Skip to main content

நீட், நிதி, மாநில உரிமை.. முதலமைச்சர் மு.க.ஸ்டாலின்

Published on 17/09/2023 | Edited on 17/09/2023

 

The full speech of the Prime Minister of the Triennial!

 

திமுகவின் முப்பெரும் விழா செப்டம்பர் மாதம் 17 ஆம் தேதி வேலூர் மாவட்டம் அணைக்கட்டு சட்டமன்ற தொகுதிக்கு உட்பட்ட பள்ளிகொண்டா அடுத்த கந்தநேரி பைபாஸ் சாலை அருகில் நடைபெற்றது.

 

இதில் கலந்துகொண்டு பேசிய முதலமைச்சர் மு.க.ஸ்டாலின், “பகுத்தறிவு தந்தை பெரியார், காஞ்சி தந்த வள்ளுவன் பேரறிஞர் அண்ணா ஆகியோரின் பிறந்தநாளையும், திமிழனத்தின் விடிவெள்ளியாக உதித்த திராவிட முன்னேற்றக் கழகத்தின் துவக்க நாளையும் இணைத்து முப்பெரும் விழா கொண்டாட வேண்டும் என 1985ம் ஆண்டு தலைவர் கலைஞர் அறிவித்தார். அன்றிலிருந்து இன்று வரை நாம் இந்த விழாவை ஒவ்வொரு ஆண்டும் தொடர்ந்து நடத்திவருகிறோம். இந்த ஆண்டுக்கு கூடுதலாக இரண்டு சிறப்புகள் உள்ளன. இந்த ஆண்டு நம்மையெல்லாம் ஆளாக்கிய கலைஞரின் நூற்றாண்டு விழாவை கொண்டாடிக்கொண்டிருக்கிறோம். நமது மாபெரும் இயக்கத்தின் பவள விழா இன்றிலிருந்து துவங்குகிறது. கொட்டும் மழையில் பிறந்ததால் என்னவோ உடனே வளர்ந்தது தி.மு.கழகம். ஆல மரமாக வளர்ந்துள்ள இந்த கழகத்தின் பவளவிழாவை ஓராண்டுக்கு நாம் கொண்டாடப்போகிறோம். அந்தவகையில், இன்று நாம் ஐம்பெரும் விழாவை நடத்திக்கொண்டிருக்கிறோம். தொண்டர்களை தம்பிகள் என அழைத்தவர் அண்ணா, உடன் பிறப்புகள் என அழைத்தவர் கலைஞர், நான் உங்களில் ஒருவன். தொண்டர்களால் கட்சித் தலைவனாகவும், முதலமைச்சராகவும் ஆக்கப்பட்டவன் நான். 

 

மிக முக்கியமான காலகட்டத்தில் நாம் இருக்கிறோம். இந்தியாவில் ஜனநாயகத்தை காக்கக் கூடிய போர்க்களத்தின் பயணத்தின் இடையே இந்த முப்பெரும் விழாவை நாம் கொண்டாடிக் கொண்டிருக்கிறோம். 1949ம் ஆண்டு திமுக உதயமானது. 75 ஆண்டுகளாக தமிழ் சமுதாயத்தின் காவல் அரணாக நமது இயக்கம் செயல்பட்டுக்கொண்டிருக்கிறது. 1967ம் ஆண்டு நாம் முதல்முறையாக ஆட்சிக்கு வருகிறோம். அதன்பிறகு 71, 89, 96, 2006, 2021 என மொத்தம் ஆறு பொதுத் தேர்தலில் வெற்றி பெற்று ஆட்சிக் கட்டிலில் அமர்ந்திருக்கிறோம். ஒரு பக்கம் ஆட்சி, மறுபக்கம் கட்சி இந்த இரண்டின் மூலமாக தமிழ்நாட்டை மற்ற மாநிலங்களைவிட தலை சிறந்த மாநிலமாக மாற்றிக்கொண்டுவருகிறோம். இடையிடையே கொள்கை அற்ற அதிமுக கூட்டம், ஆட்சிக்கு வந்து தமிழ்நாட்டை சீர் அழித்தாலும், அதனையும் திருத்தி தமிழ்நாட்டை வளர்த்துவருகிறோம். இன்று தமிழ்நாட்டின், தமிழ்நாட்டு மக்களின், தமிழினத்தின் வளர்ச்சி பலருக்கும் பொறாமையை ஏற்படுத்தக்கூடிய வளர்ச்சியாக இருக்கிறது. 

