Skip to main content

’37 எம்.பி.க்களும் மக்கள் போராளிகள்’-திருப்பூர் கம்யூனிஸ்ட் எம்.பி. சுப்பராயன்

Published on 01/06/2019 | Edited on 01/06/2019

 

இந்திய கம்யூனிஸ்ட் கட்சியின் சார்பில் வெற்றி பெற்ற திருப்பூர் பாராளுமன்ற தொகுதி எம்.பி. சுப்பராயன்  ஈரோட்டில் இன்று செய்தியாளர்களைச் சந்தித்தார். 

 

s

 

அப்போது அவர் பேசுகையில்,   ‘’பாராளுமன்ற தேர்தலில் திருப்பூர் தொகுதியில்  என்னை வெற்றி பெற வைத்த பொதுமக்களுக்கு முதலில் நன்றியை தெரிவித்துக் கொள்கிறேன்.  இந்த தேர்தலில் திருப்பூர் தொகுதியில் திமுக கூட்டணி தோல்வி அடையும் என கருத்துக் கணிப்புகளை சில ஊடகங்கள்  வெளியிட்டன.  அதை  பொய்யாக்கும் வகையில் மக்கள்  93 ஆயிரத்து 368 வாக்கு வித்தியாசத்தில் என்னை வெற்றி பெற வைத்துள்ளனர்.  மக்கள் எதிர்பார்ப்பு படி அவர்களுக்கான நலத்திட்டங்களை நிறைவேற்ற பாடுபடுவேன்.

 

  தமிழக அரசு கமிஷன் வாங்குவதை தொடர்ந்து வாடிக்கையாக கொண்டுள்ளது.  இது  மறுக்க முடியாத உண்மை.  ஆனால் கம்யூனிஸ்ட் கட்சி பொதுவாழ்வில் கமிஷன் என்பதே கிடையாது.  அதன் வழியில் நானும் எனது தொகுதியில் வழங்கப்படும் தொகையை முழுமையாக மக்கள் வளர்ச்சித் திட்டப் பணிகளுக்கு வழங்குவேன்.  எனக்கு எதிராக நான் தேர்தலில் தோல்வி அடைய வேண்டும் என்று வேலை செய்தவர்களுக்கும் எனது தொகுதி மக்கள் என்ற அடிப்படையில் அவர்களுக்கும் பணியாற்ற நான் கடமைப்பட்டு உள்ளேன் எனவே யாராக இருந்தாலும் அவர்கள் கோரிக்கையை என்னிடம் தெரிவிக்கலாம். 

 

இந்தியாவில் எந்த ஆட்சி வரக்கூடாது என்று நினைத்தோமோ அந்த ஆட்சி மீண்டும் வந்துள்ளது.  இந்த ஆட்சி தேச விரோதமாக செயல்படுகிறது.  தேச விரோதம் என்பது தேசிய நலனை புறக்கணிப்பது என்பதாகும்.  நாட்டின் சொத்துக்கள் கார்ப்பரேட் கம்பெனிகளுக்கு தாரை வார்க்கப்படுகிறது இந்தியாவின் சிறு குறு நடுத்தர தொழில்களுக்கு தீங்கு விளைவிக்கும் வகையில் ஜிஎஸ்டி, பண மதிப்பு இழப்பு போன்ற நடவடிக்கைகள் பா.ஜ.க.மோடி அரசு செய்தது. 

 

