Skip to main content

ஜல்லிக்கட்டு போட்டி; பார்வையை இழந்த இளைஞர்

Published on 18/01/2023 | Edited on 18/01/2023

 

jallikattu held in karur district kulithalai 

 

கரூர் மாவட்டம் குளித்தலை அருகே உள்ள ஆர்.டி.மலை என்கிற இராட்சண்டார் திருமலையில் 61-வது ஆண்டு ஜல்லிக்கட்டு விழா நேற்று (17.01.2023) நடைபெற்றது. போட்டியை கரூர் மாவட்ட வருவாய் அலுவலர் லியாகத் துவக்கி வைத்தார். அதனைத் தொடர்ந்து முதலில் பல்வேறு பகுதிகளிலிருந்து வந்த கோவில் காளைகள் ஒன்றன்பின் ஒன்றாக அவிழ்த்து விடப்பட்டன. போட்டியில் பங்குபெற்ற மாடுபிடி வீரர்கள் உறுதிமொழி ஏற்றதைத் தொடர்ந்து ஜல்லிக்கட்டு போட்டி தொடங்கியது.

 

ஜல்லிக்கட்டு போட்டியில் 756 காளைகள் பங்குபெற்றன. இவற்றை அடக்க 362 காளையர்கள் களம் கண்டார்கள். போட்டியானது 5 சுற்றுகளாக நடைபெற்றது. போட்டியில் காளைகளை அடக்கிய மாடுபிடி வீரர்களுக்கும், மாடுபிடி வீரர்களிடம் சிக்காமல் சென்ற காளைகளுக்கும் சில்வர் பாத்திரங்கள், கட்டில், சைக்கிள், சேர் உள்ளிட்ட பரிசுகள் வழங்கப்பட்டன. களத்தில் 59 மாடுபிடி வீரர்கள் காயமடைந்தனர். இதில் 11 வீரர்கள் மேல்சிகிச்சைக்காக திருச்சி அரசு மருத்துவமனைக்கு அனுப்பி வைக்கப்பட்டனர். களத்தில் சிவக்குமார் (வயது 21) என்பவரது கண்ணில் மாடு குத்தியதில் அவரது விழித்திரை கிழிந்து களத்திலேயே அவருக்கு பார்வை பறிபோனது.

 

இந்தப் போட்டியில் நாமக்கல் மாவட்டம் எருமைப்பட்டியைச் சேர்ந்த கார்த்திக் என்பவர் 21 காளைகளை அடக்கி முதல் இடத்தைப் பெற்றார். இவருக்கு மின்சாரம் மதுவிலக்கு மற்றும் ஆயத்தீர்வை துறை அமைச்சர் செந்தில் பாலாஜி நாட்டு மாட்டு காளை ஒன்றை பரிசாக வழங்கினார். மேலும், இவருக்கு விழாக்குழு சார்பில் வாஷிங் மெஷின் ஒன்றும் பரிசாக வழங்கப்பட்டது. 7 காளைகளை அடக்கி இரண்டாவது இடம்பிடித்த திருச்சி சாந்தாபுரத்தைச் சேர்ந்த ரஞ்சித் என்பவருக்கு விழாக்குழு சார்பில் சோபா பரிசளிக்கப்பட்டது. சிறந்த காளைக்கான பரிசு முதலைப்பட்டி கிராமம் கீரிக்கல்மேட்டைச் சேர்ந்த பால்காரர் செல்வம் என்பவரின் காளைக்கு ரூபாய் 10 ஆயிரம் ரொக்கமாக 6 பேர் கொண்ட நீதிமன்றக் குழுவினரால் வழங்கப்பட்டது.

 

விழாவில் குளித்தலை சட்டமன்ற உறுப்பினர் மாணிக்கம், தோகைமலை கிழக்கு ஒன்றிய திமுக செயலாளர் அண்ணாதுரை, திமுக கவுன்சிலர் சின்னையன் உள்ளிட்ட ஆயிரக்கணக்கானோர் கலந்து கொண்டனர். போட்டி நடக்கும் இடத்தை திருச்சி டிஐஜி மற்றும் கரூர் மாவட்ட காவல் கண்காணிப்பாளர் நேரில் பார்வையிட்டு ஆய்வு செய்தனர். விழாவிற்கான ஏற்பாடுகளை விழாக்குழுவினர் செய்திருந்தனர். ஜல்லிக்கட்டு போட்டியைக் காண சுமார் 50,000-க்கும் மேற்பட்ட பொதுமக்கள் திரண்டனர். ஜல்லிக்கட்டு போட்டியானது மாலை 5 மணிக்கு நிறைவுபெற்றது. 

