Skip to main content

"உயர்நீதிமன்றத்தின் கோரிக்கைகள் நிறைவேற்றித் தரப்படும்" - அமைச்சர் ரகுபதி

Published on 06/03/2023 | Edited on 06/03/2023

 

minister raghupathy talks about high court request 

 

கரூர் மாவட்டம் குளித்தலை ஒருங்கிணைந்த நீதிமன்ற வளாகத்தில் கூடுதல் மாவட்ட உரிமையியல் நீதிமன்றத்தினை சென்னை உயர்நீதிமன்றத்தின் பொறுப்பு தலைமை நீதிபதி ராஜா மற்றும் சட்டத்துறை அமைச்சர் ரகுபதி ஆகியோர் ரிப்பன் வெட்டியும் குத்து விளக்கேற்றியும் திறந்து வைத்து வழக்கை துவக்கி வைத்தனர். அதனையடுத்து குளித்தலை பெரிய பாலத்தில் உள்ள தனியார் திருமண மண்டபத்தில் விழா நடைபெற்றது. விழாவில் கூடுதல் மாவட்ட உரிமையியல் நீதிமன்ற வளாகத்திற்கான கல்வெட்டையும் திறந்து வைத்து சிறப்புரையாற்றினர்.

 

அப்போது சட்டத்துறை அமைச்சர் ரகுபதி அவர்கள் பேசுகையில், "தமிழகத்தில் அனைவரும் சமம். அனைவருக்கும் சமத்துவ நீதி கிடைக்க வேண்டும் என்ற நோக்கத்தில் தமிழக முதல்வர் மு.க.ஸ்டாலின் தலைமையிலான தமிழ்நாடு அரசு செயல்பட்டு வருகிறது. தமிழ்நாடு அமைதிப் பூங்காவாக இருப்பதை பொறுத்துக்கொள்ள முடியாதவர்கள், சதி செய்கிறார்கள். நீதிமன்றங்களுக்கு தேவையான சட்ட நடவடிக்கைகளை மேற்கொண்டு வருகிறோம். ஒப்பற்ற சமத்துவ நீதி ஆட்சியினை வழங்கி உயர்நீதிமன்றம், மாவட்ட நீதிமன்றம் மற்றும் கிளை நீதிமன்றங்களுக்கு தேவையான வசதிகளை செய்து தந்துள்ளோம். மேலும், உயர்நீதிமன்றம் சார்பில் விடுக்கப்பட்டுள்ள கோரிக்கைகளை வரும் சட்டமன்றக் கூட்டத்தொடரில் தமிழக முதல்வரிடம் எடுத்துரைத்து நிறைவேற்றி தருவோம்" எனக் கூறினார்.

 

அதனைத் தொடர்ந்து சென்னை உயர்நீதிமன்றத்தின் தலைமை நீதிபதி (பொறுப்பு) ராஜா பேசுகையில், “கரூர் மாவட்டத்தில் ஏற்கனவே 19 நீதிமன்றங்கள் உள்ளன. தற்போது இருபதாவது நீதிமன்றமாக குளித்தலை ஒருங்கிணைந்த நீதிமன்ற வளாகத்தில் கூடுதல் மாவட்ட உரிமையியல் நீதிமன்றம் துவங்கப்பட்டுள்ளது. கரூர் மாவட்ட மக்கள் சட்டத்திற்கு கட்டுப்பட்டு வாழக்கூடியவர்களாக உள்ளனர். கரூர் மாவட்டத்தில்தான் குறைந்த நிலையில் 19 போக்சோ வழக்குகள் உள்ளன. விழுப்புரம் மாவட்டத்தில் 356 வழக்குகள், விருதுநகர் மாவட்டத்தில் 39 வழக்குகள் என அதிகமாக உள்ள நிலையில், கரூர் மாவட்டத்தில் 19 வழக்குகள் எனக் குறைந்த நிலையில் உள்ள போதிலும், நான் மாவட்ட பொறுப்பு நீதிபதியாக பணியாற்றிய போது 7 போக்சோ வழக்குகள் மட்டுமே நிலுவையில் இருந்தன. அதனை ஒரு வருடக்காலத்தில் மகிளா நீதிமன்ற நீதிபதி குறைந்த காலத்தில் வழக்குகளில் உரிய விசாரணை மேற்கொண்டு நீதி வழங்க வேண்டும். வழக்குகளை விரைந்து விசாரித்து தமிழ்நாட்டில் கரூர் மாவட்டம் போக்சோ வழக்கு இல்லாத மாவட்டமாக கொண்டு வர வேண்டும்.

