Skip to main content

குரங்கணி தீ விபத்தில் உயிரிழந்தவர்களின் எண்ணிக்கை 17 ஆக உயர்வு!

Published on 18/03/2018 | Edited on 18/03/2018


குரங்கணி வனப்பகுதியில் ஏற்பட்ட தீ விபத்தில் உயிரிழந்தவர்களின் எண்ணிக்கை 17 ஆக அதிகரித்துள்ளது.

தேனி மாவட்டம் குரங்கணி காட்டுப்பகுதியில் கடந்த 11-ம் தேதி மாலை தீப்பிடித்தது. இந்த விபத்தில் மலையேற்ற பயிற்சிக்கு சென்ற 36 பேர் சிக்கிகொண்டனர். பலர் உயிருடன் மீட்கப்பட்டு சிகிச்சைக்காக அனுமதிக்கப்பட்டனர். 9 பேர் சடலமாக மறுநாள் மீட்கப்பட்டனர்.

மருத்துவமனையில் சிகிச்சைக்காக அனுமதிக்கப்பட்டவர்களில் மூன்று பேர் அடுத்தடுத்த நாட்களில் உயிரிழந்திருந்த நிலையில், மதுரை அரசு மருத்துவமனையில் சிகிச்சை பெற்று வந்த கவுந்தம்பாடியை சேர்ந்த கண்ணன் மற்றும் சென்னையைச் சேர்ந்த அணுவித்யா சிகிச்சை பலனின்றி நேற்று பரிதாபமாக மரணமடைந்தனர்.

மேலும் மதுரை தனியார் மருத்துவமனையில் சிகிச்சைப் பெற்று வந்த திருப்பூரைச் சேர்ந்த சத்யகலா மற்றும் சேலம் எடப்பாடியை சேர்ந்த தேவி ஆகிய இருவரும் சிகிச்சை பலனின்றி உயிரிழந்தனர் . இதன் மூலம், பலி எண்ணிக்கை 16 ஆக அதிகரித்தது.

இந்நிலையில் மதுரை தனியார் மருத்துவமனையில் சிகிச்சை பெற்றுவந்த ஈரோட்டை சேர்ந்த சதீஷ்குமார் சிகிச்சை பலனின்றி இன்று உயிரிழந்துள்ளார். இதன் மூலம் குரங்கணி காட்டுத்தீயில் சிக்கி பலியானவர்களின் எண்ணிக்கை 17ஆக அதிகரித்துள்ளது.  

சார்ந்த செய்திகள்

 

Next Story

கொடைக்கானல்  வனப்பகுதியில் தீ;  9 நாட்களாக அணைக்க போராட்டம்!

Published on 03/05/2024 | Edited on 03/05/2024
    Fire in Kodaikanal Forest; Struggle to turn off for 9 days!

கொடைக்கானல் மேல் மலைப் பகுதியில் 9-வது நாளாக காட்டுத்தீ பற்றி எரிந்து வருகிறது. 

மலைகளின் இளவரசியான கொடைக்கானலில் கடுமையான வெப்பம் வாட்டி வதைத்து வருகிறது. இதனால் மலைப்பகுதியில் உள்ள செடி, கொடி, மரங்கள் கருகி  காணப்படுகின்றன. இதன் காரணமாக அடிக்கடி காட்டுத்தீ பற்றி எரிந்து வருகிறது. அதன்படி கடந்த சில நாட்களாக கொடைக்கானல் வனப்பகுதியில் காட்டுத்தீ பற்றி எரிந்த வண்ணம் உள்ளது. இதில் ஏராளமான மரம், செடிகள் தீயில் கருகி நாசமாகின. இந்நிலையில் மேல்மலைக் கிராமங்களான பூம்பாறை, மன்னவனூர், கூக்கால் உள்ளிட்ட மலைக்கிராமங்களில் கடந்த சில நாட்களுக்கு முன்பு காட்டுத்தீ பற்றி எரிந்தது. இந்தத் தீயை அணைக்கும் முயற்சியில் தீயணைப்பு வீரர்கள் ஈடுபட்டு வருகின்றனர். ஆனால் நேற்றும் 9வது நாளாக காட்டுத்தீ கட்டுக்கடங்காமல் கொழுந்து விட்டு எரிந்தது. 

மலைக்கிராமங்களில் காட்டுத்தீ தொடர்ந்து எரிவதால் அந்தப் பகுதி முழுவதும் புகை மண்டலமாக காட்சியளிக்கிறது. இதனால் பொதுமக்கள் வாகன ஓட்டிகள் சிரமம் அடைந்து வருகின்றனர். வனப்பகுதியில் வசிக்கும் வன விலங்குகள் வேறு பகுதிக்கு இடம் பெயர்ந்து வருகின்றன. சில இடங்களில் மரங்கள் எரிந்து சாம்பலாகி கிடக்கிறது. திண்டுக்கல் வனக்கோட்டம், கோவையைச் சேர்ந்த வன களப்பணியாளர்கள், சிறப்பு வன மீட்பு குழு, வனக்குழு உறுப்பினர்கள் உள்ளிட்ட சுமார் 300க்கும் மேற்பட்டோர் தீயை அணைக்கும் முயற்சியில் ஈடுபட்டு வருகின்றனர். மேலும் மாவட்ட நிர்வாகம் சார்பில் பல்வேறு பகுதியில் இருந்து தண்ணீர் வாகனங்கள் உட்பட 10க்கும் மேற்பட்ட தீயணைப்புத்துறை வாகனங்கள் மற்றும் போலீசாரின் வருண் வாகனங்கள் கொண்டு வரப்பட்டு இரவு பகலாக தீயை அணைக்க போராடி வருகின்றனர்.

