Skip to main content

நிதி மோசடி வழக்கு: தலைமறைவாக இருந்த பாஜக பிரமுகரின் மகன் கைது!

Published on 11/05/2023 | Edited on 11/05/2023

 

Financial fraud case: Son of BJP leader who was  arrested!

 

சேலத்தில் நிதி நிறுவனம் நடத்தி பல கோடி ரூபாய் மோசடியில் ஈடுபட்ட புகாரின் பேரில் தலைமறைவாக இருந்த பாஜக பிரமுகரின் மகனை பொருளாதார குற்றப்பிரிவு காவல்துறையினர் கைது செய்தனர்.

 

சேலம் தாதகாப்பட்டி குமரன் நகரைச் சேர்ந்தவர் பாலசுப்ரமணியம் (51). பாஜக பிரமுகரான இவர் சேலம் புதிய பேருந்து நிலையம் அருகில் 'ஜஸ்ட்வின் ஜடி டெக் இந்தியா பிரைவேட் லிமிடெட்' என்ற பெயரில் நிதி நிறுவனம் நடத்தி வந்தார். வேலூர், திருவண்ணாமலை, திருச்சி, நீலகிரி, கன்னியாகுமரி ஆகிய ஊர்களிலும் கிளை அலுவலகங்களை திறந்து இருந்தார். இந்நிறுவனத்தில் ஒரு லட்சம் ரூபாய் முதலீடு செய்தால் மாதம் 20 ஆயிரம் ரூபாய் வீதம் 12 மாதங்களுக்கு வழங்கப்படும் என கவர்ச்சிகரமான அறிவிப்பை வெளியிட்டார். 

 

இதை நம்பிய முதலீட்டாளர்கள் ஏராளமான முதலீடுகளைக் கொட்டினர். ஆனால் பாலசுப்ரமணியம் உறுதியளித்தபடி வட்டி, அசல் தொகையைத் திருப்பித் தரவில்லை. நெருக்கடி முற்றியதை அடுத்து அவர் குடும்பத்துடன் தலைமறைவாகி விட்டார். இதனால் ஏமாற்றம் அடைந்த 100க்கும் மேற்பட்ட முதலீட்டாளர்கள் சேலத்தில் உள்ள ஜஸ்ட் வின் தலைமை அலுவலகத்தை முற்றுகையிட்டு போராட்டம் நடத்தினர். 

 

இதையடுத்து பாதிக்கப்பட்ட முதலீட்டாளர்கள் சேலம் பொருளாதார குற்றப்பிரிவு அலுவலகத்தில் புகார் அளித்தனர். முதலில் திருச்சியைச் சேர்ந்த முன்னாள் ராணுவ வீரரான ஜெயராஜ் என்பவர் புகார் அளித்தார். அந்தப் புகாரில் பாலசுப்ரமணியம், அவருடைய மகன் வினோத்குமார் ஆகியோர் தன்னிடம் 2 லட்சம் ரூபாய் முதலீடாகப் பெற்றுக்கொண்டு திருப்பித்தராமல் ஏமாற்றிவிட்டதாகக் கூறியிருந்தார். 

 

அதன்பேரில் அவர்கள் இருவர் மீதும் மோசடி உள்ளிட்ட பிரிவுகளின் கீழ் வழக்குப்பதிவு செய்த டிஎஸ்பி சீனிவாசன் மற்றும் ஆய்வாளர் முத்தமிழ் செல்வராஜன் மற்றும் பொருளாதார குற்றப்பிரிவினர் அவர்களைத் தேடி வந்தனர். முதல் கட்டமாக பாலசுப்ரமணியத்தை கைது செய்தனர். மேலும், ஜஸ்ட்வின் தலைமை அலுவலகம் மற்றும் கிளை அலுவலகங்களிலும் சோதனை நடத்தினர். 

 

இது ஒருபுறம் இருக்க, தலைமறைவாகிவிட்ட வினோத்குமாரை பிடிக்க தனிப்படை அமைக்கப்பட்டு தேடுதல் வேட்டை நடத்தப்பட்டு வந்தது. ஆரம்பத்தில் இந்த நிறுவனத்தின் மூலம் 400 கோடி ரூபாய்க்கு மேல் மோசடி நடந்திருக்கலாம் என சொல்லப்பட்டது. ஆனால், இதுவரை 110 பேரிடம் இருந்து புகார்கள் வரப்பெற்றுள்ளதாகவும், அதன்மூலம் 2.50 கோடி ரூபாய் வரை மோசடி நடந்திருப்பதாகவும் காவல்துறை தரப்பில் சொல்லப்பட்டது. 

