Skip to main content

பெரியார் பல்கலை ஊழியர்கள் 4 பேர் சஸ்பெண்ட்! காத்திருப்பு போராட்டம் மீண்டும் தீவிரம்!

Published on 30/10/2019 | Edited on 30/10/2019

பெரியார் பல்கலையில் தொகுப்பூதிய பணியாளர்கள் நால்வர் திடீரென்று தற்காலிக பணிநீக்கம் செய்யப்பட்டதைக் கண்டித்து, ஊழியர்கள் மீண்டும் காத்திருப்பு போராட்டத்தில் ஈடுபட்டுள்ளனர்.
 

periyar university issue


சேலம் பெரியார் பல்கலையில் நிர்வாக பணிகளை மேற்கொள்ள தொகுப்பூதிய மற்றும் தினக்கூலி ஒப்பந்தப் பணியாளர்கள் நியமிக்கப்பட்டு உள்ளனர். தொகுப்பூதியத்தின் கீழ் 239 பேரும், தினக்கூலி அடிப்படையில் 170 பேரும் பணியாற்றி வருகின்றனர். இவர்கள் தங்களுக்கு வழங்கப்படும் ஊதியத்தை வரன்முறைப்படுத்த வேண்டும் என்றும், தினக்கூலி பணியாளர்களை தொகுப்பூதியத்தின் கீழ் கொண்டு வர வேண்டும் என்றும் கோரி, கடந்த செப். 23ம் தேதி கருப்பு பட்டை அணிந்து கொண்டு அலுவலகப் பணிகளில் ஈடுபட்டனர்.

அதையடுத்து, அக். 8ம் தேதி சேலம் மாவட்ட ஆட்சியர் அலுவலகம் அருகே, ஒருநாள் உண்ணாவிரத போராட்டமும் நடத்தினர். தங்கள் கோரிக்கைகளை வலியுறுத்து தொடர் போராட்டங்களை முன்னெடுப்பது குறித்து பெரியார் பல்கலை தொழிலாளர்கள் சங்கத்தின் பொதுச்செயலாளர் சக்திவேல் ஊடகங்களுக்கு பேட்டி அளித்தார். இது, பல்கலை விதிகளுக்கு எதிரானது எனக்கூறி, செவ்வாய்க்கிழமை (அக். 29) அவரை தற்காலிக பணிநீக்கம் செய்து உத்தரவிட்டுள்ளார், துணைவேந்தர் குழந்தைவேல்.

சக்திவேல் மட்டுமின்றி அவருடைய சங்கத்தைச் சேர்ந்த துணைத்தலைவர் கிருஷ்ணவேணி, பெரியார் பல்கலை நிர்வாக பணியாளர்கள் சங்கத்தலைவர் கனிவண்ணன், துணைத்தலைவர் செந்தில்குமார் ஆகியோரையும் தற்காலிக பணிநீக்கம் செய்திருக்கிறது பல்கலை நிர்வாகம். அவர்கள் பல்கலைக்குள் நுழைவதற்கும் தடை விதிக்கப்பட்டு உள்ளது. வருகைப்பதிவு செய்யக்கூடிய பயோமெட்ரிக் உபகரணத்தில் இருந்தும் மேற்சொன்ன நால்வரின் பெயர்களையும் அதிரடியாக அகற்றி இருக்கிறது.

ஒரு குறிப்பிட்ட நிர்வாகத்தின் கீழ் பணியாற்றும்போது, அதற்கு எதிராக கருத்து சொல்வது என்பது விதிகளுக்குப் புறம்பானதுதான் என்றாலும், ஒரு தொழிற்சங்கவாதியாக நிர்வாக சீர்கேடுகளையோ, தங்களுக்கான அடிப்படை உரிமைகளுக்காகவோ குரல் கொடுக்க தொழிற்சங்க விதிகளில் இடம் இருக்கிறது. ஆனாலும், பெரியார் பல்கலை நிர்வாகம் எதேச்சாதிகாரப் போக்குடன் நான்கு பேரை தற்காலிக பணிநீக்கம் செய்திருப்பது, முரணாக இருக்கிறது. 

இதையடுத்து பல்கலை நிர்வாகத்தைக் கண்டித்து, அனைத்து தொகுப்பூதிய, தினக்கூலி பணியாளர்களும் இன்று காலை முதல் பல்கலை வளாகத்தில் பெரியார் சிலைக்கு அருகே தரையில் அமர்ந்து காத்திருப்புப் போராட்டத்தில் ஈடுபட்டுள்ளனர். 

