Skip to main content

ஜூன் 12 ஆம் தேதி மேட்டூர் அணை தண்ணீர் திறப்பு; அமைச்சர் கே.என். நேரு தகவல்  

Published on 29/05/2023 | Edited on 29/05/2023

 

mettur dam water opening for cauvery delta region cm mk stalin

 

சேலத்தில் கலைஞர் சிலை திறப்பு மற்றும் அவருடைய நூற்றாண்டு பிறந்த நாள் தொடக்க விழாவில் கலந்து கொள்ள தமிழக முதல்வர் மு.க. ஸ்டாலின் ஜூன் 11 ஆம் தேதி சேலம் வருகிறார்.

 

இது தொடர்பாக திமுக முதன்மைச் செயலாளரும், நகராட்சி நிர்வாகத்துறை அமைச்சருமான கே.என். நேரு வெளியிட்டுள்ள அறிக்கையில், "திமுக வரலாற்றில் முத்திரைச் சாதனைகள் பல படைத்தது சேலம் மாவட்டம். சேலத்திற்கு இரும்பாலை, ரயில்வே கோட்டம், அரசு மருத்துவக் கல்லூரி, மாநகராட்சிக்காக 283 கோடி ரூபாயில் காவிரி கூட்டுக் குடிநீர் திட்டம், 183 கோடி ரூபாயில் பாதாள சாக்கடைத் திட்டம், 136 கோடி ரூபாயில் சூப்பர் ஸ்பெஷாலிட்டி மருத்துவமனை, ஏத்தாப்பூரில் மரவள்ளிக்கிழங்கு ஆராய்ச்சி நிலையம், ஏற்காட்டில் தாவரவியல் பூங்கா, ஆத்தூர் கூட்டுக் குடிநீர் திட்டம் உள்ளிட்ட பல திட்டங்களை நிறைவேற்றியவர் கலைஞர். அவரைப் போலவே, சேலம் மாவட்ட வளர்ச்சியில் தனிக் கவனம் செலுத்தி வரும் முதல்வர் மு.க. ஸ்டாலின், கடந்த 2021 ஆம் ஆண்டு டிசம்பரில் நடந்த அரசு விழாவில் 1242 கோடி ரூபாயில் திட்டங்களை செயல்படுத்தி உள்ளார்.

 

இந்நிலையில் ஜூன் 11 ஆம் தேதி, சேலம் மாநகருக்கு வருகை தரும் முதல்வர் மு.க. ஸ்டாலின், சேலத்தில் அமைக்கப்பட்டுள்ள கலைஞரின் உருவச் சிலையைத் திறந்து வைப்பதுடன், அவருடைய நூற்றாண்டு பிறந்த நாள் விழாவைத் தொடங்கி வைத்து நலத்திட்ட உதவிகளையும் வழங்குகிறார். ஜூன் 12 ஆம் தேதி, காவிரி டெல்டா பாசனத்திற்காக மேட்டூர் அணையை முதல்வர் மு.க. ஸ்டாலின் திறந்து வைக்கிறார். இந்த நிகழ்ச்சிகளுக்காக சேலம் மாவட்டத்திற்கு வருகை தரும் முதல்வருக்கு சிறப்பான முறையில் வரவேற்பு வழங்கிடுவோம். இது தொடர்பாக ஆலோசிக்க, மே 30 ஆம் தேதி (செவ்வாய்க்கிழமை) காலை 10 மணிக்கு, சேலம் 5 சாலை ரத்தினவேல் ஜெயக்குமார் திருமண மண்டபத்தில் ஒருங்கிணைந்த சேலம் மாவட்ட கழக செயல்வீரர்கள் கூட்டம் என் தலைமையில் நடத்தப்பட உள்ளது.

 

இக்கூட்டத்தில் ஒருங்கிணைந்த சேலம் மாவட்டத்தைச் சேர்ந்த மாவட்டச் செயலாளர்கள், எம்பிக்கள், எம்எல்ஏக்கள், உள்ளாட்சிப் பிரதிநிதிகள், மாநகர, நகர, பேரூர், ஒன்றிய, கிளை நிர்வாகிகள், கழக செயல் வீரர்கள் கலந்துகொண்டு ஆலோசனைகளை வழங்கிட வேண்டும்" என அமைச்சர் கே.என். நேரு தெரிவித்துள்ளார். 

 

 

சார்ந்த செய்திகள்

 

Next Story

கபினியின் உபரி அப்படியே திறப்பு; தமிழகத்திற்கு அதிகரிக்கும் நீர்வரத்து  

Published on 17/07/2024 | Edited on 17/07/2024
Increased water flow to Tamil Nadu

கர்நாடக அணைகளில் இருந்து காவிரியில் திறந்து விடப்படும் நீரின் அளவு படிப்படியாக அதிகரித்து வருகிறது.

