Skip to main content

என் சாதி கசக்குது... நான் சுமக்கும் வாரிசு மட்டும் இனிக்குதா? பெண் மருத்துவரின் விபரீத செயல்!

Published on 20/05/2022 | Edited on 21/05/2022

 

Salem female doctor case

 

 


சாதி ஆதிக்கத்தின் பிடியில் சிக்கிக்கொண்டு, சேலம் பெண் மருத்துவரும் திருமணமான ஒன்பதே மாதத்தில் தன் வாழ்க்கையை தொலைத்து இருக்கிறார். கூடவே, அவருடைய வயிற்றில் வளர்ந்த சிசுவும் பலி கொடுக்கப்பட்டு இருக்கிறது. 


சேலம் வீராணத்தைச் சேர்ந்தவர் கவுசல்யா (வயது 26, பெயர் மாற்றப்பட்டுள்ளது). நாமக்கல் மாவட்டத்தைச் சேர்ந்தவர் சந்தோஷ்குமார் (27). இருவருமே மருத்துவர்கள். ஒரு தனியார் மருத்துவக்கல்லூரியில் எம்.பி.பி.எஸ் படித்தபோது, சீனியரான சந்தோஷ்குமாரும், ஜூனியரான கவுசல்யாவும் காதல் வயப்பட்டுள்ளனர். பயிற்சி மருத்துவர்களாக இருவரும் ஒரே மருத்துவமனையில் வேலை செய்தபோது, அவர்களிடையே காதல் மேலும் இறுக்கம் அடைந்துள்ளது.


கவுசல்யா, பட்டியல் சமூகத்தைச் சேர்ந்தவர். சந்தோஷ்குமார், கன்னட தேவாங்க செட்டியார் சமூகத்தைச் சேர்ந்தவர். திருமணத்திற்கு முன்பு எல்லா இளைஞர்களுமே கம்யூனிஸ்ட்டுகள்தான் என்பார்கள். அதேபோல, காதலிக்கும்போது சந்தோஷ்குமாருக்கு காதலியின் சாதி பெரிதாக தெரியவில்லை. ஆனால், அவருடைய பெற்றோர், காதலுக்கு கடும் எதிர்ப்பு தெரிவித்தனர். அதேநேரம், பெண் வீட்டில் சந்தோஷ்குமாரை ஏற்றுக்கொண்டனர். 


ஆகையால் இரு வீட்டார் சம்மதத்துடன் நடக்க வேண்டிய திருமணம், பெண்ணின் பெற்றோர் சம்மதத்துடன் அவர்கள் தலைமையில், 9 மாதத்திற்கு முன்பு நடந்தது. கவுசல்யாவின் பெற்றோரும், சந்தோஷ்குமாரை மருமகனாக அல்லாமல் மகனாகவே பார்க்கத் தொடங்கினர். திருமணமான புதிதில் சில மாதங்கள் கவுசல்யாவின் பெற்றோர் வீட்டில்தான் இளம் தம்பதிகள் குடும்பம் நடத்தி வந்துள்ளனர். 


இந்த நிலையில், சேலத்தில் உள்ள ஒரு தனியார் மருத்துவமனையில் கவுசல்யாவும், மற்றொரு தனியார் மருத்துவமனையில் சந்தோஷ்குமாரும் வேலைக்குச் சேர்ந்தனர். இதற்காக அவர்கள், அஸ்தம்பட்டியில் தனியாக வாடகைக்கு வீடு எடுத்து தங்கினர். இது ஒருபுறம் இருக்க, இருவருமே மருத்துவப் பட்டமேற்படிப்பில் சேர நீட் தேர்வுக்காக படித்துக் கொண்டிருந்தனர். அதேநேரம், அவர்கள் மத்திய அரசுப் பணியில் சேரவும் முயற்சித்துக் கொண்டிருந்தனர். 


