Skip to main content

நீரிழிவு, இருதயம், புற்று நோய் இருக்கிறதா? வீடு வீடாகக் கணக்கெடுக்க சேலம் மாநகராட்சி முடிவு!

Published on 03/07/2020 | Edited on 03/07/2020

 

SALEM CORPORATION ARRANGED DOOR BY DOOR INSPECTION CORONAVIRUS PREVENTION

 

கரோனா தொற்று நோய்த் தடுப்பு முன்னெச்சரிக்கை நடவடிக்கையாக சேலம் மாநகராட்சிக்கு உட்பட்ட 4 மண்டலங்களில் உள்ள 60 கோட்டங்களில் பல்வேறு தடுப்பு நடவடிக்கைகளை மாநகராட்சி நிர்வாகம் மேற்கொண்டு வருகிறது. இதன் ஒரு பகுதியாக, ஒவ்வொரு வீடாகச் சென்று வீட்டில் உள்ளவர்கள் விவரம் குறித்து கணக்கெடுப்புப் பணிகள், மாநகராட்சி களப்பணியாளர்கள் மூலம் மேற்கொள்ளப்பட உள்ளது.

 

வீட்டில் இருப்பவர்களின் பெயர், வயது, தொலைபேசி எண், மொத்த குடும்ப உறுப்பினர்களின் எண்ணிக்கை, வெளி மாவட்டம்/ வெளி மாநிலங்களில் பணிபுரிவோர் இருந்தால் அதன் விவரம், நீரிழிவு நோய், இதய நோய், உயர் ரத்த அழுத்தம், சுவாசக் கோளாறு, புற்று நோய் ஆகிய பாதிப்புகள் உள்ளவர்கள் விவரம் மற்றும் நாள்பட்ட நோயால் பாதிக்கப்பட்டு சிகிச்சை பெற்று வருபவர்களின் விவரங்களைக் கணக்கெடுப்பாளர்களிடம் தெரிவிக்க வேண்டும்.

 

இந்த விவரங்களின் அடிப்படையில், பொதுமக்களைத் தொற்று நோயிலிருந்து பாதுகாக்க மாநகராட்சி நிர்வாகம் உரிய நடவடிக்கை எடுப்பதுடன், தொடர் கண்காணிப்புப் பணிகளையும் மேற்கொள்ளும். குடும்ப உறுப்பினர்களிடம் ஏதாவது நோய் அறிகுறிகள் தென்பட்டால் உடனடியாகக் களப் பணியாளர்களிடமோ அல்லது மாநகராட்சி சார்பில் அமைக்கப்பட்டுள்ள கட்டுப்பாட்டு அறையின் 0427- 2212844 என்ற தொலைபேசி எண்ணுக்கோ தொடர்பு கொண்டு தெரிவிக்கலாம்.

 

குடும்ப நிகழ்ச்சிகளில் கலந்து கொள்வதற்காகவோ அல்லது பிற பணிகளுக்காக தங்களது வீடுகளுக்கு வெளி மாநிலம், பிற மாவட்டங்களில் இருந்து வரக்கூடியவர்களின் விவரங்களைப் பொதுமக்கள் கண்டிப்பாகக் கணக்கெடுப்பு பணிகள் மேற்கொள்ள வரும் மாநகராட்சி களப்பணியாளர்களிடம் தெரிவித்திட வேண்டும்.

 

சேலம் மாநகராட்சி எல்லைக்குள் வசிக்கும் பொதுமக்கள், தங்களுடைய வீடுகளுக்கு உரிய அடையாள அட்டையுடன் வரும் மாநகராட்சி களப்பணியாளர்களிடம் மேற்சொன்ன விவரங்களை எவ்வித விடுபடுதலுமின்றி சரியான முறையில் தெரிவித்து, மாநகராட்சி நிர்வாகம் மேற்கொள்ளும் கரோனா தொற்று நோய்த் தடுப்புப் பணிகளுக்கு ஒத்துழைப்பு வழங்குமாறு மாநகராட்சி ஆணையர் சதீஷ் கேட்டுக்கொண்டுள்ளார்.

 

 

சார்ந்த செய்திகள்

Next Story

ஆம்னி பேருந்து நிறுத்த வளாகத்தில் அமைச்சர்கள் ஆய்வு!