மேலும் விவசாய உற்பத்தி துறை வளர்ச்சி பெரும் சரிவை சந்தித்துள்ளது.  வேலையில்லாத் திண்டாட்டமும் பூதாகரமாக வெடித்துள்ளது.  மோடியின் 5 ஆண்டு கால ஆட்சியில் இந்தியாவின் நிலை திவாலாகி விட்டது.  விவசாயிகளுக்கு எதிரான 8 வழி சாலை திட்டம் நிறைவேற்ற உச்சநீதிமன்றத்தில் அப்பீல் செய்துள்ளது.  ஹைட்ரோ கார்பன் திட்டம் மூலம் நெல் களஞ்சியமாக உள்ள டெல்டா மாவட்டங்கள் பாலைவனமாக மாறிவிடும்.  பாஜக கடந்த கால ஆட்சியில் அறிவித்த எந்த ஒரு திட்டத்தையும் நிறைவேற்றவில்லை.  சென்னையில் குடிநீர் தட்டுப்பாடு ஏற்பட்டுள்ளது பல இடங்களில் நிலத்தடி நீர்மட்டம் ஆதால பாதாளத்திற்கு சென்றுவிட்டது.  மக்களுக்கு திட்டங்கள்,அத்திவாசிய பணிகள் உடனுக்குடன்  நடைபெற வேண்டும் என்றால்  உள்ளாட்சி தேர்தலை உடனடியாக நடத்த வேண்டும்.

 

திமுக கூட்டணி தலைமையில் வெற்றி பெற்று நாடாளுமன்றம் சென்றுள்ள  37 எம்.பி.க்களும் மக்கள் போராளிகள். நாங்கள் ஒன்று சேர்ந்து தமிழக மக்களின் நலனுக்காக பாராளுமன்றத்திற்கு உள்ளேயும், வெளியே மக்கள் மன்றத்திலும் போராடுவோம்.   திருப்பூரில் ஜவுளித்தொழிலில் சுற்றுச்சூழல் பாதிக்கப்பட்டுள்ளது இதனைப் போக்க  தொழிற்சாலைகளில் சுத்திகரிப்பு நிலையம் அமைக்க மூன்றில் இரண்டு பங்கு மானியத்தை மத்திய மாநில அரசுகள் வழங்க வேண்டும்." என திருப்பூர் சுப்பராயன் கூறினார்.
 

சார்ந்த செய்திகள்

Next Story

காங்கிரஸ், இந்திய கம்யூனிஸ்ட் கட்சிக்கு வருமான வரித்துறை நோட்டீஸ்!

Published on 29/03/2024 | Edited on 29/03/2024
Income tax notice to Congress, Communist Party of India

நாடாளுமன்ற மக்களவைத் தேர்தல் ஏழு கட்டங்களாக நடைபெற உள்ளது. அதன்படி முதற்கட்டமாகத் ஏப்ரல் 19 ஆம் தேதி வாக்குப்பதிவு நடைபெற இருக்கிறது. இதற்கான வாக்கு எண்ணிக்கை ஜூன் 4 ஆம் தேதி நடைபெறவுள்ளது. ஏற்கெனவே அரசியல் கட்சிகள் தேர்தல் பணிகளில் தீவிரம் காட்டி வரும் நிலையில், தேர்தல் தேதி அறிவிக்கப்பட்டதால் தேர்தல் களம் அனல் பறக்க ஆரம்பித்துவிட்டது.

இந்நிலையில் ரூ.1,823 கோடி செலுத்த காங்கிரஸ் கட்சிக்கு வருமான வரித்துறை சார்பில் நோட்டீஸ் அனுப்பபட்டுள்ளது. காங்கிரஸ் கட்சியின் வங்கிக் கணக்கில் இருந்த ரூ. 135 கோடியை ஏற்கனவே வருமான வரித்துறை முடக்கியுள்ள நிலையில், தற்போது ரூ. 1823.08 கோடி அபராதம் கட்ட வேண்டும் என காங்கிரஸ் கட்சிக்கு புதிய நோட்டீஸ் அனுப்பப்பட்டுள்ளது. கடந்த 1993-94, 2016-17, 2017-18, 2018-19 மற்றும் 2019-20 காலகட்டத்திற்கு உரிய வருமான வரி மற்றும் அதற்குரிய அபராதத்தை செலுத்த காங்கிரஸ் கட்சிக்கு வருமான வரித்துறை நோட்டீஸ் அனுபியுள்ளது.