இந்த நிலையில்தான் சமீபத்தில் சேலம் இரும்பாலையில் உள்ள மருத்துவமனையில் மருத்துவர் பணிக்கான நேர்காணல் நடந்துள்ளது. இதில், கவுசல்யா தேர்வு செய்யப்பட்டார். சந்தோஷ்குமார் தேர்வாகவில்லை. மனைவிக்கு வேலை கிடைத்ததை கொண்டாட வேண்டிய சந்தோஷ்குமாரோ, இப்போதைக்கு வேலைக்குப் போக வேண்டாம் என தடுத்திருக்கிறார். தற்போது அவர், பத்து வார கால கர்ப்பிணியாக இருந்ததால், அவரை நேர்காணல் செய்தவர்களும் உடனடியாக பணியமர்த்தம் செய்வதிலும் தயக்கம் காட்டினர். 


மனைவிக்கு மட்டும் வேலை கிடைத்ததால் கணவருக்கு 'ஈகோ' ஏற்பட்டதால் அவரை வேலைக்குச் செல்லாமல் தடுப்பதாகத்தான் முதலில் சொல்லப்பட்டது. கணவரின் தொந்தரவு எல்லை மீறியதால், பொறுமை இழந்த கவுசல்யா இது தொடர்பாக சேலம் அம்மாபேட்டை மகளிர் காவல்நிலையத்தில் புகார் அளித்தார். ஆனால், கவுசல்யாவின் சீற்றத்திற்கு கணவரின் 'ஈகோ' மட்டும் காரணம் இல்லை என்கிறார்கள் காவல்துறையினர். 


நாம் அவர்களிடம் பேசினோம். ''கவுசல்யா அளித்த புகாரின்பேரில், அவரையும் அவருடைய கணவரையும் நேரில் அழைத்துப் பேசினோம். அண்மையில், சேலம் இரும்பாலையில் உள்ள மருத்துவமனையில் மருத்துவர் பணிக்கான நேர்காணலுக்குக் கூட சந்தோஷ்குமார்தான் மனைவியை அழைத்துச் சென்றிருக்கிறார். நேர்காணலில் கவுசல்யா மட்டும் தேர்வு செய்யப்பட்டுள்ளார். சந்தோஷ்குமார் தேர்வு ஆகவில்லை. அன்று நள்ளிரவு, சந்தோஷ்குமார் நேர்காணல் செய்த குழுவினரிடம் தனக்காகவும் பேசும்படி கூறியுள்ளார். எனக்கு வேலை கிடைக்காவிட்டால் நீயும் அந்த பணியில் சேர வேண்டாம் என கூறியுள்ளார். 


இப்படிச் சொல்லவும், எனக்கு மட்டும் வேலை கிடைத்ததால் உனக்கு பொறாமையா? என கவுசல்யா கேட்க, அவர்களுக்குள் வாய்த்தகராறு வெடித்துள்ளது. இருவரும் பழைய சம்பவங்களை எல்லாம் தோண்டி எடுத்து திட்டிக்கொண்டனர். இதற்கிடையே, நீட் தேர்வுக்கு விண்ணப்பித்தபோது கவுசல்யாவிடம், அவருடைய சாதியை குறிப்பிடாமல் 'ஜெனரல்' என்று குறிப்பிடும்படி கட்டாயப்படுத்தி உள்ளார். அதற்கு கவுசல்யா, ’ஏன் நான் எஸ்.சி.,தானே? அதை குறிப்பிடுவதில் என்ன தவறு இருக்கிறது?,' எனக் கேட்டுள்ளார். அப்போதும் அவர்களுக்குள் கருத்து வேறுபாடு ஏற்பட்டுள்ளது.


நீட் விண்ணப்பத்தில் சாதியைக் குறிப்பிடுவது தொடர்பாக ஏற்பட்ட கருத்து வேறுபாடுதான் அவர்களின் விவகாரம் காவல்நிலையம் வரை வர வைத்துள்ளது. சந்தோஷ்குமார் வெளிப்படையாக சாதிய போக்குடன் நடந்து கொள்ளாவிட்டாலும், மனைவியிடம் 'ஜெனரல்' என்று குறிப்பிடும்படி வற்புறுத்தியதும் சாதிய வன்கொடுமைதான். 


