Skip to main content

அதிமுக கொங்கு மண்டலத்திலும் ஓ.பி.எஸ் ஆதரவாளர்கள்!!

Published on 16/08/2020 | Edited on 16/08/2020
ops supporters in admk kongu zone

 

கடந்த 2 வாரமாக அதிமுகவில் நிலவி வருகிற யார் முதல்வர் என்ற விவாதம் உச்சகட்டம் நோக்கி போய் உள்ளது. அதற்கு காரணம் ஒரு சில அமைச்சர்கள் முதல்வர் ஈ.பி.எஸ் தானென்றும் இல்லை... இல்லை...  முதல்வர் ஓ.பி.எஸ் தான் என்றும் அவர்களாகவே கூறிவருகிறார்கள். இதன் தொடர்ச்சியாகத்தான் நேற்று துணை முதல்வர் வீட்டிலும், முதல்வர் வீட்டிலும் மாறி மாறி  10க்கும் மேற்பட்ட அமைச்சர்கள் ஆலோசனையில் ஈடுபட்டனர். அதில் இறுதியாக பேசப்பட்ட விஷயம்தான், தலைமையின் அனுமதி இல்லாமல் முதல்வர் வேட்பாளர் பற்றி அதிமுக அமைச்சர்கள், நிர்வாகிகள் பேசக்கூடாது என்ற அறிக்கை.

ஆனால் தற்பொழுது முதல்வராக உள்ள எடப்பாடி பழனிச்சாமி தான் முதல்வர் வேட்பாளர் என்பதில் முடிவாக இருக்கிறாராம். தனது செல்வாக்கை நிரூபிக்கும் வகையில் பழைய வடாற்காடு மாவட்டம் உட்பட நீலகிரி வரை உள்ள மேற்கு மண்டலம் முழுக்க தனது கட்டுப்பாட்டில் தான் இருக்கிறது. அதேபோல் தென் மாவட்டத்திலும் ஏறக்குறைய 30 தொகுதிகள், அதில் வெற்றி பெறும் எம்.எல்.ஏக்கள் தனக்கு சார்பானவர்கள் என்று முதல்வர் நம்புகிறார். ஆனால் துணை முதல்வர் ஓ.பி.எஸ்-இன் தரப்போ... தொடர்ந்து என்னை டம்மி ஆக்க வேண்டிய சூழல் ஏன் வந்தது என்று அவர்களுக்குள் விவாதித்த பொழுது, சிறையில் உள்ள சசிகலா சிறைக்குச் செல்வதற்கு முன் தனது விசுவாசியான எடப்பாடி பழனிச்சாமியை முதல்வராக கொண்டுவந்தார். சசிகலாவால் உருவாக்கப்பட்டவர் தான் முதல்வர் எடப்பாடி பழனிச்சாமி. ஆக ஜெயலலிதாவால் உருவாக்கப்பட்டவரல்ல ஈ.பி.எஸ்.

ஆனால் ஜெயலலிதாவால் முதல்வர் நாற்காலியில் அமர வைக்கப்பட்டவர் பன்னீர்செல்வம். இந்த நிலையில் பன்னீர் செல்வமா? அல்லது எடப்பாடி பழனிச்சாமியா? என்ற போட்டி வரும் பொழுது அதிமுகவில் மறைந்த இரண்டு தலைவர்கள் எம்.ஜி.ஆர் மற்றொருவர் ஜெயலலிதா. இவர்கள் இருவரின் மறைவுக்குப் பிறகு ஜெயலலிதாவால் அடையாளம் காட்டப்பட்டவர்தான் ஓ.பி.எஸ் ஆகவே, ஓபிஎஸ் தான் அம்மாவால் அடையாளம் காட்டப்பட்ட வேட்பாளர் என பிரச்சாரம் இருக்க வேண்டும் என ஓ.பி.எஸ் தரப்பு கூறியிருக்கிறது.

