Skip to main content

சத்தியமங்கலத்தில் தொடங்கிய 'காட்டுக் கொள்ளை' 

Published on 30/07/2020 | Edited on 30/07/2020

 

sathyamangalam forest

 

ஒரு காலத்தில் சத்தியமங்கலம் காடு என்றால் அது  'வீரப்பன் காடு' என அழைக்கப்பட்டது. வீரப்பன் வாழ்வியல் காலம் இருந்தவரை காட்டுக்குள் விலங்குகள், மற்றும் இயற்கை கொள்ளை என்பது முழுவதுமாக தடுக்கப்பட்டது. ஆனால் இப்போது வனப்பகுதியில் ஆங்காங்கே கொள்ளை சம்பவங்கள் நடைபெற தொடங்கி விட்டது என்று வனத்துறையினரே கூறுகிறார்கள்.

ஈரோடு மாவட்டம் தூக்கநாய்க்கன்பாளையம் வனச்சரகத்திற்குட்பட்ட வனப்பகுதியில் யானைகள், காட்டெருமை, சிறுத்தை, புலிகள் என ஏராளமான வனவிலங்குகள் உள்ளது. சத்தியமங்கலம் புலிகள் காப்பகமாக அறிவிக்கப்பட்ட பின்னர் வெளி ஆட்கள் வனப்பகுதிக்குள் செல்வது முழுமையாகத் தடை செய்யப்பட்டுள்ளது. தூக்கநாய்க்கன்பாளையம் வனப்பகுதிகளில் அடிக்கடி யானை தந்தங்கள் கடத்தப்படுவதாக வனத்துறையினருக்குத் தகவல் வந்தது. இதைத் தொடர்ந்து கணக்கம்பாளையம் பிரிவில் வனச்சரகர் கணேஷ் பாண்டியன் தலைமையில் பாரஸ்டர் ஆறுமுகம், கார்டுகள் பாலமுருகன், சுரேஷ், பழனிச்சாமி ஆகியோர் தீவிர கண்காணிப்புப் பணியில் ஈடுபட்டுக் கொண்டிருந்தனர்.

 

sathyamangalam forest

 

அப்போது அவ்வழியாக இரண்டு  இரு சக்கர வாகனங்களில் வந்த நான்கு பேரை பிடித்து அவர்கள் சோதனை செய்தனர். அப்போது அவர்களிடம் இரண்டு தந்தங்கள் இருப்பது தெரியவந்தது. இதைத்தொடர்ந்து அவர்களிடம் நடத்திய விசாரணையில், அவர்கள் தொட்டகோம்பை மலைக் கிராமத்தைச் சேர்ந்த பழனிச்சாமி, அந்தியூர் பூனாட்சியைச் சேர்ந்த அங்கப்பன், ஆண்டவன், கோவிந்தராஜன் என்பதும், அந்த வனப்பகுதிக்குள் வயது முதிர்ந்த யானை ஒன்று இறந்து கிடந்ததைப் பார்த்த பழனிச்சாமி அவரது நண்பர்களுடன் யானை தந்தங்களை வெட்டி எடுத்து விற்பனைக்காக டூவீலரில் எடுத்துச் செல்வது கண்டுபிடிக்கப்பட்டது. இதைத்தொடர்ந்து நான்கு பேரையும் வனத்துறையினர் கைது செய்து, அவர்களிடம் இருந்து 5 அடி நீளமுள்ள இரண்டு யானை தந்தங்கள், மற்றும் அவர்களின் இரண்டு டூவீலர்களையும் பறிமுதல் செய்தனர். 

அடுத்த சம்பவமாக ஈரோடு மாவட்டம் அந்தியூரையடுத்துள்ள பர்கூர் மலைப்பகுதி தட்டக்கரையில் வனத்துறையினர் வாகன தணிக்கையில் ஈடுபட்டிருந்தனர். அப்போது, அவ்வழியாக பைக்கில் வந்த 2 பேரை வனத்துறையினர் தடுத்து நிறுத்த முயன்றனர். ஆனால் அவர்கள் வனத்துறையினரை பார்த்ததும் தப்பிச் செல்ல முற்பட்டனர். இதைத்தொடர்ந்து அவர்களை வனத்துறையினர் மடக்கிப் பிடித்து விசாரணை நடத்தினர். அதில், அவர்கள் துர்சனாம்பாளையத்தைச் சேர்ந்த சிக்கணன், வெள்ளிமலைப் பகுதியைச் சேர்ந்த வீரபத்தரன் என்பதும், இவர்கள் வனப்பகுதியில் இருந்து சந்தன மரத்தை வெட்டி கர்நாடகா மாநிலத்திற்குக் கடத்திச் செல்வது தெரியவந்தது. இதையடுத்து வனத்துறையினர் இரண்டு பேரையும் கைது செய்து, அவர்களிடம் இருந்த 5கிலோ சந்தன கட்டையைப் பறிமுதல் செய்தனர்.

