திருவண்ணாமலை பாராளுமன்ற தொகுதியில் திருவண்ணாமலை, கீழ்பென்னாத்தூர், கலசப்பாக்கம், செங்கம் ( தனி ), திருப்பத்தூர், ஜோலார்பேட்டை என 6 தொகுதிகள் உள்ளது. இதில் திருவண்ணாமலை, கீழ்பென்னாத்தூர், செங்கம், திருப்பத்தூர் என 4 தொகுதிகளில் திமுக எம்.எல்.ஏக்களும், கீழ்பென்னாத்தூர், ஜோலார்பேட்டை தொகுதியில் அதிமுக எம்.எல்.ஏக்களும் உள்ளனர்.

சட்டமன்றத்தில் மட்டும்மல்ல இந்த பாராளுமன்ற தொகுதி திமுக வரலாற்றில் மிக முக்கியமான தொகுதி. திமுக என்கிற கட்சி தொடங்கப்பட்டு திமுக எதிர்கொண்ட முதல் நாடாளுமன்ற தேர்தலில் இரண்டு எம்.பிக்கள் திமுக சார்பில் வெற்றி பெற்றனர். அதில் திருவண்ணாமலை நாடாளுமன்ற தொகுதியில் வெற்றி பெற்ற தர்மலிங்கமும் ஒருவர். அன்று முதல் தற்போதைய தேர்தல் வரை திமுகவின் அசைக்க முடியாத கோட்டையாக இருந்து வருகிறது.

1971 தேர்தலில் திருவண்ணாமலை தொகுதி என்பது திருப்பத்தூர் தொகுதியாக பெயர் மாற்றம்மடைந்தது. அப்போது நடந்த தேர்தலில் திமுக சின்னராஜ், 1977ல் திமுக சி.என்.விஸ்வநாதன், 1980ல் திமுக முருகையன், 1984, 1989, 1991ல் திமுக மற்றும் அதிமுக கூட்டணியில் மாறி மாறி கூட்டணி வைத்து காங்கிரஸ் ஜெயமோகன் வெற்றி பெற்றார். 1996, 1998, 1999, 2004, 2009 என தொடர்ச்சியாக 5 முறை திமுகவை சேர்ந்த வேணுகோபால் வெற்றி பெற்றார். 2014ல் அதிமுக வனரோஜா வெற்றி பெற்றார். திமுக தொடங்கியது முதல் இப்போது வரை திமுகவின் தொகுதிகளில் வெற்றி தொகுதி என்பது கட்சி தலைமையின் நம்பிக்கை.

இந்த தொகுதியின் பெரும்பான்மை சமூகமாக வன்னியர், தலித், கவுண்டர்கள், அதற்கடுத்தயிடத்தில் முதலியார், கிருஸ்த்துவர்கள், இஸ்லாமியர்கள் என்கிற வரிசையில் உள்ளனர்.

இந்த தொகுதியில் 2014ல் மொத்த வாக்காளர்களின் எண்ணிக்கை, 13,31,724 வாக்குகள். இந்த 2019 தேர்தலில் கடந்த ஜனவரி மாத கணக்கின்படி, 14,54,657 வாக்குகள் உள்ளன. ஆண் வாக்காளர்களை விட பெண் வாக்காளர்கள் 14 ஆயிரம் பேர் அதிகமாக உள்ளனர் என்பது குறிப்பிடதக்கது.

இந்த தொகுதி மக்களின் பிரதான தொழில் விவசாயம் மட்டும்மே. நிலத்தடி நீரை மட்டும்மே விவசாயம் நடக்கும் பகுதியிது. ஒரு குறிப்பிட்ட பகுதி விவசாய நிலங்களுக்கு மட்டும் சாத்தனூர் அணை நீர் பாசனத்துக்கு கிடைக்கும். விவசாயம் இல்லாத காலங்களில் இப்பகுதி மக்கள், பெங்களுரூ, மாண்டியா, ஷிவமோகா, சென்னை போன்ற இடங்களுக்கு விவசாய வேலைக்கும், கொத்தனார் வேலைக்கும் செல்கின்றனர். இதனால் கல்வியில் மிகவும் பின்தங்கிய பகுதியாகவும் இந்த தொகுதியுள்ளது.