 

தமிழ்நாட்டு மாநிலத்தின் உரிமைகளை சிதைப்பதன் மூலமாக, நமது மாநில மக்களின் வாழ்வை அழிக்க பார்க்கிறார்கள். அதனைத் தான் பா.ஜ.க. செய்துகொண்டிருக்கிறது. ஜி.எஸ்.டி. மூலமாக மாநில உரிமையை பறித்தது. ஒரு மாநில அரசை நடத்துவதற்கு மிக முக்கியமானது நிதி ஆதாரம்; வரி வருவாய். இதன் மூலம், மாநில அரசை செயல்படவிடாமல் முடக்குகிறது. மக்களுடன் நேரடி தொடர்பு கொண்டது மாநில அரசு. மக்களுக்கு தேவையான கல்வி, சுகாதாரம், குடிநீர், சாலைவசதிகள், கடன்கள், மானியங்கள், பெண்கள் முன்னேற்றம், விளிம்பு நிலை மக்களுக்கான உதவிகள், இவை எல்லாவற்றையும் வழங்கவேண்டிய கடமை மாநில அரசுக்கே உள்ளது. இதனை செய்துகொடுப்பதற்கு நிதி வேண்டும். அப்படிபட்ட நிதி ஆதாரங்களை கிடைக்கவிடாமல் செய்வதற்கு ஜி.எஸ்.டி. கொண்டுவந்து, நிதி வருவாய் வாசலை அடைத்தார்கள். வசூல் செய்யும் நிதியை முறையாக பிரித்தும் கொடுப்பதில்லை. 

 

கல்வி மிகமிக முக்கியமானது. ஒவ்வொரு மாநில அரசும், அங்கு வாழும் பெரும்பான்மையான மக்களின் பண்பாடு, அறிவு வளர்ச்சிக்கு ஏற்ப கல்வியை வழங்கும். புதியக் கல்வி கொள்கை என சொல்லி நம் மாநிலத்தின் கல்வி வளர்ச்சியை தடுக்க நினைக்கிறார்கள். ஒன்றிய அரசு சொல்லும் கல்வி வளர்ச்சியை தமிழ்நாடு எப்போதோ எட்டிவிட்டது. கல்வியில் சிறந்த மாநிலமான தமிழ்நாட்டை முடக்கும் முயற்சிதான் அவர்கள் கொண்டுவரக்கூடிய கல்விக் கொள்கை. 

 

மருத்துவம் படிக்க நினைக்கும் மாணவர்களின் கனவை சிதைப்பதற்காக கொண்டுவரப்பட்டது நீட் தேர்வு. லட்சக் கணக்கில் செலவு செய்தால் தான் தேர்ச்சி பெற முடியும் எனும் நிலையை உருவாக்கிவிட்டார்கள். சில தனியார் பயிற்சி மையங்களின் லாபத்திற்காக இந்தத் தேர்வு நடத்தப்படுகிறது. அனிதா முதல் ஜெகதீசன் வரை ஏராளமான மாணவர்கள் நீட் தேர்வால் உயிரிழந்திருக்கிறார்கள். இது தற்போது வடமாநிலங்களிலும் நடக்கத்துவங்கிவிட்டது. கடந்த 14ம் தேதி ஜார்க்கண்ட் மாநிலத்தைச் சேர்ந்த மாணவி, நீட் தேர்வுக்காக படிக்கவந்து ராஜஸ்தானில் தற்கொலை செய்துகொண்டார். இதுமட்டுமல்ல, கடந்த ஒரு ஆண்டில் 22 மாணவர்கள் தற்கொலை செய்துகொண்டுள்ளனர். இத்தனை தற்கொலைகளுக்கான காரணத்தை பா.ஜ.க. ஆராய்ந்ததா? இரக்கம் அற்ற அரசாக மோடி அரசு இருக்கிறது. 