இது தொடர்பாக பெரியார் பல்கலை தொழிலாளர்கள் சங்கத்தின் பொதுச்செயலாளர் சக்திவேல் நம்மிடம் பேசினார், ''தினக்கூலி அடிப்படையில் மூன்று ஆண்டுகளுக்கு மேல் பணியாற்றி வந்த ஊழியர்களில் கணிசமானோர் தொகுப்பூதியத்திற்கு மாற்றப்பட்டனர். அதன்படி அவர்களுக்கு வாரம் ஒரு நாள் சம்பளத்துடன் கூடிய விடுப்புடன் மாதந்தோறும் ஊதியம் வழங்கப்பட்டது. ஆனால், துணைவேந்தராக குழந்தைவேல் பொறுப்பேற்ற பிறகு, எங்களுக்கு நாள் அடிப்படையில் ஊதியம் கணக்கிடப்பட்டு வழங்கப்படும் புதிய முறையை திடீரென்று அமல்படுத்தினார். அதாவது, நான்கு ஞாயிற்றுக்கிழமைகள், அரசு விடுமுறை நாள்களில் எங்களுக்கு ஊதியம் கிடையாது. இந்த புதிய நடைமுறையை ரத்து செய்துவிட்டு மீண்டும் பழையபடி மாத அடிப்படையில் ஊதியம் வழங்க வேண்டும். 
 

periyar university issue


மேலும், மூன்று ஆண்டுகளுக்கும் மேலாக இன்னும் 170 பேர் தினக்கூலிகளாக பணியாற்றி வருகின்றனர். அவர்களை உடனடியாக தொகுப்பூதியத்திற்கு மாற்ற வேண்டும். தணிக்கை அறிக்கையில் ஆசிரியர் அல்லாத பணியாளர்கள் மீதான தடைகளுக்கு தீர்வு காணும் வகையில் விரைவாக கூட்டமர்வுக்கு ஏற்பாடு செய்ய  வேண்டும். பதிவாளர், தேர்வுக்கட்டுப்பாட்டு அலுவலர் ஆகிய காலிப் பணியிடங்களை விரைவில் நிரப்ப வேண்டும். 

முன்னாள் பதிவாளர் அங்கமுத்து தற்கொலைக்கு முன்னர் எழுதிய கடிதத்தில், பல்கலை பேராசிரியர்கள், ஊழியர்கள் சிலர் மீது குற்றம்சாட்டியிருந்தார். அவர்கள் மீது துறை ரீதியான விசாரணை நடத்த வேண்டும். மேலும், அங்கமுத்து பணிக்காலத்தில் சில முக்கிய கோப்புகள் மாயமானது குறித்தும் விசாரிக்க வேண்டும். இக்கோரிக்கைகள் உள்பட மேலும் சிலவற்றை வலியுறுத்திதான் போராடி வருகிறோம்.

இது தொடர்பான போராட்ட அறிவிப்பு குறித்து நான் பேட்டி அளித்தேன். அப்போது என் அருகே நின்றிருந்த பணியாளர்களையும் பழிவாங்கும் நோக்கில் இப்போது தற்காலிக பணிநீக்கம் செய்யப்பட்டு உள்ளது வேடிக்கையாக இருக்கிறது. எங்கள் மீதான பணியிடை நீக்க நடவடிக்கையை உடனடியாக ரத்து செய்ய வேண்டும்,'' என்றார் சக்திவேல்.

தொகுப்பூதியத்தில் 12 ஆண்டுகளுக்கு மேல் பணியாற்றி வரும் சில ஊழியர்கள் பெறும் அதிகபட்ச ஊதியமே 14700 ரூபாய்தான். இன்னும் குறைந்தபட்சம் 5000 ரூபாய் ஊதியம் பெறுவோரும் இருக்கிறார்கள். தொகுப்பூதியத்தில் ஓர் ஊழியர் ஓராண்டு பெறும் மொத்த ஊதியத்தைக் கணக்கிட்டால், 20 ஆண்டுகள் அனுபவம் உள்ள ஒரு பேராசிரியரின் ஊதியத்தைக்கூட தாண்டாது என்பது கள யதார்த்தம். இதே பல்கலையில் பேராசிரியர்கள் பலருக்கு விதிகளை மீறி பல கோடி ரூபாய்க்கு மேல் ஊதியம் வழங்கப்பட்டு உள்ளதாக தணிக்கை அறிக்கையில் சுட்டிக்காட்டப்பட்டு உள்ள நிலையில், கடைநிலையில் அதுவும் சொற்ப ஊதியத்தில் பணியாற்றி வரும் ஒப்பந்தப் பணியாளர்களை ஒடுக்க நினைப்பது சரியானதாகத் தெரியவில்லை.
 