இந்த நிலையில் தென்மாவட்டத்தில் சில இடங்களில் எடப்பாடி செல்வாக்கை நிறுத்தினாலும் ஓபிஎஸ்ஸும் கொங்கு மண்டலத்திலும் வலுவான பலத்தை ஏற்படுத்தியுள்ளார். இது சம்பந்தமாக கொங்கு மண்டலத்தில் உள்ள சில எம்.எல்.ஏக்கள் நம்மிடம் பேசும் பொழுது, இங்கு சமூக ரீதியாக பாசம் காட்டப்பட்டது உண்மைதான். ஆனால் எடப்பாடி பழனிச்சாமி தனது உறவினர்களுக்கு மட்டுமே அதிகமாக எல்லாவற்றையும் செய்து வருகிறார். முன்னாள் அமைச்சர்கள், எம்.எல்.ஏக்கள் கொடுக்கக்கூடிய எந்த கோரிக்கைகளையும் அவர்கள் கொடுக்கக்கூடிய எந்தத் திட்டங்களையும் அவர் இருக்கிறது... இருக்கிறது... என்று கூறுகிறார். ஆனால் செய்யவில்லை. இதற்கு பல உதாரணங்கள் உள்ளது.

ஆனால் ஓ.பி.எஸ்ஸோ அவர் சார்பாக, அவரோடு இணக்கமாக உள்ளவர்களுக்கு என்ன தேவையோ எல்லாவற்றையும் செய்து வருகிறார். ஆனால் எடப்பாடி பழனிச்சாமி அப்படி செய்வதில்லை. அதற்கு காரணம் அரசியல் நிலைப்பாட்டில் தான் பொதுவானவர் என்று எடப்பாடிபழனிசாமி காட்டிக் கொள்கிறார். ஆனால் இப்போது அதிமுகவில் அப்படியெல்லாம் எதுவுமில்லை. அடுத்து ஆட்சியில் யார் வருவது என்பது தான் முக்கியம். அடுத்தது கண்டிப்பாக அதிமுக ஆட்சி இல்லை. இது எல்லா எம்.எல்.ஏக்களுக்கும், கட்சி நிர்வாகிகளுக்கும் தெரியும். கொங்கு மண்டலத்தில் வளரும் ஈ.பி.எஸ்ஸிடம் வைக்கப்படும் கோரிக்கைகள் நிராகரிக்கப்பட்டு வருகிறது. எனவேதான் அதிமுக என்றால் அம்மாவால் அடையாளம் காட்டப்பட்ட ஓ.பி.எஸ்ஸை நாங்கள் தூக்கி புடிப்போம். கட்சிக்குள் பிரச்சினை வரும்பொழுது முழுக்க முழுக்க எடப்பாடி பழனிச்சாமியை நம்பி யாரும் இல்லை என்பதை நிரூபிப்போம் எனக் கூறினார்கள்.

 

 

 

 

சார்ந்த செய்திகள்

Next Story

ட்ரோல் செய்ய வந்த இடத்தில் ட்ரோலில் சிக்கிய அ.தி.மு.க. சரவணன்

Published on 29/03/2024 | Edited on 29/03/2024
ADMK Saravanan got trolled where he came to troll

நாட்டின் 18 ஆவது நாடாளுமன்ற மக்களவைத் தேர்தலுக்கான தேதிகள் அறிவிக்கப்பட்டு, மொத்தமாக ஏழு கட்டங்களாகத் தேர்தல் நடத்தப்படவுள்ள நிலையில், முதற்கட்டமாகத் தமிழ்நாட்டில் ஏப்ரல் 19 ஆம் தேதி வாக்குப்பதிவு நடைபெற இருக்கிறது. இதற்கான வாக்கு எண்ணிக்கை ஜூன் 4 ஆம் தேதி நடைபெறவுள்ளது. ஏற்கெனவே தமிழகத்தில் உள்ள அரசியல் கட்சிகள் தேர்தல் பணியில் தீவிரம் காட்டி வரும் நிலையில், தேர்தல் தேதி அறிவிக்கப்பட்டதால் தேர்தல் களம் அனல் பறக்க ஆரம்பித்து விட்டது.

அதிமுக சார்பாக மதுரையில் டாக்டர் சரவணன் வேட்பாளராக அறிவிக்கப்பட்டு பரப்புரைகள் தொடங்கப்பட்டுள்ளது. முன்னாள் அமைச்சர் செல்லூர் ராஜு அவரை ஆதரித்து பிரச்சாரம் மேற்கொண்ட நிலையில், பிரேமலதா விஜயகாந்த் அதிமுக வேட்பாளர் சரவணனை ஆதரித்து பிரச்சாரம் மேற்கொண்டார்.

