Skip to main content

ஓய்வு பெற்ற அரசு ஊழியர்களைக் கொன்று இரிடியம் கொள்ளை;  7 பேருக்கு ஆயுள் தண்டனை  

Published on 09/10/2023 | Edited on 09/10/2023

 

Life imprisonment for 7 people in iridium robbery case

 

கருமலைக்கூடல் அருகே, ஓய்வு பெற்ற அரசு ஊழியர்களை செல்லோ டேப்பால் முகத்தில் சுற்றி, மூச்சுத்திணற வைத்துக் கொலை செய்துவிட்டு, இரிடியம் உலோக நகைகளைக் கொள்ளை அடித்துச் சென்ற 7 பேருக்கு ஆயுள் தண்டனை விதித்து, சேலம் நீதிமன்றம் பரபரப்பு தீர்ப்பு அளித்துள்ளது.     

 

சேலம் மாவட்டம் கருமலைக்கூடல் அருகே உள்ள குஞ்சாண்டியூரைச் சேர்ந்தவர் நடராஜன் (75). வட்டார வளர்ச்சி அலுவலராக பணியாற்றி ஓய்வு பெற்றவர். இவருடைய மனைவி பழனியம்மாள் (75). இவர், ஓய்வு பெற்ற அரசுப்பள்ளித் தலைமை ஆசிரியர். இவர்கள் வீட்டில் அரிதான இரிடியம் உலோகம் வைத்திருந்தனர். அதை விற்பனை செய்வதற்காக தங்களுக்குத் தெரிந்த சில தரகர்களின் உதவியை நாடினர். 

 

இது தொடர்பாக நங்கவள்ளியைச் சேர்ந்த நாகப்பன், பெரியசாமி ஆகியோர் அவர்களுடைய வீட்டிற்குச் சென்று இரிடியம் உலோகத்தைப் பார்த்துவிட்டு வந்தனர். அவர்கள் மூலமாக மேலும் சில முகவர்களும் வந்து விசாரித்து விட்டுச் சென்றனர். கடந்த 2016 ஆம் ஆண்டு, ஆகஸ்ட் மாதம் 16 ஆம் தேதி இரிடியம் உலோகத்தை வாங்குவதற்காக 7 பேர் கொண்ட கும்பல் நடராஜனின் வீட்டிற்கு வந்தது. வீட்டில் வயதான நடராஜனும், அவருடைய மனைவியும் மட்டுமே இருப்பதை உறுதி செய்து கொண்ட அந்த கும்பல், திடீரென்று அவர்களை சரமாரியாகத் தாக்கியது.  

 

சத்தம் போட்டால் கேட்காமல் இருப்பதற்காக அவர்களின் வாய், முகத்தைச் சுற்றி செல்லோ டேப்பை சுற்றினர். பழனியம்மாள் அணிந்திருந்த 4 பவுன் தாலிக்கொடி, 2 அலைபேசிகளை பறித்துக்கொண்டதோடு, வீட்டில் இருந்த அரிதான இரிடியம் உலோகத்தையும் தூக்கிச் சென்றனர். வாயையும், முகத்தையும் செல்லோ டேப்பால் இறுக்கமாகச் சுற்றியதால் மூச்சுத் திணறல் ஏற்பட்டு நடராஜனும், பழனியம்மாளும் இறந்தனர். பரபரப்பை ஏற்படுத்திய இந்த சம்பவம் குறித்து, கருமலைக்கூடல் காவல்துறையினர் வழக்குப்பதிவு செய்து விசாரித்தனர். 

 

இந்தக்  கொலை, கொள்ளை தொடர்பாக கிருஷ்ணகிரி மாவட்டம் பர்கூர் அருகே உள்ள கே.என்.பள்ளி பகிமனூரைச் சேர்ந்த ராஜா (31), பர்கூர்  அம்பள்ளியைச் சேர்ந்த ரகு (38), கர்நாடக மாநிலம் பெங்களூரு அருகே உள்ள மடக்கள்ளியைச் சேர்ந்த பாபு (39), கவளக்கள்ளியைச் சேர்ந்த வினோத்குமார் (31), சரனு (39), ராமச்சந்திரப்பா (39), மாண்டியாவைச் சேர்ந்த நன்சி கவுடா (41) ஆகிய 7 பேரை கைது செய்தனர். இந்த வழக்கின் விசாரணை சேலம் மகளிர் நீதிமன்றத்தில் நடந்து வந்தது. வழக்கை விசாரித்த நீதிபதி ஈஸ்வரமூர்த்தி அக். 7 ஆம் தேதி தீர்ப்பளித்தார். கைதான 7 பேருக்கும் ஆயுள் தண்டனை விதித்து தீர்ப்பளித்தார். மேலும், முதல் குற்றவாளியான ராஜாவுக்கு 11 ஆயிரம் ரூபாயும், மற்ற ஆறு பேருக்கும் தலா 16 ஆயிரம் ரூபாய் அபராதமும் விதித்துத் தீர்ப்பு அளிக்கப்பட்டது. அரசுத் தரப்பில் வழக்கறிஞர் பத்மா ஆஜராகி வாதாடினார்.  

