திருவண்ணாமலை மாவட்டம் ஆரணி அடுத்த நெசல் கிராமத்தில் அரசு உயர்நிலைப்பள்ளி இயங்கி வருகின்றது. இந்த பள்ளியில் 6- ம் வகுப்பு முதல் 10ம் வகுப்பு வரையில் சுமார் 154 மாணவ, மாணவிகள் பயின்று வருகின்றனர். இந்த பள்ளியின் தலைமையாசிரியராக வெங்கடேசன் பணியாற்றி வருகிறார். மேலும் 8 ஆசிரியர்கள், 2 அலுவலக பணியாளர்களும் பணியாற்றி வருகின்றனர்.
இப்பள்ளியில் அரையாண்டு தேர்வில் 10- ம் வகுப்பில் உள்ள மாணவ மாணவிகளில் யார் முதல் மதிப்பெண் பெறுகிறாரோ அவர், ஒருநாள் முதல்வர் போல், பள்ளியின் ஒருநாள் தலைமையாசிரியராக பணியாற்ற வாய்ப்பு அளிக்கபடும் என்று ஆசிரியர்கள் மாணவ, மாணவிகளிடம் தெரிவித்துள்ளனர்.
இந்நிலையில் புதுப்பட்டு கிராமத்தைச் சேர்ந்த நெசவு கூலி தொழிலாளி சௌந்தராஜன் சரிதா தம்பதியினரின் மகள் மதுமிதா, நெசல் கிராமத்தில் உள்ள அரசு உயர்நிலை பள்ளியில் 10- ம் வகுப்பு அரையாண்டு தேர்வில் 447 மதிப்பெண் எடுத்து முதல் மாணவியாக வந்துள்ளார்.
அதனை தொடர்ந்து ஜனவரி 27- ந்தேதி காலையில் பள்ளி தலைமையாசிரியையாக 10- ம் வகுப்பு மாணவி மதுமிதா பொறுப்பேற்று கொண்டார். பொறுப்பேற்று கொண்ட மதுமிதாவிற்கு சால்வை அணிவித்து ஆசிரியர்கள் கௌரவித்து பாராட்டினர்.
மேலும் அனைத்து வகுப்பிற்கு சென்று மாணவ, மாணவிகளின் வருகை பதிவேடு, மாணவர்களிடம் கேள்வி கேட்டு உரையாடல், கணினி மையத்தில் மாணவ- மாணவிகளின் கற்றலை கூர்ந்து கவனித்து மாணவ- மாணவிகளுக்கு 10- ம் வகுப்பு மாணவி மதுமிதா அறிவுரை வழங்கினார். பின்னர் பள்ளி வளாகத்தில் தேசிய கொடியை ஏற்றி வைத்தார். பள்ளியின் சுற்றிகை பதிவேட்டில் பள்ளி சம்மந்தமான பதிவுகளை ஒருநாள் தலைமையாசிரியை மதுமிதா பதிவு செய்தார்.
அரசு பள்ளியில் 10- ம் வகுப்பு மாணவி ஒருநாள் தலைமையாசிரியராக பொறுப்பேற்று பணியாற்றிய நிகழ்வு ஆசிரியர்கள் மற்றும் மாணவர்கள் மத்தியில் ஆச்சரியத்தை ஏற்படுத்தியுள்ளது.
- "எல்லாருமே பார்ப்பீங்க" - விவரிக்கும் 'கூச முனுசாமி வீரப்பன்'
- "அதான் அடிச்சு தூக்குனேன்" - கூலாக சொன்ன கூச முனுசாமி வீரப்பன்
