Skip to main content

நீதிமன்றத்தின் அதிரடி உத்தரவு; அடிபணிந்த தீட்சிதர்கள்!

Published on 10/07/2024 | Edited on 10/07/2024
public  can worship at the Kanaka Sabha in  Nataraja Temple

சிதம்பரம் நடராஜர் கோவிலில் உள்ள கனக சபையில் பொதுமக்கள் மற்றும் பக்தர்கள் ஏறி வழிபட நடராஜர் கோவில் தீட்சிதர்கள் கடந்த  இரண்டு ஆண்டுகளுக்கு முன்பு தடை விதித்திருந்தனர். இதனை எதிர்த்து பல்வேறு அமைப்புகள் எப்போதும் போல் கோவில் உள்ளே உள்ள கனக சபையில் ஏறி வழிபட அனுமதிக்க வேண்டும் என பல கட்ட போராட்டங்களை நடத்தியது. 

இதனை தொடர்ந்து தமிழக அரசு கனக சபையில் பக்தர்கள் எந்த ஒரு கட்டணமும் இல்லாமல் வழிபட அரசாணை விதித்தது.  அதன் அடிப்படையில் பக்தர்கள் கனக சபையில் ஏறி வழிபட்டு வந்தனர். இந்த நிலையில் நடராஜர் கோவில் தீட்சிதர்கள் கடந்த ஆறு மாதத்திற்கு முன்பு நடைபெற்ற ஆருத்ரா தரிசன விழாவின் போது நான்கு நாட்கள் கனக சபையில் வழிபட அனுமதியில்லை என கனக சபை வாயிலில் பதாகை வைத்து அறிவித்தனர்.  இதற்கு பலத்த எதிர்ப்பு தெரிவிக்கப்பட்டது. இதனை தொடர்ந்து அரசாணையை மீறி தீட்சிதர்கள் செயல்பட கூடாது என காவல்துறையினர், வருவாய்த் துறையினர் அறிவுறுத்தியதின் பெயரில் பொதுமக்கள் மற்றும் பக்தர்கள் கனக சபையில் ஏறி வழிபட்டனர்.  

இந்த நிலையில் ஆணி திருமஞ்சன தரிசன விழா கடந்த மூன்றாம் தேதி கொடியேற்றத்துடன் தொடங்கியது. இந்த திருவிழாவில் 10, 11, 12, 13 ஆகிய நான்கு நாட்கள் கனக சபையில் ஏறி வழிபட தடை விதிக்கப்பட்டுள்ளதாக தீட்சிதர்கள் அறிவித்தனர். இதற்கு பல்வேறு தரப்பு பொதுமக்கள் மற்றும் பக்தர்கள் எதிர்ப்பு தெரிவித்தனர். மேலும் இது குறித்த வழக்கு சென்னை உயர்நீதிமன்றத்தில் நடைபெற்றது. இதில் கனக சபையில் வழிபட இடையூறு இருந்தால் தீட்சிதர்கள் மீது இந்து சமய அறநிலைத்துறையினர் சட்டப்படி நடவடிக்கை எடுக்க வேண்டும் என உத்தரவிட்டது.

அதன் அடிப்படையில் 10 ஆம்  தேதி காலை முதல் தீட்சிதர்கள் பக்தர்களை கனக சபையில் ஏற்றி வழிபட அனுமதித்தனர். இதற்கு பொதுமக்கள் மற்றும் பக்தர்கள் மத்தியில் பெரிய வரவேற்பு  ஏற்பட்டுள்ளது.  இதனால் பொதுமக்களும், பக்தர்களும் மகிழ்ச்சி அடைந்துள்ளனர். இதுகுறித்து பக்தர்கள் கூறுகையில், கனக சபையில் ஏறி வழிபட தீக்சிதர்கள் ஒரு நபருக்கு ரூபா 100 வசூலித்து அனுப்பி வைத்தனர். தற்போது இன்று கட்டணம் இல்லாமல் கனக சபையில் ஏறி வழிபட அனுமதித்துள்ளனர் இதே போல் தமிழக அரசின் அரசாணைப்படி பக்தர்கள் எந்தவித கட்டணமும் இல்லாமல் வழிபட அனுமதிக்க வேண்டும் என பக்தர்கள் தரப்பில் கூறுகின்றனர்.

