முதுகலை பட்டதாரி ஆசிரியர் தேர்வுக்கான தேதி அறிவிப்பு!

ஆசிரியர் தேர்வு வாரியத்தின் சார்பில் அரசு மேல்நிலைப்பள்ளிகளுக்கான முதுகலை ஆசிரியர், உடற்கல்வி இயக்குநர் நிலை 1 மற்றும் கணினி பயிற்றுநர் நிலை 1 ஆகிய 1996 காலி பணியிடங்களுக்கான தேர்வு அறிவிப்பு கடந்த 10ஆம் தேதி (10.07.2025) வெளியிடப்பட்டது. இத்தேர்விற்குத் தகுதியுள்ள தேர்வர்கள் https://www.trb.tn.gov.in என்ற இணையதளம் வாயிலாக வரும் ஆகஸ்ட் மாதம் 12ஆம் தேதி மாலை 5 மணி வரை விண்ணப்பிக்கலாம்  எனத் தெரிவிக்கப்பட்டிருந்தது. 

மேலும் அந்த அறிவிப்பில் இதற்கான போட்டித் தேர்வு செப்டம்பர் 28ஆம் தேதி (28.09.2025) நடைபெறும் எனத் தெரிவிக்கப்பட்டிருந்தது. மற்றொருபுறம் அதே நாளில் (28.09.2025) தமிழ்நாடு அரசுப் பணியாளர் தேர்வாணையத்தின் சார்பில் குருப் 2 மற்றும் 2 ஏ (Group II and II A Services) தேர்வை நடத்தத் திட்டமிடப்பட்டுள்ளது. இதனால், முதுகலை ஆசிரியர், உடற்கல்வி இயக்குநர் நிலை-1 மற்றும் கணினி பயிற்றுநர் நிலை-1 ஆகிய பணியிடங்களுக்குப் போட்டித் தேர்வுக்கான தேதி பின்னர் அறிவிக்கப்படும் எனத் தெரிவிக்கப்பட்டிருந்தது. 

இந்நிலையில் ஆசிரியர் தேர்வு வாரியத்தின் தலைவர் சார்பில் வெளியிட்டுள்ள அறிவிப்பில், “முதுகலை ஆசிரியர், உடற்கல்வி இயக்குநர் நிலை-1 மற்றும் கணினி பயிற்றுநர் நிலை 1 ஆகிய பணியிடங்களுக்கான அறிவிக்கை (எண். 02/2025) ஆசிரியர் தேர்வு வாரிய இணையதளம்  வாயிலாக 10.07.2025 அன்று வெளியிடப்பட்டது. அதன்படி முதுகலை ஆசிரியர். உடற்கல்வி இயக்குநர் நிலை-1 மற்றும் கணினி பயிற்றுநர் நிலை-1 ஆகிய பணியிடங்களுக்கான போட்டித் தேர்வு 12.10.2025 அன்று நடைபெறும்” எனத் தெரிவிக்கப்பட்டுள்ளது.