 

நேற்று ஒரு மீம்ஸ் பார்த்தேன். அதில் பெண்கள், ‘எங்கள் முதல்வர் சொன்ன ரூ. 1000 வந்துவிட்டது. பிரதமர் சொன்ன ரூ. 15 லட்சம் என்ன ஆனது’ என இருந்தது. தற்போது வைரலாகிவருகிறது. தமிழ்நாட்டிற்கு எத்தனை வாக்குறுதிகளைக் கொடுத்தார் பிரதமர். ஆனால், எதனையும் நிறைவேற்றவில்லை. உதாரணத்திற்கு 2015ம் ஆண்டு மதுரையில் எய்ம்ஸ் அமைப்போம் என்றார். ஆனால், தற்போது தான் டெண்டரே விட்டுள்ளனர். இதனையெல்லாம் யாரும் நினைவு செய்துவிடக்கூடாது என்பதற்காகத்தான் மற்றப் பிரச்சனைகளை கிளப்பி குளிர்காயப் பார்க்கிறார்கள். 

 

கடந்த 9 வருடத்தில் என்ன சாதனை செய்திருக்கிறார்கள் என்றால், 2014ம் ஆண்டு ஆட்சிக்கு வரும்போது சமையல் சிலிண்டரின் விலை ரூ.420. இதனை மூன்று மடங்கு அதிகரித்து ரூ. 1200க்கு உயர்த்தியதுதான் மோடியின் சாதனை. தற்போது தேர்தல் வரும் காரணத்திற்காக கண்துடைப்பாக வெறும் ரூ. 200-ஐ குறைத்துள்ளனர். 2014ம் ஆண்டு பெட்ரோல் ஒரு லிட்டர் ரூ. 71. தற்போது ஒரு லிட்டர் ரூ. 102. ஒன்றிய அரசின் வரியை மூன்று மடங்கு உயர்த்தியுள்ளனர். டீசல் ரூ. 55. தற்போது 94 ரூபாய். இதில் ஒன்றிய அரசின் வரி ஏழு மடங்கு உயர்த்தப்பட்டுள்ளது. கடந்த 9 ஆண்டுகளில் மட்டும் பா.ஜ.க. அரசு ரூ. 100 லட்சம் கோடியை கடன் வாங்கியுள்ளது. இவர்கள் ஆட்சிக்கு வரும்போது இந்தியாவின் கடன் ரூ. 55 லட்சம் கோடி. இந்த 9 ஆண்டுகளில் அது ரூ. 155 லட்சம் கோடியாக மாறியுள்ளது. 

 

பெரிய நிறுவனங்களுக்கு ரூ. 14 லட்சம் கோடியை வாரக்கடன் என சொல்லி தள்ளுபடி செய்துள்ளனர். பணவீக்கம் அதிகரித்துள்ளது. இப்படி வேதனை மட்டுமே மக்களுக்கு தந்துள்ள பா.ஜ.க. அரசுக்கு முற்றுப்புள்ளி வைத்தாகவேண்டும். சமீபத்தில் வெளியான சி.ஏ.ஜி. அறிக்கையின்படி பார்த்தால் ஏழரை லட்சம் கோடி ரூபாய்க்கு முறைகேடு நடந்துள்ளது. ஊழல் குற்றச்சாட்டில் அதிகம் சிக்கியிருப்பது சி.பி.ஐ. அதிகாரிகள் என மத்திய ஊழல் கண்காணிப்பு ஆணையம் புள்ளிவிவரம் வெளியிட்டுள்ளது. இத்தகைய ஊழல் முகத்தை மறைக்கப் பார்க்கிறார்கள். நம் முன் இருக்கும் முக்கிய கடமை இந்த ஊழல் முகத்தை கிழிக்க வேண்டியது. 

 

தமிழ்நாட்டை பொறுத்தவரை புதுவை உட்பட 40 தொகுதிகளிலும் நம் கூட்டணி தான் வெற்றி பெறப்போகிறது. ஆனால், தமிழ்நாட்டில் மட்டும் வெற்றி பெற்றால் போதாது. இந்தியா முழுக்க வெற்றி பெற வேண்டும் நமது ஆட்சி ஒன்றியத்தில் அமைந்தால், 15 மாதங்களில் மதுரை எய்ம்ஸ் மருத்துவமனையை கட்டி எழுப்ப முடியுமா முடியாதா? நீட் தேர்வில் இருந்து விலக்கு பெற முடியுமா முடியாதா? தமிழ்நாட்டுக்கு தேவையான ஏராளமான இரயில் திட்டங்களை நம்மால் கொண்டுவர முடியுமா முடியாதா? புதிய விமான நிலையங்களையும் மெட்ரோ இரயில்களையும் இயக்க முடியுமா முடியாதா? நம் இந்தியா கூட்டணி ஆட்சி அமையுமானால், இவையெல்லாம் தமிழ்நாட்டிற்கு கொண்டுவரமுடியும். 