சார்ந்த செய்திகள்

 

Next Story

நடராஜர் கோயிலில் ஆனித்திருமஞ்சன தரிசனம்; ஏராளமான பக்தர்கள் கண்டுகளிப்பு 

Published on 12/07/2024 | Edited on 12/07/2024
Anithurmanchan darshan at Nataraja Temple is witnessed by a large number of devotees

சிதம்பரம் நடராஜர் கோயிலில் ஆனித்திருமஞ்சன தரிசனம் வெள்ளிக்கிழமை(12.7.2024) மதியம் 2.10 மணிக்கு நடைபெற்றது. நடராஜமூர்த்தியும், சிவகாமசுந்தரி அம்பாளும் ஆயிரங்கால் மண்டபத்தின் முன்பு உள்ள நடனப்பந்தலில் நடனமாடி ஆனித்திருமஞ்சன தரிசன காட்சியளித்தனர். 

ஸ்ரீநடராஜர் கோயில் ஆனித்திருமஞ்சன தரிசன உற்சவம் கடந்த ஜூலை 3-ஆம் தேதி கொடியேற்றத்துடன் தொடங்கியது. ஜூலை 11-ஆம் தேதி வியாழக்கிழமை தேர்த்திருவிழா நடைபெற்றது. பின்னர் இரவு ஆயிரங்கால் மண்டபத்தில் நடராஜமூர்த்திக்கும், சிவகாமசுந்தரி அம்பாளுக்கும் ஏககால லட்சார்ச்சனை நடைபெற்றது. திங்கள்கிழமை அதிகாலை சூரிய உதயத்திற்கு முன்பு ஆயிரங்கால் மண்டபம் முகப்பில் நடராஜமூர்த்திக்கும், சிவகாமசுந்தரி அம்பாளுக்கும் மகாபிஷேகம் நடைபெற்றது. பால், தேன், விபூதி, பஞ்சாமிர்தம், இளநீர், சந்தனம் உள்ளிட்டவை குடகுடமாக அபிஷேகம் செய்யப்பட்டது. ஆயிரக்கணக்கான பக்தர்கள் பங்கேற்று தரிசித்தனர்.

காலை 6 மணி முதல் 10 மணி வரை ஆயிரங்கால் மண்டபத்தில் நடராஜமூர்த்திக்கும், சிவகாமசுந்தரி அம்பாளுக்கும் திருவாபரண அலங்காரமும், சிறப்பு அர்ச்சனைகளும் செய்யப்பட்டன. ஆயிரம் கால் மண்டபத்தில் ராஜதர்பார் காட்சியளித்த சிவகாமசுந்தரி சமேத நடராஜப் பெருமானை  நெய்வேலி என்எல்சி இந்தியா லிமிடெட் தலைவர்  எம்.பிரசன்னக்குமார் மோட்டுப்பள்ளி மற்றும் அவரது மனைவி, சட்டப்பேரவை உறுப்பினர் கே.ஏ.பாண்டியன் உள்ளிட்ட பக்தர்கள் பங்கேற்று சாமி தரிசனம் செய்தனர். பின்னர் சித்சபையில் உற்சவ ஆச்சாரியாரால் ரகசிய பூஜை நடத்தப்பட்டது. பஞ்சமூர்த்திகள் வீதிஉலா வந்த பின்னர் பிற்பகல் 2.10 மணிக்கு ஆயிரங்கால் மண்டபத்தில் எழுந்தருளியுள்ள நடராஜமூர்த்தியும், சிவகாமசுந்தரி அம்பாளும் நடனப்பந்தலில் முன்னும், பின்னும் 3 முறை சென்று நடனமாடி ஆனித்திருமஞ்சன தரிசன காட்சியளித்தனர். பின்னர் சித்சபா பிரவேசம் நடைபெற்றது. தரிசனக் காட்சியைப் பல்லாயிரக்கணக்கான பக்தர்கள் கண்டு தரிசித்தனர். ஜூலை 13-ஆம் தேதி சனிக்கிழமை  பஞ்சமூர்த்தி முத்துப்பல்லக்கு வீதி உலாவுடன் உற்சவம் முடிவடைகிறது.

