Skip to main content

கள்ள ஓட்டு கும்பலை காப்பாற்றி காரில் அழைத்து சென்ற அமைச்சர்!

Published on 07/08/2019 | Edited on 07/08/2019

 

வேலூர் நாடாளுமன்ற தொகுதிக்கான வாக்குப்பதிவு ஆகஸ்ட் 5ந்தேதி நடந்து முடிந்துள்ளது. காலை முதல் மதியம் 1 மணி வரை மந்தமாக இருந்த வாக்குப்பதிவு அதன்பின் கிடுகிடுவென உயர்ந்தது. இது பலருக்கும் பெரும் ஆச்சர்யத்தை தந்த நிலையில், அதிமுகவினர் சென்னை, காஞ்சிபுரம், திருவள்ளுவர் பகுதிகளில் இருந்து கள்ள ஓட்டு போடவே தனியாக கும்பல் கும்பலாக மக்களை அழைத்து வந்து கள்ள ஓட்டுப்போட்டார்கள், இதோ எங்களிடம் ஆதாரம் என கிளம்பியுள்ளது வாணியம்பாடி நகர திமுக.

 

n


இதுப்பற்றி விசாரித்தபோது, வாணியம்பாடி நகரத்தின் பல இடங்களில் அமைச்சர் நிலோபர்கபில் ஏற்பாட்டில் கள்ள ஓட்டு போடுவதற்காக வெளிமாவட்டத்தில் இருந்து ஆட்களை அழைத்து வந்துள்ளனர். அப்படி வந்த இரண்டு கும்பல் எங்களிடம் சிக்கியது. வாணியம்பாடி முதல் வார்டில் திமுகவினர், வீடு வீடாக சென்று வாக்காளர்களை வாக்களிக்க வாருங்கள் என அழைத்துக்கொண்டிருந்தபோது, அந்த வார்டுக்கு சம்மந்தமில்லாத ஒரு பெண், இரண்டு ஆண்கள் ஒவ்வொரு வீடாக சென்று கொண்டிருந்தனர்.


இதைப்பார்த்துவிட்டு அவர்களை பிடித்து விசாரித்தபோது, வாக்குக்கு பணம் கொடுத்துக்கொண்டு இருந்தனர். அதோடு, கள்ள ஓட்டு போடவும் ஆட்களோடு வந்திருக்கிறோம் எனச்சொன்னார்கள். அவர்களை பிடித்து காவல் ஆய்வாளர் சந்திரசேகரிடம் ஒப்படைத்துவிட்டு வந்துவிட்டோம். மாலை அதே கும்பல் கள்ள ஓட்டு போட அதே ஒன்னாவது வார்டுக்கு வந்தபோது, அங்கிருந்த திமுக நகர செயலாளர் சாரதி தலைமையிலான திமுகவினர் பிடித்து காவல்நிலையத்துக்கு அழைத்து செல்ல ஆட்டோவில் உட்காரவைத்தனர். அங்கு வந்த இன்ஸ்பெக்டர் சந்திரசேகர், அவர்களை தங்களுடன் அழைத்து சென்று வழக்கு எதுவும் பதிவு செய்யாமல் அனுப்பியுள்ளார்.


அதேபோல் பெரியபேட்டை என்கிற பகுதியில் கள்ள ஓட்டு போட வந்த ஒரு கும்பலை திமுகவினர் பிடித்து ஓரு வீட்டில் அடைத்துவைத்துள்ளனர். அங்கு வந்த அமைச்சர் நிலோபர்கபில், அவரது உதவியாளர் அருண், இன்ஸ்பெக்டர் சந்திரசேகர், அதிமுக ந.செ சதாசிவம் போன்றவர்கள் ஒரு சுத்தியலை எடுத்து அந்த வீட்டின் பூட்டை உடைத்து வீட்டுக்குள் சிறை வைக்கப்பட்டிருந்தவர்களை தங்களுடன் காரில் அழைத்து சென்றுள்ளார் அமைச்சர்.