periyar university issue


போலி பணி அனுபவ சான்றிதழ், உரிய கல்வித்தகுதி இல்லாதவர்கள், படித்தது ஒரு துறை; பணியாற்றுவது வேறு துறை, போலி 'பில்' மோசடி உள்ளிட்ட குற்றச்சாட்டுகளில் இப்போதைய பதிவாளர், தமிழ்த்துறைத் தலைவர், பல்கலை டீன் உள்ளிட்ட பலரும் ஆட்பட்டுள்ள நிலையில், தொகுப்பூதிய பணியாளர்களை ஒடுக்குவதில் மட்டும் நிர்வாகம் அதீத ஆர்வம் காட்டுவது விந்தையாக இருக்கிறது. 

இப்பிரச்னையில் சுமூகமான முறையில் தீர்வு காண பல்கலை துணைவேந்தர் இறங்கி வர வேண்டும்.... ஆதிக்க மனநிலையில் இருந்தும்; மாடியில் உள்ள அலுவலகத்தில் இருந்தும்.
 

சார்ந்த செய்திகள்

 

Next Story

“பெரியார் பல்கலைக்கழக துணைவேந்தர் மீது நடவடிக்கை எடுக்க அரசு அஞ்சுவது ஏன்?” - ராமதாஸ்

Published on 20/07/2024 | Edited on 20/07/2024
 Ramadoss said Why is the government afraid to take action against the Vice-Chancellor of Periyar University?

பெரியார் பல்கலைக்கழக துணைவேந்தர் மீது நடவடிக்கை எடுக்க அரசு அஞ்சுவது ஏன் என பா.ம.க நிறுவனத் தலைவர் ராமதாஸ் தெரிவித்துள்ளார். 

இது குறித்து அவர் வெளியிட்ட அறிக்கையில் கூறியதாவது, “சேலம் பெரியார் பல்கலைக்கழகத்தில் நடைபெற்று வரும் ஊழல்கள் மற்றும் முறைகேடுகளைக் கண்டித்தும், அவை தொடர்பாக தமிழக அரசு பிறப்பித்த ஆணைகளை செயல்படுத்த வலியுறுத்தியும் பல்கலைக்கழக வளாகத்தில் அறவழியில் போராட்டம் நடத்திய  பெரியார் பல்கலைக்கழக தொழிலாளர் 77 பேர் மீது ஏன் நடவடிக்கை எடுக்கக் கூடாது? என்று கேட்டு அவர்கள் அனைவருக்கும் பல்கலைக்கழக பொறுப்பு பதிவாளர் விஸ்வநாத மூர்த்தி குறிப்பாணை அனுப்பியுள்ளார். பல்கலைக்கழகத் தொழிலாளர்களை அச்சுறுத்தும்  வகையிலான இந்த நடவடிக்கை கண்டிக்கத்தக்கது.

பெரியார் பல்கலைக்கழகத்தில் இதுவரை இல்லாத வகையில் ஊழல்கள் அதிகரித்துள்ளன. சேலம் பெரியார் பல்கலைக்கழகத்தின் கட்டமைப்புகளை பயன்படுத்தி தமது தலைமையில் தனியார் நிறுவனம் தொடங்கியது உள்ளிட்ட ஊழல் குற்றச்சாட்டுகளின் அடிப்படையிலும், பட்டியலினத்தவர் வன்கொடுமை சட்டத்தின்படியும்  பல்கலைக்கழக துணைவேந்தர் ஜெகநாதன் சில மாதங்களுக்கு முன் கைது செய்யப்பட்டார். அப்படிப்பட்டவருக்கு பணி நீட்டிப்பு வழங்கப்பட்டுள்ளது. அதை தமிழக அரசும் வேடிக்கைப் பார்த்துக் கொண்டிருக்கிறது.

