Skip to main content

முகநூல் நட்பில் ஏமாந்து ஸ்க்ரீன்ஷாட்டில் சிக்கிய இளம்பெண்! ஆபாச வீடியோ கால் மிரட்டல்!

Published on 03/07/2023 | Edited on 03/07/2023

 

Man arrested for threatening young girl by taking obscene pictures Aruppukkottai

 

இளம்பெண்கள் ஏமாற்றப்படுவதும் பாலியல் மிரட்டலுக்கு ஆளாவதும் தொடர்ந்து நடக்கிறது. அருப்புக்கோட்டை தாலுகா - ஆத்திப்பட்டி - காவியன் நகரில் வசித்து வரும் சாம் அலெக்சாண்டரின் மனைவி ஸ்டெல்லா, ஈரோடு மாவட்டம் கவுண்டச்சிபாளையத்தைச் சேர்ந்த கோபாலகிருஷ்ணன் தன்னை  ஏமாற்றியதோடு மிரட்டியும் வருவதாக அருப்புக்கோட்டை தாலுகா காவல்நிலையத்தில் புகார் கொடுத்துள்ளார்.   

 

ஸ்டெல்லா ஏமாந்தது எப்படி?   

முகநூல் பயனர்களான ஸ்டெல்லாவும் கோபாலகிருஷ்ணனும் 2018-லிருந்தே நட்பில் இருந்துள்ளனர். 2020-ல் கோபாலகிருஷ்ணன் ஸ்டெல்லாவிடம், “எனக்கு ஷேர் மார்க்கெட்டில் நிறைய அனுபவம் உண்டு” என வலை விரித்திருக்கிறார். அவருடைய பேச்சை நம்பி ஷேர் மார்க்கெட்டில் முதலீடு செய்ய ரூ. 5 லட்சம் கொடுத்திருக்கிறார் ஸ்டெல்லா. அடுத்த குறியாக ஸ்டெல்லாவிடம்,  “உனக்கு சொந்தமான காரை என்னிடம் கொடு. மாத வாடகையாக ரூ. 20000 தருகிறேன்” எனச் சொல்லி காரை எடுத்துச் சென்றுவிட்டார் கோபாலகிருஷ்ணன். 

 

ஷேர் மார்க்கெட்டில் முதலீடு செய்ததாகச் சொன்ன ரூ. 5 லட்சத்தையும், கார் வாடகையையும் ஸ்டெல்லாவிடம் தராமல் காலத்தைக் கடத்தியிருக்கிறார் கோபாலகிருஷ்ணன். இதுகுறித்து ஸ்டெல்லா தொடர்ந்து கேட்டபோது “வாட்ஸ்-ஆப் வீடியோ காலில் நான் சொன்னபடி நீ நடந்துகொண்டால் பணத்தையும் காரையும் தருவேன்” என்று கோபாலகிருஷ்ணன் வற்புறுத்தியிருக்கிறார். ஸ்டெல்லாவும் வேறு வழியின்றி வாட்ஸ்-ஆப் வீடியோ காலில் கோபாலகிருஷ்ணன் சொன்னபடியெல்லாம் நடந்திருக்கிறார். அப்போது வாட்ஸ்-ஆப் காலில் ஸ்டெல்லா ஆபாசமாக இருந்ததை ஸ்க்ரீன்ஷாட்டுகளாக எடுத்து வைத்துக்கொண்டார் கோபாலகிருஷ்ணன்.   

 

இதனைத் தொடர்ந்து ஸ்டெல்லா, “நீ என்ன சொன்னாலும் சம்மதித்து நடந்துகொண்டேனே? என் பணத்தையும் காரையும் திருப்பிக்கொடு” என்று கெஞ்சியபோது, “அதெல்லாம் தர முடியாது. என்னை நச்சரித்தால் உன் ஆபாசப் படத்தை சமூக வலைத்தளத்தில் வெளியிட்டு உன்னை அசிங்கப்படுத்துவேன்” என்று மிரட்டியிருக்கிறார் கோபாலகிருஷ்ணன். ஆபாசப் புகைப்படம் கோபாலகிருஷ்ணனிடம் இருப்பதற்கு வாய்ப்பில்லை என்று ஸ்டெல்லா கருதிய நிலையில், 27/06/2023 அன்று ஸ்டெல்லாவின் செல்போனுக்கு அவருடைய ஆபாசப் படத்தை அனுப்பிய கோபாலகிருஷ்ணன், உடனடியாக அதை டெலிட் செய்திருக்கிறார். இதையடுத்து ஸ்டெல்லா அளித்த புகாரின் பேரில் அருப்புக்கோட்டை தாலுகா காவல்நிலையம் 405, 406, 506(i) ஆகிய இ.த.ச. பிரிவுகளிலும், தகவல் தொழில்நுட்பச் சட்டம் 67-A பிரிவிலும் கோபாலகிருஷ்ணன் மீது வழக்குப்பதிவு செய்து விசாரணை நடத்தி வருகிறது.  

 

 

சார்ந்த செய்திகள்

Next Story

ஆடு மேய்க்கச் சென்ற பெண்ணுக்கு நேர்ந்த கொடூரம்; அச்சத்தில் உறைந்த கிராம மக்கள்!