இது குறித்து குறித்து காங்கிரஸ் கட்சி சார்பில் தேரிவிக்கையில், மக்களவைத் தேர்தலில் தங்களுக்கு எதிராக வரி பயங்கரவாதம் நடைபெறுவதாக காங்கிரஸ் கங்கிரஸ் கட்சி குற்றம் சாட்டியுள்ளது. பாஜக இந்திய ஜனநாயகத்தை தகர்க்கும் வேலைகளை செய்து வருவது உச்சகட்டத்தை எட்டியுள்ளது. கடந்த 8 ஆண்டு பழைய வருமான வரியை மீண்டும் ஆய்வு செய்து ரூ.1,823 கோடி வரி பாக்கியை கட்டச் சொல்வது விதிமீறல் என காங்கிரஸ் தனது அறிக்கையில் தெரிவித்துள்ளது.

Income tax notice to Congress, Communist Party of India

இதனைத் தொடர்ந்து ரூ. 11 கோடி வருமான வரி நிலுவையில் உள்ளதாக இந்திய கம்யூனிஸ்ட் கட்சிக்கு வருமான வரித்துறை நோட்டீஸ் அனுப்பியுள்ளது. பழைய பான் (P.A.N.) எண்ணை பயன்படுத்தியதற்கு ரூ. 11 கோடி வரி பாக்கியை செலுத்த வேண்டும் என நோட்டீஸில் குறிப்பிடப்பட்டுள்ளது. நாடாளுமன்ற மக்களவைத் தேர்தல் நெருங்கும் நிலையில் இந்தியா கூட்டணிக் கட்சிகளை முடக்கும் வேலையில் மத்திய அரசு ஈடுபடுவதாக எதிர்க்கட்சிகள் சார்பில் தெரிவிக்கப்பட்டுள்ளது. 

Next Story

“சிறையில் இருந்தபோதும் உள்ளம் கலங்காத கொள்கையாளர்” - முத்தரசன் இரங்கல்

Published on 28/03/2024 | Edited on 28/03/2024
Mutharasan condoles the demise of MP Ganesamoorthy

ஈரோடு நாடாளுமன்றத் தொகுதியில் போட்டியிட்டு எம்.பியாக இருந்த மதிமுகவைச் சேர்ந்த கணேசமூர்த்தி, கடந்த ஞாயிற்றுக்கிழமை பூச்சிக்கொல்லி மருந்து குடித்து தற்கொலைக்கு முயன்றார். இதனைத் தொடர்ந்து மருத்துவமனையில் சிகிச்சை பெற்று வந்த கணேசமூர்த்தி இன்று சிகிச்சை பலனின்றி உயிரிழந்தார். இவரது இழப்புக்கு முதல்வர் ஸ்டாலின் உள்ளிட்ட அரசியல் கட்சிகளின் தலைவர்கள் இரங்கல் தெரிவித்து வருகின்றனர்.

இந்த நிலையில், இந்திய கம்யூனிஸ்ட் கட்சி சார்பில் மாநிலச் செயலாளர் முத்தரசன் வெளியிட்டுள்ள இரங்கல் அறிக்கையில், “மறுமலர்ச்சி திராவிட முன்னேற்றக் கழகத்தின் நிறுவனத் தலைவர்களில் ஒருவரும், ஈரோடு மாவட்ட மூத்த அரசியல் முன்னோடியுமான அ. கணேச மூர்த்தி எம்.பி. (77) இன்று (28.03.2024) அதிகாலை கோவை மருத்துவமனையில் காலமானார் என்று துயரச் செய்தி அதிர்ச்சியளிக்கிறது. ஈரோடு அருகில் உள்ள அவல் பூந்துறை, கவுண்டிச்சிபாளையம் என்ற ஊரில் செல்வாக்கு பெற்ற விவசாயக் குடும்பத்தில் பிறந்தவர். பெருந்துறை அரசு உயர்நிலைப் பள்ளியில் படிப்பை முடித்து சென்னையில் உயர் கல்வி பெற்றவர்.