 

இந்தியா முழுமைக்கும் சமூகநீதியை உருவாக்கித்தர நம்மால் முடியும். இங்கு நாம் அமல்படுத்திக்கொண்டிருக்கிற திராவிட மாடல் திட்டங்களை இந்தியா முழுக்க பல்வேறு மாநிலங்களில் கொண்டு சேர்க்கமுடியும். இத்தகைய பொற்காலத்தை உருவாக்கித் தரத்தான் நாடாளுமன்றத் தேர்த்தல் வரப்போகிறது” என்றார். 

 

 

சார்ந்த செய்திகள்

 

Next Story

முன்கூட்டியே துண்டு போடும் நிர்வாகிகள்; மேடையிலேயே கலாய்த்த அமைச்சர் உதயநிதி!

Published on 20/07/2024 | Edited on 20/07/2024
Minister Udhayanidhi spoke to administrators about   Deputy Chief Minister

திமுக இளைஞரணி 45வது ஆண்டு விழா இளைஞரணி செயலாளரும் அமைச்சருமான உதயநிதி தலைமையில் தேனாம்பேட்டையில் நடந்தது. இதில் இளைஞரணி முக்கிய நிர்வாகிகள், மாவட்ட பொறுப்பாளர்கள் எனப் பலரும் கலந்துகொண்டனர்.

அவர்கள் மத்தியில் பேசிய அமைச்சர் உதயநிதி, “மக்களவை தேர்தலில் தமிழக மக்கள் பாஜகவிற்குப் பதிலடி கொடுத்துள்ளனர். அரசியல் களத்தில் எப்படி மக்களைச் சந்தித்துப் பேசுகிறோமோ அதேபோன்று இன்றைய காலத்தில் சமூக வலைத்தளமும் அவ்வளவு முக்கியத்துவம் வாய்ந்ததாகப் பார்க்கப்படுகிறது. குறிப்பாக பாஜகவினர் சமூக வலைத்தளங்களில் பொய்யையே பேசி, பொய்யையே பரப்பி அரசியல் செய்து கொண்டிருக்கிறார்கள். அதனை நாம் அம்பலப்படுத்த வேண்டும். அதனால் அனைவரும் சமூக வலைத்தளங்களில் ஆக்டிவாக இருங்கள்.

காலையில் எழுந்தவுடன் முரசொலியைத் தவறாமல் படித்துவிடுங்கள். முதல்வரின் அறிக்கைகள், அரசின் திட்டங்கள் என்னுடைய அறிக்கைகள், என அனைத்தையும் படித்துவிடுங்கள். முரசொலியில் தினமும் ஒரு பக்கத்தை இளைஞர் அணிக்கென்று ஒதுக்கி அதில் கருத்துகளை வெளியிட்டு வருகிறோம். முதல்வர் 234 தொகுதிகளிலும் நூலகம் அமைக்க வேண்டும் என்று கூறியிருந்தார். அதனையேற்று  முதற்கட்டமாக 50 தொகுதிகளிலும் நூலகத்தைத் திறந்துள்ளோம். மிதமுள்ள தொகுதிகளிலும் விரைவில் நூலகம் தொடங்கப்பட்டு மாணவர்களுக்கும், மக்களுக்கும் உபயோகமாக இருக்கும் என்று நம்புகிறேன்.

தமிழ்நாடு முழுவதும் பேச்சு போட்டி நடத்தி 100 சிறந்த பேச்சாளர்களைத் தேர்ந்தெடுத்து தலைமையிடத்தில் கொடுக்க வேண்டும் என்று முதல்வர் ஸ்டாலின் கட்டளையிட்டிருந்தார். அதன்படி அதற்கான பணிகளையும் தற்போது தொடங்கியிருக்கிறோம். இதற்காக 30 நடுவர்கள் தேர்ந்தெடுக்கப்பட்டிருக்கிறார்கள். அவர்களை அனைத்து மாவட்டத்திற்கு அனுப்பி வைத்து பேச்சாளர்களைத் தேர்வு செய்யவுள்ளோம்.

