Skip to main content

ஏழ்மையிலும் மாறாத நேர்மை; மூதாட்டிக்கு டிஎஸ்பி பாராட்டு

Published on 11/01/2024 | Edited on 11/01/2024
DSP praises the old woman who found the missing jewel

தூத்துக்குடி மாவட்டம் சாத்தான்குளத்தைச் சேர்ந்தவர் ஓய்வு பெற்ற பேராசிரியர் ராமச்சந்திரன். இவரின், குடும்பத்தில் ஒரு வளைகாப்பு நிகழ்ச்சியானது கடந்த 2023 ஆம் ஆண்டு டிசம்பர் மாதம் 17ஆம் தேதி நடைப்பெற்றது. இந்த நிகழ்வு சாத்தான்குளம் வணிக வைசிய திருமண மண்டபத்தில் தடபுடலாக நடந்தது. அந்த நிகழ்ச்சியில் கலந்துக்கொண்ட ஓய்வு பெற்ற பேராசிரியர் ராமச்சந்திரன் சிறப்பாக நிகழ்ச்சியை நடத்தி முடித்திருந்தார். 

அதன் பிறகு, நிகழ்ச்சியில் பங்கேற்ற உறவினர்கள் அனைவரும் சொந்த ஊர்களுக்கு சென்றனர். இதையடுத்து, நிகழ்ச்சியில் பங்கேற்ற ராமச்சந்திரனின் குடும்ப உறவினர் பெண் ஒருவரின் ஒன்றரை சவரன் தங்கச் சங்கலி காணாமல் போனது தெரிய வந்தது. இதைக்கேட்டு பதறிப்போன குடும்பத்தினர் என்ன செய்வது? யாரிடம் கேட்பது? என தெரியாமல் விழி பிதுங்கி நின்றுள்ளனர். இதையடுத்து, உறவினர்கள் ஒன்றுகூடி காணாமல் போன ஒன்றரை சவரன் தங்கச் சங்கலியை மீட்பது குறித்து கலந்து பேசியுள்ளனர். அதில் எடுத்த முடிவின் படி, நிகழ்ச்சிக்கு வந்த உறவினர்கள் யார் மீதும் புகார் அளிக்காமல்,  வளைகாப்பு நிகழ்ச்சி நடந்த சாத்தான்குளம் வணிக வைசிய திருமண மண்டபத்திற்கு சென்றுள்ளார். அங்கே, திருமண மண்டப நிர்வாகியான அந்தோணி ராஜ் என்பவரிடம் நகை காணாமல்  போனது தொடர்பாக உதவி கேட்டுள்ளனர். உடனே, நம்பிக்கை தெரிவித்த அந்தோணி ராஜ் முதற்கட்டமாக இங்கு வேலை செய்யும் பணியாளர்கள் வைத்து, காணாமல் போன நகையை மண்டபம் முழுக்க தேடியுள்ளனர். அதில், மண்டபத்தில் பணியாளராக வேலை செய்யும் மூதாட்டி பாலசுந்தர் என்பவரின் மனைவி அந்தோணியம்மாளும் தொடர்ந்து தேடுதலில் ஈடுபட்டு வந்துள்ளார். 

தொடர்ந்து முழு வீச்சில் நடந்த தேடுதல் பணியில், அந்தோணியம்மாள் மண்டபத்தில் நாற்காலிகள் அடிக்கி வைக்கப்பட்ட பகுதியிலிருந்து காணாமல் போன நகையை கண்டுபிடித்தார். இதையடுத்து, மீட்ட தங்கச் சங்கலியை மண்டப நிர்வாகி அந்தோணி ராஜ்ஜிடம் கொடுத்தார். அதனை, அந்தோணி ராஜ் உரிய வழிமுறையாக சாத்தான்குளம் டிஎஸ்பி அருளிடம் காணமல் போன நகையை ஒப்படைத்தார். இதையடுத்து, காணாமல் போன தங்க நகை மீட்கப்பட்ட செய்தி அறிந்த ஓய்வு பெற்ற பேராசிரியர் ராமச்சந்திரன் குடும்பத்தினர் நிம்மதி பெருமூச்சு விட்டனர்.

அதனைத்தொடர்ந்து, தவறவிட்ட ஒன்றரை சவரன் தங்கச் சங்கலியை பேராசிரியர் ராமச்சந்திரன் சாத்தான்குளம் டிஎஸ்பி அருளிடம் பெற்றுக்கொண்டார். இதையடுத்து, காணாமல் போன தங்க நகை மீட்டுக்கொடுத்த மூதாட்டி அந்தோணியம்மாளின் நேர்மையை பாராட்டும் விதமாக சாத்தான்குளம் டிஎஸ்பி சால்வை அணிவித்து கௌரவித்தார். தொடர்ந்து, அந்தோணியம்மாளின் நேர்மைக்கு அளிக்கும் பரிசாக பேராசிரியர் ராமச்சந்திரன், தனது 10,000 ரூபாய் பணத்தை  டிஎஸ்பி அருள் மூலமாகவே பரிசாக அளித்தார். 