இந்நிலையில், மதுரையில் நடைபெற்ற பரப்புரை கூட்டத்தில் பேசிய வேட்பாளர் சரவணன், “இங்கிருந்த பாராளுமன்ற உறுப்பினரை சு.வெ என்று சொல்வார்கள். சும்மாவே இருந்தார்; இருக்கப் போறாரு என்று தெரிந்ததால் அவருக்கு அப்படி பெயர் வந்ததா என தெரியல. அவர் ஒரு ட்விட்டர் அரசியல்வாதி. ஆன்லைனில்  மட்டும் தான் இருப்பார். அவருடைய செயல் ஆன்லைனில் மட்டும் தான் இருக்கும். மக்களை சந்தித்ததே கிடையாது. அவர் கதை எழுதிக் கொண்டிருந்தார். இப்பொழுது கதை விட்டுக் கொண்டிருக்கிறார். கடைசியாக மூன்று மாதம் வந்து ஒன்று இரண்டு திட்டங்களை செய்து கொண்டிருக்கிறார். அவர் இவ்வளவு திட்டங்களை சொல்லி இருக்கிறாரே அந்த திட்டங்கள் எல்லாம் நடந்து இருக்கா என்று பார்ப்பதற்காக பைனாகுலரோடு நான் வந்திருக்கிறேன். எங்காவது கடந்த பாராளுமன்ற உறுப்பினர் வெங்கடேசன் செஞ்ச திட்டம் கண்ணுல படுதா என்று பார்க்கிறேன்'' என கூறியவாறே கையில் இருந்த பைனாகுலரில் பார்த்தார். ஆனால் இறுதி வரை சரவணன் பைனாகுலரில் முன்பக்கம் இருந்த லென்ஸ் கவரை திறக்காமல் பார்த்துக் கொண்டிருந்தார். இந்த காட்சிகள் சமூக வலைத்தளங்களில் ட்ரோல் செய்யப்பட்டு வருகிறது.

Next Story

“திருச்சி அதிமுக வேட்பாளர் வெற்றிக்கு ஒற்றுமையுடன் பாடுபட வேண்டும்” - தங்கமணி

Published on 29/03/2024 | Edited on 29/03/2024
 Trichy AIADMK candidate must work together for victory says Thangamani

திருச்சி மாவட்டம் முசிறி தா.பேட்டை ரோட்டில் அமைந்துள்ள தனியார் மண்டபத்தில் பெரம்பலூர் பாராளுமன்றத் தொகுதி அதிமுக வேட்பாளர் சந்திரமோகன் அறிமுகம் மற்றும் செயல் வீரர்கள் ஆலோசனைக் கூட்டம் நடைபெற்றது. கூட்டத்திற்கு திருச்சி புறநகர் மாவட்டச் செயலாளர் பரஞ்சோதி தலைமை வகித்தார். முன்னாள் எம்எல்ஏக்கள் செல்வராசு, மல்லிகா, இந்திரா காந்தி, பரமேஸ்வரி, முருகன் ஆகியோர் முன்னிலை வகித்தனர். முன்னாள் அமைச்சர்கள் மோகன், எம்.ஆர். விஜயபாஸ்கர், நாமக்கல் மாவட்டச் செயலாளரும் பெரம்பலூர் பாராளுமன்றத் தொகுதி பொறுப்பாளருமான தங்கமணி ஆகியோர் அதிமுக வேட்பாளரை ஆதரித்துப் பேசினார்.

அப்போது முன்னாள் அமைச்சர் தங்கமணி பேசியதாவது: பண பலமா? அதிகார பலமா? என்று நிரூபிக்கின்ற இந்த தேர்தலை பொறுத்தவரை நாம் வீடு வீடாகச் சென்று திண்ணைப் பிரச்சாரம் மேற்கொண்டு வாக்குகள் சேகரிக்க வேண்டும் எனவும்,  பூத்துக்கு 500 வாக்குகள் பெற்றால் கூட நாம் வெற்றி பெற முடியும். 15 நாள் உழைப்பு அடுத்த ஐந்து வருடத்திற்கான மக்கள் பலனை தரும். திருச்சி மாவட்டம் அதிமுகவின் கோட்டை என்பதை நாம் மீண்டும் நிரூபிக்க வேண்டும். ஒவ்வொரு வீட்டிற்கும் ஐந்து முறை சென்று கழக தொண்டர்கள் வாக்குகள் சேகரிக்க வேண்டும். இறந்து போனவர்கள், வெளிநாட்டில் இருப்பவர்கள் வாக்குகளை கண்டறிந்து கள்ள வாக்குகளை நாம் தடுக்க வேண்டும். அதிமுக ஆட்சியில் விலைவாசி கட்டுக்குள் இருந்தது. திமுக ஆட்சியில் விலைவாசி மற்றும் அனைத்து கட்டணங்களும் உயர்ந்துள்ளது.

