கேரளத்தில் இருந்து வளைகுடா நாடு வரை பரபரப்பை ஏற்படுத்திக் கொண்டிருக்கும் சம்பவம், ஸ்வப்னா சுரேஷின் தங்கக் கடத்தல் விவகாரம். இந்த விவகாரத்தின் முக்கியப் புள்ளியாகச் செயல்பட்டவர் கேரளா முதல்வரின் முதன்மைச் செயலாளராக இருந்த சிவசங்கரன். இவர் சஸ்பென்ட் செய்யப்பட்டிருக்கும் நிலையில், சுங்கத்துறை மற்றும் அமலாக்கத்துறையின் வளையத்தில் இருக்கும் சிவசங்கரன் எந்த நேரத்திலும் கைது செய்யப்படலாம் என்கின்றனர் சுங்கத்துறை வட்டாரங்கள்.
ஸ்வப்னா சுரேஷின் தங்கக் கடத்தலுக்கு வசதியாக, சிவசங்கரன் அடுக்குமாடி குடியிருப்பில் ஒரு வீடு வாடகைக்கு எடுத்துக் கொடுத்திருந்ததாகவும், ஸ்வப்னா சுரேஷின் லாக்கரில் ரூ.1 கோடி இருப்பதாகவும் விசாரணையில் சிவசங்கரன் உறுதிப் படுத்தியுள்ளார். மேலும், அவரிடமிருந்து இன்னும் பல்வேறு தகவல்கள் சுங்கத்துறை அதிகாரிகளுக்கு கிடைத்துள்ளதால், அவரை விசாரணைக்கு மீண்டும் வருமாறு அதிகாரிகள் நோட்டீஸ் அனுப்பியிருந்தனர். அந்த விசாரணையின் முடிவில் சிவசங்கரன் கைது செய்யப்படலாம் என்ற தகவலும் வெளியானது.
இதைத் தொடர்ந்து எர்ணாகுளம் ஐகோர்ட்டில் முன்ஜாமின் தாக்கல் செய்தார் சிவசங்கரன். இதில், அவரின் உடல்நிலையைக் கருத்தில்கொண்டு, ஐகோர்ட் 23 -ஆம் தேதி வரை சிவசங்கரனை கைது செய்யத் தடை விதித்திருந்தது. இந்த நிலையில் திடீரென்று நெஞ்சு வலி இருப்பதாகக் கூறி, தனது மனைவி மருத்துவராகப் பணி புரியும் திருவனந்தபுரம் கிள்ளிபாலத்தில் உள்ள பி.ஆர்.எஸ் மருத்துவமனையில் அனுமதிக்கபட்டார். அங்கு அவருக்கு இதயக் கோளாறு எதுவும் இல்லை என்று மருத்துவர்கள் கூறினார்கள்.
இதற்கிடையில் முதுகுத் தண்டுவடத்தில், சிறு பிரச்சனை இருப்பதாக அந்த மருத்துவர்கள் அறிவுறுத்தியதால் அவரை மேல் சிகிச்சைக்காக திருவனந்தபுரம் அரசு மருத்துவக் கல்லூரி மருத்துவமனையில் அனுமதித்துள்ளனர். அவா் அனுமதிக்கபட்டிருக்கும் அறையைச் சுற்றி போலீசாரும் நிறுத்தப்பட்டுள்ளனர். அதேபோல் சுங்கத்துறை அதிகாரிகளும் கண்காணித்து வருகின்றனர். இதனால் அவர் கூடிய விரைவில் கைது செய்யப்படலாம் எனக் கூறப்படுகிறது.
இதற்கிடையில் இந்த விவகாரத்தில் பினராயி விஜயனுக்கும் தொடா்பு இருப்பதாகக் கூறி, எதிர்க்கட்சிகள் முதல்வர் பினராயி உடனே பதவி விலக வேண்டுமென்று போராடி வருகின்றனர்.
- "எல்லாருமே பார்ப்பீங்க" - விவரிக்கும் 'கூச முனுசாமி வீரப்பன்'
- "அதான் அடிச்சு தூக்குனேன்" - கூலாக சொன்ன கூச முனுசாமி வீரப்பன்
