்த பதில்

Published on 11/04/2024 | Edited on 11/04/2024
Admk candidate saravanan election campaigned with sellur raju

மக்களவைத் தேர்தல், முதற்கட்டமாக தமிழகத்தில் ஏப்ரல் 19ஆம் தேதி நடைபெறவிருக்கிறது. ஏப்ரல் 19ஆம் தேதி அன்று தொடங்கப்படும் இந்த தேர்தல் நாடு முழுவதும் ஜூன் 1ஆம் தேதி வரை நடைபெற்று அதில் பதியப்படும் வாக்கு எண்ணிக்கை ஜூன் 4ஆம் தேதி நடைபெற்று அன்றே முடிவுகள் அறிவிக்கப்பட இருக்கின்றன. இந்த தேர்தலை எதிர்கொள்ள தமிழகத்தைப் பொறுத்தவரை திமுக, அதிமுக, காங்கிரஸ், பா.ஜ.க உள்ளிட்ட கட்சிகள் தீவிர பிரச்சாரம் மேற்கொண்டு வருகின்றன.

அதில், மதுரை மக்களவைத் தொகுதியில் வேட்பாளராக அ.தி.மு.க கட்சி சார்பில் சரவணன் போட்டியிடுகிறார். அதனையொட்டி, அதிமுக வேட்பாளர் சரவணன் மதுரை தொகுதி முழுவதும் தீவிர பிரச்சாரம் மேற்கொண்டு வருகிறார். அந்த வகையில், முன்னாள் அமைச்சர் செல்லூர் ராஜு மற்றும் அதிமுக வேட்பாளர் சரவணன் ஆகியோர் தேர்தல் பிரச்சாரம் செய்து வந்தனர்.

அப்போது பேசிய அ.தி.மு.க வேட்பாளர் சரவணன், “ஏப்ரல் 19ம் தேதி தேர்தல் நடக்க இருக்கிறது. எல்லோரும் ஏப்ரல் 1ஆம் தேதி என நினைத்து ஏப்ரல் ஃபூல் பண்ண மாட்டீங்க தானே. அப்ப பழைய வேட்பாளரான கம்யூனிஸ்ட் வேட்பாளருக்கு தானே ஏப்ரல் ஃபூல் கொடுப்பீங்க” என்று கூறியதுமே அங்கிருந்த பொதுமக்கள் ‘ஆமாம் கொடுப்போம்.. கொடுப்போம்’ என்று கூறினர். 

இதனையடுத்து, பேசிய முன்னாள் அமைச்சர் செல்லூர் ராஜூ, “தமிழகத்தை போதை மாநிலமாகவும், கஞ்சா மாநிலமாகவும் மாற்றி இருக்கிற தி.மு.க.விற்கு சரியான பாடம் புகட்ட வேண்டும். நம்மை ஏமாற்றியவர்களை நாம் ஏமாற்ற வேண்டும். எதிரியாக இருந்தாலும் நெஞ்சில் குத்துனா அவனை நம்ம பாராட்டுவோம். ஆனால், முதுகுல குத்துன பாராட்டுவீங்களா?.  அவர்களுக்கு சரியான பதிலடி கொடுக்க வேண்டும். அந்த மாதிரி, அதை செய்வோம் இதை செய்வோம் என்று கூறி ஆட்சிக்கு வந்தவர்கள் எதையும் செய்யாமல் எந்த ஒரு திட்டமும் தராத தி.மு.க தலைமையிலான கூட்டணியில் இருக்கக்கூடிய மார்க்சிஸ்ட் கம்யூனிஸ்ட் வேட்பாளர் சு. வெங்கடேசனை இங்கே நிற்கிறார்.

வெங்கடேசனை யாராவது பார்த்திருக்கிறீர்களா? ஐந்து வருடம் ஆகிவிட்டது. இனிமே வந்தால் கேளுங்கள். இனிமேல், எப்படி ஓட்டு கேட்டு வருவீர்கள் என்று நீங்கள் கேளுங்கள். கேட்டீர்கள் என்றால் தான், அடுத்த வருகிற வேட்பாளர்கள் பயத்துடன் இருப்பார்கள். ஏனென்றால் உங்களைப் பார்க்காத பி.டி.ஆர் பழனிவேல் ராஜனுக்கு ஓட்டு போட்டீர்கள். அந்த தைரியத்தில் தான் அவர் மீண்டும் தேர்தலில் நிற்கிறார். எனவே அனைவரும், இரட்டை இலை சின்னத்துக்கு வாக்களித்து வெற்றி பெறச் செய்ய வேண்டும்” என்று கூறினார்.