பல்கலைக்கழக பொறுப்பு பதிவாளராக இருந்த முனைவர் தங்கவேலு மீதான ஊழல் மற்றும் மோசடி குற்றச்சாட்டுகள் குறித்து விசாரணை நடத்திய தமிழக அரசு குழு, அந்தக் குற்றச்சாட்டுகளுக்கு ஆதாரம் இருப்பதால் அவர் மீது நடவடிக்கை எடுக்க வேண்டும்; அதற்கு வசதியாக அவரை பணியிடை நீக்கம் செய்ய வேண்டும் என்று தமிழக அரசு ஆணையிட்டது. ஆனால், இதை மதிக்காமல் தங்கவேலுவை ஓய்வு பெற அனுமதித்த பல்கலைக்கழக நிர்வாகம் அவருக்கு ஓய்வூதியமும், ஓய்வுக்கால பயன்களும் வழங்க ஆணையிட்டது. இவற்றைக் கண்டித்து தான் பல்கலைக்கழக தொழிலாளர்கள் போராட்டம் நடத்தியுள்ளனர். இது சட்டத்தின்படி அனுமதிக்கப்பட்ட ஒன்று தான்.

ஆனால், தமக்கு எதிராகவும், தமது நிர்வாகத்துக்கு எதிராகவும் போராட்டம் நடத்துவதை பொறுத்துக் கொள்ள முடியாத துணைவேந்தர் ஜெகநாதன், பல்கலைக்கழக பதிவாளர் வாயிலாக  போராட்டத்தில் ஈடுபட்ட பணியாளர்கள் மீது நடவடிக்கை  எடுத்திருப்பது அப்பட்டமான அடக்குமுறை ஆகும். பல்கலைக்கழகத்தில் நடைபெறும் முறைகேடுகளால், 18 வகையான முதுநிலை படிப்புகளுக்கு நடைபெற்ற மாணவர் சேர்க்கை கலந்தாய்வுக்கு வெறும் 2 பேர் மட்டுமே வரும் அளவு பல்கலைக்கழகத்தின் பெயர் சீர் கெட்டுள்ளது. இதை சரி செய்ய முடியாத துணைவேந்தர் தமக்கு எதிராக போராட்டம் நடத்தியவர்கள் மீது அடக்குமுறையை  கட்டவிழ்த்து விட்டிருப்பதை மன்னிக்க முடியாது.

பெரியார் பல்கலைக்கழகத்தில் நடைபெறும் அனைத்து அத்துமீறல்களையும் தமிழக அரசு வேடிக்கைப் பார்த்துக் கொண்டிருப்பது தான், துணைவேந்தரின்  துணிச்சலுக்கும், அடக்குமுறைக்கும் காரணம் ஆகும். பெரியார் பல்கலைக்கழக துணைவேந்தர் மீதான ஊழல் குற்றச்சாட்டுகள் குறித்து விசாரணை நடத்தவும், தண்டனை பெற்றுத்தரவும் தமிழக அரசு அஞ்சுவது ஏன்? எனத் தெரியவில்லை. தமிழக அரசு இனியாவது அதன் தயக்கத்தை உடைத்து, துணைவேந்தர் மீது நடவடிக்கை எடுக்க வேண்டும். பல்கலைக்கழகத் தொழிலாளர்கள் 77 பேருக்கு அனுப்பப்பட்டுள்ள குறிப்பாணையை ரத்து செய்யவும் நடவடிக்கை எடுக்க வேண்டும்” எனத் தெரிவிக்கப்பட்டுள்ளது

Next Story

பெரியார் பல்கலை. துணைவேந்தரின் ரீ என்ட்ரி; கொஞ்சம் மிரட்டல், நிறைய புலம்பல்!

Published on 03/07/2024 | Edited on 03/07/2024
Conversation between Periyar University Vice-Chancellor Professors

பெரியார் பல்கலை துணைவேந்தருக்கு பதவி நீட்டிப்பு வழங்கப்பட்ட பிறகு நடந்த கல்வி ஆண்டு துவக்க உரையில், கடந்தகால செயல்பாடுகள் குறித்து புலம்பியும், ஆசிரியர்களுக்கு மிரட்டல் விடுக்கும் வகையிலும் அவர் பேசியிருப்பது மீண்டும் சலசலப்பை ஏற்படுத்தி உள்ளது. 