Published on 12/04/2024 | Edited on 12/04/2024
The cruelty that happened to the woman who went to herd the goats; Villagers frozen in fear

தஞ்சாவூரில் ஆடுகளை மேய்க்கச் சென்ற பெண் கொடூரமாகக் கொலை செய்யப்பட்ட சம்பவம் பரபரப்பை ஏற்படுத்தி இருக்கிறது.

தஞ்சை மாவட்டம் செங்கிப்பட்டி அடுத்துள்ளது மனையேறிப்பட்டி. இந்தக் கிராமத்தைச் சேர்ந்த 48 வயது பெண் ஒருவர், கருங்குளம் பகுதியில் ஆடுகளை எப்பொழுதும் மேய்ச்சலுக்குக் கொண்டு செல்வது வாடிக்கை. அதன்படி நேற்று மேய்ச்சலுக்கு ஆடுகளை அழைத்துச் சென்ற நிலையில் மாலை வரை அவர் வீடு திரும்பவில்லை. இதனால் காணாமல் போனவரைத் தேடி உறவினர்கள் குளக்கரை பகுதிக்குச் சென்றுள்ளனர். அப்பொழுது அப்பெண்ணின் செருப்பு மற்றும் அவர் உணவு எடுத்து வந்த பாத்திரம், தண்ணீர் பாட்டில் ஆகியவை மட்டும் தரைப்பகுதியில் கிடந்தது.

இதனால் சந்தேகமடைந்தவர்கள் அக்கம் பக்கத்தில் தேடிய பொழுது அப்பெண் ஆடைகள் களையப்பட்ட நிலையில் ரத்த காயத்துடன் சடலமாகக் கிடந்தார். பின்னர், உடனடியாக காவல்துறைக்குத் தகவல் கொடுக்கப்பட்டது. இதனையடுத்து சம்பவ இடத்திற்கு வந்த போலீசார் பெண்ணின் சடலத்தை மீட்டு பிரேதப் பரிசோதனைக்கு அனுப்பி வைத்ததோடு, இந்தச் சம்பவம் தொடர்பாக விசாரணை நடத்தி வருகின்றனர். ஒருவேளை அப்பெண் பாலியல் வன்கொடுமைக்கு ஆளாக்கப்பட்டு கொலை செய்யப்பட்டு இருக்கலாம் என்ற கோணத்தில் போலீசார் விசாரணை மேற்கொண்டு வருகின்றனர். இந்தச் சம்பவம் அங்கு பெரும் பரபரப்பையும், அச்சத்தையும்  ஏற்படுத்தி இருக்கிறது.

Next Story

கோவையில் திமுகவினர் மீது பாஜகவினர் தாக்குதல்!

Published on 12/04/2024 | Edited on 12/04/2024
BJP DMK issue in Coimbatore

நாட்டின் 18 ஆவது நாடாளுமன்ற மக்களவைத் தேர்தலுக்கான தேதிகள் அறிவிக்கப்பட்டு, மொத்தமாக ஏழு கட்டங்களாகத் தேர்தல் நடத்தப்படவுள்ள நிலையில், முதற்கட்டமாக தமிழ்நாட்டில் ஏப்ரல் 19 ஆம் தேதி வாக்குப்பதிவு நடைபெற இருக்கிறது. ஏற்கெனவே தமிழகத்தில் உள்ள அரசியல் கட்சிகள் தேர்தல் பணியில் தீவிரம் காட்டி வரும் நிலையில், தேர்தல் தேதி அறிவிக்கப்பட்டதால் தேர்தல் களம் அனல் பறக்க ஆரம்பித்து விட்டது.

இத்தகைய சூழலில் கோவை மாவட்டம் சிங்காநல்லுர் சட்டமன்ற தொகுதிக்கு உட்பட்ட ஆவாரம்பாளைம் 28வது வார்டு பகுதியில் தேர்தல் நடத்தை விதிகளை மீறி நேற்று (11.04.2024) இரவு 10.40 மணியளவில் பாஜகவினர் தேர்தல் பிரசாரத்தில் ஈடுபட்டதாக கூறப்படுகிறது. இதனை தட்டிக்கேட்ட திமுகவினரை பாஜகவினர் அடித்து உதைத்து தாக்கியதாக கூறப்படுகிறது. மேலும் இது குறித்து முன்னாள் திமுக எம்.எல்.ஏ. நா.கார்த்திக் கூறுகையில், “கோவையில் இதுவரை போட்டியிட்ட வேட்பாளர்கள் யாரும் இது போன்று சட்டவிதிகளை மீறி பிரசாரத்தில் ஈடுபட்டதில்லை. திமுகவினர் மீது தாக்குதல் நடத்திய பாஜகவினர் மீது வழக்கு பதிவு செய்து கைது செய்ய வேண்டும்” எனத் தெரிவித்திருந்தார்.

இந்நிலையில் தேர்தல் நடத்தை விதிமீறலில் ஈடுபட்டதை தட்டிக்கேட்ட திமுகவினரை தாக்கிய பாஜகவைச் சார்ந்த ஆனந்தகுமார், மாசானி உள்ளிட்டோர் மீது 294 பி, 323, 147 உள்ளிட்ட 3 பிரிவுகளின் கீழ் பீளமேடு போலீசார் வழக்குப்பதிவு செய்துள்ளனர்.