Skip to main content

பாஜக பிரமுகரின் போலி போதை மறுவாழ்வு மையம்; இளைஞர் மர்ம மரணம் 

Published on 10/07/2024 | Edited on 10/07/2024
person who came for treatment at BJP executive fake rehabilitation center lost life

கள்ளக்குறிச்சி மாவட்டம் திருக்கோவிலூர் அருகே உள்ளது குச்சிப்பாளையம் ஐய்யப்பன் நகர். இந்த பகுதியில் லோட்டஸ் பவுண்டேஷன் எனும் பெயரில் போதை மறுவாழ்வு மையம் மற்றும் மனநலம் மருத்துவமனை உள்ளது. இதில் கடந்த  05 ஆம் தேதி அன்று ஜா.சித்தாமூர் கிராமத்தில் வசிக்கும்  பொன்முடி என்பவரது  மகன் ராஜசேகர் மது பழக்கத்திற்கு அடிமையானதால் அவரது மைத்துனர் மூலமாக அழைத்து வந்து  சேர்க்கப்பட்டுள்ளார். 

இந்நிலையில் நேற்று முந்தினம்(8.7.2024) இரவு 12 மணியளவில் உடல்நிலை சரியில்லை என கூறி ராஜசேகரை திருக்கோவிலூரில் உள்ள தனியார் மருத்துவமனைக்கு அழைத்துச் சென்றுள்ளனர். பின்னர் அங்கிருந்து திருக்கோவிலூர் அரசு மருத்துவமனைக்கு அழைத்துச் செல்லும்போது செல்லும் வழியிலேயே ராஜசேகர் உயிரிழந்து உள்ளதாக அவரது மனைவிக்கு நிர்வாகத்தின் மூலமாக தகவல் தெரிவிக்கப்பட்டுள்ளது.

இந்த நிலையில் உயிரிழந்த தனது கணவர் ராஜசேகரின் உடலில் ஆங்காங்கே காயங்கள் ஏற்பட்டுள்ளதால் சந்தேகம் அடைந்த அவரது மனைவி ராஜாமணி மணலூர்பேட்டை காவல் நிலையத்தில் கணவரின் இறப்பில் சந்தேகம் உள்ளது என புகார் அளித்துள்ளார். இந்த புகாரின் பேரில் வழக்கு பதிவு செய்த மணலூர்பேட்டை போலீசார் உடனடியாக ராஜசேகரின் உடலை உடற்கூறு ஆய்விற்காக கள்ளக்குறிச்சி அரசு மருத்துவக் கல்லூரி மருத்துவமனைக்கு அனுப்பி வைத்தனர். அங்கு அவரை பிரேத பரிசோதனை செய்த மருத்துவர்கள் அவரது உடலின் பல்வேறு பகுதிகளில் காயங்கள் இருப்பதை உறுதி செய்து லோட்டஸ் ஃபவுண்டேஷன் மீது நடவடிக்கை எடுக்கக்கோரி காவல்துறைக்கு அறிவுறுத்தப்பட்டதாக சொல்லப்படுகிறது.

இதனையடுத்து திருக்கோவிலூர் டிஎஸ்பி (பொறுப்பு) பூபாலன் மற்றும் திருக்கோவிலூர் ஆய்வாளர் பாலாஜி தலைமையில் நேற்று நள்ளிரவு முதல் லோட்டஸ் ஃபவுண்டேஷன் மருத்துவமனையில் விசாரணை மேற்கொள்ளப்பட்டது. இந்த விசாரணை அடிப்படையில் இன்று போலீசாரின் முன்னிலையில் வருவாய் துறையினர் லோட்டஸ் ஃபவுண்டேஷன் மருத்துவமனைக்கு சீல் வைத்தனர். மேலும் அதன் உரிமையாளர் பாஜக முன்னாள் மாவட்ட செயலாலர் காமராஜ்  உட்பட 6 நபர்களை போலீசார் பிடித்து விசாரணை நடத்தி வருகின்றனர்.