சேலம் பெரியார் பல்கலை. துணைவேந்தர், ஜெகநாதன். இவருடைய  பதவிக்காலம் ஜூன் 30ம் தேதியுடன் முடிவடைந்தது. இவரும், முன்பு நிரந்தர  பொறுப்பு பதிவாளராக இருந்த தங்கவேலும் சேர்ந்து கொண்டு பல்வேறு ஊழல் முறைகேடுகளில் ஈடுபட்டதாக புகார்கள் கிளம்பின. இது தொடர்பாக  வழக்குப்பதிவு செய்யப்பட்டு, நீதிமன்றத்தில் விசாரணை நடந்து வருகிறது.   இந்நிலையில், கடும் விமர்சனங்களுக்கிடையே, 2025 மே 19ம் தேதி வரை மேலும்  11 மாதங்களுக்கு ஜெகநாதனுக்கு பதவி நீட்டிப்பு வழங்கி ஆளுநர் ஆர்.என்.ரவி,  கடந்த ஜூன் 29ம் தேதி உத்தரவிட்டார். இது உயர்கல்வித்துறையில் பல்வேறு அதிர்வலைகளை ஏற்படுத்தியது.

பெரியார் பல்கலை தொழிலாளர்கள் சங்கத்தினர் ஆளுநர், ஜெகநாதனைக் கண்டித்து ஜூலை1, 2 தேதிகளில் பல்கலை  முன்பு போராட்டத்தில் ஈடுபட்டனர். கோடை விடுமுறைக்காலம் முடிந்து பெரியார் பல்கலை ஜூலை 1ஆம் தேதி தொடங்கியது. ஒவ்வொரு கல்வி ஆண்டின் தொடக்கத்திலும் துணைவேந்தர் அனைத்து ஆசிரியர்களையும் சந்தித்துப் பேசுவது நடைமுறையில் இருக்கிறது. அதன்படி, ஜூலை 2ஆம் தேதி நடப்புக் கல்வி ஆண்டுக்கான துவக்க உரையாற்றினார் துணைவேந்தர் ஜெகநாதன். இதற்கான மேடையில், துணைவேந்தருடன் பதிவாளர் (பொறுப்பு)  விஸ்வநாதமூர்த்தி, தேர்வுக்கட்டுப்பாட்டு அலுவலர் (பொறுப்பு) கதிரவன் ஆகியோரும் அமர்ந்து இருந்தனர். 27 துறைகளைச் சேர்ந்த 120 உதவி, இணை மற்றும் பேராசிரியர்கள் கலந்து கொண்டனர். அனைவரையும் வரவேற்றுப் பேசிய  பதிவாளர், துணைவேந்தரை பேச அழைத்தார். 

ஊழல் புகார், கைது, பதவி நீட்டிப்பு என பல்வேறு சர்ச்சைகள் சுழன்றடித்து வரும் நிலையில் துணைவேந்தர் ஜெகநாதன் என்ன பேசப் போகிறாரோ என்ற எதிர்பார்ப்பு ஆசிரியர்கள் மத்தியில் நிலவியது. அவர் எப்போது எந்த மேடை ஏறினாலும், 'சுழன்றும் ஏர்ப்பின்னது உலகம் அதனால் உழந்தும் உழவே தலை' என்ற திருக்குறளைச் சொல்லி பேச்சைத்  தொடங்குவார். நேற்றைய (ஜூலை 2) துவக்க உரையிலும் இந்த குறட்பாவைச் சொல்லியே பேசத் தொடங்கினார். அவர் கோவை வேளாண் பல்கலையில் பேராசிரியராக பணியாற்றியவர் என்பதால் உழவின் பெருமையைச் சொல்லும் வகையில், நிகழ்ச்சிகளில் இந்த  திருக்குறளோடு பேச்சைத் தொடங்குவதை வழக்கமாகக் கொண்டிருப்பதாகச்  சொல்லப்பட்டது. அடுத்து, தனக்கு ஆளுநர் பதவி நீட்டிப்பு வழங்கியதற்கு நன்றி சொல்லிவிட்டு, சில துறைகளில் மாணவர் சேர்க்கை குறைவாக இருப்பது ஏன்? என்று கேட்டு டாப் கியரில் எகிறத் தொடங்கினார்.     