Published on 11/02/2024 | Edited on 11/02/2024
Ministers inspect the omni bus stop complex

கிளாம்பாக்கம் கலைஞர் நூற்றாண்டு பேருந்து முனையத்தில் இருந்து முதற்கட்டமாக அரசு விரைவு பேருந்துகள் (SETC) இயக்கப்பட்டன. அதனைத் தொடர்ந்து ஜனவரி 24 ஆம் தேதி முதல் தனியார் சொகுசு பேருந்துகள் (OMNI BUS) இயக்கப்பட்டது. அதன் தொடர்ச்சியாக திண்டிவனம் மற்றும் செங்கல்பட்டு வழியாக தென்மாவட்டங்களுக்கு செல்லும் 710 அரசுப் பேருந்துகளும் (TNSTC) கடந்த 30 ஆம் தேதி (30.01.2024) முதல் கிளாம்பாக்கத்தில் இருந்து இயக்கப்பட்டு வருகிறது.

இத்தகைய சூழலில் கடந்த ஜனவரி 24 ஆம் தேதி முதல் கிளாம்பாக்கத்திலிருந்து ஆம்னி பேருந்துகளை இயக்க வேண்டும் என்ற உத்தரவை எதிர்த்து ஆம்னி பேருந்து உரிமையாளர்கள் சென்னை உயர்நீதிமன்றத்தில் மனுத் தாக்கல் செய்திருந்தனர். அந்த மனுவில், ‘இந்த வழக்கு முடியும் வரை கோயம்பேட்டிலிருந்து ஆம்னி பேருந்துகளை இயக்க அனுமதிக்க வேண்டும்’ எனத் தெரிவித்திருந்தனர். இது தொடர்பான மனு இன்று விசாரணைக்கு வந்த போது, “கோயம்பேடு பேருந்து நிலையம் அருகே ஆம்னி பேருந்து பணிமனைகளை ஏற்கெனவே மக்கள் பயன்படுத்தியுள்ளனர். அதனால், மறு உத்தரவு வரும் வரை கோயம்பேடு ஆம்னி பேருந்து பணிமனைகளில் பயணிகளை ஏற்றி இறக்கலாம். போரூர், சூரப்பட்டு சுங்கச் சாவடிகளிலும் பயணிகளை ஏற்றி இறக்கிக் கொள்ளலாம்.

கிளாம்பாக்கம் பேருந்து நிலையத்தில் பயணிகளை ஏற்றி இறக்காமல் தென் மாவட்டத்திற்கு செல்லும் எந்த ஆம்னி பேருந்தையும் இயக்கக் கூடாது. ஆன்லைன், மொபைல் ஆப்களில் போரூர், சூரப்பட்டு தவிர பயணிகளை ஏற்றி இறக்க வேறு இடங்களைக் குறிப்பிடக் கூடாது” என்று உத்தரவிட்டிருந்தது. இந்நிலையில் கோயம்பேட்டில் இருந்து நேற்று (10.02.2024) இரவு முதல் மீண்டும் ஆம்னி பேருந்துகள் இயக்கப்பட்டு வருகிறது. அதே சமயம் கோயம்பேடு ஆம்னி பேருந்துகளுக்கான பேருந்து நிலையத்திற்கு பதிலாக முடிச்சூரில் அருகே உள்ள மண்ணிவாக்கத்தில் ஆம்னி பேருந்து நிறுத்த வளாகம் கட்டப்பட்டு வருகிறது. இந்நிலையில் முடிச்சூர் ஆம்னி பேருந்து நிறுத்த வளாகத்தில் அமைச்சர்கள் வளாகத்தில் அமைச்சர்கள் சிவசங்கர், சேகர்பாபு ஆய்வு மேற்கொண்டனர்.