சம்பவத்தன்று இருவருக்கும் கடும் வாக்குவாதம் ஏற்பட்டுள்ளது. அப்போது திடீரென்று கவுசல்யா மயங்கி விழுந்துவிட்டார். மனைவியை கட்டுப்படுத்த முடியாத இயலாமையில் சந்தோஷ்குமாரும் கத்தியால் கையில் வெட்டிக்கொண்டு தற்கொலைக்கு முயன்றிருக்கிறார். அவர் அப்படிச் செய்வது முதல்முறை அல்ல. ஏற்கனவே ஒருமுறை இதேபோல் மனைவியுடன் தகராறு ஏற்பட்டபோதும், அளவுக்கு அதிகமாக தூக்க மாத்திரைகளை தின்று தற்கொலைக்கு முயன்றிருக்கிறார். 


அதன்பிறகு சுதாரித்துக்கொண்ட சந்தோஷ்குமார், தனது நண்பர் கணேஷ் என்பவரை வரவழைத்துள்ளார். இருவரும் சேர்ந்து கவுசல்யாவை தனியார் மருத்துவமனையில் சிகிச்சைக்கு சேர்த்தனர். மருத்துவர்கள் கேட்டபோது, வாந்தி எடுத்தபோது மயங்கி விழுந்துவிட்டதாக தெரிவித்துள்ளார். 


மறுநாள், இந்த விவகாரம் மேலும் பெரிதாக வெடித்துள்ளது. கவுசல்யாவை அவருடைய பெற்றோர் வீட்டுக்கு அனுப்பி விட்டார். சந்தோஷ்குமாரும் தனது பெற்றோர் வீட்டுக்குச் சென்றுவிட்டார். இது ஒருபுறம் இருக்க, சாதிய போக்குடன் கணவர் நடந்து கொள்வதை பிடிக்காத கவுசல்யா, அவர் மூலம் தன் வயிற்றில் உருவான வாரிசு மட்டும் எதற்கு? என்று தீர்மானித்து, சேலம் அரசு மருத்துவமனையில் 10 வார காலமாக வளர்ந்திருந்த கருவையும் கலைத்து விட்டார். 


இன்ஸ்பெக்டர் சிவகாமி, உதவி கமிஷனர் சரவணகுமார் ஆகியோர் அவர்களை அழைத்துப் பேசியும் அவர்களுக்குள் இணக்கமான உறவை மீண்டும் உருவாக்க முடியவில்லை. கவுசல்யா அளித்த புகாரின்பேரில் சந்தோஷ்குமார் மீது இதச பிரிவுகள் 294 பி, 323, 506 (2), 498 (ஏ) மற்றும் சாதி வன்கொடுமை சட்டத்தின் கீழ் வழக்குப்பதிவு செய்து விசாரணை நடத்தி வருகிறோம். அவருடைய நண்பர் கணேஷ் மீது வீட்டிற்குள் அத்துமீறி நுழைந்ததாகவும், மிரட்டியதாகவும் வழக்குப்பதிவு செய்துள்ளோம். தலைமறைவாக உள்ள அவர்களை தேடி வருகிறோம்'' என்கிறார்கள் காவல்துறையினர். 


 

 

சார்ந்த செய்திகள்

 

Next Story

நெருங்கி வரும் விநாயகர் சதுர்த்தி - மனுகொடுத்த களிமண் மண்பாண்ட சங்கத்தினர்

Published on 18/07/2024 | Edited on 18/07/2024
 'Plaster of Paris Ganesha idols should be banned'- clay potters petition

விநாயகர் சதுர்த்தி நெருங்கி வரும் நிலையில் தமிழகத்தின் பல்வேறு பகுதிகளில் விநாயகர் சிலைகள் தயாரிப்பதற்கான பணிகள் தற்போது துவங்கி தீவிரமாக நடைபெற்று வருகிறது. சில இடங்களில் விநாயகர் சிலைகள் தயாரிப்பு முடிவடைந்து சிலைகளுக்கு வண்ணம் சேர்க்கும் பணிகள் நடைபெற்று வருகிறது.

சில ஆண்டுகளாகவே இரசாயனம் கலந்த பிளாஸ்டர் ஆஃப் பாரிஸ்  உள்ளிட்ட பொருட்கள் மூலம் விநாயகர் சிலைகளை தயாரிக்க அரசு தடை விதித்ததோடு, விநாயகர் சிலை தயாரிப்பதற்கான பல்வேறு கட்டுப்பாடுகளையும் அரசு வெளியிட்டு இருந்தது. அதன்படி பிளாஸ்டர் ஆஃப் பாரிஸ் மூலப் பொருட்களால் தயாரிக்கப்பட்ட சிலைகள் உள்ள இடங்கள் மற்றும் குடோன்களில் அதிகாரிகள் ஆய்வு செய்து குடோன்களை மூடிய சம்பவங்களும் நிகழ்த்திருந்தது.