''சில துறைகளில் மாணவர் சேர்க்கைக் குறைந்துள்ளது. குறிப்பாக, நூலக  அறிவியல் துறையில் ஒரே ஒரு மாணவர்தான் சேர்ந்துள்ளார். கல்வியியல்  துறையில் ஒருவர்கூட சேரவில்லை. மாணவர்களே இல்லாமல் ஆசிரியர்களுக்கு எதற்காக சம்பளம் கொடுக்க வேண்டும்? துறைத்தலைவர்கள், பேராசிரியர்கள்  சரியாக பாடம் நடத்தி இருந்தால் இதுபோன்ற நிலை ஏற்பட்டிருக்காது. ஆளே இல்லாமல் எதற்காக இந்தத் துறைகளை வைத்திருக்க வேண்டும்? பேசாமல் இந்த  துறைகளை மூடி விடலாம். நமக்கு மாணவர்கள்தான் விளம்பர தூதர்கள். ஒரு துறை சரியாக இருந்தால் மாணவர்கள் வெளியே அதைப்பற்றி நல்லவிதமாகச் சொல்வார்கள். நமக்கும் மாணவர் சேர்க்கை அதிகரித்திருக்கும். ஆனால் அவர்கள் வெளியே வேறு  விதமாகச் சொல்லி இருக்கிறார்கள். அதற்காக ஆசிரியர்கள் எல்லோரையும் குற்றம் சொல்லவில்லை. 'நாக்' கமிட்டி  வந்தபோது, ஆசிரியர்கள் எல்லோரும் இரவு, பகலாக வேலை செய்ததை  மறக்கவில்லை.

ஒரு துறையில், மாணவர்களுக்கு அகமதிப்பீட்டு மதிப்பெண் குறைவாக போட்டுள்ளனர். பிடித்த மாணவர்கள், பிடிக்காத மாணவர்கள் என்று பாரபட்சம் பார்க்க வேண்டாம். நாம் மாணவர்களுக்காகத்தான் இருக்கிறோம். இப்போதுகூட மாணவர் சேர்க்கை குறைந்து விட்டதாக ஊடகங்களில் செய்தி  வருகின்றன. எல்லா துறைகளிலும் சேர்க்கைக் குறைந்து விட்டதாகச் சொல்ல  முடியாது. ஒரு சில துறைகளில்தான் குறைவாக உள்ளது. அதற்கு என்ன காரணம் என்பதைக் கண்டறிந்து அவற்றைக் களைய நடவடிக்கை எடுக்கப்படும். எல்லா விஷயங்களையும் ஊடகங்களில் தவறாக சித்தரித்து பரப்புவதால்  யாருக்கு என்ன லாபம் கிடைக்கப் போகிறது? நம்மை மற்றவர்கள் அசிங்கமாக  நினைக்க மாட்டார்களா? சங்கம் என்று சொல்லிக்கொண்டு ஒருத்தர் மட்டும்தான் இருப்பார் பாருங்க. அவரும், இன்னும் சிலரும் என்னைப் பற்றித் தப்பு தப்பாக ஊடகங்களில் பேட்டி  கொடுக்கின்றனர். 

Conversation between Periyar University Vice-Chancellor Professors

வெளியில் இருந்து மூன்றாம் நபர்களும் தவறான  செய்திகளைப் பரப்புகின்றனர். தேசிய அளவிலான தர வரிசையில் 70வது இடத்தில் இருந்த பெரியார்  பல்கலையை இப்போது 49வது இடத்திற்குக் கொண்டு வந்து நிறுத்தி இருக்கிறோம். இனி அதேபோன்ற தர வரிசை கிடைக்குமா? என்பது  சந்தேகம்தான். ஆசிரியர்கள் மீது புகார்கள் வருவதன் பேரில்தான் விசாரணைக்குழு  அமைக்கிறேன். நடவடிக்கை எடுக்கிறேன். இதற்கு நான் என்ன செய்ய முடியும்?  என்னிடம் உங்களுக்கு பிடிக்காதது எதுவாக இருந்தாலும் நேரில் சொல்லலாம். அதைவிட்டுவிட்டு ஏன் ஊடகங்களில் பேசுகிறீர்கள்? புகார் வந்தால் நடவடிக்கை  எடுப்பேன். உதவி பேராசிரியர் ஒருவர் என்னைப் பற்றி ஊடகங்களில் பேட்டி கொடுக்கிறார்.  அவருடன் சேர்ந்து கொண்டு இன்னும் சிலரும் பேசுகிறார்கள். இத்தனை நடந்தும்  ஒருவர்கூட, துணைவேந்தர் தவறானவர் இல்லை என்று சொல்லாதது வருத்தம்  அளிக்கிறது.