கல்லூரி கல்வி பயின்ற காலத்தில் தமிழ் மொழி பற்று, தேசிய இனங்கள், தமிழர் தனித்துவ பண்புகள் குறித்த அறிஞர் அண்ணாவின் கருத்துக்களால் ஈர்க்கப்பட்டு தி.மு.கழக மாணவர் இயக்கத்தில் இணைந்து செயல்படத் தொடங்கியவர். தொடர்ந்து திராவிட முன்னேற்றக் கழகத்தின் முக்கிய தளகர்த்தர்களில் ஒருவராக உயர்ந்தார். கடந்த 1977 ஆம் ஆண்டு தமிழ்நாடு சட்டமன்றத் தேர்தலில் மொடக்குறிச்சி தொகுதி தி.மு.கழக வேட்பாளராகத் தேர்தல் களம் இறங்கியவர். முதல் மூன்று முறை தொடர்ந்து தோல்வி அடைந்த போதும் கொள்கையில் நிலைகுலையாமல் பயணித்தவர்.

1977 முதல் 1992 வரையான காலங்களில் திராவிட முன்னேற்றக் கழகம் சந்தித்த நெருக்கடிகளை முன்னின்று எதிர் கொண்டவர். 1980களின் ஆரம்பத்தில் திமுக மாநில சிறப்பு மாநாடு நடத்தி தலைவர் கலைஞரிடம் 33 லட்சத்து 33 ஆயிரத்து 333 ரூபாய் நிதி வழங்கிய பெருமைக்குரியவர். கட்சி உறுப்பினர்கள், ஆதரவாளர்களின் பேராதரவு பெற்று  தி.மு.கழகத்தின் ஈரோடு மாவட்டச் செயலாளர் பொறுப்பை ஏற்று சிறப்பாக செயல்பட்டவர். 1989 மொடக்குறிச்சி தொகுதி சட்டமன்ற உறுப்பினராகத் தேர்வு பெற்றார்.

கட்சியில் ஏற்பட்ட நெருக்கடியைத் தொடர்ந்து வைகோவுடன் இணைந்து மறுமலர்ச்சி தி.மு.கழகம் உருவாக்கியவர்களில் அ. கணேசமூர்த்தி குறிப்பிடத்தக்கவர். பொடா சட்டத்தின் கீழ் 19 மாதம் சிறையில் இருந்தபோதும் உள்ளம் கலங்காத கொள்கையாளர். பழனி மக்களவைத் தொகுதியில் இருந்து இருமுறை நாடாளுமன்ற உறுப்பினராகத் தேர்ந்தெடுக்கப்பட்டவர். தற்போது ஈரோடு தொகுதி நாடாளுமன்ற உறுப்பினராகச் செயல்பட்டு வந்தவர். கட்சியின் உயர் பொறுப்புகளிலும் பணியாற்றியவர். உயர்ந்த பண்புகளின் அடையாளமாக வாழ்ந்து காட்டிய அ. கணேசமூர்த்தியின் மறைவு எளிதில் ஈடு செய்ய முடியாத பேரிழப்பு. பொதுவாழ்வு பணிகளை ஒருங்கிணைக்கும் தலைமை பண்புமிக்க ஒருவரை ஈரோடு மாவட்டம் பறிகொடுத்து விட்டது.

அ. கணேசமூர்த்தியின் வாழ்விணையர் சில வருடங்களுக்கு முன்பு காலமாகிவிட்டார். இவர்களுக்கு கபிலன் என்ற மகனும் தமிழ் பிரியா என்கிற மகளும் பேரக் குழந்தைகளும் இருக்கிறார்கள். அ. கணேசேமூர்த்தியின் மறைவுக்கு இந்தியக் கம்யூனிஸ்டு கட்சியின் தமிழ்நாடு மாநிலக் குழு ஆழ்ந்த இரங்கலைத் தெரிவித்துக் கொள்கிறது. அன்னாரை பிரிந்து வாடும் அவரது குடும்பத்தாருக்கும், மதிமுக தலைவர் வைகோ உள்ளிட்ட நண்பர்களுக்கும் ஆறுதல் தெரிவித்துக் கொள்கிறது” எனக் குறிப்பிடப்பட்டுள்ளது.