இந்நிலையில் வடமாநிலத்தவர் பிளாஸ்டர் ஆஃப் பாரிஸில் சிலை தயாரிப்பதை தடுத்து நிறுத்த வேண்டும் என சேலத்தில் களிமண் மண்பாண்ட தொழிலாளர் சங்கத்தினர் சேலம் மாவட்ட ஆட்சியர் அலுவலகத்தில் மனு அளித்தனர்.

குலாலர் மண்பாண்டம், களிமண் பேப்பர் கூழ் விநாயகர் சிலை பொம்மைகள் தயாரிப்பாளர்கள் மற்றும் விற்பனையாளர்கள் சங்கம் சார்பில் அதன் நிர்வாகிகள் சேலம் மாவட்ட ஆட்சியரிடம் பிளாஸ்டர் ஆஃப் பாரிஸ் விநாயகர் சிலைகளுடன் மனு அளித்தனர். மேலும் சிலை தயாரிப்பதற்கான கட்டுப்பாடுகளை விரைவாக அரசு வெளியிட வேண்டும் என்று கோரிக்கையும் வைத்துள்ளனர்.

Next Story

அதிமுக பிரமுகர் படுகொலை; 9 பேர் கைது - சேலத்தில் உச்சக்கட்ட பரபரப்பு 

Published on 04/07/2024 | Edited on 04/07/2024
9 people arrested in Salem AIADMK executive Shanmugam case

சேலம் மாவட்டம் தாதகாப்பட்டி, தாகூர் தெருவைச் சேர்ந்தவர் சண்முகம்(60). இவர், கடந்த அதிமுக ஆட்சியில் சேலம் மாநகராட்சியின் மண்டலக் குழு தலைவராக இருந்துள்ளார். தற்போது, இவர் சேலம் கொண்டலாம்பட்டி பகுதியின் அதிமுக செயலாளராக இருந்து வந்தார். சமீபகாலமாக சண்முகத்திற்கு கொலை மிரட்டல் விடுத்து அடிக்கடி புதிய புதிய எண்ணிலிருந்து கால் வந்துள்ளது. ஆனால் அதனைப் பொருட்படுத்தாமல் இருந்து வந்துள்ளார். 

இந்த நிலையில், கடந்த புதன்கிழமை இரவு 10 மணியளவில் சண்முகம், சேலம் தாதகாப்பட்டி அருகே உள்ள சஞ்சீவிராயன் பேட்டை மாரியம்மன் கோயில் தெரு பகுதிக்கு, தன்னுடைய இரு சக்கர வாகனத்தில் வந்துள்ளார். அப்போது, அங்கு மறைந்திருந்த மர்ம நபர்கள் சிலர், சண்முகத்தை வழிமறித்து வெட்டிப் படுகொலை செய்துவிட்டு அங்கிருந்து தப்பி ஓடினர். இதைக் கண்டு அதிர்ச்சிக்குள்ளான அக்கம் பக்கத்தினர் அன்னதானப்பட்டி காவல்துறைக்கு தகவல் தெரிவித்துள்ளனர். தகவல் அறிந்ததும் அதிமுகவினர் அந்தப் பகுதியில் ஒன்று கூடியுள்ளனர்.