அகமதிப்பீட்டுத் தேர்வுகள் எல்லாம் ஒழுங்காக நடத்தணும். மதிப்பீடு பணிகளைச் சரியாக பண்ணுங்க. இன்னும் 11 மாதங்கள் நான் இங்குதான் இருக்கப் போகிறேன். தொடர்ந்து பல்கலை வளர்ச்சிக்கு நிறைய பணிகளைச் செய்வேன். செய்து கொண்டுதான் இருக்கிறேன். ஒரு சிலரால் அதில் தடங்கல் ஆகிறது. சேலம் உத்தமசோழபுரத்தில் சோலார் திட்டம் கொண்டு வர நடவடிக்கை  எடுக்கப்பட்டு வந்தது. என்னை கைது செய்த பிறகு அந்த திட்டம் கைநழுவிப் போய்விட்டது. சேலத்தில் உள்ள முன்னாள் எம்.பி., ஒருவர் எத்தனையோ பேருக்கு மாணவர் சேர்க்கைக்காக கேட்டிருக்கிறார். நானும் சேர்க்கை அனுமதி கொடுத்திருக்கிறேன். ஆனால் நான் கைது செய்யப்பட்டபோது எனக்கு அவர் எந்த உதவியும் செய்யவில்லை. அதேநேரம், நாமக்கல்லில் உள்ள முன்னாள் எம்.பி., ஒருவர்  எனக்கு நிறைய உதவிகளைச் செய்தார். இப்போதும் நான் ஆராய்ச்சிக் கட்டுரைகளை எழுதிக் கொண்டுதான் இருக்கிறேன்.  நீங்களும் எழுதுங்கள். எதைச் செய்தாலும் பல்கலை வளர்ச்சிக்கென்று செய்யுங்கள்,'' என நிறைய புலம்பலும், கொஞ்சம் மிரட்டலுமாகப் பேசி முடித்தார்  துணைவேந்தர் ஜெகநாதன்.

''உங்கள் சொந்தப் பிரச்சனையாக இருந்தாலும் என்னிடம் சொல்லுங்கள். என்னால் முடிந்ததை செய்கிறேன்,'' என்று இறங்கி வந்து பேசியபோதும்  ஆசிரியர்களிடையே எந்த ரியாக்ஷனும் இல்லை. மேலும் அவர், ''ஜார்க்கண்ட் மாநில ஆளுநராக உள்ள சி.பி.ராதாகிருஷ்ணனைச் சந்தித்ததைக்கூட தவறாக சித்தரித்து விட்டனர். அவருடனான சந்திப்பு  யதேச்சையாக நடந்ததுதான். அவரிடம் கூட பெரியார் பல்கலை வளர்ச்சிக்காக  உதவி கேட்டு புரபோசல் அளித்திருக்கிறேன். ஆனால் இந்த சந்திப்பைக்கூட தவறாக சித்தரித்து விட்டனர். ஊடகங்களில் தப்பு  தப்பாக பரப்பி விட்டனர். அப்போதுகூட ஆசிரியர்கள் யாருமே என்னை ஆதரித்துப் பேசவில்லை. ஏன் இந்தப் பல்கலையில் ஆசிரியர்கள் இப்படி இருக்கிறார்கள் என்று எனக்குப் புரியவே இல்லை,'' என மீண்டும் புலம்பினார்.

உரையை முடிக்கும்போது திடீரென்று ஒரு பஞ்ச் டயலாக்குடன் நிறைவு செய்ததுதான் ஹைலைட். ''நான் இறைவனை நம்பவில்லை. இயற்கையை நம்புகிறேன். இயற்கை என்றைக்குமே பொய் சொல்லாது. அது கண்டிப்பாக நம்மை தண்டிக்கும். கொரோனா காலத்தில் இயற்கை எப்படி தண்டித்ததோ, அதுபோல என்னைப் பற்றி  தவறாக பேசுபவர்களையும் இயற்கை ஒருநாள் தண்டிக்கும்,'' என சாபம் விட்டு  உரையை நிறைவு செய்தார் துணைவேந்தர் ஜெகநாதன். அவர் கஷ்டப்பட்டு பஞ்ச் வசனத்துடன் முடித்தாலும், கூட்டத்தில் இருந்த பேராசிரியர்கள் யாருமே அதை கைத்தட்டி உற்சாகப்படுத்தவில்லை.  எல்லோருமே அமைதியாக அமர்ந்து  இருந்தனர். பகல் 12 மணிக்குத் தொடங்கிய கூட்டம், 45 நிமிடங்களில் முடிந்தது. துணைவேந்தருக்கு பதவி நீட்டிப்பு வழங்கப்பட்டதற்காக சம்பிரதாயத்துக்குக் கூட  மேடையில் அவருக்கு யாரும் வாழ்த்துச் சொல்லவோ, சால்வை அணிவிக்கவோ  வரவில்லை. அவருடைய ஆதரவு பேராசிரியர்களும் வாழ்த்துச் சொல்வதை  தவிர்த்தனர். கூட்டத்தில் கலந்து கொண்ட ஆசிரியர்களுக்கு அரை லிட்டர் குடிநீர் பாட்டில்,  இனிப்பு, மசால் வடை, தேநீர் / காபி வழங்கப்பட்டது. அதேநேரம், துணைவேந்தரின் பேச்சுக்கு பேராசிரியர்கள் மத்தியில் சில விமர்சனங்களும் கிளம்பி உள்ளன.

