வைரலாகும் அமைச்சர் சக்கரபாணியின் வீடியோ! 

உணவு மற்றும் உணவுப்பொருள் வழங்கல் துறை அமைச்சர் சக்கரபாணி மாட்டு வண்டியை ஓட்டிய வீடியோ சமூகவலைத்தளங்களில் வைரலாகி வருகிறது.

திண்டுக்கல் மாவட்டத்தில் உள்ள ஒட்டன்சத்திரம் சட்டமன்ற தொகுதியின் எம்.எல்.ஏ.வும். அமைச்சருமான சக்கரபாணி, விவசாய குடும்பத்தைச் சேர்ந்தவர் என்பதால் விவசாயத்திலும் ஈடுபாடாக இருந்து வருகிறார். தனது சொந்த ஊரான கள்ளிமந்தையத்திலிருந்து இரண்டு கிலோ மீட்டர் தூரத்தில் உள்ள காளியப்பா கவுண்டனூரில் அவருக்கு சொந்தமான தோட்டம் உள்ளது.

இந்தத் தோட்டத்திற்கு அமைச்சர் சக்கரபாணி எப்போதாவது வந்து செல்வது வழக்கம். அப்படி வரும்போது தோட்டத்தில் உள்ள விவசாய நிலங்களையும் பார்வையிட்டுவிட்டு அங்குள்ள மாடு கன்றுகளோடு சிறிது நேரம் நேரத்தை கழித்துவிட்டு செல்வார். அதுபோல் நேற்று, அமைச்சர் சக்கரபாணி தோட்டத்துக்குச் சென்றார்.

அப்போது, தோட்டத்திலிருந்த மாட்டு வண்டியில் இரண்டு மாடுகளை பூட்டி தோட்டத்திலிருந்து மூன்று கிலோமீட்டர் தூரத்தில் உள்ள கப்பல்பட்டி பிரிவு வரை மாட்டுவண்டியை ஓட்டிச் சென்றார். இதனை அமைச்சர் சக்கரபாணி தனது ஃபேஸ்புக் பக்கத்தில் பதிவு செய்துள்ளார். தற்போது இந்த வீடியோ வைரலாகிவருகிறது.