 

இந்நிலையில், கடந்த 6 மாதத்திற்கு மேலாக தலைமறைவாக இருந்த வினோத்குமார் (31) மே 8ம் தேதி சேலத்தில் ஓரிடத்தில் பதுங்கி இருப்பதாக கிடைத்த தகவலின் பேரில் அவரை பொருளாதார குற்றப்பிரிவினர் கைது செய்தனர். மோசடி செய்த பணத்தில் சொத்துகள் வாங்கப்பட்டதா? எங்கெங்கு முதலீடு செய்யப்பட்டுள்ளது? இந்த மோசடியில் வேறு யார் யாருக்கெல்லாம் தொடர்பு இருக்கிறது? அரசியல் பின்னணி உள்ளதா? என்பது குறித்து விரிவான விசாரணை நடத்தினர். 

 

பின்னர், வினோத்குமாரை கோவையில் உள்ள 'டான்பிட்' நீதிமன்றத்தில் ஆஜர்படுத்தினர். நீதிமன்ற உத்தரவின்பேரில் அவரை கோவை மத்திய சிறையில் அடைத்தனர். 

 

 

சார்ந்த செய்திகள்

Next Story

ஆவடியில் இரட்டைக் கொலை; போலீசாரிடம் சிக்கிய செல்போன்!

Published on 29/04/2024 | Edited on 29/04/2024
aavadi siddha doctor and his wife incident Cell phone caught by the police

திருவள்ளூர் மாவட்டம் ஆவடி அடுத்துள்ள மிட்டனமல்லியில் சித்த மருத்துவர் சிவன் நாயர் என்பவரும், அவரது மனைவி பிரசன்னகுமாரி ஆகியோர் வசித்து வந்துள்ளனர். இத்தகைய சூழலில் அவரது இல்லத்திற்கு சிகிச்சைக்கு வருவதுபோல் நேற்று (28.04.2024) இரவு வீட்டிற்குள் மர்ம நபர்கள் நுழைந்துள்ளனர். அதன்பின்னர் சித்த மருத்துவர் சிவன் நாயரையும் அவரது மனைவி பிரசன்னகுமாரியையும் மர்ம நபர்கள் கழுத்தை அறுத்து கொடூரமாக கொலை செய்துள்ளனர். அதனைத் தொடர்ந்து மர்ம நபர்கள் அங்கிருந்து தப்பியோடியுள்ளனர்.

இது குறித்து தகவல் அறிந்து சம்பவ இடத்திற்கு விரைந்து வந்த போலீசார் தீவிர விசாராணை மேற்கொண்டனர். அப்போது இந்த இரட்டைக் கொலை நடந்த இடத்தில் செல்போன் ஒன்று கைப்பற்றப்பட்டது. இது தொடர்பாக ராஜஸ்தான் மாநிலத்தை சேர்ந்த மகேஷ் என்பவரிடம் போலீசார் விசாரணை மேற்கொண்டுள்ளனர். அதோடு கொலையான மருத்துவரிடம் சிகிச்சை பெற வந்தவர்களிடமும் போலீசார் தீவிர விசாரணை மேற்கொண்டுள்ளனர்.

மேலும் கொலையாளிகள் பல லட்சம் மதிப்பிலான தங்க நகைகளைக் கொள்ளையடித்துச் சென்றுள்ளனரா என்ற கோணத்திலும் போலீசார் தீவிர விசாரணை நடத்தி வருகின்றனர். ஆவடி அருகே சித்த மருத்துவர் மற்றும் அவரது மனைவி கழுத்து அறுத்து கொடூரக் கொலை செய்யப்பட்ட சம்பவம் மக்கள் மத்தியில் பெரும் பரபரப்பையும், அதிர்ச்சியையும் ஏற்படுத்தியுள்ளது. 

Next Story

தேவகவுடா மகன் மீது பாலியல் குற்றச்சாட்டு!

Published on 29/04/2024 | Edited on 29/04/2024
Deve Gowda's son issue in karnataka 

நாடாளுமன்ற மக்களவைத் தேர்தல் நாடு முழுவதும் களைகட்டி வருகிறது. அதன்படி முதற்கட்டமாக கடந்த 19ஆம் தேதி தொடங்கி வரும் ஜூன் 1 ஆம் தேதி வரை 7 கட்டமாக வாக்குப்பதிவு நடைபெறவுள்ளது. முதற்கட்டமாக 21 மாநிலங்கள் மற்றும் யூனியன் பிரதேசங்களில் உள்ள 102 இடங்களுக்கு வாக்குப்பதிவு நடைபெற்றது. இதனையடுத்து 13 மாநிலங்களில் உள்ள 88 மக்களவைத் தொகுதிகளில் நேற்று முன்தினம் (26.04.2024) 2ஆம் கட்ட வாக்குப்பதிவு நடைபெற்றது. மொத்தம் 28 தொகுதிகள் கொண்ட கர்நாடகா மாநிலத்தில் ஏப்ரல் 26 ஆம் தேதி 14 தொகுதிகளுக்கு வாக்குப்பதிவு நடந்து முடிந்துள்ளது. மே 7 ஆம் தேதி மற்ற 14 தொகுதிகளில் தேர்தல் நடைபெறவிருக்கிறது.

