Skip to main content

கணவரின் கொடூரச் செயல்; மனைவிக்கு நேர்ந்த சோகம் - நள்ளிரவில் பயங்கரம்!

Published on 08/05/2024 | Edited on 08/05/2024
 husband stabbed his wife

சென்னை, வண்ணாரப்பேட்டை அடுத்துள்ளது மூலக்கொத்தளம். இப்பகுதியில் உள்ள பெரிய பாளையத்தம்மன் கோவில் 1 வது தெருவைச் சேர்ந்தவர் செல்வம். 55 வயதான இவர், தனியார் நிறுவனத்தில் பணிபுரிந்து விருப்ப ஓய்வு பெற்றவர். இவரது மனைவி பத்மினி. இந்தத் தம்பதிக்கு திருமணமாகி 35 ஆண்டுகளான நிலையில், இவர்களுக்கு ஒரு மகன் மற்றும் ஒரு மகள் உள்ளனர். மகனுக்கும் மகளுக்கும்  திருமணம் முடிந்து தனித்தனியாக வசித்து வருவதால், செல்வம் - பத்மினி தம்பதி மட்டும் தனியாக வசித்து வந்தனர்.

இந்த நிலையில், செல்வம்-பத்மினிக்கு இடையே அடிக்கடி கருத்துவேறுபாடு ஏற்பட்டுள்ளது. இதனால், இருவரும் அடிக்கடி சண்டையிட்டு கொண்டு இருந்துள்ளனர். அந்த வகையில், கடந்த மே 5 ஆம் தேதி நள்ளிரவு நேரத்தில் செல்வம் தம்பதிக்கு பணம் தொடர்பாக மீண்டும் கருத்து வேறுபாடு ஏற்பட்டுள்ளது. ஒருகட்டத்தில், இருவருக்கும் கடுமையான வாக்குவாதம் முற்றியுள்ளது. அப்போது, ஆத்திரமடைந்த செல்வம் வீட்டில் சமையல் செய்ய பயன்படுத்தப்படும் கத்தியை எடுத்துள்ளார். அதனை மறைத்து வைத்து மனைவி பத்மினியிடம் சென்றவர், 7 இடங்களில் சரமாரியாக அவரை குத்தியுள்ளார்.

இதைச் சற்றும் எதிர்பாராத மனைவி பத்மினி, மயக்கமாகி கீழே சரிந்து விழுந்தார். தொடர்ந்து, மனைவியை தன் கையாலேயே குத்தி கொலை செய்தோம் என்ற குற்ற உணர்ச்சியில், செல்வம் அதே கத்தியால், தனக்கு தானே குத்திக்கொண்டுள்ளார். இதில், குடல் சரிந்த நிலையில் கீழே விழுந்த செல்வம், வலி தாங்க முடியாமல் அலறியுள்ளார். உடனே, அலறல் சத்தம் கேட்டு ஓடிவந்த அக்கம் பக்கத்தைச் சேர்ந்தவர்கள்.. வீட்டின் உள்ளே இருவர் ரத்த வெள்ளத்தில் சரிந்து கிடந்ததைக் கண்டு அதிர்ந்துபோயினர்.

இதையடுத்து, நடந்த சம்பவம் தொடர்பாக இந்தத் தம்பதியரின் மகன் பாலாஜிக்கு தகவல் தெரிவித்தனர். உடனே பதறியடித்து ஓடிவந்த பாலாஜி, ஆபத்தான நிலையில் இருந்த  தாய், தந்தை இருவரையும் மீட்டு அவசர ஊர்தியின் மூலம் ஸ்டான்லி அரசு மருத்துவமனையில் சிக்கிச்சைக்கு சேரத்தார். அங்கு, சுயநினைவின்றி சிகிச்சை பெற்றுவந்த பத்மினி அதிகாலையில் சிகிச்சை பலனின்றி உயிரிழந்தார். ஆனால், நல்வாய்ப்பாக தற்கொலை முயற்சி செய்த செல்வம் தீவிர சிகிச்சைப் பிரிவில் தொடர்ந்து சிகிச்சைப் பெற்று வருகிறார். இதனிடையே, தகவலின் பேரில் கொலை சம்பவம் நடைபெற்ற வீட்டுக்குச் சென்ற போலீசார் விசாரணை மேற்கொண்டனர்.