போதை மறுவாழ்வு மையத்திற்கு வந்த நபர் அடித்து உயிரிழந்த சம்பவம் அந்த பகுதியில் பெரும் பரபரப்பை ஏற்படுத்தியுள்ளது. போதை மறுவாழ்வு மையம் என்கிற பெயரில் வருவாய் துறை மூலம் சான்றிதழ் பெற்று கொண்டு முறையான பயிற்சி பெறாதவர்களை வைத்தும், 24 மணி நேரமும் மருத்துவர்கள் இங்கு இருப்பதாக கூறி மதுவுக்கு அடிமையானவர்களை மறுவாழ்வு மையத்தில் சேர்க்கப்படுகின்றனர். இதற்கு பல ஆயிரங்களை கட்டணங்களாக வசூலிக்கின்றனர்.

அப்படி சேர்க்கப்படுபவர்களுக்கு அடி, உதை தரப்படுகிறது. அடி உதைக்கு பயந்து அவர்கள் மது அருந்தாமல் இருக்க  வைக்கப்படுகின்றனர். அதன் பின்பு சிகிச்சை என்கிற பெயரில் மனநல சிகிச்சை அவர்களுக்கு அளிக்கப்படுகிறது. அப்படியே அடித்து துன்புறுத்தியாக தான் அவர் இறந்துள்ளார் என்கிறது போலீசில் ஒரு தரப்பு. அதனாலேயே அவரின் உடலில் காயங்கள் ஏற்பட்டதாக கூறப்படுகிறது.

சார்ந்த செய்திகள்

 

Next Story

ஆந்திராவில் இருந்து தென்மாநிலங்களுக்குக் கடத்தப்படும் கஞ்சா; சுற்றிவளைத்த தமிழக போலீஸ்

Published on 13/07/2024 | Edited on 13/07/2024
cannabis smuggled from Andhra, Telangana to Tamil Nadu, Karnataka, Kerala by car and train

ஆந்திராவில் இருந்து தமிழகத்திற்குக் கஞ்சா கடத்திய வரப்படுவதாக வந்த ரகசியத் தகவல் போலீசாருக்கு கிடைத்துள்ளது. அதனடிப்படையில் மாவட்ட காவல் கண்காணிப்பாளர் மணிவண்ணன் உத்தரவின் பேரில் தமிழக ஆந்திர எல்லையோரம் உள்ள வேலூர் மாவட்டம் சைணகுண்டா சோதனை சாவடி அருகே குடியாத்தம் தாலுகா போலீசார் தீவிர வாகன தணிக்கையில் ஈடுபட்டனர்.

அப்போது கர்நாடகா பதிவு எண் கொண்ட சொகுசு காரை தடுத்து நிறுத்தி சோதனை செய்த போது அதில் 12 கிலோ கஞ்சா கடத்திவரப்பட்டது தெரியவந்தது.  கஞ்சாவைக் கடத்தி வந்த குடியாத்தம் பகுதியைச் சேர்ந்த குடியரசன் (24) கோகுல்குமார் ( 26) மாதேஷ் (21) மற்றும் பெரம்பலூர் மாவட்டத்தைச் சேர்ந்த வெங்கடேசன்( 23) ஆகிய நான்கு பேரையும் கைது செய்து கடத்தலுக்குப் பயன்படுத்தப்பட்ட காரை பறிமுதல் செய்த குடியாத்தம் தாலுகா போலீசார் வழக்குப் பதிவு செய்து விசாரணை மேற்கொண்டு வருகின்றனர். இதில் கைது செய்யப்பட்ட குடியரசன் மற்றும் கோகுல்குமார் ஆகிய இருவரும் மீது கொலை வழக்கு உள்ளிட்ட பல்வேறு வழக்குகள் நிலுவையில் உள்ளது குறிப்பிடத்தக்கது.

இதேபோல் ராணிப்பேட்டை மாவட்டம் அரக்கோணம் வழியாக டாடா நகர் பகுதியில் இருந்து எர்ணாகுளம் செல்லும் எர்ணாகுளம் எக்ஸ்பிரஸில் கஞ்சா கடத்தப்படுவதாக வேலூர் மதுவிலக்கு மற்றும் அமலாக்கப் பிரிவு காவல்துறையினருக்கு ரகசியத் தகவல் கிடைத்தது. அதன் பேரில் அரக்கோணம் மதுவிலக்கு மற்றும் அமலாக்கப் பிரிவு காவல் துறையினருடன் இணைந்து ரயிலில் சோதனை மேற்கொண்டனர். 