இதில், அந்தோணியம்மாளின் நேர்மையை குறிப்பிட்டு பேசும் காவல் உயர் அதிகாரிகள், ''அந்தோணியம்மாள் ஏழ்மையான குடும்பத்தைச் சார்ந்தவர். தனது குடும்ப வறுமையின் காரணமாக கடந்த 2 வாரங்களுக்கு முன்பு தனது மூக்குத்தியை அடகு வைத்து, 2000 ரூபாய் கடன் வாங்கி குடும்ப செலவை பார்த்து வந்துள்ளார். இதற்கிடையில் தான், தவறவிட்ட ஒன்றரை சவரன் தங்கச் சங்கலியை கண்டுப்பிடித்து போலீசாரிடம் ஒப்படைத்துள்ளார்'' என கருத்து தெரிவித்தனர். இதற்கிடையில், முதல் முறையாக டிஎஸ்பி அலுவலகத்திற்கு வந்த அந்தோணியம்மாள் "ஐயா நான் இதுவரைக்கும் போலீஸ் ஸ்டேஷன் பக்கமே வந்ததில்லை.. வருவதற்கே பயமா இருந்துச்சு.." என வெகுளியாக டிஎஸ்பியிடம் கலந்துரையாடினார். இதையடுத்து செய்தியாளர்களை சந்தித்த  அந்தோணியம்மாள் நடந்ததை விவரித்தார். இந்த சம்பவம் அப்பகுதியில் நெகிழ்ச்சியை ஏற்படுத்தியுள்ளது.

சார்ந்த செய்திகள்

 

Next Story

ரவுடிகள் வேட்டை; சரணடைந்த சாமி ரவி

Published on 15/07/2024 | Edited on 15/07/2024
owdies hunting; Surrendered Sami Ravi

தமிழகத்தில் பகுஜன் சமாஜ் கட்சி தலைவர் ஆம்ஸ்ட்ராங் படுகொலை செய்யப்பட்டதைத் தொடர்ந்து தமிழகம் முழுவதும் போலீசார் ரவுடிகளை கைது செய்து வருகின்றனர். பல்வேறு இடங்களில் தீவிர கண்காணிப்பு ஏற்பாடுகள் மேற்கொள்ளப்பட்டு வருகிறது. ஆம்ஸ்ட்ராங் கொலை வழக்கில் சரணடைந்த 11 பேரில் திருவேங்கடம் என்ற ரவுடி போலீசார் விசாரணையின் பொழுது தப்பிக்க முயன்றதோடு பதுக்கி வைத்திருந்த துப்பாக்கியால் போலீசாரை நோக்கி சுட முயன்றதால் என்கவுன்டர் செய்யப்பட்டது பரபரப்பை ஏற்படுத்தி இருந்தது. இந்த என்கவுன்டர் ரவுடிகள் மத்தியில் கலக்கத்தை ஏற்படுத்தியுள்ளது.

இந்நிலையில் தஞ்சை மாவட்டம் திருக்காட்டுப்பள்ளி காவல் நிலையத்தில் பிரபல ரவுடி சாமி ரவி சரணடைந்துள்ளதாக தகவல் வெளியாகி உள்ளது. ராமஜெயம் கொலை வழக்கில் சம்பந்தப்பட்டவர் என்று கூறப்படுபவரும், பல்வேறு குற்றச் சம்பவங்களில் தொடர்புடையவராகவும் உள்ள சாமி ரவி காவல் நிலையத்தில் சரணடைந்துள்ளதாக தகவல்கள் வெளியாகி உள்ளது. அதேபோல் ராக்கெட் ராஜா உள்ளிட்ட பல்வேறு ரவுடிகளும் கைது செய்யப்பட்டுள்ளதாக தகவல்கள் வெளியாகி உள்ளது.

Next Story

ஜன்னல் வழியே வெளியான புகை; எரித்து கொல்லப்பட்ட மூவர்;காவல்துறை தீவிர விசாரணை

Published on 15/07/2024 | Edited on 15/07/2024
Smoke from the window; Three were burnt to death

கடலூரில் ஒரே குடும்பத்தில் 3 பேரை கொலை செய்து உடல்கள் எரிக்கப்பட்ட சம்பவம் பரபரப்பை ஏற்படுத்திய சம்பவம் தொடர்பாக போலீசார் விசாரணை நடத்தி வருகின்றனர். ராஜஸ்தான் மாநிலத்தைச் சேர்ந்த கமலேஸ்வரி, சுரேஷ்குமார் தம்பதியினர் சுரேஷ்குமார் நெல்லிக்குப்பத்தில் உள்ள இஐடி சர்க்கரை ஆலையில் மருந்தாளுனராக பணியாற்றி ஓய்வு பெற்றுள்ளார். இவருக்கு 70 வயதான நிலையில் வயது மூப்பின் காரணமாக கடந்த 6 மாதங்களுக்கு முன் உயிரிழந்தார்.