தொடர்ந்து, கொலைக்கு பயன்படுத்திய ஆயுதங்களைக் கைப்பற்றி விசாரணை நடத்தி வருகின்றனர். போலீசாரின் முதற்கட்ட விசாரணையில் சில முக்கிய தகவல்கள் சொல்லப்படுகிறது. அதில், 8 ஆண்டுகளுக்கு முன்பு விஆர்எஸ் பெற்ற செல்வம் கடன் பிரச்சனையில் இருந்துள்ளார். அந்தச் சமயத்தில் செல்வம் தனது மனைவியிடம் புதிதாக கடை ஒன்றை தொடங்க இருப்பது குறித்து யோசனை கேட்டுள்ளார். ஆனால், ஏற்கெனவே கடன் சுமை அதிகமாக இருக்கும் சூழலில் இப்போது ஏன் புதிய கடை என மனைவி பத்மினி அதற்கு எதிர்ப்பு தெரிவித்தாக சொல்லப்படுகிறது. இதன்காரணமாக ஏற்பட்ட வாக்குவாதத்தில் நடைபெற்ற கொலையா? அல்லது வேறு ஏதேனும் காரணம் உள்ளதா என்ற கோணத்திலும் போலீசார் வழக்குப்பதிவு செய்து விசாரணை நடத்தி வருகின்றனர்.

சென்னை அடுத்த வண்ணாரப்பேட்டை அருகே குடும்ப தகராறில் கணவனே மனைவியைக் குத்தி கொலை செய்து தற்கொலைக்கு முயன்ற சம்பவம் அப்பகுதியில் பெரும் பரபரப்பை ஏற்படுத்தி உள்ளது.

சார்ந்த செய்திகள்

 

Next Story

மாடு மோதி விபத்து; சிறப்பு உதவி ஆய்வாளர் பலி!

Published on 15/07/2024 | Edited on 15/07/2024
Cuddalore dt Tittakudi police station ssi Bharathidasan incident

கடலூர் மாவட்டம் திட்டக்குடி காவல் நிலையத்தில் சிறப்பு ஆய்வாளராக பணியாற்றி வந்தவர் பாரதிதாசன். இவர் திட்டக்குடி - விருத்தாசலம் நெடுஞ்சாலையில் தனது இருசக்கர வாகனத்தில் சென்று கொண்டிருந்துள்ளார். அப்போது எதிர்பாராதவிதமாக திடீரென சாலையில் வந்த மாடு ஒன்று பாரதிதாசனின் இரு சக்கர வாகனத்தின் மீது மோதியுள்ளது. இதனால் கீழே விழுந்த சிறப்பு உதவி ஆய்வாளர் பாரதிதாசன் மீது அச்சமயத்தில் அங்கு வந்த அரசு பேருந்து அவர் மீது ஏறியது. இந்த விபத்தில் பாரதிதாசன் சம்பவ இடத்திலேயே உயிரிழந்தார்.

இதுகுறித்து தகவல் அறிந்த சம்பவ இடத்திற்கு வந்து காவல்துறையினர் வழக்குப்பதிவு செய்து விசாரணை நடத்தி வருகின்றனர். இது போன்று சாலைகளில் சுற்றித் திரியும் மாடுகளால் நாள்தோறும் விபத்துகளைச் சந்திப்பதாக அப்பகுதி பொதுமக்கள் வேதனை தெரிவித்துள்ளனர். மேலும் இது குறித்துப் பல முறை புகார் அளித்து முறையான நடவடிக்கை எடுக்கவில்லை என்றும் பொதுமக்கள் குற்றம் சாட்டியுள்ளனர். மாடு மோதிய விபத்தில் சிறப்பு உதவி ஆய்வாளர் ஒருவர் உயிரிழந்த சம்பவம் மக்கள் மத்தியில் பெரும் சோகத்தை ஏற்படுத்தி உள்ளது. 