இதுப்பற்றி திமுக ந.செ சாரதி கேள்வி எழுப்ப, மந்திரிக்கும் அவருக்கும் வாக்குவாதம் ஏற்பட்டுள்ளது. இதில் அமைச்சரின் உதவியாளர் அருண், இன்ஸ்பெக்டர் சந்திரசேகர் இருவரும், திமுகவை சேர்ந்தவர்களை பிடித்து தள்ளி அடித்து விரட்டியுள்ளனர். இதில் ஒரு திமுக நிர்வாகிக்கு காயம் ஏற்பட்டுள்ளது.


நான் அமைச்சருக்கு தான் ஆதரவாக இருப்பேன்.  உங்களால் முடிஞ்சத பார்த்துக்குங்க என திமுகவினரிடம் சவால் விட்ட காவல் ஆய்வாளர் சந்திரசேகர், கள்ள ஓட்டு போட வந்த கும்பலை அமைச்சரின் காரில் ஏற்றி அனுப்பிவைத்துள்ளார். இதற்கான வீடியோ தற்போது வெளியாகி மாவட்டத்தில் பெரும் பரபரப்பு ஏற்பட்டுள்ளது.

 

சார்ந்த செய்திகள்

Next Story

“என்ன எல்லாரும் பளபளன்னு இருக்கீங்க... ஆயிரம் ரூபாய் வந்துடுச்சா” - கதிர் ஆனந்த் பிரச்சாரம்

Published on 28/03/2024 | Edited on 28/03/2024
Kathir Anand campaign in Vellore

வேலூர் மாவட்டம் கே.வி.குப்பம் சட்டமன்றத் தொகுதிக்குட்பட்ட பரதராமி, கல்லப்பாடி, கொண்டசமுத்திரம்,  பி.கே.புரம் உள்ளிட்ட பல்வேறு இடங்களில் வேலூர் பாராளுமன்றத் தொகுதி திமுக வேட்பாளர் கதிர் ஆனந்த் பிரச்சாரம் மேற்கொண்டார்

அப்போது பேசிய கதிர் ஆனந்த், ட்ரைவர் வண்டி மேல இருக்க ஹெட் லைட் எல்லாம் ஆஃப் பண்ணுப்பா. என் மூஞ்சு தெரியமாட்டுதாம் என்று கூற, உடனடியாக ட்ரைவரும் லைட் ஆஃப் பண்ண, மக்களை பார்த்து இப்போது எனது முகம் தெளிவாக தெரிகிறதா? என்று கேட்டார். அதற்கு மக்களும் தொண்டர்களும் தெரியுது தெரியுது என்று சிரித்துக்கொண்டே கூற தனது பேச்சைத் தொடங்கினார்.

அந்த கலகலப்பு குறையாமல் இருக்க மக்களைப் பார்த்து, என்ன எல்லாரும் பல பளபளன்னு இருக்கீங்க... எல்லாம் ஃபுல்லா மேக்கப் போட்டு வந்து இருக்கீங்களா... ஃபேரன் லவ்லி, ஸ்டிக்கர் பொட்டு எல்லாம் போட்டு ஜம்முன்னு வந்திருக்கீங்களா... என்று கேட்க கூட்டத்தில் இருந்தவர்கள் சிரிக்க ஆரம்பிக்க, அதைவிட உங்க முகத்தை பார்க்கும் போது ஒரு புன்னகை, சந்தோஷம் தெரிகிறது.