நகை கடன் அனைவருக்கும் தள்ளுபடி என்று கூறிவிட்டு 45 லட்சம் பேரில் 12 லட்சம் பேருக்கு மட்டுமே தள்ளுபடி செய்துள்ளனர். 10 ஆண்டுகளில் தாலிக்கு தங்கம், லேப்டாப், இலவச சைக்கிள், மகளிர் திருமண உதவித் திட்டம் உள்ளிட்ட பல்வேறு மக்கள் திட்டங்களை நாம் நிறைவேற்றியுள்ளோம். 2026 ஆம் ஆண்டு எடப்பாடி பழனிசாமி தான் மீண்டும் முதலமைச்சர் என உறுதிமொழி ஏற்போம். உள்ளாட்சி தேர்தலுக்கும், வரும் 2026 ஆம் ஆண்டு நடைபெற உள்ள சட்டமன்றத் தேர்தலுக்கும் இந்த நாடாளுமன்றத் தேர்தல் அடித்தளமாக அமையும். பெரம்பலூர் நாடாளுமன்ற தொகுதி வேட்பாளர் சந்திரமோகனுக்கு இரட்டை இலை சின்னத்தில் பெருவாரியான வாக்குகள் பெற்று வெற்றி பெற செய்ய வேண்டுமாய் கழக தொண்டர்கள் அனைவரையும் கேட்டுக்கொள்கிறேன் என்று பேசினார்.

வேட்பாளர் சந்திரமோகனை அறிமுகப்படுத்தி விஜயபாஸ்கர் பேசியதாவது: தேர்தல் வாக்குறுதிகளை நிறைவேற்றியவர் முன்னாள் முதலமைச்சர் ஜெயலலிதா. ஏழைகளுக்கு 20 கிலோ அரிசி, தாலிக்கு தங்கம், மாணவர்களுக்கு லேப்டாப் கொடுத்தார். ஆனால் இந்த திமுக ஆட்சியில் அந்த திட்டத்தை எல்லாம் நீக்கி விட்டனர். நீட் ஒழிக்கிறேன் என்று சொல்லி இப்போது மத்தியில் காங்கிரஸ் ஆட்சி வந்த உடன் நீக்குகிறோம் என்று சொல்லி பொய் பிரச்சாரம் செய்து வாக்கு கேட்டு செல்வார்கள். அந்த பொய் பிரச்சாரத்தை முறியடிக்கும் வகையில் நமது திண்ணை பிரச்சாரம் இருக்க வேண்டும் என செயல் வீரர்களுக்கு ஆலோசனைகள் வழங்கினார்.

இதனை அடுத்து வேட்பாளர் சந்திரமோகன் பேசியதாவது:  என்னை எந்த நேரத்திலும் பொதுமக்கள் தொடர்பு கொள்ளலாம். நான் வெற்றி பெற்றவுடன்  இப்பகுதிகளுக்குரிய தேவைகளை கவனத்தில் கொண்டு நிறைவேற்ற பாடுபடுவேன் எனப் பேசினார்.

முன்னதாக முன்னாள் எம்எல்ஏ செல்வராஜ் அனைவரையும் வரவேற்றுப் பேசினார். கூட்டத்தில் தேமுதிக மாவட்டச் செயலாளர் குமார், புதிய தமிழகம் கட்சி மாவட்டச் செயலாளர் சின்னையன் , வளரும் தமிழகம் கட்சி மாவட்ட செயலாளர் தமிழன் துரைராஜ், எஸ்டிபிஐ கட்சி மாவட்டச் செயலாளர் அசாருதீன் உட்பட கூட்டணிக் கட்சி நிர்வாகிகள் தொண்டர்கள் பலர் கலந்து கொண்டனர். நிறைவில் நகரச் செயலாளர் எம்.கே. சுப்ரமணியன் நன்றி கூறினார்.