 

 

சார்ந்த செய்திகள்

 

Next Story

வழக்கறிஞர் பாதுகாப்பு சட்டத்தை நிறைவேற்ற வலியுறுத்தி  ஆர்ப்பாட்டம்!

Published on 20/06/2024 | Edited on 20/06/2024
Demonstration demanding the passing of the Lawyer Protection Act

கரூர் மாவட்டம் பல்வேறு கோரிக்கைகளை வலியுறுத்தி கரூர் வழக்கறிஞர்கள் சங்கம் சார்பில் நீதிமன்ற வளாகம் முன்பு கண்டன ஆர்ப்பாட்டம் நடைபெற்றது. 

இந்த ஆர்ப்பாட்டத்தில், வழக்கறிஞர் பாதுகாப்புச் சட்டத்தை உடனடியாக நிறைவேற்ற வேண்டும், வழக்கறிஞர்களுக்கு பாதுகாப்பை உறுதிப்படுத்த வேண்டும், புதிய சட்ட அமலாக்கத்தை நிறுத்த வேண்டும், இந்தி திணிப்பை தடுக்க வேண்டும், குற்றவியல் சட்ட மாற்றங்களைத் திரும்ப பெற வேண்டும் உள்ளிட்ட பல்வேறு கோரிக்கைகளை வலியுறுத்தி மத்திய மாநில அரசுகளைக் கண்டித்து கண்டன ஆர்ப்பாட்டம் நடைபெற்றது. 

ஆர்ப்பாட்டத்தில் கரூர் மாவட்ட வழக்கறிஞர்கள் சங்கத்தைச் சேர்ந்த ஏராளமானோர் கலந்து கொண்டு கண்டன கோஷங்களை எழுப்பினர்.

Next Story

மூட்டை மூட்டையாக வீசப்பட்ட மருத்துவ கழிவுகள்;  தனியார் மருத்துவமனை நிர்வாகம் அடாவடி

Published on 20/06/2024 | Edited on 20/06/2024
private hospital dumping medical waste near a government school in Karur

கரூர் மாநகராட்சிக்குட்பட்ட செல்லாண்டிபாளையம் பகுதியில் அரசு உயர்நிலைப் பள்ளி அமைந்துள்ளது. இதில் நூற்றுக்கணக்கான மாணவ, மாணவிகள் கல்வி பயின்று வருகின்றனர். அரசு பள்ளிக்குச் செல்லும் சாலையின் இரண்டு புறங்களிலும் குப்பைகள் கொட்டப்பட்டு மலை போல் குவிந்துள்ளது. மேலும், ஒரு பகுதியில் கொட்டப்பட்ட குப்பைகளுக்கு அடிக்கடி தீ வைக்கும் நிகழ்வும் ஏற்படுகிறது. 

இந்த நிலையில் கரூர் மாநகரில் அமைந்துள்ள தனியார் மருத்துவமனையில் நோயாளிகளுக்கு பயன்படுத்தப்பட்ட ஆன்டிபயாட்டிக் மருந்துகளின் நூற்றுக்கணக்கான கண்ணாடி பாட்டில்கள் சாக்கு மூட்டையில் நிரப்பி அந்தக் குப்பை மேட்டில் தூக்கி வீசப்பட்டுள்ளது. மேலும், அந்தத் தனியார் மருத்துவமனையில் நோயாளிகளின் விபரங்கள் அடங்கிய ஸ்கேன் சென்டர் சீட்டுகளும் சிதறிக் கிடந்தன.

இது குறித்து அப்பகுதியைச் சேர்ந்த இளைஞர்கள் மருத்துவமனையைத் தொடர்பு கொண்டு புகார் தெரிவித்த போது, மருத்துவமனை நிர்வாகம் நேரில் வந்து பேசுங்கள் என்று அலட்சியமாகப் பதில் அளித்ததாகக் குற்றம் சாட்டினர். மாநகராட்சி நிர்வாகம் அப்பகுதியில் குப்பைகள் கொட்டக்கூடாது என அறிவிப்பு பலகை வைத்திருந்தும், அதை மதிக்காமல் தனியார் மருத்துவமனை நிர்வாகம் மருத்துவமனை கழிவுகளை வீசி சென்றதால், அவ்வழியாக செல்லக்கூடிய அரசுப் பள்ளி மாணவர்களுக்கும், குடியிருப்பு பகுதி பொது மக்களுக்கும் நோய் தொற்று பரவும் அபாயம் உள்ளதால் மாநகராட்சி அதிகாரிகள் உரிய நடவடிக்கை எடுக்க வேண்டும் என்று கோரிக்கை விடுத்துள்ளனர்.