“பிக்பாஸ் முடிந்ததும் கமல் அரசியலுக்குத் திரும்புவார்!” -கே.டி.ராஜேந்திரபாலாஜி கேலி!

சிவகாசி அருகிலுள்ள எரிச்சநத்தம் கிராமத்தில் குடிமராமத்துப் பணிகள் மூலமாக கண்மாய்களைத் தூர்வாரும் பணிகளைத் துவக்கி வைத்து பூமி பூஜை போட்ட பிறகு செய்தியாளர்களைச் சந்தித்தார் தமிழக பால்வளத்துறை அமைச்சர் கே.டி. ராஜேந்திரபாலாஜி .

“அமெரிக்காவில் வாழும் தமிழர்களின் மூலமாக புதிய தொழிற்சாலைகளை கொண்டு வருவதற்காகத்தான் முதல்வர் லண்டன் செல்கிறார். ஸ்டாலினுக்கு எங்களைக் குறை கூறுவது தான் வேலை. மத்திய அரசின் அனுமதியோடு மாநில அரசுக்கு தேவையான திட்டங்களை கொண்டு வருவதற்காகத்தான் வெற்றிகரமான பயணங்களை மேற்கொள்ளவிருக்கிறார். எடப்பாடியாரின் வெற்றிக்கொடி அமெரிக்காவில் நாட்டப்படும். நல்லவர்கள் யார் ஆதரவு கொடுத்தாலும் அதிமுக ஏற்றுக்கொள்ளும். பாஜகவோடு நல்ல உறவில் உள்ள இயக்கம் அதிமுகதான். தேசியத்தின் பார்வையில் பாஜக எடுக்கும் முடிவுகள் அனைத்தும் அதிமுகவை கவர்ந்துள்ளது.

திமுக பிரிவினையைத் தூண்டக்கூடிய கட்சி. தமிழக முதல்வர் எடப்பாடியார் தேசியத்தையும் தெய்வீகத்தையும் மதிக்கக்கூடியவர். அதிமுக ஆட்சியில் ஒரு சிறு எறும்புக்குக்கூட இடையூறு இருக்காது. திமுக தீவிரவாதத்திற்கு ஆதரவான நிலைப்பாடு எடுக்கிறது. மத்திய உள்துறை எடுக்கும் பட்டியலில் இந்திய இறையாண்மைக்கு எதிராகச் செயல்படுபவர் பட்டியலில் திமுக மாட்டினால் நாங்கள் என்ன செய்ய முடியும்? மாட்டினால் மாட்டியது தான். எந்த ஒரு திட்டமாக இருந்தாலும் அது நல்ல திட்டமாக இருந்தால் எந்த அரசியல் தலைவர்கள் சொன்னாலும் ஏற்றுக் கொள்வோம். அதில் எங்களுக்கு மாறுபட்ட வேறுபட்ட கருத்து இல்லை.

அமமுகவில் போட்டியிடுவதற்கு வேட்பாளா்கள் இல்லை. அந்தக் கட்சியில் இருந்தவர்கள் அனைவரும் எங்களிடம் வந்து விட்டார்கள். தேர்தல் களத்தில் அதிமுக, திமுக தான் போட்டியிடும். அதில் அதிமுகதான் வெற்றிபெறும். அதை திமுகவினர் வேடிக்கை பார்ப்பார்கள்.

திமுகவினருக்கு சுதந்திர உணர்வு இருக்கிறதா? இவர்கள் வெள்ளைக்காரனிடம் காட்டிக்கொடுத்த இயக்கத்திலிருந்து வந்தவர்கள் போல் பேசுகிறார்கள். கமல்ஹாசன் கட்சி திடீரென பெய்த மழையில் முளைத்த காளான் போல. திடீரென வருவார்கள்; போய் விடுவார்கள் தற்போது பிக்பாஸ் பாஸ் நிகழ்ச்சி நடக்கிறது. பிக்பாஸ் நிகழ்ச்சி முடிந்தவுடன் கமல் மீண்டும் அரசியலுக்கு வருவார்.” என்றார்.