Next Story

“மத்தியில் இந்தியா கூட்டணி ஆட்சி அமைய துரை வைகோவுக்கு வாக்களியுங்கள்” - அமைச்சர் அன்பில் மகேஷ்

Published on 11/04/2024 | Edited on 11/04/2024
Vote for Durai Vaiko to form India coalition government at center says Anbil Mahesh

திருச்சி தெற்கு மாவட்டம்,  கிழக்கு மாநகரம், கிழக்கு தொகுதியில் இந்திய கூட்டணியின் மறுமலர்ச்சி திராவிட முன்னேற்றக் கழகத்தின் வேட்பாளர்  துரை வைகோவை  ஆதரித்து  மாநகர  செயலாளர்  மு.மதிவாணன், கிழக்கு சட்டமன்ற உறுப்பினர் இனிகோ இருதயராஜ் தலைமையில் தீவிர பிரச்சாரம் நடைபெற்றது .

திருச்சி பாலக்கரை ரவுண்டானா, ஜெயில் பேட்டை, குப்பாங்குளம் மேம்பாலம், சூசையப்பர் கோவில், உப்புபாறை, முஸ்லீம் தெரு, சகாயமாதா கோவில், வி. எம்.பேட்டை வளைவு,பஜனை கூடத்தெரு, தர்மநாதபுரம், மல்லிகைபுரம் மெயின் ரோடு, துரைசாமிபுரம், நாகநாதர் டீஸ்டால், தனமணி காலனி, கோவிந்த கோனார் தெரு, சங்கிலியாண்டபுரம் மெயின் ரோடு அரசமரம், கீழப்புதூர் நாகநாதர் டீ கடை காளியம்மன் கோவில், எடத்தெரு விறகு மந்தை வழி, ரெங்கசாமி பூங்கா, புதுத்தெரு, சபரி ஆஸ்பத்திரி சந்து,மோட்சராக்கினி கோவில், கெம்ஸ்டவுன்,சந்தியாகப்பர் பாளையம் வழி, செங்குளம் காலனிகாவேரி திரைஅரங்கம், உடையான்தோட்டம், பருப்புகாரத்தெரு மெயின்ரோடு, எடத்தெரு அண்ணாசிலை  ஆகிய பகுதிகளில்ம திமுக வேட்பாளர் துரை. வைகோவை ஆதரித்து அமைச்சர் அன்பில் மகேஷ் பொய்யாமொழி தீவிர பிரச்சாரம் மேற்கொண்டார்.

அப்போது அமைச்சர் அன்பில் மகேஷ் பொய்யாமொழி துரைவைகோவை ஆதரித்து பேசியதாவது:- மகளிர் உரிமைத் தொகை வழங்கும் திட்டம்,  உயர்கல்வி பயிலும் மாணவிகளுக்கு புதுமைப் பெண்கள் திட்டம், இலவச பேருந்து பயணம் தந்த விடியல் பயணம் என பல்வேறு திட்டங்களை தந்த நமது முதல்வரின் கரத்தை வலுப்படுத்தவும், வர இருக்கின்ற பாராளுமன்றத் தேர்தலில் இந்திய கூட்டணி வெற்றி பெற்றவுடன் சுங்கச்சாவடிகள் அகற்றப்படவும், பெட்ரோல் டீசல் விலை குறைக்கப் பெறவும், வீட்டு உபயோகத்திற்கு பயன்படுத்தப்படும் கேஸ் விலை பாதியாக குறைக்கவும், நீட் தேர்வில் இருந்து நம் குழந்தைகள் விலக்கு பெற்றிடவும் நம்முடைய வேட்பாளர் துரை. வைகோவுக்கு தீப்பெட்டி சின்னத்தில் வாக்களித்து அவரை பெருவாரியான வாக்குகள் வித்தியாசத்தில் வெற்றி பெறச் செய்ய வேண்டும் எனக் கேட்டுக்கொள்கிறேன்” என்றார்.

இந்நிகழ்வில்   துணை மேயர் திவ்யா, கோட்டத் தலைவர் ஜெய நிர்மலா, பகுதி செயலாளர் ராஜ் முகமது, வட்டக் கழக செயலாளர்கள் சேகர், நலங்கிள்ளி, சுரேஷ், தனுஸ்கோடி, சில்வியா, கருணாநிதி, கோவிந்தராஜ், எடிட்டன், ஞனசேகர், சீனிவாசன், மற்றும் திமுக துணைப் பொதுச்செயலாளர் மருத்துவர் ரொஹையா, திருச்சி மாநகர் மாவட்டச் செயலாளர் வெல்லமண்டி சோமு, மாநில மாணவர் அணிச் செயலாளர் பால.சசிகுமார், மாநில தொண்டர் அணி ஆலோசகர் ஆ.பாஸ்கரசேதுபதி, மாநில ஆபத்து உதவிகள் அணிச் செயலாளர் சுமேஷ் உள்ளிட்ட கூட்டணி கட்சி நிர்வாகிகள், தொண்டர்கள் திரளாகக் கலந்து  கொண்டனர்.