இந்தத் தேர்தலில், பா.ஜ.க தலைமையிலான தேசிய ஜனநாயகக் கூட்டணியில், முன்னாள் பிரதமர் தேவகவுடாவின் ஜனதா தளம் (எஸ்) கட்சி போட்டியிடுகிறது. கர்நாடகாவில் ஆளும் கட்சியான காங்கிரஸ் இந்தத் தேர்தலில் தனித்துப் போட்டியிடுகிறது. இத்தகைய சூழலில் தேவகவுடாவின் பேரனும், ஹாசன் மக்களவைத் தொகுதியின் எம்.பி.யுமான பிரஜ்வல் ரேவண்ணா பல பெண்களை பாலியல் வன்கொடுமை செய்ததாக புகார் எழுந்துள்ளது. தன்னிடம் உதவி கேட்டு வந்த ஏராளமான பெண்களை பிரஜ்வல் ரேவண்ணா பாலியல் தேவைகளுக்காக பயன்படுத்திக் கொண்டதாக பரபரப்பு குற்றச்சாட்டு எழுந்துள்ளது. பிரஜ்வல் ரேவண்ணா பல பெண்களுடன் இருப்பது போன்ற ஆபாச காட்சிகள் வெளியாகி மக்கள் மத்தியில் பெரும் பரபரப்பை ஏற்படுத்தியுள்ளது. மேலும் பிரஜ்வல் ரேவண்ணா மீது உரிய நடவடிக்கை எடுக்கவும் மாநில மகளிர் ஆணையம் கர்நாடக அரசுக்கு கடிதம் எழுதி இருந்தது.

Deve Gowda's son issue in karnataka 

இதனையடுத்து இந்தப் புகார் குறித்து சிறப்பு புலானாய்வுக் குழு அமைத்து விசாரணை தொடங்க முடிவெடுக்கப்பட்டது. இதற்கான உத்தரவை கர்நாடக முதல்வர் சித்தராமையா வெளியிட்டிருந்தார். அதே சமயம் இந்தப் புகார் குறித்த நெருக்கடி அதிகரிப்பால் பிரஜ்வல் ரேவண்ணா கர்நாடகாவில் இருந்து ஜெர்மனிக்கு தப்பியோடியதாவும் தகவல் வெளியாகி இருந்தது. இதற்கிடையே காங்கிரஸ் கட்சியின் மகளிர் அணியினர் அவரைக் கைது செய்ய வலியுறுத்தி போராட்டத்திலும் ஈடுபட்டனர். பிரஜ்வால் ரேவண்ணா மீது ஹோலேநரசிப்பூர் காவல் நிலையத்தில் ஐபிசி 354 ஏ, 354 டி, 506, மற்றும் 509 ஆகியவற்றின் கீழ் 4 பிரிவுகளில் வழக்குப்பதிவு செய்யப்பட்டது.

இந்த வழக்கை விசாரிக்கும் சிஐடி பிரிவின் எஸ்ஐடி (சிறப்பு புலனாய்வுக் குழு) குழு ஐபிஎஸ் அதிகாரி விஜய் குமார் சிங் தலைமையில் செயல்படும் எனத் தெரிவிக்கப்பட்டது. மேலும் இந்தக் குழுவில் சிஐடி டிஜி சுமன் டி பென்னேகர் மற்றும் ஐபிஎஸ் அதிகாரி சீமா லட்கர் ஆகியோர் உறுப்பினர்களாக இருப்பார்கள் எனவும் தெரிவிக்கப்பட்டது. அதே சமயம் இந்த மக்களவைத் தேர்தலில் ஹாசன் தொகுதியில் பாஜக கூட்டணி வேட்பாளராக பிரஸ்வால் ரேவண்ணா ப்ரஜ்வால் மீண்டும் போட்டியிடும் ஹசான் தொகுதியில் கடந்த 26ம் தேதி தேர்தல் நடைபெற்று முடிவடைந்துள்ளது குறிப்பிடத்தக்கது. 

Deve Gowda's son issue in karnataka 

இந்நிலையில் முன்னாள் பிரதமர் தேவகவுடாவின் மகனும், முன்னாள் அமைச்சருமான எச்.டி.ரேவண்ணா மீது பாலியல் குற்றச்சாட்டு எழுந்துள்ளது. எச்.டி.ரேவண்ணா வீட்டில் பணியாற்றும் சமையலர் அளித்த புகாரின் பேரில் ரேவண்ணா மீது பாலியல் சீண்டல், மிரட்டல் உள்ளிட்ட 4 பிரிவுகளின் கீழ் வழக்குப்பதிவு செய்து ஹோலேநர்சிபூர் போலீசார் விசாரணை மேற்கொண்டு வருகின்றனர். எச்.டி. ரேவண்ணாவின் மகன் பிரஜ்வால் மீது ஏற்கெனவே பாலியல் புகார் உள்ள நிலையில் தற்போது தந்தை மீதும் பாலியல் புகார் எழுந்துள்ள சம்பவம் கர்நாடகாவில் பெரும் அதிர்வலையையும், பரபரப்பையும் ஏற்படுத்தியுள்ளது.