பிரபலமான அண்ணாமலையார் கோயில் இந்த தொகுதிக்குள் தான் வருகிறது. மாதத்துக்கு 20 லட்சம் பக்தர்களை திருவண்ணாமலை நகரம் காண்கிறது. இதன் மூலம் ஓரளவு சுற்றுலா வளர்ச்சி அடைந்து தொழில்கள் வளர்ச்சி அடைந்துள்ளன. மற்றப்படி இந்த தொகுதியில் விவசாயமே பிரதானம்.

​

தொகுதியின் தேவைகள்……..

1.   வேலூர் மாவட்டத்தில் இருந்து தனியாக பிரித்து திருப்பத்தூரை தலைமையிடமாக கொண்டு ஏலகிரி மாவட்டம் உருவாக்கப்பட வேண்டும் என்பது திருப்பத்தூர், ஜோலர்பேட்டை, நாட்றாம்பள்ளி, வாணியம்பாடி, ஆலங்காயம், ஏலகிரி பகுதி மக்களின் 35 ஆண்டுகால கோரிக்கை. அந்த கோரிக்கையை ஒவ்வொரு முறையும் தேர்தலின் போது வேட்பாளர்கள் வாக்குறுதி தருகிறார்கள், வெற்றி பெற்றவுடன் மறந்துவிடுகிறார்கள்.

2.   திண்டிவனத்தில் இருந்து ஜோலார்பேட்டைக்கு, கீழ்பென்னாத்தூர், திருவண்ணாமலை, செங்கம், சிங்காரப்பேட்டை வழியாக ஜோலார்பேட்டைக்கு இரயில்பாதை அமைக்க வேண்டும் என்பது 20 ஆண்டுகால கோரிக்கை. அந்த திட்டம் 10 ஆண்டுகளுக்கு முன்பு ஆய்வு பணிகள் தொடங்கி, நிலம் கையகப்படுத்தும் பணிகள் முடிந்தும், பணிகள் தொடங்கவில்லை.

3.   திண்டிவனம் டூ கிருஷ்ணகிரி வழியாக செல்லும் தேசிய நெடுஞ்சாலை 4 வழிச்சாலையாக மாற்ற பணிகள் நடைபெற்று அவை பாதியில் நிற்கின்றன. கடந்த 10 ஆண்டுகளாக மக்கள், கட்சிகள் பல போராட்டங்கள் நடத்தியும் மத்திய – மாநில அரசுகள் கண்டுக்கொள்ளவில்லை.

4.   திருப்பத்தூர் பகுதியில் தொழிற்சாலைகள் அமைக்க வேண்டும்.

5.   செங்கம் பகுதியில் அரசின் சார்பில் சென்ட் தொழிற்சாலை அமைக்க வேண்டும் என்பது இந்த தொகுதி மக்களின் பிரதான கோரிக்கைகளில் முக்கியமானவையாகும்.

6.   சாத்தனூர் அணையை தூர்வார வேண்டும், மத்திய அரசின் நிதியுதவியோடு பெரிய தளமாக மாற்ற முயற்சிகள் செய்ய வேண்டும்.

7.   திருவண்ணாமலை அண்ணாமலையார் கோயிலை பிரதான சுற்றுலா தலமாக அறிவிக்க வேண்டும். பக்தர்களுக்கு தேவையான அடிப்படை வசதிகள் செய்து தரவேண்டும்.

8. எட்டுவழி சாலையை புறக்கணிக்க வேண்டும்.

தற்போது இந்த தொகுதியில் திமுக சார்பில் அண்ணாதுரை என்பவரும், அதிமுகவில் அக்ரி.கிருஷ்ணமூர்த்தி என்பவரும் களத்தில் நிற்கிறார்கள். இவர்களில் மேற்கண்ட வாக்குறுதிகளில் நிறைவேற்றுவேன் என வாக்குறுதி தருகிறேன் என்பவருக்கு இந்த தொகுதி சாதகமாக இருக்கும்.