இவர்கள் நெல்லிக்குப்பம் அருகே உள்ள காராமணிக்குப்பம் ஜோதி  நகரில் வாடகை வீட்டில் பல ஆண்டுகளாக வசித்து வருகின்றனர். தற்சமயம் கமலேஸ்வரி அவரது மகன் சுகந்தகுமார், பேரன் இஷான் ஆகியோர் வசித்து வருகின்றனர். சுகந்த குமார் திருமணம் ஆகி சில வருடங்களிலேயே அவர் மனைவி பிரிந்து சென்று விவாகரத்து பெற்று சென்றுவிட்டார். சுகந்தகுமார் ஹைதராபாத்தில் உள்ள ஐடி நிறுவனத்தில் பணி செய்து வரும் நிலையில் 15 நாட்கள் அலுவலகத்திலும் 15 நாட்கள் வீட்டில் இருந்தும் பணி செய்து வந்துள்ளார். இவர் கடந்த வெள்ளிக்கிழமை இரவு ஹைதராபாத்தில் இருந்து  வீட்டிற்கு வந்ததாக கூறப்படுகிறது.

இந்நிலையில் அதே தினம் கமலேஸ்வரி அவரது உறவினர் வீட்டிற்கு துக்க நிகழ்ச்சிக்கு சென்று விட்டு அவரும் இரவு 8 மணிக்கு வீட்டிற்கு வந்துள்ளார். இவர்களின் வீட்டு வேலை செய்யும் பணி பெண் சனிக்கிழமை காலை வீட்டிற்கு வந்து பார்க்கும் பொழுது வெளி இரும்பு கேட் பூட்டி இருந்த நிலையில் அவர் மீண்டும் சென்றுள்ளார்.  அதன் பிறகு அவரும் தொலைபேசியில் தொடர்பு கொண்ட பொழுது தொலைபேசி எண் சுவிட்ச் ஆப் செய்யப்பட்டிருந்ததால் அவரும் இரண்டு நாள் வேலைக்கு வரவில்லை.

திங்கட்கிழமை வீட்டின் ஜன்னல் பகுதியில் இருந்து லேசாக புகை வந்ததால் அக்கம்பக்கத்தினர் காவல் துறைக்கு தகவலளித்தனர். இதையடுத்து சம்பவம் குறித்து நெல்லிக்குப்பம் போலீசார்  தீயணைப்புத் துறைக்கு தகவல் கொடுத்தனர். இதையடுத்து வீட்டின் கதவை உடைத்து உள்ளே சென்று பார்க்கும் பொழுது, ஒவ்வொரு பகுதியிலும் கொலை செய்யப்பட்டு ரத்த வெள்ளத்தில் எரிந்த நிலையில் உடல்களை கண்டு அதிர்ந்து போன போலீசார் உடனடியாக மாவட்ட காவல் கண்காணிப்பாளருக்கு தகவல் அளித்தனர்.

Smoke from the window; Three were burnt to death

சம்பவ இடத்திற்கு மோப்ப நாய் கைரேகை நிபுணர்கள் வரவழைக்கப்பட்டு தடயங்கள் சேகரிக்கும் பணியில் போலீசார் ஈடுபட்டனர். சம்பவ இடத்திற்கு மாவட்ட காவல் கண்காணிப்பாளர் ராஜாராம் நேரடியாக வந்து விசாரணை செய்தார். சுமார் 3 மணி நேரம்  விசாரணை செய்தார். அதில் வீட்டில் பணிபுரியும் பெண் மற்றும் உறவினர்கள் வீட்டைச் சுற்றியுள்ள பலரிடம் தனித்தனியாக விசாரணை செய்தார். விசாரணை மேற்கொள்ள  5 தனிப்படை அமைக்கப்பட்டுள்ளதாகவும், முதல்கட்ட விசாரணையில் இது கொலையாக இருக்கும் என தெரிவித்தார். பின்னர் 3 பேர்களின் உடல்களைக் கைப்பற்றி பிரேதப் பரிசோதனைக்காக கடலூர் தலைமை அரசு மருத்துவமனைக்கு கொண்டு சென்று உள்ளனர். ஒரே குடும்பத்தைச் சேர்ந்த 3  பேர் கொலை செய்து எரிக்கப்பட்ட சம்பவம் சுற்றுவட்டப் பகுதியில் பரபரப்பை ஏற்படுத்தியது.