 

 

 

சார்ந்த செய்திகள்

 

Next Story

10 மணி வரை மழை; நான்கு மாவட்டங்களுக்கு அலர்ட்

Published on 15/06/2024 | Edited on 15/06/2024
Rain till 10 p.m.; Alert for four districts

தமிழகத்தில் இரவு 10 மணி வரை 4 மாவட்டங்களில் மிதமான மழைக்கு வாய்ப்பு இருக்கும் என வானிலை ஆய்வு மையம் அறிவித்துள்ளது.

தமிழ்நாட்டில் 7 நாட்களுக்கு ஒரு இடங்களில் இடி மின்னலுடன் கூடிய மழைக்கு வாய்ப்பு இருக்கும் எனச் சென்னை வானிலை மையம் ஏற்கனவே அறிவித்திருந்தது. வட தமிழக மாவட்டங்களில் குறிப்பாக உள் மாவட்டங்களில், மேற்குத் தொடர்ச்சி மலையை ஒட்டிய மாவட்டங்களில் மழை பெய்து வருகிறது. இந்நிலையில் இன்று சென்னை வானிலை ஆய்வு மையம் வெளியிட்ட அறிவிப்பின்படி தமிழகத்தில் இரவு 10 மணி வரை சேலம், திண்டுக்கல், நாமக்கல், திருச்சி ஆகிய நான்கு மாவட்டங்களில் மிதமான மழைக்கு வாய்ப்பு இருக்கும் என அறிவிக்கப்பட்டுள்ளது.

Next Story

இருசக்கர வாகனங்கள் மீது பேருந்து மோதி விபத்து; ஓட்டுநர் கைது!

Published on 13/06/2024 | Edited on 13/06/2024
salem dt sukkampatti village bus lorry two wheer incident

சேலம் மாவட்டம் வலசையூர் அருகே சுக்கம்பட்டி கிராமத்தில், அரசு மேல்நிலைப்பள்ளி எதிரில் நேற்று (12.06.2024) காலை சுமார் 10.40 மணியளவில் அரூரில் இருந்து சேலம் நோக்கி சென்ற லாரி ஒன்றின் பின்னால் இரண்டு இருசக்கர வாகனங்கள் சென்று கொண்டிருந்தன. அப்போது ஆச்சாங்குட்டப்பட்டியிலிருந்து சேலம் நோக்கி வந்துகொண்டிருந்த தனியார் பேருந்து எதிர்பாராதவிதமாக இருசக்கர வாகனங்கள் மீது மோதி விபத்தில் சிக்கியது. இதில் இருசக்கர வாகனங்களில் பயணம் செய்த கிருஷ்ணகிரி மாவட்டத்தில் நில அளவையராக பணிபுரிந்து வந்த முருகன் (வயது 30) மற்றும் அவரது மனைவி நந்தினி (வயது 25) மற்றும் பூவனூரைச் சேர்ந்த வேதவள்ளி லட்சுமணன் ஆகிய மூவர் சம்பவ இடத்திலேயே உயிரிழந்தனர்.

மேலும், இவ்விபத்தில், முருகன் மற்றும் நந்தினி தம்பதியரின் ஒரு வயதுக் குழந்தை கவின் பலத்த காயமடைந்து சிகிச்சைக்காக சேலம் அரசு மருத்துவமனைக்குக் கொண்டுசெல்லும் வழியில் உயிரிழந்தது. இந்த விபத்தில் கர்ப்பிணிப் பெண் ஒருவர்,  இரண்டு குழந்தைகள் உட்பட 5 பேர் உயிரிழந்தது அப்பகுதியில் பெரும் சோகத்தையும், அதிர்ச்சியையும் ஏற்படுத்தியுள்ளது. 

salem dt sukkampatti village bus lorry two wheer incident

வேகத்தடை இருப்பதால் மெதுவாகச் சென்ற லாரியின் பின்னால் வந்த இருசக்கர வாகனங்கள் மீது அதிவேகமாக வந்த பேருந்து மோதியது தெரியவந்தது. இந்நிலையில் இந்த சாலை விபத்தில் 5 பேர் உயிரிழந்த சம்பவத்தில் தனியார் பேருந்து ஓட்டுநர் கைது செய்யப்பட்டுள்ளார். தலைமறைவாக இருந்த பேருந்தின் ஓட்டுநர் ரமேஷை வீராணம் காவல்துறையினர் கைது செய்துள்ளனர்.