Skip to main content

சாராயம் காய்ச்சியவருக்கு ‘மாமூல்’ போலீஸ் சப்போர்ட்! -உயிர் பயத்தில் ஒரு குடும்பம்!

Published on 18/05/2020 | Edited on 18/05/2020

 

 Vellore Power cut issue

 

“நீதான போலீஸ் மேல பெட்டிஷன் போடறவன்.. அவன் சாராயம் காய்ச்சினா உனக்கென்னடா.. வம்பா செத்து போயிடுவ.. வீட்ட காலி பண்ணிட்டு போயிடு. உன் புகாரை வாங்க முடியாதுடா..”

சமூக ஆர்வலர் என்று சொல்லப்படும் பிரகாஷ், சாராயக் கும்பலொன்று, தன்னைக் குடும்பத்தினரோடு கொலை செய்வதற்குத் திட்டம் வகுத்துள்ளதாக, ராஜபாளையம் வடக்குக் காவல் நிலையத்தில் புகார் கொடுக்க வந்தபோது, சார்பு ஆய்வாளர் முத்துகுமார் திட்டிய வார்த்தைகள் இவை.  
 


என்ன விவகாரம் இது?

பிரகாஷ் வீட்டுக்கு அருகிலுள்ள வீட்டில் கள்ளச்சாராயம் காய்ச்சுவதற்காக ‘ஊறல்’ போட்டிருந்தனர். இந்திரா நகர் பச்சை காலனியில் அய்யனாரும் அவருடைய மனைவி ராமலட்சுமியும், இதுபோன்ற சமூக விரோதச் செயலில் ஈடுபட்டு வருவது தெரிந்தும், ‘மாமூல்’ தருவதால், காவல்துறையினர் கண்டுகொள்வதில்லை. இதுகுறித்து, தென்மண்டல ஐ.ஜி. மற்றும் விருதுநகர் மாவட்ட காவல்துறை கண்காணிப்பாளர் போன்ற உயரதிகாரிகளிடம் சிலர் முறையிட, ஸ்ரீவில்லிபுத்தூர் மதுவிலக்கு போலீசார் அய்யனார் வீட்டில் சோதனை நடத்தி, சாராய ஊறலைக் கைப்பற்றினர். அய்யனாரும் ராமலட்சுமியும் கைதாகி சிறையில் அடைக்கப்பட்டனர். பிறகு,  இருவரும் ஜாமீனில் வெளிவந்தனர்.  

‘காவல்துறை உயரதிகாரிகள் வரைக்கும் தகவல் அளித்து, தங்களைச் சாராயத் தொழில் பார்க்கவிடாமல் செய்தது பிரகாஷ்தான்..’ என அய்யனாருக்கு சந்தேகம் எழ, கார்த்தீஸ்வரன் உள்ளிட்ட குண்டர்கள் சிலர், ஆயுதங்களோடு பிரகாஷ் வீட்டுக்கு வந்து, “எங்க அண்ணன் சாராயம் காய்ச்சுவான்.. கஞ்சா விற்பான்.. உனக்கு எதுக்குடா வலிக்குது?” என்று கேட்டு தாக்குதல் நடத்த முயன்றுள்ளனர். உயிர் பயத்துடன் புகார் கொடுக்க வந்தபோதுதான், ராஜபாளையம் வடக்குக் காவல் நிலையம், பிரகாஷை விரட்டியடித்துள்ளது. காரணம் – சாராயம் காய்ச்சிய அய்யனார் மூலம் தொடர்ந்து கிடைத்துவந்த மாமூல் நின்றுபோனதுதான்.

 

 


ராஜபாளையம் வடக்குக் காவல்நிலைய சார்பு ஆய்வாளர் முத்துகுமாரை தொடர்புகொண்டோம்.

“இந்த பிரகாஷ் வித்தியாசமான ஆளா இருக்கான். என் மேலயே ஏழெட்டு பெட்டிஷன் போட்டிருக்கான். ஒரு முடிவோடு என்னைப் பத்தி பொய்ப் பொய்யா சொல்லுறான். அவனுக்கு அய்யனாருக்கும் வீட்ட வாங்குறதுல பிரச்சனை இருந்துக்கிட்டே இருக்கு. அய்யனார் வீட்ல சாராய ஊறலைப் பிடிச்சதே நான்தான்..” என்று ஒரே போடாகப் போட்டார்.  

நம்மிடம் பிரகாஷ் “கிரிமினல்களுக்கு துணைபோகும் போலீசார்,  என் போன்ற சமூக அக்கறை உள்ளவர்களுக்கு, உயிர் அச்சத்தையும்,  பொய் வழக்கு பயத்தையும் ஏற்படுத்தி விடுகின்றனர்.” என்றார் பரிதாபமாக. 

திருடனாய்ப் பார்த்து திருந்தாவிட்டால் திருட்டை ஒழிக்க முடியாது.. என்ற பட்டுக்கோட்டையாரின் பாடல் வரிகள், மாமூல் வாங்குவோருக்கும் பொருந்தும்தான்!

