Skip to main content

கூட்டுறவு வங்கியில் ரூ.25 கோடி மோசடி; அதிகாரி தீவிர விசாரணை

Published on 17/05/2024 | Edited on 17/05/2024
Rs 25 crore fraud in Dharmapuri City Cooperative Bank

தர்மபுரி நகர கூட்டுறவு வங்கியில் கடந்த, 2003-ஆம் ஆண்டு கம்ப்யூட்டர் மென்பொருள்  ஒப்பந்ததாரர் தங்கவேல் என்பவர் வங்கியில் இருந்து நூதன முறையில் ரூ. 2 கோடியே, 87 லட்சத்தை  வெவ்வேறு வங்கி கணக்குகளுக்கு அனுப்பி மோசடி செய்தார். இந்த மோசடி குறித்து போலீசார் வழக்கு பதிவு செய்து அவரை கைது செய்தனர்.

இதைத் தொடர்ந்து கடந்த 20 ஆண்டுகளாக  நடந்த வழக்கு விசாரணையின் போது  வங்கியின் சார்பில் மோசடி செய்யப்பட்ட பணத்தில் இருந்து  தங்கவேல், அவரது மனைவி சுப்தரா, நண்பர் சிவமணி உள்ளிட்டோர் பெயரில் கிரயம் செய்யப்பட்ட, ரூ. 25 கோடி மதிப்பிலான சொத்துக்கள் ஜப்தி செய்யப்பட்டு வங்கி பெயரில் கையகப்படுத்தப்பட்டுள்ளது. வங்கியில் இருந்து மோசடி செய்யப்பட்ட பணம் மற்றும் அதற்கான வட்டி என மொத்தம் ரூ.12 கோடியை  தங்கவேல் வங்கிக்கு செலுத்த வேண்டும் என்று அறிவுறுத்தப்பட்டு பலமுறை நோட்டீஸ் அனுப்பப்பட்டது.

இந்த நிலையில் தங்கவேல் வங்கியில் இருந்து ஜப்தி செய்யப்பட்ட சொத்துக்களை போலி ஆவணங்கள் மூலம் பினாமிகள் பெயரில் கிரையம் செய்துள்ளது கண்டுபிடிக்கப்பட்டது. மேலும் ரூ.25 கோடி முறைகேட்டில் தங்கவேல் பினாமிகள் 18 பேர் உடந்தையாக இருப்பதாக பல்வேறு புகார்கள் எழுந்தது.

இதையடுத்து, தர்மபுரி நகர கூட்டுறவு வங்கி சார்பில் ஜப்தி செய்யப்பட்டு கையகப்படுத்தப்பட்ட சொத்துக்களை போலி ஆவணங்கள் மூலம் விற்பனை செய்து ரூ.25 கோடி வரை மோசடி செய்த சம்பவம் தொடர்பாக விசாரணை நடத்த கூட்டுறவு சார் பதிவாளர் கவுரி என்பவரை தமிழக அரசு நியமித்துள்ளது. இதையடுத்து, அவர், தர்மபுரி நகர கூட்டுறவு வங்கியில் இந்த மோசடி குறித்து விசாரணையை தொடங்கியுள்ளார். தொடர்ந்து அவர் வங்கியில் உள்ள  ஆவணங்களை சரி பார்க்கும் பணியில் ஈடுபட்டுள்ளதாக கூறப்படுகிறது. இந்த முறைகேட்டில் சம்பந்தப்பட்டவர்களை நேரில் அழைத்து விசாரணை நடத்தவும் அவர் முடிவு செய்துள்ளதாக கூறப்படுகிறது.

சார்ந்த செய்திகள்

 

Next Story

கைமாறிய பெரும் தொகை?-ஆம்ஸ்ட்ராங் வழக்கில் மேலும் இருவர் கைது

Published on 17/07/2024 | Edited on 17/07/2024
Huge amount changed hands?- Two more arrested in Armstrong case including woman

தமிழக பகுஜன் சமாஜ் கட்சியின் மாநில தலைவர் ஆம்ஸ்ட்ராங் கடந்த 05.07.2024 அன்று இரவு பெரம்பூரில் உள்ள அவரது வீட்டின் அருகே 6 பேர் கொண்ட மர்ம கும்பலால் வெட்டி படுகொலை செய்யப்படார். இது தொடர்பாக  சரணடைந்த ஆற்காடு சுரேஷின் தம்பி பொன்னை பாலு, ராமு, திருவேங்கடம், திருமலை, செல்வராஜ், மணிவண்ணன், சந்தோஷ், அருள், கோகுல், விஜேஷ், சிவசக்தி ஆகிய 11 நபர்களும் போலீசார் கஸ்டடியில் எடுக்கப்பட்டு விசாரணை நடைபெற்றது. இத்தகைய சூழலில் இந்த வழக்கில் தொடர்புடைய முக்கிய குற்றவாளியான பிரபல ரவுடி திருவேங்கடம் 14.07.2024 அன்று அதிகாலை என்கவுன்டர் செய்யப்பட்டது பரபரப்பை ஏற்படுத்தியது.