இந்த மேடையில் அனைவரும் பேசி நான் துணை முதல்வராக வேண்டும் என்று தீர்மானம் எல்லாம் நிறைவேற்றினீர்கள். பத்திரிகையில் வரும் கிசுகிசுக்கள், வதந்திகள் எல்லாவற்றையும் படித்துவிட்டு வந்து இது நடக்கப்போகிறதோ என்று யூகத்தில் நாமும் ஒரு துண்டு போட்டு வைப்போம் என்ற அடிப்படையில் இங்கே பேசியுள்ளனர். இளைஞரணி செயலாளர் பொறுப்புதான் முதல்வரின் மனதிற்கு நெருக்கமான பொறுப்பு. நான் முன்பே கூறியதுபோல, எல்லா அமைச்சர்களுமே எங்களின்  முதல்வருக்குத் துணையாகத்தான் இருப்போம் என்றேன். அதேபோன்று இங்கே இருக்கக்கூடிய அனைத்து அமைப்பாளர்களுமே முதல்வருக்குத் துணையாகத் தான் இருப்போம்.

எனக்கு எவ்வளவு பெரிய பொறுப்பு வந்தாலும், என் மனதிற்கு நெருக்கமானது இளைஞரணி செயலாளர் பொறுப்புதான். ஆகையால் எந்த பொறுப்பு வந்தாலும் இளைஞரணியை மறந்துவிடமாட்டேன். நாடாளுமன்ற மற்றும் இடைத்தேர்தலுக்கு உழைத்ததை போன்று வரும் 2026 ஆம் ஆண்டு சட்டமன்றத் தேர்தலின் வெற்றிக்காக உழைப்போம். 2026 என்ன நடந்தாலும், எந்தக் கூட்டணி வந்தாலும் ஜெயிக்க போவதும் நம்முடைய கூட்டணிதான். அதைமட்டுமே இளைஞரணி தம்பிமார்கள் இலக்காக வைத்துக்கொள்ள வேண்டும்” என்றார்.

Next Story

“அம்மா உணவகங்களைத் தரத்துடன் இயக்க வேண்டும்” - முதல்வருக்கு இ.பி.எஸ் வலியுறுத்தல்

Published on 20/07/2024 | Edited on 20/07/2024
EPS insistence on CM for most runs amma restaurants with quality

ஜெயலலிதா ஆட்சியின்போது செயல்பட்டதை போல் முழுமையான பணியாட்களுடன், தரத்துடன் இயங்க தமிழக முதல்வருக்கு எதிர்கட்சி தலைவர் எடப்பாடி பழனிசாமி வலியுறுத்தியுள்ளார்.

இது தொடர்பாக அவர் வெளியிட்டுள்ள அறிக்கையில், “அதிமுக ஆட்சியில் 2021 மே மாதம் வரை, குறிப்பாக கொரோனா பெருந்தொற்றுக் காலங்களில் நகரப் பகுதிகளில் வாழ்ந்த ஏழை, எளிய, நடுத்தர மக்கள் மற்றும் உழைப்பாளர்களது அன்னலட்சுமியாக தமிழகம் முழுவதும் சுமார் 664 அம்மா உணவகங்கள் நகரப் பகுதிகள் மற்றும் அரசு மருத்துவமனைகளில் திறக்கப்பட்டு நல்ல முறையில் செயல்பட்டு வந்தன.

அம்மா உணவங்களில் விற்கப்படும் உணவு வகைகளின் சுவை மற்றும் தரத்தை ஜெயலலிதாவும் அவர்வழியில்  ஆட்சி செய்தபோது நானும், அமைச்சர் பெருமக்களும் அவ்வப்போது நேரில் ஆய்வு செய்தோம். சுவை மற்றும் தரத்தை ஆய்வு செய்தபின் தக்க ஆலோசனைகள் வழங்கி அம்மா உணவகங்கள் சிறப்பாக செயல்பட்டன என்பதை தமிழக மக்கள் நன்கு அறிவார்கள். 

