கடந்த சில ஆண்டுகளுக்கு முன்புவரை சுமார் 600 இந்திய (தமிழக) மீனவர்களைக் கொன்று குவித்த இலங்கை கடற்படை இன்னும் அடங்கவில்லை. இப்போது 4 மீனவர்கள் சென்ற படகை இடித்து மூழ்கடித்துக் கொன்றிருக்கிறார்கள். இப்படி அடுத்தடுத்து தமிழக மீனவர்கள் கொல்லப்படுவதை மத்திய, மாநில அரசுகள் வேடிக்கை பார்த்துக் கொண்டிருப்பதால் தான் மேலும் மேலும் தமிழக மீனவர்களை அச்சமின்றி இலங்கை கடற்படையினர் கொல்வதாகக் கூறுகிறார்கள் விபரம் அறிந்தவர்கள்.

18-ந் தேதி கோட்டைப்பட்டினம் மீன்பிடி துறைமுகத்தில் இருந்து 214 விசைப்படகுகளில் மீனவர்கள் கடலுக்கு மீன்பிடிக்கச் சென்றனர். அடுத்த நாள் 213 படகுகள் கரை திரும்பியது. ஒரு படகு மட்டும் காணவில்லை. அப்போது, "இலங்கை கடற்படை கப்பலை மீனவர்களின் படகில் இடித்து மூழ்கடித்துவிட்டார்கள். ராமேசுவரம் பகுதியைச் சேர்ந்த ஆரோக்கியசாமி என்பவருக்குச் சொந்தமான படகில், அதே பகுதியைச் சேர்ந்த ஏ.மெசியா(30), வி.நாகராஜ்(52), என்.சாம்(28), எஸ்.செந்தில்குமார்(32) ஆகிய 4 மீனவர்களும் கடலில் மூழ்கியுள்ளனர். சிறிதளவு மனிதாபிமானம் கூட இல்லாத இலங்கை கடற்படை, மீனவர்கள் மீளக்கூடாது என்பதற்காக படகு மூழ்கிய பகுதியிலேயே சுற்றிவந்தனர். அதனால் யாராலும் 4 மீனவர்களையும் காப்பாற்ற முடியவில்லை" என்றார்கள் சக மீனவர்கள்.

காணாமல் போன மீனவர்களை மீட்கக்கோரி உறவினர்களும், மீனவர்களும் போராட்டக்குரல் கொடுத்த நிலையில், தேடுவதாக சொன்னார்கள். ஆனால் இலங்கை கடற்பகுதியில் முதலில் இரு சடலங்களும், பிறகு ஒவ்வொரு சடலமாக 4 சடங்களும் மீட்கப்பட்டது. இந்நிலையில் இந்திய மீனவர்களுக்கு பாதுகாப்பு இல்லை. காணாமல் போன மீனவர்களின் படகை இடித்து மூழ்கடித்த இலங்கை கடற்படையினர் மீது கொலை வழக்குப் பதிவு செய்து நடவடிக்கை எடுக்க வேண்டும். இந்திய மீனவர்களுக்குப் பாதுகாப்பு வேண்டும் என்ற கோரிக்கைகளை வலியுறுத்தி கிழக்கு கடற்கரைச் சாலையில் சாலை மறியல் போராட்டமும் செய்தனர்.

தொடர்ந்து இலங்கை கடற்படை தாக்குதலால் இறந்த மீனவர்களின் குடும்பங்களுக்கு முதலமைச்சர் நிவாரணம் வழங்கக்கோரி அமைச்சர் விஜயபாஸ்கர் முதலமைச்சருக்குக் கடிதம் அனுப்பினார். அதனைத் தொடர்ந்து தமிழக அரசு சார்பில் இறந்தவர்கள் குடும்பத்திற்கு தலா ரூ. 10 லட்சம் நிவாரணம் மற்றும் வீட்டுக்கு ஒருவருக்கு அரசு வேலை வழங்க முதலமைச்சர் உத்தரவிட்டார்.

ஆனால், இறந்த மீனவர்களின் சடலங்களை ஒப்படைக்கும் வரை கடலுக்குச் செல்லமாட்டோம் என்று மீனவர்கள் தொடர் வேலைநிறுத்தப் போராட்டத்தில் ஈடுபட்டிருந்தனர். இந்நிலையில், இன்று கோட்டைப்பட்டினம் மீனவர்களின் இரு படகுகளில் இலங்கை சென்று 4 மீனவர்களின் உடல்களைப் பெற்றுவந்தனர். மீனவர்களின் உடல்களைப் பெற்றுச் செல்ல அவர்களின் உறவினர்கள் அமரர் ஊர்திகளுடன் காத்திருந்தனர். மதியம் 2.30 மணிக்கு கரைக்கு கொண்டுவரப்பட்ட மீனவர்களின் உடல்களுக்கு அமைச்சர் விஜயபாஸ்கர், மாவட்ட ஆட்சியர் உமாமகேஸ்வரி, மாவட்ட எஸ்.பி பாலாஜி சரவணன், ரெத்தின சபாபதி எம்.எல்.ஏ, அறந்தாங்கி சார் ஆட்சியர் ஆனந்த் மோகன் மற்றும் பலர் மாலை அணிவித்து அஞ்சலி செலுத்தினார்கள். அதன் பிறகு மீனவர்களின் உடல்களை உறவினர் பெற்று சொந்த ஊர்களுக்குக் கொண்டு சென்றனர்.