கர்நாடக மாநிலத்தில் தென்மேற்கு பருவமழை கடந்த ஜூலை முதல் வாரத்தில் இருந்து தொடங்கி தற்போது விட்டு விட்டு கனமழை பொழிந்து வருகிறது. இதனால் காவிரி நீர்ப்பிடிப்பு பகுதிகளான மைசூர், குடகு, ஹாசன் உள்ளிட்ட பகுதிகளிலும் கடலோர மற்றும் மலை மாவட்டங்களிலும் தொடர்ந்து மழை பொழிவதால் கர்நாடக அணைகளுக்கு நீர்வரத்து அதிகரித்துள்ளது.

கர்நாடகாவின் முக்கிய அணைகளான கிருஷ்ணராஜ சாகர் அணை மற்றும் கபினி, ஹேமாவதி உள்ளிட்ட அணைகளில் நீர்மட்டம் அதிகரித்துள்ளது. இதனால் தொடர்ந்து உபரி நீர் காவிரி ஆற்றில் திறந்து விடப்பட்டு வருகிறது.

நேற்று (16/07/2024) மாலை நிலவரப்படி மொத்தமாக கர்நாடக அணைகளில் இருந்து காவிரியில் திறந்து விடப்படும் நீரின் அளவு 36,579 கன அடியாக அதிகரித்திருந்தது. தொடர்ந்து நீர் திறப்பு அதிகரித்ததால் இன்று (17/07/2024) காலை நிலவரப்படி 40,000 கன அடியாக இருந்த நீர் திறப்பு தற்போது 45,651 கனஅடியாக உயர்த்தப்பட்டுள்ளது. கனமழை காரணமாக கபினி அணைக்கு வரும் உபரி நீர் அப்படியே காவிரி ஆற்றில் திறந்து விடப்படுகிறது. இதனால் மேட்டூர் அணைக்கு தற்போது நீர்வரத்து 29,520 கனஅடியாக ஆக உள்ளது.

கர்நாடகாவின் முக்கிய அணையான கிருஷ்ணராஜ சாகர் அணைக்கு நீர்வரத்து 36,675 கன அடியாக உள்ள நிலையில் 651 கனஅடி நீர் காவிரியில் திறக்கப்பட்டு வருகிறது. கபினி அணையில் இருந்து மட்டும் 45,000 கனஅடி நீர் காவிரியில் திறந்து விடப்பட்டுள்ளது.

Next Story

அனைத்துக் கட்சித் தலைவர்கள் கூட்டம்; முதல்வர் மு.க. ஸ்டாலின் பேசியது என்ன?

Published on 16/07/2024 | Edited on 16/07/2024
CM MK Stalin What did say in all party leaders meeting

சென்னை தலைமைச் செயலகத்தில் தமிழ்நாடு முதலமைச்சர் மு. க. ஸ்டாலின் தலைமையில் இன்று (16.07.2024) , காவிரி நதிநீரில் தமிழ்நாட்டின் உரிமைகளைப் பாதுகாக்கும் வகையிலும், கர்நாடக அரசிடமிருந்து தமிழ்நாட்டிற்குக் காவிரி நீரைப் பெறுவதற்குத் தேவையான நடவடிக்கைகளை மேற்கொள்வது குறித்தும் அனைத்து சட்டமன்ற கட்சித் தலைவர்களின் கூட்டம் நடைபெற்றது.

இந்த கூட்டத்தில் முதலமைச்சர் மு.க. ஸ்டாலின் பேசுகையில், “ காவிரி நடுவர் மன்றத்தின் இறுதி ஆணையினையும்,  உச்சநீதிமன்றத்தின் தீர்ப்பினையும் பின்பற்ற மறுத்து, காவிரி ஒழுங்காற்றுக் குழுவின் ஆணையின்படி நமக்குக் கிடைக்க வேண்டிய குறைந்த அளவு தண்ணீரைக் கூட கர்நாடக அரசு வழங்க மறுத்து வருகிறது. இதனை முறியடித்து, தமிழ்நாட்டின் உரிமைகளை நிலைநாட்டி, காவிரி டெல்டா பகுதிகளில் உள்ள விவசாயிகளுக்குத் தண்ணீர் கிடைக்கச் செய்வதற்கு எடுக்கப்பட வேண்டிய நடவடிக்கைகளைப் பற்றிப் பல ஆக்கப்பூர்வமான கருத்துக்களை இங்குத் தெரிவித்து இருக்கின்றீர்கள். அதற்கு எனது நன்றியினைத் தெரிவித்துக் கொள்கின்றேன். 

CM MK Stalin What did say in all party leaders meeting

தமிழ்நாட்டுக்கு சட்டப்பூர்வமாக உச்சநீதிமன்றத் தீர்ப்பின்படி, கிடைக்க வேண்டிய நீரினைச் சென்ற ஆண்டில் கர்நாடக அரசு விடுவிக்காததால், வேளாண் பெருமக்களுக்கு கடும் பாதிப்பு ஏற்பட்டது. இதுகுறித்து உச்சநீதிமன்றத்தை நாடித் தான் நீரைப் பெற்றோம். இந்த ஆண்டில் தென்மேற்கு பருவமழை சாதகமாக இருக்கக்கூடிய சூழ்நிலையிலும், கர்நாடகா அரசு இவ்வாறு நடந்து கொள்வதை எந்த விதத்திலும் ஏற்றுக் கொள்ள முடியாது.