உற்சவ ஏற்பாடுகளை பொது தீட்சிதர்களின் செயலாளர்  உ.வெங்கடேச தீட்சிதர், துணைச்செயலாளர் து.ந.சுந்தரதாண்டவ தீட்சிதர், உற்சவ ஆச்சாரியார் கு.த.கு கிருஷ்ணசாமி தீட்சிதர் ஆகியோர் செய்திருந்தனர். கடலூர் மாவட்ட காவல் கண்காணிப்பாளர் ஆர்.ராஜாராம் மேற்பார்வையில் சிதம்பரம் ஏஎஸ்பி பி.ரகுபதி தலைமையில் நகர காவல் ஆய்வாளர் ரமேஷ்பாபு மற்றும் போலீஸார் பாதுகாப்பு பணிகளை மேற்கொண்டனர்.

Next Story

நடராஜர் கோவிலில் ஆனி திருமஞ்சன தேர் திருவிழா கோலாகலம்

Published on 11/07/2024 | Edited on 11/07/2024
Ani Thirumanjana Chariot Festival in Nataraja Temple

சிதம்பரம் நடராஜர் கோவிலில் ஆண்டுக்கு இருமுறை தேர் மற்றும் தரிசன விழா நடைபெறுவது வழக்கம்.  இதில் ஆனி மாதத்தில் நடைபெறும் திருவிழாவிற்கு ஆனி திருமஞ்சனம் என்றும், மார்கழி மாதத்தில் நடைபெறும் விழாவிற்கு ஆருத்ரா தேர் மற்றும் தரிசன விழா ஆகும்.

இந்நிலையில் ஆனி மாதத்திற்கான ஆனித் திருமஞ்சன தேர் மற்றும் தரிசன விழா கடந்த 3-ந் தேதி கொடியேற்றத்துடன் தொடங்கியது. இதனை தொடர்ந்து தினம் தோறும் சிறப்பு பூஜைகள் மற்றும் அபிஷேகம் நடைபெற்ற நிலையில்  பஞ்ச மூர்த்தி சாமி சிலைகள் வீதி உலா தினந்தோறும் நடைபெற்றது.

இதனை தொடர்ந்து 11-ம் தேதி வியாழக்கிழமை அதிகாலை சித்சபையில் (கருவறை) இருந்து நடராஜர், சிவகாமசுந்தரி சாமி சிலைகள் ஊர்வலமாக கோவிலில் இருந்து பக்தர்கள் தோளில் தூக்கியவாறு எடுத்துவரப்பட்டு காலை 6 மணிக்கு தேரில் ஏற்றினார்கள்.  இதனைத் தொடர்ந்து தேர் திருவிழா காலை 8 மணிக்கு மேல் தொடங்கியது.  தேர் சிதம்பரம் நகரில் முக்கிய வீதிகளான கீழவீதி தெற்கு வீதி மேலவீதி வடக்கு வீதி வழியாக சென்று இன்று மாலை 5 மணியிலிருந்து 6 மணிக்குள் தேர் நிலையை அடையும். தேர் தெருக்களில் செல்லும் போது நடராஜர் மற்றும் சிவகாமசுந்தரி தேருக்கு தல 2 கிராம் தங்கக் காசு கொடுத்து பல்வேறு தரப்பினர் மண்டகப்படி செய்வார்கள் என்பது குறிப்பிடத்தக்கது.

இதனைத் தொடர்ந்து மாலை 6 மணிக்கு மேல் தேரில் இருந்து சாமி சிலைகள் இறக்கப்பட்டு பக்தர்கள் தோளில் சுமந்தவாறு ஊர்வலமாக எடுத்துச் சென்று கோவிலில் உள்ள ஆயிரங்கால் மண்டபத்தில் வைக்கப்படும்.  இதனைத் தொடர்ந்து இரவு லட்சார்ச்சனை நடைபெறும். வெள்ளிக்கிழமை அதிகாலை ஆயிரங்கால் மண்டபத்தில் மகா அபிஷேகம் நடைபெறும். இதனைத் தொடர்ந்து வெள்ளிக்கிழமை மதியம் 2 மணியிலிருந்து 4 மணிக்குள் ஆனி திருமஞ்சன தரிசன விழா நடைபெறும்.

இந்நிகழ்வில் தமிழகத்தின் பல்வேறு பகுதிகள் மட்டுமல்லாமல் இந்திய அளவிலும். உலக நாடுகளில் இருந்தும் சிவ பக்தர்கள் மற்றும் பொதுமக்கள் திரளாக கலந்து கொள்வார்கள்.