சம்பவ இடத்திற்கு வந்த சண்முகத்தின் குடும்பத்தினர் கதறி துடித்து கண்ணீர் விட்டனர். மேலும் இறந்துபோன சண்முகத்தின் உறவினர்கள் கொலை செய்த நபர்களை கைது செய்யும் வரையிலும், உடலை வாங்கமாட்டோம் என அரசு மருத்துவமனையிலேயே தர்ணாவில் ஈடுபட்டனர். மேலும் உறவினர்களிடம் போலீஸார் பேச்சு வார்த்தை நடத்தினர். அப்போது, அதிமுகவினருக்கும் போலீஸாருக்கும் இடையில் தள்ளுமுள்ளு ஏற்பட்டது. இதையடுத்து அதிமுக நிர்வாகிகள், தொண்டர்கள் அங்கிருந்து அகற்றப்பட்டனர். இதனால் அந்த பகுதியில் பதற்றம் நிலவியது. நீண்ட நேர பேச்சுவார்த்தைக்கு பின்னர், மாநகர் காவல் துணை ஆணையர் மதிவாணன் தலைமையிலான போலீஸார் சம்பவ இடத்திலிருந்து உடலை கைப்பற்றி சேலம் அரசு மருத்துவமனைக்கு அனுப்பி வைத்தனர். உயிரிழந்த சண்முகம் 2011 முதல் 2016 ஆம் ஆண்டு வரை, சேலம் மாநகராட்சி கொண்டலாம்பட்டி மண்டலத் தலைவராக பதவி வகித்துள்ளார். ரியல் எஸ்டேட் உள்ளிட்ட தொழில்களிலும் அவர் ஈடுபட்டு வந்துள்ளார். அத்துடன் இவர், சந்துக்கடை வியாபாரம் குறித்தும் லாட்டரி விற்பனை குறித்தும் போலீசாருக்கு அடிக்கடி தகவல் கொடுத்து வந்ததாக சொல்லப்படுகிறது. இதனால், கொலைக்கான காரணம் முன்விரோதமா? அல்லது வேறு ஏதேனும் காரணமா என்பது தொடர்பாக மோப்ப நாயுடன் போலீசார் விசாரணை மேற்கொண்டு வந்தனர்.

இதுதொடர்பாக அதிமுக பொதுச்செயலாளர் எடப்பாடி பழனிசாமி வெளியிட்டுள்ள இரங்கல் அறிக்கையில், “நாங்கள் ஏற்கனவே சொல்வதுபடி தமிழகத்தில் சட்டம் ஒழுங்கு சீர்குலைந்து போய் காணப்படுகிறது. அதற்கு அதிமுக தொண்டர் பலியாகி இருப்பது பெரும் வேதனையை அளிக்கிறது. உடனே சம்பந்தப்பட்ட கொலையாளிகளை கைது செய்யவேண்டும். இந்த கொலையில் சம்பந்தப்பட்டவர்கள் மீது உரிய நடவடிக்கை எடுக்கவேண்டும் " எனத் தெரிவித்துள்ளார். 

இந்த நிலையில், சண்முகம் கொலை வழக்கில் சேலம் தாதகாப்பட்டியைச் சேர்ந்த லாட்டரி வியாபாரி எனச் சொல்லப்படும் சதீஷ், அருண்குமார், முருகன் உட்பட 9 பேர் கைதுசெய்யப்பட்டுள்ளனர். போலீசார் நடத்திய விசாரணையில்.. திமுகவை சேர்ந்த சதீஷ், கடந்த 2 ஆண்டுகளாக தாதகாப்பட்டியில் சட்டவிரோதமாக கஞ்சா விற்பனை, லாட்டரி விற்பனை செய்து வந்தாரென கூறப்படுகிறது. இதன் காரணமாக சண்முகத்திற்கும் சதீஷ்கும் இடையே தகராறு ஏற்பட்டதாக சண்முகத்தின் உறவினர்கள் தரப்பில் கூறப்படுகிறது. இதன் அடிப்படையில்தான், சண்முகத்தை சதீஷ் கூலிப்படைகளை ஏவி வெட்டி படுகொலை செய்துள்ளதாகச் சண்முகத்தின் மனைவியும் குடும்ப உறுப்பினர்களும் தெரிவித்த நிலையில், தற்போது சதீஷ் கைது செய்யப்பட்டுள்ளார்.

ஏற்கெனவே கடலூரில் அதிமுக நிர்வாகி ஒருவர் திருட்டு ஆடுகள் வாங்கியதில் ஏற்பட்ட முன்விரோதத்தில் கொலை செய்யப்பட்ட நிலையில் தற்போது சேலத்தில் அதிமுக நிர்வாகி ஒருவர் மர்ம நபர்களால் சாலையிலேயே வெட்டி படுகொலை செய்யப்பட்டது மீண்டும் பரபரப்பை ஏற்படுத்தி இருக்கிறது.