இந்த வழக்கில் சரணடைந்த மொத்தம் 11 பேர் 5 நாட்கள் காவல் துறை கஸ்டடியில் விசாரணைக்கு அழைத்து செல்லப்பட்ட நிலையில் என்கவுன்டர் செய்யப்பட்ட திருவேங்கடத்தை தவிர்த்து மற்ற 10 பேரும் 5 நாள் காவல் கஸ்டடி முடிந்து பூவிருந்தவல்லி தனி கிளைச் சிறையில் மீண்டும் அடைக்கப்பட்டுள்ளனர்.

இந்நிலையில்  ஆம்ஸ்ட்ராங்  கொலை வழக்கில் மேலும் இரண்டு பேரை போலீசார் கைது செய்துள்ளனர். மலர்கொடி மற்றும் ஹரிஹரன் என்ற இருவரை போலீசார் இந்த கொலைச் சம்பவம் தொடர்பாக கைது செய்துள்ளதாக தகவல்கள் வெளியாகி உள்ளது. வழக்கறிஞரான ஹரிஹரன் தரப்பில் இருந்து கொலையாளிகளுக்கு பெரும் தொகை மாறியது விசாரணையில் தெரியவந்துள்ளது எனவும் கூறப்படுகிறது. கைது செய்யப்பட்ட ஹரிஹரன், மலர்க்கொடியை ரகசிய இடத்தில் வைத்து போலீசார் விசாரணை செய்து வருவதாக தகவல்கள் வெளியாகி உள்ளது.  

மலர்கொடி  ஜாம்பஜார் பகுதியைச் சேர்ந்த தாதாவான தோட்டம் சேகருடைய மனைவி  என்று தெரியவந்துள்ளது. எதற்காக, யாரால் இந்த கொலை செய்யப்பட்டது என்பது தொடர்பாக தீவிர விசாரணை நடைபெற்று வருகிறது.

Next Story

தகராறு செய்த மனைவி; திருமணம் செய்து வைத்த புரோக்கரை தாக்கிய கணவர்

Published on 17/07/2024 | Edited on 17/07/2024
 husband  beaten broker who had married him because his wife had a dispute

விழுப்புரம் மாவட்டம் வடவாம்பழத்தைச் சேர்ந்த ஜானகிராமன் மகன் சக்திவேல். இவர் கூலி தொழில் பார்த்துவருகிறார். இவருக்கும் அதே பகுதியைச் சேர்ந்த ஜெகதீஸ்வரி என்வருக்கும் கடந்த 12 ஆண்டுகளுக்கு முன்பு திருமணம் நடந்துள்ளது. சக்திவேல் - ஜெகதீஸ்வரி இருவருக்கும் அரசமங்கலத்தை சேர்ந்த பெருமாள் என்ற கல்யாண புரேக்கர் திருமணம் செய்துவைத்திருக்கிறார். 

இந்த நிலையில் கணவன் சக்திவேலுக்கும், மனைவி ஜெகதீஸ்வரிக்கும் இடையே அடிக்கடி தகராறு ஏற்பட்டு வந்துள்ளது. அதேபோன்று சம்பவத்தன்று இருவருக்கும் இடையே குடும்ப பிரச்சனை தொடர்பாகத் தகராறு ஏற்பட்டுள்ளது. ஒரு கட்டத்தில் தகராறு முற்றிக் கைகலப்பு நடந்ததாக கூறப்படுகிறது. இதனைத் தொடர்ந்து மனைவி ஜெகதீஸ்வரி கோபித்துக்கொண்டு தாய் வீட்டிற்குச் சென்றுள்ளார். 

இதனால் ஆத்திரமடைந்த சக்திவேல் இருவருக்கும் வரன் பார்த்து திருமணம் செய்துவைத்த புரோக்கர் பெருமாளை தாக்கியுள்ளார். அரசமங்கலம் ரேஷன் கடையில் நின்றுக்கொண்டிருந்த அவரை சக்திவேல், “நீ தான எனக்குப் பெண் பார்த்து திருமணம் செய்து வச்ச, இப்போ பாரு என் மனைவி அடிக்கடி சண்டை போடுறா..” என்று ஆபாச வார்த்தையில் புரோக்கர் பெருமாளை திட்டி தாக்கியதாகக் கூறப்படுகிறது. இதனைத் தொடர்ந்து புரோக்கர் பெருமாள் கொடுத்த புகாரின் பேரில் சக்திவேல் மீது வழக்குப் பதிவு செய்த போலீசார், அவரை கைது செய்து விசாரணை நடத்தி வருகின்றனர்.