Cuddalore dt Tittakudi police station ssi Bharathidasan incident

முன்னதாக விருத்தாசலம் அருகே பரவலூர் - கோமங்கலம் இடையே பைக்கில் சென்ற இரு இளைஞர்கள் லாரி மோதிய விபத்தில் உயிரிழந்தனர். இந்த விபத்தை வேடிக்கை பார்க்க அப்பகுதியில் குவிந்த கூட்டத்தின் மீது கார் ஒன்று மோதியது. இதில் 17 பேர் காயமடைந்து மருத்துவமனையில் சிகிச்சைக்காக அனுமதிக்கப்பட்டுள்ளனர். இந்த விபத்தில் தொடர்புடைய லாரி ஓட்டுநர் அங்கிருந்து தப்பி ஓடிவிட்டார். அதே சமயம் மற்றொரு விபத்திற்குக் காரணமாக கார் ஓட்டுநரைப் பிடித்து அங்கிருந்தவர்கள் சரமாரியாகத் தாக்கினர். மேலும் இந்த விபத்து குறித்து போலீசார் வழக்குப்பதிவு செய்து விசாரணை மேற்கொண்டு வருகின்றனர். இந்த விபத்து சம்பவம் காரணமாக விருத்தாசலம் - சேலம் சாலையில் ஒரு மணி நேரம் போக்குவரத்து பாதிக்கப்பட்டதால் வாகன ஓட்டிகள் வெகுவாக அவதியடைந்தனர். 

Next Story

ரவுடி திருவேங்கடம் என்கவுண்டர்; ‘நடந்தது என்ன?’ -  காவல்துறை விளக்கம்!

Published on 14/07/2024 | Edited on 14/07/2024
Thiruvenkadam incident An explanation has been given by the Chennai Police

தமிழக பகுஜன் சமாஜ் கட்சியின் மாநில தலைவர் ஆம்ஸ்ட்ராங் கடந்த 05.07.2024 அன்று இரவு பெரம்பூரில் உள்ள அவரது வீட்டின் அருகே 6 பேர் கொண்ட மர்ம கும்பலால் வெட்டி படுகொலை செய்யப்படார். இது தொடர்பாக 11 பேர் சரணடைந்த நிலையில் 11 பேரும் கைது செய்யப்பட்டு போலீஸ் கஸ்டடி காவலில் விசாரணைக்காக அனுமதிக்கப்பட்டனர். இந்த வழக்கில் கைது செய்யப்பட்ட ஆற்காடு சுரேஷின் தம்பி பொன்னை பாலு, ராமு, திருவேங்கடம், திருமலை, செல்வராஜ், மணிவண்ணன், சந்தோஷ், அருள், கோகுல், விஜேஷ், சிவசக்தி ஆகிய 11 நபர்களும் போலீசார் கஸ்டடியில் எடுக்கப்பட்டு விசாரணை நடைபெற்றது.

இத்தகைய சூழலில் தான் இந்த வழக்கில் தொடர்புடைய முக்கிய குற்றவாளியான பிரபல ரவுடி திருவேங்கடம் இந்த வழக்கு தொடர்பான திடுக்கிடும் தகவல்களையும், அதற்கான சதி திட்டம் தீட்டிய இடத்தில் நாட்டு வெடிகுண்டுகள் பதுக்கி வைக்கப்பட்டுள்ளது குறித்தும் தெரிவித்துள்ளார். இதனையடுத்து அவரை இன்று (14.07.2024) அதிகாலை புழல் வெஜிடேரியன் நகருக்கு அழைத்துச் சென்று தடயங்கள் ஏதேனும் உள்ளதா? என்பது குறித்து கண்டறிவதற்காக காவல்துறையினர் சென்றனர். அப்போது அவர்களின் பிடியில் இருந்து ரவுடி திருவேங்கடம் தப்பிச் சென்று, அப்பகுதியில் உள்ள இரும்பு தகடு வேயப்பட்ட சிறு கூரையின் உள்ளே பதுங்கிக் கொண்டு அங்கு மறைத்து வைத்திருந்த துப்பாக்கியால் காவல்துறையினரை நோக்கி சுட்டுள்ளார்.

Thiruvenkadam incident An explanation has been given by the Chennai Police

அப்போது சரணடையும்படி எச்சரிக்கை விடுத்தும் சரணடையாமல் வெளியே வர மறுத்து தப்பி செல்ல திட்டம் தீட்டியதாக தெரிகிறது. இதனால் வேறு வழியின்றி காவல்துறையினர் ரவுடி திருவேங்கடத்தை இரண்டு முறை துப்பாக்கியால் சுட்டதில் மார்பிலும், வயிற்றிலும் துப்பாக்கி குண்டு பாய்ந்ததில் சுருண்டு விழுந்துள்ளார். அதனைத் தொடர்ந்து அவரை மீட்டு மாதவரத்தில் உள்ள தனியார் மருத்துவமனை கொண்டு சென்றனர். அங்கு திருவேங்கடத்தின் உடலைப் பரிசோதித்த மருத்துவர்கள் ஏற்கனவே இறந்து விட்டதாக தெரிவித்துள்ளனர். பகுஜன் சமாஜ் கட்சியின் மாநிலத் தலைவர் ஆம்ஸ்ட்ராங் கொலை வழக்கில் தொடர்புடைய முக்கிய குற்றவாளியை காவல்துறையினர் துப்பாக்கியால் சுட்டு கொன்ற சம்பவம் சென்னையில் பெரும் பரபரப்பை ஏற்படுத்தியுள்ளது.