 

வழக்கறிஞர்கள் வழக்கின் தன்மையை உணர்ந்து நீதிபதிகளின் கேள்விகளுக்கு தகுந்த பதிலை அளித்தும் வாதாடும்போது வழக்கு விசாரணையை விரைவில் முடித்து நீதிபதி தீர்ப்பினை வழங்க முடியும். எனவே, வழக்கறிஞர்கள் பொறுப்பையும் கடமையையும் உணர்ந்து செயல்பட வேண்டும். மூத்த வழக்கறிஞர்தான் அட்வகேட் ஜெனரல் எனவும், இந்தியாவில் அட்டர்னி ஜெனரல் எனவும் அழைக்கப்படுவார்கள். நீண்ட காலமாக நிலுவையில் இருந்த அயோத்தி பாபர் மசூதி இடிப்பு வழக்கினை மூத்த வழக்கறிஞர் ஒருவர் தான் வாதாடி நல்ல தீர்ப்பினை பெற்று தந்தார். எனவே, மூத்த வழக்கறிஞர்கள் வயது மூப்பினை கருத்தில் கொள்ளாமல் உரிய நீதியினை வழங்குவதற்காக நீதிமன்ற வழக்குகளில் வாதாடி வெற்றியைத் தேடித் தர வேண்டும்" என்று கூறினார்.

 

மூத்த வழக்கறிஞர்கள் 5 நபர்களுக்கும் நீண்ட நாட்களாக வழக்கறிஞராக பணிபுரிந்து வரும் நன்கு வாதாடக்கூடிய 40 வழக்கறிஞர்களுக்கும் சென்னை உயர்நீதிமன்றத்தின் பொறுப்பு தலைமை நீதிபதி ராஜா நினைவு பரிசுகளை வழங்கி கௌரவித்தார். இந்நிகழ்ச்சியில் கரூர் மாவட்ட நீதிமன்ற பொறுப்பு  நீதிபதி குமரேஷ் பாபு, மாவட்ட நீதிபதி சண்முகசுந்தரம், தலைமை குற்றவியல் நீதித்துறை நடுவர் ராஜலிங்கம், மாவட்ட ஆட்சியர் பிரபு சங்கர், எஸ்.பி சுந்தரவதனம், டி.எஸ்.பி ஸ்ரீதர், கோட்டாட்சியர் புஷ்பா தேவி, குளித்தலை எம்எல்ஏ மாணிக்கம், தமிழ்நாடு பார் கவுன்சில் தலைவர் கரூர் மாவட்டம் மாரப்பன், குளித்தலை கிளை சாகுல் அமீது  மற்றும்  நீதிமன்ற ஊழியர்கள் எனப்  பலர் கலந்து கொண்டனர். 

 

 

சார்ந்த செய்திகள்

 

Next Story

'410 ஆசிரியர்களுக்குப் பணி வழங்குக' - நீதிமன்றம் உத்தரவு

Published on 19/07/2024 | Edited on 19/07/2024
'Give employment to 410 teachers'- court orders

10 ஆண்டுகளாக காத்திருக்கும் 410 ஆசிரியர்களுக்கு தகுதி அடிப்படையில் பணி வழங்க வேண்டும் என சென்னை உயர்நீதிமன்றம் உத்தரவிட்டுள்ளது.

போட்டி தேர்வை எதிர்த்து 410 ஆசிரியர்கள் சென்னை உயர் நீதிமன்றத்தில் வழக்கு தொடர்ந்திருந்தனர். கடந்த 2014 முதல் 2017 ஆம் ஆண்டு வரை நடத்தப்பட்ட ஆசிரியர் தகுதித் தேர்வுகளில் தகுதி பெற்று சான்றிதழ் சரிபார்க்கும் பணி முடிவடைந்த நிலையில் 10 ஆண்டுகளாக 410 ஆசிரியர்கள் பணி நியமனத்திற்காக காத்திருந்து வருகின்றனர். தகுதித் தேர்வு எழுதி பணி நியமனத்திற்கு காத்திருக்கும் நேரத்தில் 2018 ஆம் ஆண்டு போட்டி தேர்வை அரசு கொண்டு வந்ததால்  பணி நியமனம் இல்லாமல் காத்திருக்கும் ஆசிரியர்கள் 410 தகுதி அடிப்படையில் பணி வழங்க வேண்டும் எனக் கோரி சென்னை உயர்நீதிமன்றத்தில் வழக்கு தொடர்ந்திருந்தனர்.

இந்த வழக்கு உயர் நீதிமன்றத்தில் பொறுப்பு நீதிபதியாக இருந்து உச்ச நீதிமன்றம் சென்றுள்ள நீதிபதி மகாதேவன் அமர்வுக்கு முன்பு விசாரணையில் இருந்து வந்தது. இந்நிலையில் விசாரணைகள் முடிந்து இன்று தீர்ப்பு வழங்கப்பட்டது. போட்டித் தேர்வு என்பது 2018 ஆம் ஆண்டு எடுக்கப்பட்ட முடிவு அதற்கு முன்னதாகவே மனுதாரர் 410 பேரும் மாநில அரசின் திட்டத்தின் படிதகுதித் தேர்வு எழுதியுள்ளனர். எனவே 410 பேருக்கும் தகுதி அடிப்படையில் பணி நியமனம் வழங்க வேண்டும் என நீதிமன்றம் உத்தரவிட்டுள்ளது.

