வெளிச்சத்திற்கு வந்த 'ஆணவக் கொலை'-வெளியான அதிர்ச்சி வாக்குமூலம்

திருப்பூர் மாவட்டம் பல்லடம் அருகே உள்ள பருவாய் கிராமத்தை சேர்ந்த தண்டபாணி என்பவரின் மகள் வித்யா(22). இவர் கோவையில் உள்ள கல்லூரி ஒன்றில் முதுகலை படிப்பு படித்து வந்துள்ளார். இந்நிலையில் அதே கல்லூரியில் படிக்கும் திருப்பூர் பகுதியை சேர்ந்த வென்மணி என்ற இளைஞரும், வித்யாவும் கடந்த மூன்று ஆண்டுகளாக காதலித்து வந்ததாக கூறப்படுகிறது. அதன் காரணமாக இளைஞர் வெண்மணி, வித்யாவின் வீட்டிற்கு சென்று பெண் கேட்டுள்ளார். ஆனால் இருவரும் வெவ்வேறு சமூகம் என்பாதால் வித்யாவின் பெற்றோர் காதலுக்கு கடும் எதிர்ப்பு தெரிவித்துள்ளனர்.

கடந்த30.3.2025 அன்றுவித்யாவின் பெற்றோர் இருவரும் கோவிலுக்கு சென்றதாக கூறப்படுகிறது. அவர்கள் இருவரும் கோவிலுக்கு சென்று வீட்டிற்கு திரும்பி வந்து பார்த்தபோது வீட்டில் இருந்த பீரோ வித்யா மீது விழுந்து தலையில் பலத்த காயம் ஏற்பட்டு சடலமாக கிடந்ததாகக் கூறப்படுகிறது. ஆனால், அவரது பெற்றோர் இதுகுறித்து பல்லடம் போலீசாருக்கு கூட எந்த தகவலும் தெரிவிக்காமல் அவசர அவசரமாக இறுதி சடங்கு செய்து உடலை அடக்கம் செய்ததாக சொல்லப்படுகிறது.

காதலர் வெண்மணி தனது காதலி வித்யாவின் மரணத்தில் மர்மம் இருப்பதாக காவல் நிலையத்தில் புகார் அளித்துள்ளார். புகாரின் பேரில் வழக்குப்பதிவு செய்த போலீசார் விசாரணையை தொடங்கினர். வித்யாவின் வீட்டிற்கு தடயவியல் நிபுணர்கள் வரவழைக்கப்பட்டு சோதனைகள் நடைபெற்றது. அதேசமயம் நேற்று மாலை வட்டாட்சியர், கோட்டாட்சியர் முன்னிலையில் புதைக்கப்பட்ட வித்யாவின் உடலைத் தோண்டி எடுத்து உடற்கூறாய்வு செய்யப்பட்டது.

உயிரிழந்த மாணவி வித்யாவின் பெற்றோர் மற்றும் அவருடைய சகோதரர் சரவணன் ஆகியோரிடம் போலீசார் விசாரணையை தொடங்கினர். உடற்கூறு ஆய்வில் மாணவியின் தலையில் பலத்த காயம் ஏற்பட்டது தெரிய வந்தது. இதனை வைத்து வித்யாவின் தாய், தந்தை மற்றும் சகோதரர் சரவணன் ஆகியோரிடம் போலீசார் தீவிர விசாரணை மேற்கொண்டதில் மாற்று சமூகத்தை சேர்ந்த நபரை காதலித்ததால் இரும்பு கம்பியால் வித்யாவை தலையில் தாக்கி தான்தான் கொலை செய்ததாக சரவணன் பரபரப்பு வாக்குமூலம் அளித்துள்ளார். இதனால் இந்த சம்பவம் ஆணவக் கொலை என்பது உறுதி செய்யப்பட்டுள்ளது. மேலும் தொடர்ச்சியாக சரவணன் மற்றும் அவருடைய பெற்றோர்களிடம் இந்தகொலை தொடர்பாகதீவிர விசாரணையானது மேற்கொள்ளப்பட்டு வருகிறது.