எனவே, இந்தக் கூட்டத்தில் தெரிவிக்கப்பட்டுள்ள கருத்துகளின் அடிப்படையில், ஒருமனதாக எடுக்கப்பட்டுள்ள இந்த முடிவுகளைத் தீர்மானங்களாகப் படிக்கின்றேன். முதலாவதாக காவிரி நடுவர் மன்றம் 05-02-2007 அன்று அளித்த இறுதித் தீர்ப்பையும், உச்சநீதிமன்றம் 16-02-2018 அன்று அளித்த தீர்ப்பையும் அவமதிக்கும் வகையில், காவிரி நீர் ஒழுங்காற்றுக் குழு தற்போது ஆணையிட்டுள்ளவாறு தமிழ்நாட்டிற்குக் காவிரி நீரைத் தர முடியாது என்று மறுத்துள்ள கர்நாடக அரசிற்கு இந்த அனைத்து சட்டமன்றக் கட்சிக் கூட்டம் தனது கடுமையான கண்டனத்தைத் தெரிவித்துக் கொள்கிறது. 

CM MK Stalin What did say in all party leaders meeting

இரண்டாவதாகக் காவிரி நடுவர் மன்றத்தின் இறுதித் தீர்ப்பு மற்றும் உச்சநீதிமன்ற ஆணையின்படி, தமிழ்நாட்டிற்குக் காவிரி நீரை உடனடியாக விடுவித்திடக் கர்நாடக அரசுக்கு ஆணையிடுமாறு காவிரி நதிநீர் மேலாண்மை ஆணையத்தினை இந்த அனைத்து சட்டமன்றக் கட்சிக் கூட்டம் வலியுறுத்துகிறது. மூன்றாவதாகக் காவிரி நடுவர் மன்றத்தின் இறுதித் தீர்ப்பு மற்றும் உச்சநீதிமன்ற ஆணையின்படி, தமிழ்நாடு பெறவேண்டிய நீரை உடனடியாகப் பெறுவதற்கு, தேவைப்படின், மாண்பமை உச்சநீதிமன்றத்தை நாடி, அனைத்து சட்டப்பூர்வமான நடவடிக்கைகளையும் மேற்கொள்ள இக்கூட்டம் ஒருமனதாகத் தீர்மானிக்கிறது. இந்தத் தீர்மானங்களின் அடிப்படையில் தேவைப்படும் அனைத்து நடவடிக்கைகளையும் முழுமூச்சோடு மேற்கொண்டு, காவிரி டெல்டா விவசாயிகளின் உரிமைகளை இந்த அரசு நிலைநாட்டும் என உறுதியளித்து, எனது உரையை நிறைவு செய்கின்றேன்” எனத் தெரிவித்தார். இதனையடுத்து தீர்மானம் ஒரு மனதாக நிறைவேற்றப்பட்டது.

இக்கூட்டத்தில், நீர்வளத்துறை அமைச்சர் துரைமுருகன், திமுக சார்பில் நாடாளுமன்ற உறுப்பினர் பி. வில்சன், ஆர்.எஸ். பாரதி, அதிமுக சார்பில் எஸ்.பி. வேலுமணி, ஒ.எஸ். மணியன், காங்கிரஸ் கட்சியின் சார்பில் கு. செல்வப்பெருந்தகை, செ. ராஜேஷ்குமார், பாமக சார்பில் ஜி.கே. மணி மற்றும் சதாசிவம், விடுதலை சிறுத்தைகள் கட்சியின் சார்பில் அதன் தலைவரும், நாடாளுமன்ற உறுப்பினருமான தொல். திருமாவளவன் மற்றும் எஸ்.எஸ். பாலாஜி, பாஜகட்சி சார்பில் கரு. நாகராஜன், கருப்பு முருகானந்தம், மார்க்சிஸ்ட் கம்யூனிஸ்ட் கட்சியின் சார்பில் வி.பி. நாகை மாலி மற்றும் பி. சண்முகம், இந்திய கம்யூனிஸ்ட் கட்சியின் சார்பில் டி. இராமச்சந்திரன் மற்றும் மூ. வீரபாண்டியன், மனிதநேய மக்கள் கட்சியின் சார்பில் எம்.எச். ஜவாஹிருல்லா, புதுமடம் அலீம், கொங்கு மக்கள் தேசியக் கட்சியின் சார்பில் ஈ.ஆர். ஈஸ்வரன் மற்றும் சூரியமூர்த்தி, புரட்சி பாரதம் கட்சியின் சார்பில் பூவை எம். ஜெகன்மூர்த்தி, மதிமுக சார்பில் சதன் திருமலைக் குமார் மற்றும் பூமிநாதன், தலைமைச் செயலாளர் சிவ் தாஸ் மீனா, நீர்வளத்துறைக் கூடுதல் தலைமைச் செயலாளர் க.மணிவாசன், அரசுத் துறைச் செயலாளர்கள் மற்றும் அரசு உயர் அலுவலர்கள் கலந்து கொண்டனர்.