2021-இல் ஆட்சிமாற்றத்திற்குப் பிறகு அம்மா உணவகங்களை திமுக நிர்வாகிகள் கடப்பாரை போன்ற ஆயுதங்களால் இடித்துத் தள்ளினர். அம்மா உணவகங்களில் பணிபுரிந்தவர்களை மூன்றில் ஒரு பங்காக குறைத்தும், அம்மா உணவகங்களை நடத்துவதற்குத் தேவையான நிதியை ஒதுக்காமலும், தேவையான அரிசி, காய்கறிகள், பருப்பு வகைகள், எண்ணெய் போன்ற உணவுப் பொருட்களை தரமாக வழங்காமல், ஏழை, எளிய, நடுத்தர மக்கள் மற்றும் உழைப்பாளிகள் வயிராற உண்ணும் உணவின் தரத்தைக் குறைத்து பல அம்மா உணவகங்களுக்கு மூடு விழாவும் நடத்தியது திமுக அரசு.

திமுக அரசின் மேற்கண்ட செயல்பாட்டினை உடனடியாக அறிக்கைகள் மற்றும் பேட்டிகள் வாயிலாக கடுமையாக எதிர்த்தேன். அதனையடுத்து, அம்மா உணவகங்களை மூடும் முயற்சியை தற்காலிகமாக நிறுத்தியது திமுக அரசு. உண்மை நிலை இவ்வாறு இருக்க, நிர்வாகத் திறனற்ற  திமுக அரசின் முதலமைச்சர் 19.7.2024 அன்று, தனது எக்ஸ் வலைத்தளத்தில் அம்மா உணவகங்களை மூடிவிடுவோம் எனப் புரளிகளைக் கிளப்பியதாக முதலைக் கண்ணீர் வடித்துள்ளார். மேலும், தேனாம்பேட்டை பகுதியில் உள்ள அம்மா உணவகம் ஒன்றில் ஆய்வு மேற்கொண்டு, மக்களிடம் உணவின் தரம் குறித்தும்; அங்குள்ள பணியாளர்களிடம் அவர்களின் தேவைகள் குறித்தும் கேட்டறிந்ததாக குறிப்பிட்ட  திமுக அரசின் முதலமைச்சர், உணவின் சுவையை சோதித்தார்.

முதலமைச்சர் ஆய்வுக்கு வருவார் என்று முன்னதாகவே அம்மா உணவகத்திற்கு தெரிவிக்கப்பட்டு அங்கு தரமாக உணவுப் பொருட்கள் தயாரிக்கப்பட்டிருந்தன. எஞ்சிய அம்மா உணவகங்களில் நேற்று நடைபெற்றதை போல் கடந்த மூன்றாண்டுகளில் எத்தனைமுறை உணவின் தரத்தை அதிகாரிகளோ, திமுக அமைச்சர்களோ சோதித்தனர் என்று முதலமைச்சர் விளக்குவாரா ? ஆய்வு செய்வதாக ஒரு நாடகத்தை 19.7.2024 அன்று திமுக அரசின் முதலமைச்சர் அரங்கேற்றியுள்ளார். ஜெயலலிதாஆட்சியில் சென்னையில் மட்டும் 407 அம்மா உணவகங்கள் செயல்பட்டு வந்த நிலையில் மூன்றாண்டுகளில் அதை உயர்த்தாமல், சுமார் 19 அம்மா உணவகங்களை மூடியுள்ளது இந்த திமுக அரசு.  முதல்வர் ஸ்டாலின் இதற்கு என்ன பதிலளிக்கப் போகிறார்?

இனியாவது வாய் பந்தல் போடாமல், உண்மையிலேயே ஏழை, எளிய, நடுத்தர மக்கள் மற்றும் உழைப்பாளிகளுக்கு சுவையுள்ள உணவு வகைகளை வழங்கவும், மூடியுள்ள உணவகங்களை திறப்பதுடன், மேலும் புதிய அம்மா உணவகங்களை, ஜெயலலிதா ஆட்சியின்போது செயல்பட்டதை போல் முழுமையான பணியாட்களுடன், தரத்துடன் இயங்க நிர்வாகத் திறனற்ற முதலமைச்சரை வலியுறுத்துகிறேன்” எனக் குறிப்பிட்டுள்ளார்.