இந்நிலையில் இந்த என்கவுண்டர் சம்பவம் தொடர்பாக பெருநகர சென்னை காவல்துறை சார்பில் விளக்கம் அளிக்கப்பட்டுள்ளது. அதில், “பகுஜன் சமாஜ் கட்சியின் மாநிலத் தலைவர் ஆம்ஸ்ட்ராங் (52 வயது) கடந்த 5 ஆம் தேதி (05.07.2024) கொலை செய்யப்பட்டார். இது தொடர்பாக கே - 1 செம்பியம் காவல் நிலையத்தில் வழக்கு பதிவு செய்து விசாரணை மேற்கொள்ளப்பட்டது. இந்த விசாரணையில் சென்னை   குன்றத்தூர், பகுதியைச் சேர்ந்த கண்ணன் என்பவரின் மகன் திருவேங்கடம் (வயது 33) உட்பட 11 நபர்கள் கைது செய்யப்பட்டு சிறையில் அடைக்கப்பட்டனர். 

Thiruvenkadam incident An explanation has been given by the Chennai Police

இவ்வாறு கைது செய்யப்பட்ட திருவேங்கடம் உட்பட 11 நபர்கள் விசாரணைக்காக போலீஸ் காவலில் எடுக்கப்பட்டனர். அதில் திருவேங்கடம் இந்த கொலை வழக்கு தவிர இரண்டு கொலை வழக்குகள் மற்றும் வழிப்பறி, கொடுங்காய வழக்கு உள்ளிட்ட ஐந்து வழக்குகளில் சம்பந்தப்பட்டுள்ளார். அவரது வாக்குமூலத்தின் அடிப்படையில் இன்று (14.07.2024) அதிகாலை போலீஸ் காவலில் இருந்த திருவேங்கடத்தை இந்த வழக்கில் சம்பந்தப்பட்ட ஆயுதங்களை கைப்பற்ற எதிரி தங்கியிருந்த மணலியில் உள்ள வீட்டிற்கு தக்க பாதுகாப்புடன் அரசு வாகனத்தில் அழைத்து செல்லப்பட்டார். அவ்வாறு அழைத்து செல்லும்போது, இயற்கை உபாதைக்காக ரெட்டேரி ஏரிக்கரை ஆட்டு மந்தை செல்லும் வழியில் போலீஸ் வாகனத்தை நிறுத்தினர்.

அப்போது பாதுகாப்பில் இருந்த காவலர்களை தள்ளிவிட்டு திருவேங்கடம் தப்பி ஓடிவிட்டார். உடனடியாக பாதுகாவலாக சென்ற காவலர்கள் அவரை பிடிக்க முயற்சித்தும் பிடிக்க இயலவில்லை. புழல் காவல் நிலைய எல்லைக்குட்பட்ட வெஜிடேரியன் வில்லேஜ் என்ற இடத்தில் மறைந்திருந்த திருவேங்கடத்தை பிடிக்க முயற்சித்தபோது  தான் மறைத்து வைத்திருந்த கள்ளத்துப்பாக்கியை எடுத்து காவலர்களை நோக்கி சுட்டுள்ளார். உடனடியாக காவல் ஆய்வாளர் திருவேங்கடத்தை தற்காப்பிற்காக துப்பாக்கியால் சுட்டதில், காயமடைந்த திருவேங்கடம் உடனடியாக மெரிடியன் மருத்துவமனைக்கு அழைத்து செல்லப்பட்டார். அவரை பரிசோதித்த மருத்துவர்கள் அவர் இறந்துவிட்டதாக தெரிவித்தனர். இது சம்பந்தமாக எம் - 3 புழல் காவல் நிலையத்தில் வழக்கு பதிவு செய்யப்பட்டு முதல் தகவல் அறிக்கை நீதிமன்ற நிதிபதி விசாரணைக்காக அனுப்பப்பட்டுள்ளது” எனத் தெரிவித்துள்ளார்.