முன்பக்க சாதாரண பெட்டியில் சந்தேகம் அளிக்கக் கூடிய வகையிலிருந்த நபர்களைப் பிடித்து விசாரணை மேற்கொண்ட போது கஞ்சா கடத்தி வருவது தெரியவந்தது. அவர்களிடம் இருந்து 10 பாண்டல்களில் இருந்த சுமார் 14 கிலோ எடையுள்ள கஞ்சாவை பறிமுதல் செய்த காவல்துறையினர் கஞ்சா கடத்திய குற்றத்திற்காக கர்நாடகா மாநிலம் பெங்களூரைச் சேர்ந்த சுப்ரமணியம் (21) மற்றும் அப்துல் (18) ஆகிய இருவரைக் கைது செய்து விசாரணை மேற்கொண்டு வருகின்றனர்.

ஆந்திரா மற்றும் தெலுங்கானாவில் வனப்பகுதிகளில் இருந்து கடத்தி வரப்படும் கஞ்சா தமிழ்நாடு, கர்நாடகா பகுதிகளுக்குள் நுழைந்து மாநில இளைஞர்களைப் போதைக்கு அடிமையாக்கி வருகிறது. இதனைத் தடுக்க காவல்துறை பெரும் முயற்சிகள் எடுத்தாலும் கஞ்சா கடத்தி வருவதற்காக அனுப்பப்படும் குருவிகளுக்குத் தரப்படும் ஆயிரக்கணக்கான ரூபாய் பணம் அவர்களை இந்த தொழிலைக் கச்சிதமாகச் செய்யவைக்கிறது. 

Next Story

சாராயம் காய்ச்சி குடித்த நபர்கள் மருத்துவமனையில் அனுமதி!

Published on 12/07/2024 | Edited on 13/07/2024
People admitted to hospital after drinking liquor

செங்கல்பட்டு மாவட்டம் மதுராந்தகம் அருகே மழுவங்கரணை கிராமத்தைச் சேர்ந்தவர் தேவன்(65).  அடுப்புக்கரி வியாபாரம் செய்து வரும் இவர் தன்னிடம் வேலை செய்யும் தொழிலாளர்களுக்காக சாராயம் காய்ச்சி வந்ததாகக் கூறப்படுகிறது. இது குறித்த தகவல் மேல்மருவத்தூர் காவல் ஆய்வாளர் ஏழுமலைக்குத் தெரியவர, உடனடியாக  மதுவிலக்கு அமல் பிரிவு போலீசாருடன் தேவன் வீட்டிற்குச் சென்று சோதனை நடத்தியுள்ளார்.

சோதனையில்  சாராயம் காய்ச்சுவதற்காக வைத்திருந்த ஊறல் மற்றும் காய்ச்சி வைத்திருந்த 20 லிட்டர் சாராயத்தைக் கைப்பற்றினர். மேலும் தேவனை போலீசார் கைது செய்து விசாரணை நடத்தியபோது, சாராயத்தைக் காய்ச்சி தன்னிடம் வேலை செய்யும் மணி, பெருமாள், அய்யனார், ராதா கிருஷ்ணன், மதுரை ஆகிய 5 பேருக்கு குடிக்கக் கொடுத்ததாகத் தெரிவித்தார்.

இதனைத் தொடர்ந்து மருத்துவ குழுவினர் அதில் 3 பேரை  பிடித்து முழு மருத்துவ பரிசோதனை செய்தனர். மூவருக்கும் எந்த பாதிப்பு ஏற்படவில்லை என்று  மருத்துவர்கள் தெரிவித்தனர். இருப்பினும் முன்னெச்சரிக்கைக்காக அவர்கள் செங்கல்பட்டு அரசு மருத்துவமனையில் அனுமதிக்கப்பட்டு கண்காணிக்கப்பட்டு வருகின்றனர். எஞ்சியுள்ள 2 பேருடன் சேர்த்து 5 பேரும் நலமுடன் இருப்பதாகத் தெரிவிக்கப்பட்டுள்ளது.