 


 

சார்ந்த செய்திகள்

Next Story

பாபநாசம் பட பாணியில் கொலை; போலீசாரே அதிர்ந்த சம்பவம்

Published on 23/04/2024 | Edited on 23/04/2024
Papanasam film style incident; The incident shocked the police

கேரள மாநிலம் ஆலப்புழா மாவட்டத்தில் உள்ளது மாதாரி குளம் கிராமம். அங்கே உள்ள பூங்கா பகுதியில் வசித்து வந்தவர் ரோஷம்மா. கடந்த புதன்கிழமை அன்று ரோஷம்மா திடீரென மாயமானார். இதனால் பல இடங்களில் அவரை உறவினர்கள் தேடி வந்தனர். எங்கு தேடியும் அவரை கண்டுபிடிக்க முடியாததால் இறுதியாக காவல் நிலையத்தில் உறவினர்கள் புகார் அளித்தனர்.

போலீசார் ரோஷம்மா தொடர்பான நபர்களிடம் விசாரணை மேற்கொண்டு வந்த நிலையில் ரோசம்மாவின் உறவினர்களிடமும் விசாரணை நடத்தப்பட்டது. அப்போது ரோசம்மாவின் சகோதரர் பென்னி என்பவரிடத்தில் போலீசார் விசாரித்த போது அவர் முன்னுக்கு பின் முரணாக பதில் கொடுத்தார். இதனால் சந்தேகமடைந்த போலீசார் அவரிடம் விசாரணையை தீவிரப்படுத்தினர். அப்பொழுது சுத்தியலால் ரோசம்மாவை அடித்து கொலை செய்து வீட்டு வளாகத்திலேயே புதைத்தது தெரிய வந்தது.

புதைத்த இடத்தை பென்னி அடையாளம் காட்டிய நிலையில் ரோஷம்மாவின் சடலம் தோண்டி எடுக்கப்பட்டது. கைப்பற்றப்பட்ட சடலமானது பிரேத பரிசோதனைக்காக அனுப்பி வைக்கப்பட்டது. கொலைக்கான காரணம் குறித்து பெண்ணிடம் விசாரித்த போது கணவரை பிரிந்து வாழ்ந்து வந்த ரோசம்மாவுக்கும் பென்னிற்கும் இடையே முன்விரோதம் இருந்துள்ளது. இந்நிலையில் கடந்த புதன்கிழமை ஏற்பட்ட தகராறின் போது ஆத்திரத்தில் சுத்தியலால் ரோசம்மாவை அடித்து கொலை செய்து வீட்டு வளாகத்திலேயே புதைத்தது போலீசார் விசாரணையில் தெரியவந்துள்ளது. பாபநாசம் பட பாணியில் நடந்த இந்தக் கொலை போலீசாருக்கே அதிர்ச்சியைக் கொடுத்துள்ளது.

Next Story

15 ஆண்டுகளுக்கு முன்பு நடந்த சம்பவம்; கலாச்சேத்ரா முன்னாள் பேராசியருக்கு காப்பு

Published on 23/04/2024 | Edited on 23/04/2024
Kalachetra former teacher arrested on complaint

அண்மையில் கலாச்சேத்ரா கல்லூரியில் மாணவிகளுக்கு பாலியல் தொல்லை கொடுத்ததாக மாணவிகள் போராட்டம் நடத்திய நிலையில் புகார் தொடர்பாக ஒருவர் கைது செய்யப்பட்டு இருந்தது பரபரப்பை ஏற்படுத்தி இருந்தது. இந்த நிலையில் அதே கலாச்சேத்ரா கல்லூரியில் கடந்த 15 ஆண்டுகளுக்கு முன்பு ஆசிரியராக பணியாற்றிய நடன ஆசிரியர் தற்பொழுது பாலியல் புகாரில் கைது செய்யப்பட்டுள்ளது பெரும் பரபரப்பை ஏற்படுத்தியுள்ளது.

கடந்த 15 ஆண்டுகளுக்கு முன்பு கலாச்சேத்ராவில் பணியாற்றிய பேராசிரியர் ஸ்ரீஜித் என்பவர் பணியில் இருந்த போது பாலியல் தொல்லை கொடுத்ததாக சமீபத்தில் வெளிநாட்டில் இருந்து ஒரு புகார் சென்னை காவல் துறைக்கு கொடுக்கப்பட்டிருந்தது. அந்தப் புகாரின் அடிப்படையில் சென்னை காவல்துறை விசாரணை மேற்கொண்டது. இதில் புகார் கொடுத்த பெண்ணிடம் வீடியோ கான்பரன்ஸ் மூலமாக போலீசார் விசாரணை மேற்கொண்டனர். விசாரணையில் பாலியல் தொந்தரவு கொடுக்கப்பட்டது உறுதி செய்யப்பட்டது அதனடிப்படையில் 15 வருடங்களுக்கு முன்பு நடந்த சம்பவத்தை வைத்து நடன பேராசிரியர் ஸ்ரீஜித்தை போலீசார் கைது செய்துள்ளனர்.