நான் வந்தவுடனே சீதாராமன் கிட்ட கேட்டேன், “என்னாங்க எல்லார் மத்திலயும் ஒரு சந்தோஷம் இருக்குதே என்னா காரணம்னு கேட்டேன். அதுக்கு அவரு சொன்னாரு எல்லாருக்கும் மாசம் மாசம் ரூ. 1000 பணம் கொடுக்குறாங்களாம். அதான் எல்லாரும் ஹாப்பியா இருக்காங்களாமானு சொன்னாரு...’ என்ன உண்மையா அது? என்று பெண்களை பார்த்து கேட்க, அவர்களும் ஆம் என்று கூச்சலிட்டனர். அப்பொழுது சிலர் இன்னும் எங்களுக்கு வரவில்லை என கூறினர். அதற்கு இந்த தேர்தல் முடிந்தவுடன் அனைவருக்கும் கலைஞர் மகளிர் ஊக்கத்தொகை வழங்கப்படும் என்று  மக்களிடையே தனது கலகலப்பான பேச்சை தொடர்ந்து பிரச்சாரம் மேற்கொண்டார்.

இருப்பினும், ஃபேரன் லவ்லி போட்டீங்களா? பொட்டு வச்சீங்களா? பளபளன்னு இருக்கீங்க என கதிர் ஆனந்த் கேட்டது பெண்களிடம் முகச்சுழிப்பை ஏற்படுத்தியுள்ளது. இதனை எதிர்க்கட்சிகள், பெண்களை கொச்சைப்படுத்தி பேசுகிறார் வேட்பாளர். இது மேட்டிமைத்தனம், ஆயிரம் ரூபாய் இல்லை என்றால் பெண்கள் என்ன பொட்டு வைக்கக் கூடாதா? தங்களை அழகுபடுத்திக் கொள்ளக் கூடாதா? எனக் கேள்வி எழுப்பி விமர்சனம் செய்து வருகின்றனர்.

Next Story

கதிர் ஆனந்த் வேட்புமனு தாக்கல் 

Published on 25/03/2024 | Edited on 25/03/2024
Kathir Anand filed nomination

வேலூர் நாடாளுமன்றத் தொகுதியில் இந்தியா கூட்டணி சார்பில் போட்டியிடும் திமுக வேட்பாளர் கதிர் ஆனந்த் இன்று வேட்புமனு தாக்கல் செய்தார். இதற்காக அவர், அமைச்சர் துரைமுருகன், சட்டமன்ற உறுப்பினர் நந்தகுமார், சட்டமன்ற உறுப்பினர் கார்த்தி உள்ளிட்ட 2000க்கும் மேற்பட்ட இந்தியா கூட்டணிக் கட்சித் தொண்டர்களுடன் ஊர்வலமாக வந்து மாவட்டத் தேர்தல் நடத்தும் அலுவலர் சுப்புலட்சுமியிடம் வேட்புமனு தாக்கல் செய்தார்.

அதற்கு முன்னதாக வேலூர் அண்ணா சாலையில் உள்ள வேலூர் மாநகர் திமுக அலுவலகத்தில் கலைஞர் சிலைக்கு மாலை அணிவித்துவிட்டு, தொடர்ச்சியாக ஊர்வலமாகச் சென்று அண்ணா சிலை, பெரியார் சிலை, காந்தி சிலை, அம்பேத்கர் சிலை ஆகியவற்றிற்கு மாலை அணிவித்துவிட்டு சத்துவாச்சாரியில் உள்ள மாவட்ட ஆட்சியர் அலுவலகத்திற்கு ஊர்வலமாக வந்து தனது வேட்பு மனுவைத் தாக்கல் செய்தார்.

அதற்கு முன்னதாக இந்தியா கூட்டணி தொண்டர்கள் ஆரவாரத்துடன் கதிர் ஆனந்த் வேட்புமனு தாக்கல் செய்வதற்கு உற்சாக வரவேற்பு அளித்தனர். வழிநெடுக பட்டாசுகள் வெடித்து கரகாட்டம், ஒயிலாட்டம், மயிலாட்டம் எனப் பல்வேறு மேள தளங்கள் இசைத்து ஊர்வலமாக வந்தனர். பின்னர் மாவட்ட ஆட்சியரும், தேர்தல் அதிகாரியுமான சுப்புலட்சுமியிடம் வேட்பு மனுவைத் தாக்கல் செய்தார்.