விருதுநகர் மாவட்டம் அருப்புக்கோட்டை நகராட்சிக்குட்பட்ட உச்சிக்கோவில் பகுதியில் 4வது தெரு அமைந்துள்ளது. இந்த தெருவில் 50க்கும் மேற்பட்ட வீடுகள் உள்ளன. இதையடுத்து, நேற்று முன்தினம் (06-11-23) இரவு வழக்கத்திற்கு மாறாக இந்த தெருவில் வசித்த வரும் மக்கள் அனைவரும் தங்களது வீட்டிற்கு தூங்கச் சென்றுவிட்டனர். இந்த நிலையில் நேற்று காலை வாசல் தெளிப்பதற்காக பெண்கள் எழுந்து வந்து வீட்டில் வாசலைப் பார்த்து அதிர்ச்சியடைந்துள்ளனர். 

இந்த தெருவில் இருக்கும் பெரும்பாலான வீட்டின் வாசல்களில் ஆங்காங்கே ரத்தத் துளிகள் சிதறிக் கிடந்தன. இதையடுத்து, அந்தப் பகுதியில் நிறுத்தப்பட்டிருந்த ஆட்டோக்களிலும் ரத்தம் தெளிக்கப்பட்டிருந்தது. மேலும், ஒரு வீட்டில் ‘பி.ஆர். இன்று இரவு’ என்று ரத்தத்தில் எழுதப்பட்டிருந்தது. இதனால், பீதியடைந்த அப்பகுதி மக்கள் ஒரு இடத்தில் குவிந்ததால் பரபரப்பு ஏற்பட்டது. இதனைத் தொடர்ந்து, இந்த சம்பவம் குறித்து அப்பகுதி மக்கள் காவல்துறையினருக்குத் தகவல் கொடுத்தனர். 

தகவல் அறிந்த அருப்புக்கோட்டை டவுன் காவல்துறையினர், சம்பவ இடத்திற்கு விரைந்து வந்து பார்வையிட்டனர். இதையடுத்து, அங்கு இருந்த ரத்த துளிகளை எடுத்து அது மனித ரத்தமா? அல்லது ஆட்டு ரத்தமா? என்பதைக் கண்டறிய பரிசோதனைக்காக எடுத்துச் சென்றனர். மேலும், இது குறித்து காவல்துறையினர் அப்பகுதி மக்களிடம் விசாரித்ததில், கடந்த 10 நாட்களுக்கு முன்பு 5வது தெருவில் இதுபோல் வீட்டு வாசலில் ரத்தம் தெளிக்கப்பட்டிருந்ததாகத் தெரிவித்தனர். வீட்டு வாசலில் ரத்தம் தெளிக்கப்பட்ட சம்பவத்தால் அப்பகுதி மக்கள் பீதியடைந்துள்ளனர். இந்த சம்பவம் பரபரப்பை ஏற்படுத்தியுள்ளது. 

அருப்புக்கோட்டை பழைய பேருந்து நிலையம் எதிரில் கடை நடத்தி வருபவர் ராஜ். இரண்டு வருடங்களுக்கு முன், கிராம உதவியாளர் பணிக்கு அறிவிப்பு வந்தபோது இவரும், இவருடைய மனைவியின் தங்கை கார்த்திகாவும், அந்த வேலை கிடைப்பதற்கான முயற்சியில் ஈடுபட்டுள்ளனர். ஆவின் பாலகத்தில் பணிபுரியும் சுந்தரகோபி, இவ்விருவரின் ஆர்வத்தைத் தெரிந்துகொண்டு அணுகினார். அப்போது சுந்தரகோபி, நரிக்குடி சமத்துவபுரத்தில் வசிக்கும் விஜயலட்சுமி, பலருக்கும் கிராம உதவியாளர் பணிக்கு ஏற்பாடு செய்து தருகிறார். அதற்கு  ரூ. 5 லட்சம் வரை செலவாகும் என்று கூறியிருக்கிறார்.

பணம் கொடுத்து வேலை வாங்கத் தனக்கு விருப்பம் இல்லை என்று ராஜ் மறுத்தும், சுந்தரகோபியும் அவருடைய தந்தை முருகனும் அடிக்கடி ராஜுவை சந்தித்து ஆசை காட்டியுள்ளனர். இவர்களின் பேச்சை நம்பிய ராஜ், தனக்கும் தன் மனைவியின் தங்கை கார்த்திகாவுக்கும் கிராம உதவியாளர் வேலை வாங்கித் தரச்சொல்லி,  சில தவணைகளில் வங்கி மூலமாகவும் நேரிலும்  ரூ. 9,50,000 கொடுத்தனர்.

கிராம உதவியாளர் தேர்வை ராஜுவும் கார்த்திகாவும் எழுதினர். தேர்வு முடிவு வந்தபோது, ராஜ் மற்றும் கார்த்திகா பெயர்கள் இல்லை. அதனால் ஏமாற்றமடைந்த ராஜ், சுந்தரகோபியிடமும் முருகனிடமும் காரணம் கேட்டார். அதற்கு அவர்கள்  “அதிகமாகப் பணம் தந்தவர்களுக்குத்தான் வேலை தந்துள்ளனர்.” என்று கூற, பணத்தைத் திருப்பிக் கேட்டார் ராஜ். பணத்தைத் தராமல் காலதாமதம் செய்து வந்த அவ்விருவரும் ஒரு கட்டத்தில், “பணத்தைக் கேட்டு வந்தால் உன்னை இந்த ஊரில் வாழ விடமாட்டோம். அடித்தே கொன்று விடுவோம்.” என்று மிரட்டியுள்ளனர்.  

இதனைத் தொடர்ந்து, அருப்புக்கோட்டை குற்றவியல் நீதிமன்றத்தில் சுந்தரகோபி, விஜயலட்சுமி மற்றும் முருகன் ஆகியோர் மீது வழக்குப் பதிவு செய்யும்படி மனுத் தாக்கல் செய்தார் ராஜ். CRMP No.3526/2023-ன் படி வரப்பெற்ற உத்தரவின் பேரில், அருப்புக்கோட்டை டவுன் காவல் நிலையம் மூவர் மீதும் 5 பிரிவுகளின் கீழ் வழக்குப் பதிவு செய்துள்ளது.