Conversation between Periyar University Vice-Chancellor Professors

இது தொடர்பாக பேராசிரியர்களிடம் பேசியபோது, ''சேலத்தில் உள்ள முன்னாள் எம்.பி., என்று பெயரைச் சொல்லாமல் சொன்னாலும் அவர் எஸ்.ஆர்.பார்த்திபனைத்தான் சொல்கிறார். அதேபோல, நாமக்கல்லில் உள்ள முன்னாள் எம்.பி., என்றால், இப்போது பாஜகவில் உள்ள கே.பி.ராமலிங்கத்தை மறைமுகமாகச் சொல்லி இருக்கிறார். துணைவேந்தரின் பாஜக பாசம்தான் கே.பி.ராமலிங்கத்திற்கு முக்கியத்துவம் கொடுத்து பேச வைத்திருக்கிறது. ஊழல் புகாரில் கைது செய்யப்பட்டவருக்கு ஆளுங்கட்சி சிட்டிங் எம்.பி., ஆக இருப்பவர் எப்படி உதவி செய்ய முடியும்? மாணவர் சேர்க்கை இல்லாத துறைகளில் ஆசிரியர்களுக்கு எதற்காக சம்பளம் கொடுக்க வேண்டும் என்று துணைவேந்தர் கேட்கிறார். அதில் நியாயம்  இருக்கிறது. அதேநேரம், உறுப்புக் கல்லூரிகளில் பணியாற்றி வந்த முதல்வர்கள்  வெங்கடேஸ்வரன், மருதமுத்து, செல்வவிநாயகம், வெங்கடேசன், கார்த்திகேயன் ஆகியோர் பல்கலை பணிக்கு ஈர்த்துக் கொள்ளப்பட்டனர். 

பல்கலைக்கழகத்தில் முதல்வர் பணியிடமே இல்லாத நிலையில் அவர்களை சும்மாவே வைத்துக்கொண்டு ஆண்டுக்கு 1.50 கோடி ரூபாய்க்கு மேல் வெட்டியாக சம்பளம் கொடுத்து வருகிறார். இவர்களில் மருதமுத்து மட்டும் அண்மையில் ஓய்வு பெற்று விட்டார். இதையும் துணைவேந்தர் கவனத்தில் கொண்டு பேசியிருக்க வேண்டும்.   ஊழல் புகார்கள் குறித்துதான் ஊடகங்களில் பேராசிரியர்கள் சிலர் பேசி வருகின்றனர். அதற்காக அவர்களை சக ஆசிரியர்கள் ஆதரிக்கவும் இல்லை. எதிர்க்கவும் இல்லை. இதே நிலைப்பாட்டைதான் துணைவேந்தர் விவகாரத்திலும் பின்பற்றுகிறோம். மேலும், துணைவேந்தரே தனக்குப் பிடிக்காத ஆசிரியர்களுக்கு எதிராக சிலரை தூண்டிவிட்டு பெட்டிஷன் போட வைக்கிறார். அதையும் அவர் கவனத்தில் கொள்ள வேண்டும்,'' என்கிறார்கள் பேராசிரியர்கள்.

துணைவேந்தர் ஜெகநாதனுக்கு பதவி நீட்டிப்பு வழங்கப்பட்டுள்ள நிலையில், பெரியார் பல்கலையில் இன்னும் என்னென்ன ஏழரைகள் நடக்கப் போகிறதோ எனக் கமெண்ட் அடிக்கிறார்கள் பேராசிரியர்கள்.