இந்நிலையில் தீயை அணைக்கும் பணியைத் திண்டுக்கல் மண்டல வனப்பாதுகாவலர் காஞ்சனா நேரில் பார்வையிட்டார். பின்னர் அவர் நிருபர்களிடம் கூறியதாவது... மேல்மலைப் பகுதிகளில் பற்றியக் காட்டுத்தீ நேற்று மாலை வரை 80 சதவீதம் அணைக்கப்பட்டுள்ளது. 2 நாட்களுக்குள் முழுவதுமாக கட்டுப்படுத்தப்படும். தொடர்ந்து காட்டுத்தீ எரிந்தால் ஹெலிகாப்டர் மூலம் தீயை அணைக்க அரசுக்கு அறிக்கை சமர்ப்பிக்கப்பட்டுள்ளது. பூம்பாறை, மன்னவனூர், கூக்கால் உள்ளிட்ட பகுதிகளில் சுமார் 150 ஹெக்டேர் பரப்பளவில் தீ எரிந்து உள்ளதாக தகவல் கிடைத்துள்ளது. இந்தத் தீயினால் வனவிலங்குகள் எதுவும் உயிரிழக்கவில்லை. தற்போது கரும்பாறை என்ற இடத்தில் புகை மண்டலம் சூழந்துள்ளதால் அங்கு 150க்கும் மேற்பட்டோர் தீயை கட்டுப்படுத்தும் முயற்சியில் ஈடுபட்டு வருகின்றனர்.

இதற்கிடையே பேரிஜம் ஏரி பகுதியில் சாலையோரங்களில் உள்ள ஆபத்தான மரங்களை அகற்ற நடவடிக்கை எடுக்கப்பட்டு வருகிறது. இந்தப் பணியில் கோவை மற்றும் வைகை அணைப்பகுதியில் இருந்து தமிழ்நாடு சிறப்பு மீட்பு படையைச் சேர்ந்த வீரர்கள் உட்பட ஏராளமானோர் ஈடுபட்டு வருகின்றனர். மின் வயர்கள் உரசியதால் தீ விபத்து ஏற்பட்டிருக்கலாம் என்று கூறப்படுகிறது. இதுகுறித்து ஆய்வு நடத்தி அரசுக்கு அறிக்கை அனுப்பப்படும் என்றார். பேட்டியின் போது மாவட்ட வன அலுவலர் யோகேஷ்குமார் மீனா, உதவி வன பாதுகாவலர் சக்திவேல், ஆர்.டி.ஓ. சிவராமன், தாசில்தார் கார்த்திகேயன் மற்றும் பல்வேறு துறை அதிகாரிகள் உடனிருந்தனர். இதற்கிடையே காட்டுத்தீயை அணைக்கும் பணி நடைபெறுவதால் இந்தப் பகுதிக்கு, சுற்றுலா மற்றும் கனரக வாகனங்களுக்கு தடை விதிக்கப்பட்டது!

Next Story

6 வது நாளாக பற்றி எரியும் காட்டுத்தீ... அச்சத்தில் கொடைக்கானல்!

Published on 14/03/2022 | Edited on 14/03/2022

 

Wildfire burning about the 6th day ... Kodaikanal in fear!

 

கொடைக்கானலில் 6 வது நாளாக பற்றி எரிந்து வரும் காட்டுத்தீ அங்கிருப்போருக்கு அச்சுறுத்தலைத் தந்துள்ளது.

 

திண்டுக்கல் மாவட்டம் கொடைக்கானலில் உள்ள வெள்ளைப்பாறை, பெருமாள் மலை உள்ளிட்ட கிட்டத்தட்ட 40 ஏக்கர்  வனப்பகுதியில் காட்டுத்தீ எரிந்து வருகிறது. ஏற்கனவே மச்சூர் வனப்பகுதியில் எரிந்த காட்டுத்தீ கட்டுப்படுத்தப்பட்ட நிலையில் வெள்ளைப்பாறை பகுதியில் காட்டுத்தீ பரவி எரிந்து வருகிறது. அதேபோல் கூக்கால் கிராமத்தில் உள்ள பழம்புத்தூர் வனப்பகுதியிலும் காட்டுத்தீயின் பரவல் அதிகமாக உள்ளது. கோடைக்காலம் துவங்கியுள்ள நிலையில் காட்டுத்தீ பரவுதல் என்பது எளிதில் நிகழக்கூடிய ஒன்றாகிவிட்டது. தீத்தடுப்பு கோடுகள், எதிர்த்தீ அமைத்தும் வனத்துறையினர் காட்டுத்தீயைக் கட்டுப்படுத்தும் முயற்சியில் இறங்கியுள்ளனர். இந்த காட்டுத்தீயால் வனவிலங்குகள் ஊருக்குள் இடப்பெயர்வு செய்வது அதிகரிக்கும் என கொடைக்கானல் மக்கள் அச்சம் தெரிவிக்கின்றனர்.