Ministers inspect the omni bus stop complex

அதனைத் தொடர்ந்து அமைச்சர்கள் சேகர்பாபு, சிவசங்கர் செய்தியாளர்களை கூட்டாக சந்தித்து பேசினர். அதன்படி சேகர்பாபு பேசுகையில், “முடிச்சூர் ஆம்னி பேருந்து நிலையத்தில் 150 பேருந்துகள் நிற்கும் அளவிற்கும், 300 பேர் வரை தங்குவதற்கான இடமும், உணவகமும், அலுவலக அறைகளும், கழிவறைகளும் கட்டப்பட்டு வருகின்றன. இந்த பணிகள் பணி ஏப்ரலில் நிறைவு பெறும்” எனத் தெரிவித்தார். அதனைத் தொடர்ந்து அமைச்சர் சிவசங்கர் பேசுகையில், “கிளாம்பாக்கம் பேருந்து நிலையத்தில் பேருந்துகள் இயக்கப்படவில்லை என நள்ளிரவில் போராட்டம் நடத்தியதில் உள்நோக்கம் இருக்குமோ என சந்தேகம் அளிக்கிறது. கிளாம்பாக்கத்தில் இருந்து வழக்கமான பேருந்துகள் இயக்கப்பட்டு வருகின்றன ” எனத் தெரிவித்தார். 

Next Story

மழை வெள்ள பாதிப்பு; தூத்துக்குடியில் மத்தியக் குழுவினர் ஆய்வு!

Published on 12/01/2024 | Edited on 12/01/2024
 Rain and flood damage Central team inspection in Tuticorin

கன்னியாகுமரி, திருநெல்வேலி, தூத்துக்குடி, தென்காசி ஆகிய தென் மாவட்டங்களின் பல இடங்களில் கடந்த டிசம்பர் 17 மற்றும் 18 ஆம் தேதிகளில் கனமழை பெய்தது. இதனால் தாழ்வான பகுதிகளில் வெள்ள நீர் சூழ்ந்தது. பல்வேறு இடங்களில் போக்குவரத்து சேவையும் பாதிக்கப்பட்டது. அதே சமயம் தொடர் கனமழை எதிரொலியாக குடியிருப்புப் பகுதிகள், சாலைகள், ரயில் நிலையம் என அனைத்து இடங்களிலும் வெள்ளம் சூழ்ந்துள்ளதால் மக்களின் இயல்பு வாழ்க்கை பாதிக்கப்பட்டது.

இதனையடுத்து தென் மாவட்டங்களில் மழை வெள்ள பாதிப்புகளை டெல்லியில் இருந்து வந்த மத்தியக் குழுவினர் டிசம்பர் 19 ஆம் தேதி பார்வையிட்டு ஆய்வு செய்தனர். தேசியப் பேரிடர் மேலாண்மைக் குழு ஆலோசகர் கே.பி. சிங் தலைமையிலான ஐந்து பேர் கொண்ட குழு தென் மாவட்டங்களான தூத்துக்குடி, நெல்லை, தென்காசி, கன்னியாகுமரி மாவட்டங்களில் ஏற்பட்ட வெள்ளச் சேதங்களைக் கணக்கிட்டனர். அதனைத் தொடர்ந்து தமிழக முதல்வர் மு.க. ஸ்டாலின் தூத்துக்குடியில் வெள்ள பாதிப்புகளை டிசம்பர் 20 ஆம் தேதி பார்வையிட்டு ஆய்வு செய்தது குறிப்பிடத்தக்கது.

இந்நிலையில் தூத்துக்குடியில் ஏற்பட்ட மழை வெள்ள பாதிப்புகளை இரண்டாம் கட்டமாக மத்தியக் குழுவினர் 7 பேர் ஆய்வு செய்து வருகின்றனர். கே.பி. சிங் தலைமையிலான இந்த குழுவில் ரங்கநாத் தங்கசாமி, பொன்னுசாமி, ராஜேஷ் திவாரி, விஜயகுமார் ஆகியோர்  இடம்பெற்றுள்ளனர். இவர்கள் மழை வெள்ள பாதிப்பு குறித்து கேட்டறிந்து வருகின்றனர். தூத்துக்குடி மாவட்ட ஆட்சியர் அலுவலகத்தில் நடைபெறும் இந்த ஆய்வு கூட்டத்தில் தமிழக அரசின் கூடுதல் தலைமைச் செயலாளர் பிரபாகர், தூத்துக்குடி மாவட்ட ஆட்சியர் லட்சுமிபதி ஆகியோர் உடன் இருந்தனர். இதனைத் தொடர்ந்து மாவட்டத்தின் பல்வேறு பகுதிகளில் இரு குழுக்களாகப் பிரிந்து ஆய்வு செய்ய உள்ளனர்.