இச்சம்பவங்கள் ஒருபுறமிருக்க வனத்துறையினர் மீதே மலை மக்கள் வேறுவிதமாக குற்றம்சாட்டுகிறார்கள். ''இந்தக் காட்டுக்குள் அரசியல்வாதிகள், பெரும் செல்வந்தர்கள் பலருக்கும் காடு, தோட்டம் மட்டுமல்ல தங்கும் விடுதிகளும் உள்ளது. இவர்களுக்கு வனத்துறையினர் வேண்டிய எல்லா வசதிகளும் செய்கிறார்கள். சந்தன மரம் மட்டுமல்லாமல் தேக்கு, ஈட்டி போன்ற உயர்ரக மரங்கள் வனத்துறை உதவியுடன் வெட்டப்பட்டு கடத்தப்படுகிறது. யானை தந்தம், புலிகள், சிறுத்தைகளின் பல் மற்றும் நகங்களும் விற்பனைக்கு கொண்டு சென்று விடுகிறார்கள். இவர்களுக்கு ஒத்துழைக்காத மலை வாசிகள் மீது பொய் வழக்குப் போடுகிறார்கள்" என்கிறார்கள். எது எப்படியோ வீரப்பன் இல்லாத தைரியத்தில் 'காட்டுக் கொள்ளை' தொடங்கி விட்டது என அப்பகுதி மக்கள் முணுமுணுக்கிறார்கள்.

 


 

சார்ந்த செய்திகள்

Next Story

ஊருக்குள் நுழைந்த காட்டு யானை; அச்சத்தில் கிராம மக்கள்

Published on 17/03/2024 | Edited on 17/03/2024
A wild elephant entered the town; Villagers in fear

கோவையில் வேடப்பட்டியில் திடீரென காட்டு யானை ஊருக்குள் புகுந்ததால் பொதுமக்கள் அச்சத்தில் உறைந்துள்ளனர்.

கோவை மாவட்டம் பேரூர் அடுத்துள்ள வேடப்பட்டி, தொண்டாமுத்தூர் உள்ளிட்ட பகுதிகளில் கடந்த சில மாதங்களாகவே ஒற்றை காட்டு யானை ஒன்று திடீரென ஊருக்குள் புகுந்து அச்சுறுத்தி வருகிறது. அந்த பகுதியில் உள்ள விவசாய நிலங்கள் மற்றும் தோட்டங்களில் முகாமிட்டு பெரும் அச்சுறுத்தல் கொடுத்து வருகிறது.

கடந்த இரண்டு தினங்களுக்கு முன்பு கரடிமடை பகுதிக்கு வந்த காட்டு யானை தாக்கியதில் நான்கு பேர் காயமடைந்தனர். இந்நிலையில் இன்று அதிகாலை பேரூர் வேடப்பட்டி சாலை வழியாக ஒற்றை காட்டு யானை ஊருக்குள் புகுந்தது. சுமார் 20 கிலோமீட்டர் வனப்பகுதியில் இருந்து கடந்து வந்துள்ள காட்டு யானை தனியார் கல்லூரியின் பின்புறத்தில் முகாமிட்டுள்ளது.

காட்டு யானையை அந்த பகுதியில் இருந்து அப்புறப்படுத்த கோவை வனச்சரக வனத்துறையினர் தீவிர முயற்சி எடுத்து வருகின்றனர். இதனால் அந்த பகுதியில் பாதுகாப்பு எச்சரிக்கை அறிவிக்கப்பட்டுள்ளது. காட்டு யானை சுற்றி வருவதால் அந்த பகுதியில் உள்ள பொதுமக்கள் வீட்டிலேயே அடைந்து கிடக்கும் சூழல் ஏற்பட்டுள்ளது. ஒற்றைக் காட்டுயானை ஊருக்குள் புகுந்த சம்பவம் அந்த பகுதியில் பரபரப்பை ஏற்படுத்தி இருக்கிறது.

Next Story

யானைகள் தொடர் அட்டகாசம்; வனத்துறையை கண்டித்து கிராம மக்கள் சாலை மறியல்

Published on 16/03/2024 | Edited on 16/03/2024
 villagers staged a struggle against the forest department as the elephants continued to roar
கோப்புப்படம்

வேலூர் மாவட்டம் குடியாத்தம் அடுத்த கள்ளப்பாடி, கே.வலசை, கணவாய் மோட்டூர், அனுப்பு, டிபி பாளையம், உள்ளிட்ட பகுதிகள் தமிழக ஆந்திர எல்லையை ஒட்டி உள்ளது. இங்கு தொடர்ந்து யானைகள்  விவசாய நிலங்களுக்குள் புகுந்து பயிர்களை சேதப்படுத்தி வருகிறது.

மேலும் பயிர்களை தொடர்ந்து யானைகள் சேதப்படுத்தி வருவதாகவும் அதை கட்டுக்குள் கொண்டு வர வனத்துறையினர் நடவடிக்கை எடுக்க வேண்டும். மேலும் சேதம் அடைந்து வரும் பயிர்களுக்கு உரிய இழப்பீடு வழங்கக் கோரியும் கிராம மக்கள் சுமார் நூற்றுக்கும் மேற்பட்டோர் குடியாத்தம் - பரதராமி சாலையில் கணவாய் மோட்டூர் பகுதியில் சாலை மறியலில் ஈடுபட்டனர் இதனால் குடியாத்தம் பரதராமி சாலையில் சாலை போக்குவரத்து பாதிப்பு ஏற்பட்டது

இதனையடுத்து தகவல் அறிந்து சம்பவ இடத்திற்கு வந்த பரதராமி காவல்துறையினர் மற்றும் குடியாத்தம் வனத்துறையினர், மேற்கொண்ட பேச்சுவார்த்தையில் உரிய நடவடிக்கை எடுப்பதாக வனத்துறையினர்  உறுதி அளித்தனர். இதனையடுத்து கிராம மக்கள் கலைந்து சென்றனர். இதனால் அப்பகுதியில் சிறிது நேரம் போக்குவரத்து பாதிப்பு ஏற்பட்டது.