Next Story

முன்னாள் அமைச்சர் எம்.ஆர்.விஜயபாஸ்கர் நீதிமன்றத்தில் ஆஜர்!

Published on 19/07/2024 | Edited on 19/07/2024
Former Minister MR Vijayabaskar appears in court

கரூர் மாவட்டம் வாங்கல் குப்பிச்சிபாளையத்தைச் சேர்ந்த பிரகாஷ் என்பவர் கரூர் காவல் நிலையம் மற்றும் எஸ்.பி. அலுவலகத்தில் புகார் ஒன்றை அளித்திருந்தார். அதில், தோரணக்கல்பட்டி மற்றும் குன்னம்பட்டியில் தனக்குச் சொந்தமான ரூ.100 கோடி மதிப்புள்ள 22 ஏக்கர் நிலத்தை அதிமுக முன்னாள் அமைச்சர் எம்.ஆர். விஜயபாஸ்கர் மற்றும் அவரது ஆதரவாளர்கள் தனது மனைவி மற்றும் மகளை மிரட்டி மோசடியாகப் பத்திரப்பதிவு செய்து உள்ளனர் என்று கூறியிருந்தார்.

மேலும் இது தொடர்பாக மேலக்கரூர் பொறுப்பு சார்பதிவாளரும் கரூர் நகர காவல் நிலையத்தில் புகார் அளித்திருந்தார். அதனைத் தொடர்ந்து இந்த வழக்கு சிபிசிஐடிக்கு மாற்றப்பட்டது. அதே சமயம் இந்த வழக்கில் தனது பெயர் சேர்க்கப்படலாம் என்று கருதி முன்னாள் அமைச்சர் எம்.ஆர். விஜயபாஸ்கர் முன்ஜாமீன் கேட்டு கரூர் மாவட்ட முதன்மை அமர்வு நீதிமன்றத்தில் மனுத்தாக்கல் செய்திருந்தார். இதனையடுத்து நில அபகரிப்பு வழக்கில் எம்.ஆர். விஜயபாஸ்கரின் முன் ஜாமீன் மனுக்களை நீதிபதி தள்ளுபடி செய்து உத்தரவிட்டிருந்தார். 

Former Minister MR Vijayabaskar appears in court

அதனைத் தொடர்ந்து முன்ஜாமீன் கோரி எம்.ஆர். விஜயபாஸ்கர் சென்னை உயர்நீதிமன்றத்தின் மதுரைக் கிளையில் மனுத்தாக்கல் செய்திருந்தார்.  இந்த மனுவும் நேற்று தள்ளுபடி செய்யப்பட்டது. இதற்கிடையே தலைமறைவாக கேரளாவில் பதுங்கி இருந்த எம்.ஆர். விஜயபாஸ்கர் தனிப்படை போலீசாரால் கடந்த 16 ஆம் தேதி (16.07.2024) கைது செய்யப்பட்டார். இத்தகைய பரபரப்பான சூழலில் எம்.ஆர். விஜயபாஸ்கருக்கு வரும் 31ஆம் தேதி வரை என 15 நாட்கள் நீதிமன்ற காவல் விதிக்கப்பட்டு திருச்சி மத்தியச் சிறையில் அடைக்கப்பட்டிருந்தார்.

இதற்கிடையே பிரகாஷ் வாங்கல் காவல் நிலையத்தில் ஏற்கனவே  எம்.ஆர். விஜயபாஸ்கர் உள்ளிட்ட 13 பேர்  மீது அளித்த புகாரின் பேரில் கொலை முயற்சி, ஆள் கடத்தல் உள்ளிட்ட 8 சட்டப்பிரிவின் கீழ் வழக்குப் பதிவு செய்யப்பட்டிருந்தது. இது தொடர்பான புகாரின் பேரில் எம்.ஆர். விஜயபாஸ்கர் மீண்டும் கைது செய்யப்பட்டார். இதையடுத்து திருச்சி மத்திய சிறையில் இருந்த எம்.ஆர். விஜயபாஸ்கருக்கு இது குறித்து தகவல் தெரிவிக்கப்பட்டது. இந்நிலையில் திருச்சி மத்திய சிறையில் இருந்த எம்.ஆர். விஜயபாஸ்கர் கரூர் மாவட்ட முதலாவது குற்றவியல் நீதிமன்றத்தில் இன்று (19.07.2024) ஆஜர்படுத்தப்பட்டார்.